كنت بتعجَب غاية العجَب صراحة في هذه المفاوضات الماراثونية بين "قحت" والمجلِس العسكري في عِبارة رُفِعت الجلسة للتشاوُر !!!!
وفي ذهني خلفية حقيقية ماثِلة وهي إنو العساكِر ديل بمشوا يتشاوروا مع منو ؟ هذا من جانِب المجلس العسكري طبعاً .. .. فيقيني هو إنه قد جاءكم كُل السودان عدا "عبد الحي يوسف والجزولي " (بالمناسبة الزول دة مشا وين ) " ؟ وربما تلاتة دفارات بتاعة ناس قرطبة !!!! وإدارة حميدتي الأهلية الطردوهُم من صالات معرض الخرطوم الدولي ديلاك ، تاني نسيت مِنوا ؟
غير ضياء بِلال والرزيقي الخبراء الإعلاميين من ذوات الخلفية الأمنية !!!
وهنالك كذلك سُؤآل حصيف تِبرِزهُ جدلية المنطِق الصادق وهو من هُم هؤلاء اعضاء لجنة "الخبراء" والإستِشاريين الجالسين في الطرف الآخر من الطاوِلة المُقابِل للأساتِذة الأجلاء إبتِسام السنهوري ونبيل اديب والجعلي تمثيلاً للمجلس العسكري او عساكِر الحكومة او اياً كان وضعهُم تعريفاً !!
هذه في واقِع الأمر اسئلة مِلحاحة للعقل الفاحِص الحزِق في ظِل خوار اجهزة الإعلام المرئية والمقروءة التي تُسيطِر عليها - وحتي كِتابة اسطري هذه - عناصِر المؤتمر الوطني البائد الذي رفضه ابناء السودان !!
هل هؤلاء المستشارين هم النائب العام ؟ هل هم قانونيين من وزارة العدل وديوان النائب العام ؟ من هم حقيقةً ؟
جيبوا لينا سيرتُن الذاتية ادلِقوها لينا هِنا دة يَتَضِح المغزي لكم احبتي من تساؤلي البرئ هذا !!!
ارادت الحكومة الكندية شِراء عدد خمس عشرة طائرة هِلِكوبتر "اباتشي" إستِطلاعية تبلُغ تكلِفتا مليار ونصف المليار دولار .. ظلَّت لِجان البرلمان الكندي عبر القنوات المرئية والمسموعة "تردح" لأكثر من عام لأراء المع والضِد لهذه الصفقة ..!!!
ظَلَّ المستشار الصحفي للرئيس الأمريكي برتوكولياً حريصاً في كُل سانِحة إستِقبال رئآسي حتي لرئيس "الواغ واغ" من ان يتطرق الرئيس الأمريكي عبر الصورة المرئية والصوت المسموع لمستَجِدات الشأن الأمريكي والعالمي ، حتي عبر زيارات الرئيس الأمريكي الخارجية !!
انا واحِد من الناس اكتر شي كان بزعجني هو ان يذهب تلفزيون السودان للقصر الجمهوري ويجيب ليك صورة البشير واركان حربو او نوابو او المجس القِيادي بدون صوت ، والبشير وهم يبحلِقوا في الكَمِرا زي "سعيد ود الشول" في عِرسو !!
المدنية تعني الشفافية ، زي الرئيس الأمريكي ترمب دة قام آخرتا جابلو تويتر كمان !!!!
مخرج ...
تتعافا القرارات التي تهم الناس ، وتدعي قضايا الرأي او الشأن العام ، اذا خضعت للتشاور والبحث المعرِفي المبذول تحت الأضواء لا خلف الكواليس .. وتخرج متوازِنة مُتفقٌ عليها ، لانها تصتدِم بمتطلبات العلن والشفافية وتنهزم عندها الأهواء والغرض ، وتخجل بؤر الفساد والإفساد نتاج هذا الوضوح والشفافية وتختفي الإختِفاء الخجول ..
الهدف دائماً من التعتيم الإعلامي هو الخوف والحرص لتمرير الرأي المغروض الفاسِد الهَشّ الذي يعلم باحِثوه إنَّ ليس له من سيقان يستقوي بها واقِفاً ليُسوق علانية في شفافية تامة غير منقوصة للعامة ، مثالاً لا حصراً صفقة بيع الجيش السوداني في حرب اليمن والدِفاع المستميت من المجلس العسكري لإبقاء هذه الإتفاقية التي دُبِرت بليل ، الشي الذي فتح البلد كلها للتغول والوِصاية الإستِخباراتية التي كما تعلمون كادت ان تعصِف وتنسِف السودان القطر الواحِد ، نظير دولارات لو زرعنا برسيم وبعناه ليهُم بِجِيب لينا اضعاف ما شالوا حميدتي من السعوديين والإماراتيين ..!! دماءنا تسيل نحنا ويقبضوا المصريين ..!!
قال دِفاع عن الحرمين الشريفين قال .. حرمين في عينك !!
ذهب عبود لإجتماعات إتفاقية مياه النيل ، فأغرق حلفا كولها وزرع بدلا سمك في بُحيرة للمصريين ، كالثورِ الهائج في مستودع الخزف !!
نحنا ما فاهمين اي حاجة ؟ المُحصِلة كَش قَسَم السودان علي إتنين ؟ هسة جالِس الآن اسود الوجه ببلع عشرة ادوية تلاتة مرات في اليوم في كوبر !!! انا ما عارِف الزول ليه يصل مرحلة يبلع عشرة ادوية ابتِداءاً !!!
هسة حميدتي شايفو سافر مصِر دي زاتا زي عبود زمان ، ماعارفو شال ليه كم جمل معاه !!! جا يتكَّلَّم عن سد النهضة !!!؟؟؟؟ اها دة بِتَفهَملو شنو !!
الناس دي قِصتا شنو معانا ؟ دفعولك كم الحلب ديل ؟
ول قالولك بنكلِملَك الأوروبيين يرجعولك الماسورة القفلوها ؟
خواص الحكومة هو في واقِع الأمر دائماً عوام الرعية التي اوكلت لكم هذه الحكومة لتصريف شأنهُم العام إنابة عنهُم نظير اجرٍ معلوم يدعي "ماهية". رغم انفكم !!
علي رئيس الوزراء قراءة هذا المقال المبذول أعلاه !!! فأنت غير مُطالب بالنتائج كرئيس وزراء لانو كان غلبك تجي راجع لينا تقول الشي دة ماقِدرت عليه لي واحِد إتنين تلاتة ..!! نحنا نقرر ما إنتَّ .. دي دولة المؤسسات ومدنية الحكم .. مدنية لاتعني انك ما عسكري .. تعني الشفافية الصدق الوضوح ، تعني صدق المجهود المبذول ووضوحو !!!
نحن نطالبك ان تذهب حيث نريدك ان تذهب نحنُ لا أنتَّ لا هُم !! ولكن إن لم تعرِف اين هو السقف من الحقوق ، فما هي البرامِج إذن ، هذا👆 هو السقف ، مادونو تمشي يجي غيرك ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.عادل الحكيم
فيس بوك
تويتر
انستقرام
يوتيوب
بنتيريست