تلاتين سنة وقاعد هِنا؟ يا بشّة روّح خَلنا أبعِد بعييييييد ويوم الوعيد ... والله ما بتشوف هَنا!
تلاتين سنة عهد الضياع عهد الجِياع زمن الحرب زمن النهب
تلاتين سنة راكب البلد زي الحمار شايل القروش زي البعر سويت دمار خليت سَعَر
تلاتين سنة يا بشّة روّح خَلنا يا بشّة طير أطفش خلاص حكمك ظلم وعهدك نجاس الله يريّح همنا
تلاتين سنة زي صخرة قاعد في السدر وليلنا ما ضوّاو بدر وفيك خلاص شفنا الفَقُر يا بركة ليلة القَدُر تنزل عليك صاقعة الفَجُر
تلاتين سنة من حكم حوش ناس بانقا حاشاك عوارة ونقنقة مش عيب عليك يا بشّة بس أهلك بيحكموا فينا حسَ
تلاتين سنة كافوري تشهد للعيان وڤِلل جِنان وقصرك المشؤوم كمان ونسوانك العشرة الحسان في داعي تبنيك قصر ونحن لا عيش لا دقيق لا بوش لا رقيق في صفوفها واقفين للعصر
تلاتين سنة ونسمة تاجوج خشيمها فرحان مبتهج عيشها للبيت عاد بجي وغازها للباب ما بغِيب وسندوتشات أمواج ما بتسيب وتعرض إنت وتبتهج
تلاتين سنة عهد الدمار عهد الودار اسم بلدنا مليتو عار لا في الشرق لا في الغرب بقينا أهلن للوقار يا حليلو سودان الكُبار ياااا حليلو سودان الكُبار في الموافق ٩/٢٠١٩
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة