|
كتب الكاتب الفاتح جبرا المتوفرة بمعرض الدوحة
|
|
 Re: ليتك تركتنا في صفوفنا يا علي عثمان محمد طه (Re: أحمد الملك)
|
الي جميع قطاعات الشعب السوداني الثائر
نقاط مهمة جداًجداً جداً جدا. اعتقد بأنها جديرة بالملاحظة وتحتاج الي تنقيح والبداية السريعة بتنفيذها
أولاً
نحن نعول علي السلمية ..بدأت الاحظ ان الشعب الثائر والجمهور العريض كلما كان اكثر تتظيماً كلما قلت الخسائر في الأرواح و في الإصابات .لأن العدو أيضاً يعول علي الفرقة ليسهل اخماد الثورة
تنظيم الحراك بالتفكير بوسائل سلمية و منظمة له كثير من الفوائد ..فائدة آنية بإسقاط النظام وفوائد كثر بعده عندما نشرع في وضع لبنات الدولة المدنية الديمقراطية الحقة.
طيب يا سادة نحن عندنا سلاح قوي و مافي زول يقدر يحرمنا منه وهو صوتنا العالي ..وكلكم رأيتم حتي من داخل السجون كيف ارتفعت أصواتنا بالحق
الاستاذ المرحوم سامي سالم ( معذرة ان لم يكن الأسم صحيح ) كان يقول لتخلق معارضة شعبية منظمة وفعالة يجب ان يتشارك كل المشاركين في اعمال أو أقول صغيرة و في وقت واااااااااااحد..مثلاً كل بيت الساعة ٩ مساء يطلعوا الناس برة ويولعوا شمعة لمدة ٥ دقائق بس ويرجعوا ..تخيل لو كل بيوت السودان بتعمل كده يومياً و في نفس التوقيت و توزع الصور في وسائل التواصل ؟ شوف ده ح يعمل شنو في معنويات نظام الطاغوت ..طبعا. مافي أمن يقدر يسألك القانون لا يمنعك ان توقد شمعة برة بيتك ..اعتقد كل بيت سوداني عنده القدرة يشتري شمعة والاحياء الفقيرة ممكن ان توزع لها الشموع مجانا من ميزانية الثورة .
برضو الأخ محمد كمال الدين (( ممكن تشوفو الفيديو بتاعه في يوتيوب )) عنده اقتراح جابه من الثورة الإيرانية ضد الشاه ..وهو الشعب كل يوم الساعة ٩ مساءً يصرخ الجميع من داخل بيوتهم و من شرفاتهم بأعلي الصوت تسقط بس تسقط بس تسقط بس و لمدة ٣٠ ثانية وبعدها تزغرد حرائرنا ولمدة ٣٠ ثانية اخري ..يعني الموضوع كله دقيقة واحدة بس تخيل الشعب السوداني كله في المدن وفِي الحضر وفِي القري قام بالعمل ده في نفس التوقيت و في كل يوم (( انا متأكد الطاغية ح يبول في ملابسه)) صدقوني زي الأمور دي مجربة مع ترمب و جابت نتائج فورية ..
طيب :
كلكم شايفين خطاب النظام وتعامله مع الثورة ..تخيلوا يا ثوار يا أعزاء إن عدوكم مجموعة من الضباع (( وهم كذلك لمن يعرفون و تستهويهم سلوك الحيوانات )).اكيد عندهم تكتيكات ..طيب بدأ التكتيك ب الرباطة و الصعاليك و ساقطي الضباع عمر البشير و قوش و علي عثمان و الفاتح عز الدين ..التهديد والقتل و جز الرؤوس ..لم ينفع ؟؟؟ ماذا تفعل الضباع التي تجتمع كل ساعة لتخطط ؟؟؟؟؟
يبدأ صعاليك الصف التاني وهم الإناث لأنهن اكثر نعومة و يظهرن بانهن يخافون علي الشعب وعلي البلد ليبدأوا الخطاب الإعلامي والسياسي علي سبيل المثال لا الحصر ..الضبعة الطاهر التوم و حسن اسماعيل و حامد ممتاز ((طبعا ديل بقولوا للرباطة قتلكم ده واصلوا فيه لكن برضوا ادونا فرصة نطق الحنك و نرسل رسايل التخوين و نضرب الاسافين بالمعاجين )))
هؤلاء السياسيين والاعلاميين الضباع هم أعداء وانا أري انهم اخطر وأخبث من بتاعين جز الرؤوس و لا يمكن ان يخدعوننا (( كلامي ده للشباب العمره صغير )) رجاءً اي كلمة تبث عبر هؤلاء الضباع ديل يجب تحليلها و تمحيصها دائماً ما يكون في يدي قائلها خنجر سام
طيب ماذا علينا ان نفعل : يجب علي نقابة المهنيين و شباب الحراك الانتباه للموضوع ده و محاولة إيجاد الخطاب القوي المعاكس (( يجب ان لا تهمل هذه النقطة المهمة لو سمحتم )))
انا أيضا اقترح ان يكون هناك برنامج كامل ومفصل للاعتصام يوزع بنشرات بإمضاء التجمع ويلتزم به الشعب الثائر كله ..مثلاً
الاعتصام بكرة او الموكب بكرة في ميدان كذا او شارع كذا الساعة كده ((( الجمهور يجب ان يكون في نقطة التجمع علي الأقل ربع أو نص ساعة من الموعد المضروب )) زي الماشي تلاقي من تحب نظيف و ظريف و ضاحك ومتفائل
مثلاً البرنامج يحتوي علي الآتي (((لكل السودان وفي وقت واحد)))
الهتاف يبدأ مثلاً الساعة ٣ شوكة
تسقط بس ..تسقط بس كل لمدة ١٥ دقيقة ..ناخد راحة ٥ دقايق نتونس شوية نشرب موية
الساعة ٣:٣٥ (( كل السودان ))
رص العساكر رص الليلة تسقط بس
راحة تاني
الساعة ٤ كل السودان وفي نفس التوقيت
الهتاف مثلا. يا الطاهر ود التوم كضبك بقي بالكوم
وهكذا وهكذا
تنظيم وشعلة من النشاط
******* في تاني موضوع مهم جداً .سمعنا أن النظام بدأ يستخدم شماسة وبتاعين عصابات ومرتادي سجون عشان يخربوا سلمية المظاهرات وعمليات سلب ونهب وبدأت مظاهره في المسرحية الهندية العبيطة بتاعة الصيدلية. أنا ما عندي أسي أية فكرة كيف نواجه هذه القضية بطريقة محترمة ومدروسة وتشبه ثورتنا المحترمة. أي زول عنده رأي أو فكرة رجاء يشاركنا بيها لاني أعتقد أنها مشكلة يمكنها أن تعبث بحراكنا وبخططه
وعاش السودان حراً و آمناً و ديمقراطياً
| |
 
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: wadalf7al)
|
إلي شعب السودان الثائر
بالرجوع إلي الفكرة التي كتبتها عن تنظيم الشعب والجمهور السادة المحترمين في قيادة الثورة اتفقوا علي نقطتين عمليتين
أولاً: أي حيطة في السودان يجب أن تكتب عليها تسقط بس..أي حيطة ( حيطة القصر الجمهوري برضو إذا في طريقة ). موضوع بسيط بوهية وورق بوستر وشوف دي ح تعمل شنو في النظام.
ثانياً : من يوم الثلاثاء الساعة 8 مساء شووووووكة لحدي 8 و-10 دقائق كل الناس من داخل منازلها كل زول شايل غطاء حلة وملعقة يدق عليها و الكل يهتف تسقط بس تسقط بس لمدة 10 دقائق وكل يوم إلي أن يسقط النظام
ممكن الرجوع لي فيديو علي هباني في يوتيوب يشرح فيه الأمر بالتفصيل
هكذا تصنع الثورات ويتنظم جمهور الثورة ويسهل الحراك وتنهك معنويات العدو .
طعم الانتصار جميل
وعاش السودان حراً و شامخاً
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: wadalf7al)
|
Quote: ثانياً : من يوم الثلاثاء الساعة 8 مساء شووووووكة لحدي 8 و-10 دقائق كل الناس من داخل
منازلها كل زول شايل غطاء حلة وملعقة يدق عليها و الكل يهتف تسقط بس تسقط بس لمدة 10 دقائق وكل يوم إلي
أن يسقط النظام |
ود الفحل او امير بوب
وحاتم ابراهيم
هدفهما واضح
ومكشوف و(معروف)
من الإبداع والإمتاع
الشغالين فيهوووو دا
!!!!!!!!!!!!!!!!!!!!!!!!!!!!!!!!
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: عاطف ابن عمرر)
|
غايتو ما عندي فكرة أمير بوب وحاتم ابراهيم هدفهما شنو. لكن أنا هدفي واضح ومعلن زي كل باقي السودانين الثائرين وهو إسقط النظام. عندك مشكلة في هدفي العميق ده.
شايفك مشغول شديد بتعلقياتي وملاحظاتي التي أبديها؟؟؟؟؟؟؟؟؟؟؟؟؟
ما عندك لي فكرة كيف تكون أجود وأعمق. هههههههة
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: wadalf7al)
|
العمق دا تسأل منو الليبراليين
ناس
ثروت سوار الدهب وكمال عباس
ومرشح توينتي توينتي
الملوووو المنبر زمان ببشريات
الحرية والديموقراطية الموعودة
كما تفعل أنت الآن
مع فارق الهدف والغاية طبعن!!
ههههههههه
غايتوووو كتر من معلقاتك
ولوحاتك وسن كيبورداتك
القادم حااار نااار!!
والله صحي!!
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: wadalf7al)
|
هههههه
سودانيس عالم جميل
يا لزيز
ههههههههههههههه
المقتبس في الحفظ والصون يا بتاع
الثورة القاصرة
هههههههههههههه
بالمناسبة التاء المربوطة
بشوفوها قبل وليس بعد(السرقة)
فما تجمع بين الغباء والسرقة!!
وسودانيس عالم جميل
دي لو بحتا الكرة الأرضية كلها
ما بتلقاني كتبتها
ولا ههههههههه بالتاء المربوطة!!
هههههههههههههه
بالتاء المربوطة!!!
ههههههههههههه
.......
أها
الثورة هادرة ولا قاصرة؟؟
ولا سكتم بكتم
هههههههههههههه
# تسكت ..بس!!
ههههههههههههه
....
الغياب شايفوو طال من المنبر العام!!
بتاعين الضهاري ديل شتر
والله صحي!!
ابو ورطة في انتظارك
وفتح ليك الباب:
اعتذار صغيروني
وتركب معاهم (اللواري)!!
ههههههههههههه
شايفك زمان اعتذرتا لي
الزول السمح
وقبلها اعتذار الصفحة
الغلبك ترقد عليها!!
التالتة (سابتة)
يا هناي الجراي
وشيال الإبريق
وبتاع البطيخ جاهزين
جاهزين لحماية
حاتم إبراهيم!!
ههههههههههه
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: عاطف ابن عمرر)
|
هويا عاطف وإسحق فضل الله ومحمد وقيع الله وأشباهم
خلونا من إسلام وجمهوريين وشيوعيين والكلام ده. قالولك الشافع الشجاع ولد كابتن التاج مات وهو بدافع عن زميلاته عشان كلابكم بتاعة الأمن ما تنهشم. شوف الشهامة. إنت رايكم شنو في ملثمين يضربوا بنات . رجال ملثمين يضربوا في بنات وجوهم سافرة بي عصي في صلباتهم في أفخاذهم في أي حتة تصادف. رايكم في الكلام ده شنو. الاسلام خلو اها انتو رجال زينا ولا عندكم راي أخر ؟؟؟؟ ولد يموت يدافع عن بنات بلده وإنتو عايشين تدافعوا عن البشير وعلي عثمان. سبحان الله
خسئتم يا أشباه الرجال والله انتو رجال ل.و.ا.ي.ط.ه.
| |
|
|
|
|
|
|
|
|
|
Re: ليتك تركتنا في صفوفنا يا علي عثمان محمد طه (Re: اللخو)
|
إلي السيد الاعلامي الطاهر التوم
سمعناك تحاضرنا كل يوم بقناتك S24 عن إكتمال الصورة وعن ضرورة إظهار المشهد كامل وبكل حياد للجمهور. طيب في مشهد مهم جداً ما عارف تغافلت أنت عن اظهاره ولا بقيت ما فاضي ليه أو إحتمال لم تعره إهتماماً كبيراً ولكني اعتبره مهم جداً ويهدد أمن السودان القومي وخاصة وأنت كل يوم في خاتمة برنامجك تقول بكل تأثر اللهم احمي هذا البلد وتقرب تبكي من تأثرك وخوفك علي البلد يا زول يا حنين إنت.هناك رجل جاءك زائر في لقاء معك هذا الرجل هو منتم للحزب الحاكم ( لا أعرف بالضبط ماهو منصبه في الحزب ) لكنه لا يملك أية منصب لا دستوري ولا تنفيذي في الدولة .هدد هذا الرجل الشعب الثائر بكتائب تسمي بكتائب الظل. أمامك و قدم عينك وإنت يا صاحب الدار ويا صاحب إكتمال الصورة لم يفتح عليك الله ولا حتي بكلمة واحدة صمت صمت الحملان تستمع وتهز رأسك وضيفك ينذر ويحذر ويرسل الوعيد. نحن مشاهديك ما زلنا نثق بك وهناك دايماً متسع من الوقت لعمل الواجب الصحيح.
نحن جمهورك الكريم نود منك أن تفتح هذا الملف لأنه يهدد أمن السودان. ملف كامل مصور ومدعوم بمقابلات وفيديهات وتقارير شافية يجاوب علي هذه التساؤلات
ماهي طبيعة هذا الكتائب؟ متي تكونت؟ ومم تتكون؟ من هم الذين علي قيادتها؟ ومن أين لها التمويل؟ وأين هي مراكزها؟ هي هي في الخرطوم أم هي موزعة في المدن الاخري؟ إلى من تتبع؟ ومن يصدر إليها الأوامر؟ كيف تتلقي الاوامر؟ ماهي طبيعة الاسلحة التي تمكلها؟ ومن أين لها المال لتشتري الأسلحة؟ هل من الضرائب التي ندفعها؟ وأين تلقي كوادرها التدريب؟ هل للحزب الشيوعي الصيني أية علاقة بها؟ هل لها أي علاقة بالحزب الشيوعي الروسي؟ ما هي طبيعة لبسها؟ هل أعضاءها ملثمون؟ ما هي اعمارهم؟ هل كلهم رجال ولا معاهم نساء وأطفال؟ هل ينتمون إلي حزب معين؟ هل هم من كل أنحاء السودان أم يمثلون قبيلة أو منطقة محددة بعينها في السودان؟ هل يتلقون رواتب؟ هل هم مفرغون ولا عندهم وظائف عادية ؟ ماهي طبيعة نشاطهم وكيف يقومون به ؟ هل يتحركون في مجموعات أو كافراد؟ هل هي مجوعات سرية؟ هل يعرف أعضائها بعضهم البعض ؟ كيف تستطيع هذه الكتائب تسيير دولاب العمل المدني في حالة العصيان؟ ومن أعطاها هذا الحق ؟ هل هي مع الشعب أم ضده؟ هل هي تساند الحزب الحاكم أو تساند كل الأحزاب السودانية بطريقة عادلة؟ كيف تقدم هذه الكتائب أرواحها؟ ولمن؟ وفي سبيل أي قضية؟ كيف ستقتل المعارضين ؟ هل لا تعتبر تلك الكتائب لليسارين أو للعلمانين ألحق في العيش بيننا كمواطنين سودانيين؟ كيف تصطاد تلك الكتائب المخربين والمندسين؟ هل تحمي تلك الكتائب أفراد بعينهم؟ هل تحمي زوجاتهم أو اقاربهم؟ هل يمكن أن نستدعيها لتحمي متظاهرين سلميين؟ هل يعمل بعضهم في أي نشاط مشبوه كغسيل الأموال أو المتاجرة بالاسلحة أو بالمخدرات؟ هل لديهم نشاط إقليمي ؟ هل لديهم القدرة علي تهديد رؤساء دول أو زعماء سياسيين اجانب؟ هل هم شرطة أم جيش أم أمن؟ هل بينهم اجانب أو مرتزقة؟ هل كلهم أخيار ولا بينهم مساجين ومعتادي إجرام؟ ماذا يتوجب علي المواطنين أن يفعلوا عندما يقابلون أحد من هذه الكتائب ؟ هل نقتله؟ هل يقتلنا؟ هل ناخد معه سيلفي؟ ما تأثير تلك الكتائب علي هذه الضائقة المالية والاقتصادية التي يمر بها البلد؟ هل اشتركت تلك الكتائب في الحروب الأهلية في دارفور أو في جبال النوبة؟ هل لدي البرلمان أي معلومة عن تلك الكتائب؟ هل يمكن للبرلمان أن يستدعي قوادها لسؤالهم؟ هل لوزارة الداخلية أي علم عن تلك الكتائب؟ هل لهذه الكتائب أي نشاط إلكتروني؟ هل تهدد تلك الكتائب البشرية في العالم؟ هل يعملون في تنقيب الذهب؟ هل لهم أي نشاط في تهريبه؟
وهكذا تكتمل الصورة ؟؟؟؟؟؟؟؟ معليش الموضوع يحتاج منك قليل من الشجاعة ولكن الشجاعة هي من شيمة الاعلامي الصادق .ولا ما كده؟؟؟؟ ما تخاف الشعب معاك والمعاه الشعب هو الكسبان
مع كل تقديري يا الطاهر
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
أحمد الملك
فيس بوك
تويتر
انستقرام
يوتيوب
بنتيريست