المساله ليست الناس قاصدين فيصل لكن فيصل بحكم مواقفه وكتاباته كان عندنا امل كبير فيه اكثر من اى وزير آخر لكن فيصل بتصرفاته المهزوزه وضعفه خذلنا وخيب املنا شديد كنا نتوقع فيصل اكثر الوزراء ثوريه فوجدناه اضعف الوزراءوابطاهم قرارات ثوريه
ولندع مسالة فصل الكيزان من الخدمه وقد افاد انه لا يستطيعه للحاجز القانونى والقانون يقيده مع انه بروف صغيرون تجاوزت هذه المعضله بشجاعتها وفصلت الكيزان مديرو الجامعات وليس مقدمو البرامج اوالمذيعين وعندما سئلت قالت فصلتهم بالشرعيه الثوريه وماقدروا حتى يشتكوا لانه الملوث عمره مايشتكى ولكن فيصل آثر السلامه ومجرد فصل عيساوى أنهكه
ياخوانا ناس عركى ووردى ومصطفى سيد احمد محظورين من التلفزيون القومى ومازالوا !!!! دا برضه يافيصل فى قوانين بتمنعك ترفع عنهم الحظر ؟! ياخى دا يكون شرف ليك انه أعدت وردى ورفاقه للتلفزيون وديل لما تذاع أناشيدهم وأغانيهم يشرفوا تلفزيون السودان الذى ظل متسخا ٣٠ عاما بنقل رقصات البشير الخليعه وتثنيه وتمدده وتفاهته وسفاهة نافع وعوارات عبد الرحيم محمد حسين والان وبعد الثوره تلفزيونك يافيصل مازلنا نسمع منه غث الحديث احاديث ابوبكر عبد الرازق عن عشق الكنداكات للأصم لوسامته ويهاجم الثوره من تلفزيون الثوره !! ولاحاديث الصافى جعفر بتاع سندس ونحن كارهون !! ولانسمع حميد ولا محجوب شريف يافيصل هل هناك عار اكثر من ذلك لحق بك وبتاريخك ؟! وحميد ومحجوب شريف قادوا الثوره وهم اموات وكان شباب الثوره يردد إشعارهم ويفتح صدره للرصاص !! وعن اى ثوريه تتحدث يافيصل وانت تمنع قامات الفن السودانى من الغناء فى تلفزيون السودان ؟وتمنع شعراء ثوراتنا من الظهور فى تلفزيونك ؟قبل كم يوم استمعت لنشيد لوردى ومن تلفزيون السودان ولكن كان عبر زيدان فوردى ممنوع خسء تلفزيونك يافيصل الذى يحرمنا من امثال وردى وابو عركى الذى ظللنا محرومين منه سنينا عددا الم يكن يستحق هذا الرائع المناضل ابوعركى ان يدخل التلفزيون محمولا على الاعناق وان تستقبله انت فى الباب وتصفق له نيابه عن الشعب السودانى ؟واين مصطفى سيد احمد فى عهدك يافيصل ؟ اين صاحب ذلك الكلام المموسق الجميل وهل مثل مصطفى تحرم منه الشعب السودانى ؟؟!! اشرف لك ان تستقيل يافيصل ولا يكتب ان فى عهدك كان محجوب الشريف ووردى وحميد وعركى ومصطفى سيد احمد محظورين فى تلفزيون السودان وانت مطاطىء الراس وضعفت من ان ترفع عنهم الحظر وذلك عار وطنى سيلصق بك الى ان تموت ويكتب فى تاريخك اذا تبقى لك تاريخ
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد الحسن محمد عثمان
فيس بوك
تويتر
انستقرام
يوتيوب
بنتيريست