في البوست الاول اتكلمت عن السياحه الطبيعيه في الشقيقه السودان ووضحت اني بدأتها بالقياده شمالا من مدينة الخرطوم مرورا بمدينة أم دورمان باتجاه الصابلوجه وده احد الشلالات الواقعه علي نهر النيل وبيبعد في حدود ٢٠٠ كم من العاصمه الخرطوم وبعدها اتجهت شرقا في الدروب الصحراويه والجبليه بسيارتي للوصول لزيارة بعض من المعالم الاثريه النوبيه والفرعونيه بمنطقة البجراويه بالقرب من مدينة شندي. وعلي فكره السودان بها عدد كبير من الاهرامات والمعابد وعدد الاهرامات هناك يفوق عددها في مصر.
زي ما وضحت سابقا السودان تعوم علي كنز من الركائز السياحيه اللي تؤهلها لتكون وجهه سياحيه جديده للمصرين وابناء دول شمال افريقيا والوطن العربي وكمان الاجانب من اوروبا وغيرها
طبيعة عملي كانت بتتيح لي اني اخلص شغلي كل يوم خميس واركب طيارة مصر للطيران اللي بتقلع الساعه ٧:٢٠ مساءا للقاهرة واقضي الويك اند في مصر وسط اسرتي وبعدين اركب طيارة الساعه ١١:٤٥ ليلا يوم السبت اللي بتوصل فجر الاحد للخرطوم وابدا عملي من جديد. في البدايه كنت بعمل كده اسبوعيا وخصوصا ان فترة الطيران اقصر من السفر من القاهره للاسكندريه فكان الموضوع عادي وسهل جدا ولكني تراجعت عن ذلك حتي استكشف البلد واختلط بشعبها واعرف عاداته وتقاليده واصبح "زول" من ابناء هذا البلد الجميل. وبدات اجهز لنفسي برنامج للعطله الاسبوعيه مره مع زملائي السودانيين ومره مع المغتربين الاجانب من بلاد اخري وفعلا استمتعت جدا ومره كلنا مع بعضنا.
النيل يا جماعه هناك حاجه تانيه خالص. الصور اللي منزلها مع البوست ده مش شاطئ بحر. ده شاطئ النيل. متخيلين ان ده نهر النيل (النيل الابيض) برمله ناعمه وشماسي وبننزل نعوم في المياه النقيه كمان كأنها مياه البحر الابيض المتوسط في مرسي مطروح وبالاخص في شاطئ الابيض. رحلات الويك اند كنا بنطلع نخيم ومعانا احتياجاتنا وبنشوي ونبات في الخيام علي شط النيل. مناظر تحفه وتغريد الطيور المختلفه لا يضاهيه اي صوت اخر واسترخاء ما بعده استرخاء و طبعا صيد البط هناك حدث ولاحرج.
كنت متعود اني امارس هوايتي واطلع اصطاد سمك من منطقه اسمها جبل الأولياء من عند السد والطُعم الحي اللي بنصطاد بيه السمك اسمه "سارجيل" اللي هو الدود يعني بس دود ما شاء الله عليه بيرعي في طينه كلها خير. انواع السمك هناك مش كلها بنشوفها في نهر النيل في مصر بس اللي لفت انتباهي اني اصطدت سمك القرموط وبسبب لونه ماعرفتش في الاول هو ايه. سمكة القرموط اللي طلعتلي كان لونها شفاف ياجماعه مش اسود زي اللي في مصر وعرفت بعد كده ان ده بسبب نقاء ونظافة النهر نفسه 🙈😎.
وجهات السياحه في السودان تلبي كل الاحتياجات والاذواق زي سياحة الطبيعه مثل الشلالات والغابات الخضراء ودي في جبل مره و سياحة الاثار ودول موجودين في شمال الخرطوم وفي سياحة السفاري ودي في الجنوب عالحدود مع اثيوبيا وهي منطقه اسمها دندر ودي محميه طبيعيه. واللي ماحدش يعرفه ان محمية الدندر السياحية في السودان هي من أكبر المحميات المفتوحة في إفريقيا ومساحتها عشرتلاف كيلومتر مربع. (متخيلين كبيره اد ايه)! محمية الدندر تمتزج فيها بيئة السافنا الغنية اللي أنتجت العديد من برك المياه واللي بتشكل بيئة مثالية لحياة الحيوانات والطيور إضافة إلى أن التنوع الإحيائي أضاف لها ميزات كبيرة و مقدرة عن مثيلاتها في القارة الإفريقية ككل. اه والله.
بالاضافه لذلك في سياحة الغطس والسنوركلينج وصيد الأسماك في البحر الاحمر وده من مدينة بورتسودان وبتبعد تقريبا ساعه بالطياره من الخرطوم وانا جربت التلات رياضات هنام ومش هاقدر اوصفلكم الطبيعه البحريه البكر هناك عامله ازاي.
احنا كمصريين لما بنحب نصطاد في مصر بنروح منطقة حماطه ودي جنوب مرسي علم تقريبا ب ١٢٠ كم. واللي راح مرسي علم وحماطه هايقدر يحكم علي كلامي لما اقوله ان بورتسودان الحياه البحريه فيها اشد واقوي كمان.
السودان بجد وجهه سياحيه لازم الكل يشتغل عليها واوعدكم اني هاتواصل مع ادمن الجروب لندرس ازاي ممكن نجهز رحله للسودان وصدقوني اللي هايزور السودان هاينبسط جدا سواء من المزارات او من التعامل مع الشعب الجميل الطيب اللي مالوش مثيل.
عايز اديكو نصيحه علشان ماتتحطوش في الموقف السخيف اللي انا وقعت فيه. اول ماوصلت السودان وبحكم انا باعشق الفول السوداني اللي بيتباع في اسوان لقيتهم بيبعوه عالارصفه فتوجهت لسيده بائعه وقلتلها من فضلك عايز بخمسه جنيه سوداني 🙈🙈 زي مابنقول في مصر. انا قلت كده والسيده طاحت فيا بصوت عالي وانا ماكونتش فاهم هي بتقول ايه لحد ما جه احد الزملاء وفهمني انه اسمه فول مش سوداني وقالي باللفظ: ترضي حد يقولك عايز بخمسه جنيه مصري؟ طبعا طلعت كلمة بيعتبروها سب في حقهم وفعلا انا كمصري ماكونتش اعرف. المهم اعتذرت للسيده واصبحت صديقتي واصبحت زبون دائم عندها باشتري (((الفووووووول)))😍😍.
والي لقاء جديد مع السياحه في السودان.
ملحوظه الصور كلها من تصويري ومعلشي هتلاقوني واخد سكرين شوتس من تسجيلات فيديو لان معظم توثيقي لرحلاتي بالسودان كان من خلال تسجيل فيديوهات صوت وصوره.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد حسن حبشي
فيس بوك
تويتر
انستقرام
يوتيوب
بنتيريست