|
|
 عزيــــــــــزة يا خــــــــــــرتوم
|
عزيزة يا خرتوم في خاتر زول
متوك في ريدك البراي مجافي النوم
بهاتي باسمك يوماني يوماتي
موهط في شتات مهموم
مابتملا عينيه دهشة المدن الاتيقة
ولاعيشة الدنيا وبريقها
ولا العمارات الداقة في اخر التجوم
عزيزة يا خرتوم لزول طفت روحه لشوفة وطن
محكر في قليب شقي ومكلوم
ولطلتك اتكرف هواك المكبرت
بدعاش عزة ارد الروح لزول نجع مضلوم
عزيزة يا خرتوم منو البقدر اجافيك واخليك
واتغابي عن سيرتك ماريدك فدر مفسوم
من وعيك اكتوبر طفر
بركات هدر
والشعب بعزة انتصر
ومن جواك ابريل ظهر
ثورة عند اللزوم
عزيزة با خرتوم
بكرة انكسح الضلام
ويطل صبحك التاير تمام
وتب مافينا زول سواي كلام
ومافينا زولا بسوي اللوم
عزيزة ياخرتوم
ماجابت حواء غيرك
وانت جيابة مهيرة جيابة الرجال
وراس غردون مهر ريدك
جابوه بعز النبال
وكان خبر معلوم
عزيزة ياخرتوم
الشفع كبروهناك في جو المنافي
ولجوهم هناك بزبد المرافي
وحجوهم بالخير الصبح مافي
وبالشر الصبح طافي
كروش مشحوطة بمال الربا
ودقون تريانة بالكضب الحجى
هنباتة ساكنين في الغيوم
اسرقوا اللقمة من خشم طفل محروم
باسم الله وكلام الله نهبوا القوم
وماتت فاطنة السمحة في الخرتوم
والشفع حلفو يمين عتق راجعين
شان ترجع الخرتوم طراوة
وحالها السمح يرجع حلاوة
وترجع الناس النقاوة
وتقدل فاطنة في الخرتوم
لا هنباتي لا بعاتي فيها يحوم
وتطل شمسك يا وطن لكل الغبش
تديهم امان في سودان جديد
لامظلوم ولا مكلوم ولا مهضوم
وتبقي عزيزة يا خرتوم
وتبقي عزيزة يا خرتوم
تردي الروح لزول نجع مضلوم
هشـــام هبــاتي/ تكساس
|
|
 
|
|
|
|
فيس بوك
تويتر
انستقرام
يوتيوب
بنتيريست