الوقت مساء في تسعينات الكيزان، قمر أمشير في النافذة يصارع رياح أمشير الباردة التي تزعق في الاودية وفوق هامات النخيل.
مصباح الزيت يبعث الدفء في المكان، ورائحة زيته المحروق تبعث الدفء في ذكريات زمان الإنتفاضة الجميل، قبل أن تذروها رياح أمشير الهوج.
في عينيك عشم باكر...
يرتخي الصوت في الجهاز العتيق بسبب ضعف بطاريات الجهاز. احاول إكمال الاغنية من الذاكرة حتى يلتقط الجهاز أنفاس بطارياته:
ما إنتي العمر كله، والشمس الوشاحا ورود..
سيب الغنا ياخينا وأكتب! انا الفجر في الحواشة! نسهر ونتعب في الزراعة وآخر الموسم نرسل للاخوان نشحت حق العيش! الكيزان نشفوا الدنيا حتى البرد راح! نتعب ساكت في موسم نتيجته معروفة!
يستعد الزين مبكرا لمواجهة فشل الموسم: كنا نكتب رسالة لشقيق الزين في هوردن! استخدمت الاطلس (لم يكن هناك لا جاز ولا سكر ولا قوقل في مطلع تسعينات الكيزان) للبحث عن دولة هوردون، لم نعثر لها على اثر، قلت له بعض الدول غيّرت اسمها بعد الاستقلال مثل زيمبابوي.
اضطررت لعمل تحقيق معه : ماذا يفعل شقيقك هناك؟
شغّال في القصر الملكي!
شغال شنو؟ ملك؟
ملك شنو؟ زمان كان الطيش في المدرسة! أقلّ شوية!
لم اشأ ان اقول له ان بعض (الطيوش) يصبحون رؤساء او ملوك لأن الدنيا حظوظ (وانا حظي جميل) حسب نص الاغنية!
المهم: أمير؟
لأ أقل شوية
وزير؟
لأ أقلّ شوية
مدير القصر؟
قرّبت
غفير؟
غفير شنو يا زول احترم نفسك أنا أخوي قرأ في الجامعة.
والغفير مالو ما زول شغال بعرقه! لا خاين لا كوز (سرّاق)!
أنا اخوي فعلا شغال بعرقه، المحل البيشتغل فيه سخن شوية!
شغال في فرن!
قرّبت
طباخ
بس كتلته!
طيب معناها دي دولة خليجية
لأ هو ما في الخليج، هو حاول في الاول يمشي الخليج لكن الفيزا صعب شوية عشان كدة مشى هوردون!
طيب بيتكلموا ياتو لغة هناك؟ صابر بيتكلم اي لغة تاني غير الانداندي؟
بيتكلم جميع اللغات الاجنبية
زي شنو
اولا العربي!
كويس! وتاني
عدت الى الاطلس مرة اخرى.
ملكية عربية: المغرب
لأ
الاردن!
كتلته!
الليلة شكلنا حنكتل حاجات كتيرة. لكن انت بجواباتك دي يوم حتكتل ليك زول!.
المهم عايز تكتب ليه شنو؟
قول ليه يرسل لي مُسجل، وداير لي تلفزيون ملون ورادي وشوية هدوم وشوية مصاريف حق الجاز والسكّر ودوا الملاريا!
أخوك هو ولا ابوك؟ بعدين الاجهزة دي كلها داير تتخصص إعلام ولا شنو؟
إعلام دة منو؟
إعلام يعني كضب، بعدين ياخي في زول بيكتب لي زول جواب وطوالي لا سلام لا كلام يبدأ يقول ليه رسّل لي وما ترسل لي. انت آخر مرة شفت صابر متين؟
وكت سافر قبل خمسة سنة!
طيب ما مشتاق ليه؟
نوديه وين؟ ما هو قاعد طول عمره هنا لا شغلة لا مشغلة، حايم طوالي من ضل لي ضل، ويحب الحريق، شايل الكوشتينة في جيبه! هسع وكت يادوب اشتغل وعمل ليه قرشين نقول ليه مشتاقين عشان ينط يرجع؟ ما مشكلة انت سلّم عليه لكن ما تقول ليه ولا ينقصنا سوى رؤياكم الغالية زي جوابات عبدالعاطي، نحن ينقصنا حاجات كثيرة غير رؤياه الغالية! الحقيقة رؤياه الغالية اقل حاجة مهمة في الحاجات الناقصة! ثم اوضح:
الكيزان حكموا البلد ونشفوا كل حاجة، لا سكر لا عيش لا دوا.
اكتب ليه تحية حارة لو مرت بفلسطين لحررتها!
لكن فلسطين دة فيه مشاكل!
وماله، صابر دايما داير ليه حاجة تديه دفرة عشان يتحرك، يرسّل الحاجات. صابر ماخد اسمه، ترسل ليه جواب يفتح بعد ستة شهور! لو فيه خبر عزاء الناس تكون نست الميت وكت يرسل جواب العزا، ولو خبر مولود جديد المولود يكون بقى راجل وكت يرسل هو يبارك!
عزيزي صابر، تحية طيبة، نحن بخير ولا ينقصنا سوى عدم رؤياكم الغالية. أعرفك أن الموسم الزراعي غير مبشر بسبب غلاء وإنعدام الديزل، الزراعة عطشت، والعسلة ضربت الفول لأن البرد خفيف السنة دي. ونحن بخير، السكّر معدوم، بأكل (الجوكة) البلح مع الشاي خشمنا وجعنا وسنوننا كلها سوسّت! ولا زم نمشي كمان دكتور الاسنان .. ونحن بخير. حكومة الكيزان عملت الدوا بالقروش، لو ما عندك دوا تمشي الفقرا، والفقرا ذاتهم رفعوا أسعارهم! لو حفرت بير لبيت الأدب يدفعوك ضرائب، عمي سيدأحمد قال: يعني ناكل بالقروش و(نهُر) بالقروش! لكن الحمدلله نحن بخير.. ولا ينقصنا سوى عدم رؤياكم الغالية .. التي نتمناها على الدوام!
للحصول على نسخ بي دي اف من بعض اصداراتي رجاء زيارة صفحتي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد الملك
فيس بوك
تويتر
انستقرام
يوتيوب
بنتيريست