إنشاء الله خير؟ وماشي القصر ساكت كدة؟ لا مدفع لا دبابة؟
لأ ، انا ما ماشي اقلبها، شفت ليك زول قلب المقلوب؟ أنا ماشي القسم، عملوني وزير!!
يا زول .. وزير حتة واحدة؟ وزير وزير ولا وزير دولة؟ ولا وزير بدون حقيبة؟
حقيبة شنو، دي وزارة ولا أغاني وأغاني، أنا وزير كامل الدسم
وفي ياتو قائمة؟ مؤتمر وطني، آل البيت حوش بانقا صراصر وبالعكس، أولاد البرعي الأوائل؟ ولا كوز قديم ناسينه كنت بتشتم وتقول الناس ديل بعدوا من الدين وقاعد فوق راي، هم أصلا من يومهم بعاد من الدين بس بعدوا منك انت كمان شوية، إتحادي أصلي ولا مضروب؟ أمة ولا اصلاح وتنجيد؟ أحزاب فكة؟ قبضت حقك وشقيت ليك حزب؟ حَمَلة سلاح، حَمَلة سلام؟ حَمَلة الدفتردار الانتقامية، محكمة جنائية.
يا زول دة سؤال ولا قائمة طعام البيقراها الجرسون المستعجل داك في طريق الخرطوم بورسودان؟ لا هذا ولا ذاك، الحقيقة الشغلة دي وقعت لي في الكرتلة!
كيف؟
جاني زول قال لي أدفع مليون كاش، عشان تسحب ورقة، شيك ممنوع
ولا حتى شيك معتمد؟
معتمد وين؟ كله بيطير، المشكلة ما قصة معتمد ولا محافظ، المشكلة تمشي البنك بالشيك يقولوا ليك كاش مافي بنديك مصاريف وارجع لينا بعد كم يوم! وقفت في البلد دي في أي صف لكن عمري ما اتخيلت يجي يوم يكون فيه صف الكاش! لو كان في فكي إتنبأ قبل تلاتين سنة وقال يا اخوانا جاييكم زمن خير ، بدل صفوف العيش والبنزين الكاش حيكون بالصفوف! ، انا كنت حأقول صف الكاش دة معناه الحكومة يا بقت تمام يا حكومة دقست بقت توزع كاش للناس والناس تجي تقيف في الصفوف عشان تقبض!
أها وبعد دفعت المليون كاش حصل شنو؟
قالوا لي اسحب ليك رقم ، لاعبين على وزير مالية، الجماعة ديل أي زول يمشوا ليه عشان يبقى وزير مالية يقوم جاكي، والصراحة ليهم حق، زمان يتشكلوا في وزير مالية لغاية البلد اتسرقت كلها والخزنة عدمت المليم، بعد الخزنة بقت خلا، بقوا يفتشوا في واحد يدرعوها ليه في رقبته!
ومالك مستعجل كدة؟
ماشي أأدي القسم قبل الجماعة ديل يغيروا رايهم!
أمسك المصحف قوي، عادي قالو بعد تخت يدك فوقه، يجو يجروك لي ورا، ويلزو زول تاني!!
البيجرو لي ورا دة كويس، في ناس عينوهم لكن الوزير القديم رفض يسلمهم المكتب والعربات، قال ليهم تجوا تستلموا بعد ما أكمّل العِدةّ!!
وعِدة الوزير المقال كم؟
البكا بيترفع بعد اليوم الأول، بعد داك يقعد الوزير تلاتة شهور في الوزارة بكل مخصصاته، ما يمرق برة الوزارة الا للشديد القوي
شديد قوي زي شنو؟
ويمضي وزير الكرتلة الى القصر، يبدأ عهده المجيد بتعبئة كل ماكينات النقود بأوراق العملة الساخنة، من فم المطبعة الى الحائط ، حتى تمتلئ جدران الوطن بالنقود، وتفيض وتغرَق الشوارع في أوراق العملة الجديدة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد الملك
فيس بوك
تويتر
انستقرام
يوتيوب
بنتيريست