* تسقط_ بس! * البشير أعاق و قتل الكثير من السودانيين و دمر الكثير من مواقع أحلامنا.. و لا زال يقتل و الدماء تسيل في طرقات و دروب مدن السودان و قراه.. * من لم يمت بالرصاص، مات بالمرض أو بسوء التغذية.. و ربما بالإبادة الجماعية في الأراضي المحروقة في دارفور و جبال النوبة و منطقة الأنقسنا.. * يسقط_ بس! * كان الطفل عمر حسن البشير على موعد مع الشيطان يوم قذف والدته بحديدة كسرت من ساقها (عضم الشيطان), أو الكعب, عندما كان يافعاً.. فلا عجب أن يعمل في السودانين قتلا و إعاقات و إرهابا بعدما كبر و سرق السلطة و احتكر السلاح.. * يسقط_بس! * تحكي الحاجة/ هدية، والدة البشير، لإحدى الصحف اليومية عن طفولته قائلة:- "... مرة دقيتو دقة شديدة عشان نزل البحر وهو طفل والدنيا كانت دميرة وقلت لى امى يمة ولدى بغرق انا ماشة الحقو وطوالى جبتو وكان عندو "قنقر "معانا وقال لى يمة قنقرى وينو ؟ما اشتغلتا بيهو وشلتا القهوة من امى.. قام مسك يدى وقال لى تانى يمة قنقرى وينو ؟ شلتا القهوة باليد التانية وبرضو ما رديت عليو.. قام مسك يدى التانية والقهوة اتكشحت.. بعد داك دفرتوا جوة الاوضة انا اضرب فيهو وامى تضرب فيهو.. امى كانت ماسكاهو.. قلتا ليها يمة ماتفكيهو، لو اتفكا بيعمل فينا مصيبة .. و فكتو أمى, فعمل قام شال الحديدة ام راسين البكسرو بيها السكر زمان وضربنى فى عضم الشيطان!!" * يسقط_بس! * تلك حكاية روتها السيدة الطيبة والدة البشير في عفوية.. و الحكاية تكشف عن عناد البشير ( قام مسك يدى وقال لى تانى يمة قنقرى وينو ؟ شلتا القهوة باليد التانية وبرضو ما رديت عليو.. قام مسك يدى التانية والقهوة اتكشحت )، كما تكشف عن بذرة الشر التي كانت تنمو في داخله ( شال الحديدة ام راسين البكسرو بيها السكر زمان وضربنى فى عضم الشيطان)!! * يسقط_ بس! * و بذرة الشر صارت شجرة غطت شرورها كل السودان و هي شجرة المؤتمر الوطني التي من تحت ظلها أتانا صوت البشير يحدثنا عن القصاص و قتل الناس بالرصاص لتحقيق الأمن و الأمان! * يسقط_ بس! * لم يكتف البشير بكسر (عضم الشيطان) من ساق السيدة والدته، بل كسر ساقي السودان كسرا يصعب جبره، و أقعده عن التقدم إلى الأمام.. * يسقط-بس! * و لا بدّ من القضاء على نظام البشير و جبر كسر السودان.. و ما أكثر السودانيين ممن يتقنون جبر الكسور، سواء أكانوا مغتربين أو مقيمين! * و نردد أمام البشير ما ظل يردده الشباب أثناء تظاهراتهم المباركة بإذن الله:- تسقط_بس! * الشباب يقولون للبشير أنهم لا يريدون من الدنيا شيئاً على الإطلاق سوى سقوط البشير.. تسقط_بس!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عثمان محمد حسن
فيس بوك
تويتر
انستقرام
يوتيوب
بنتيريست