بسم الله و بإسم السودان و بإسم كل من تجرع علقما منذ ٨٩ و حتى الان
لكل الناس المعترضه على الإقالات المتقطعه القاعد تتم وعلي قلتها ،باعتبارها تمكين و اقصاء و انتقام، أحب اطمئنكم انو مافي تمكين و لا شي و لافي اعاده سناريو ولا حاجه ، لانو ببساطه المجرمين ديل لمن جو كانو قله و طردوا الاغلبيه و شردوهم و عملو عمليه احلال بشعه جدا كان نتاجها الانهيار الحاصل الان لانو الاحلال كان بالولاء و ما بالكفاءه و دا معلوم لكل صاحب عقل بميز.
الان الوضع مختلف تماما لانو في ثورة في البلد والاغلبيه الواعيه صاحبه القضيه عايزه تعمل اعاده هيكله و عايزه تعيد الامور لي نصابها؛ الموضوع ما انتقام و لا تمكين بقدر ماهو تصحيح مسار لصالح الوطن الكبير ما لصالح الايدلوجيا الشاذه زي ما تم في التمكين.
ولانو الناس الان محتاجين لي كفاءات و ناس تشتغل بس ما اكتر ، فلازم يحصل البحصل لانو انا في تقديري اصلا مافي كوز كفاءه ، لانو لو لم تسخر الكفاءة لخدمة الوطن والشعب تتحول الي نقمة بدلا من النعمة ، وتصبح المشكله مافي الكراس(شهادات و جامعات) المشكله في الراس (وزي ماقالت حبوبتي القلم ما بزيل بلم). لوكان اصلا هو زول سوي و راشد و بفكر بطريقة طبيعية وانسانية ،ما كان قبل علي نفسو يبق كوز اصلا و حتى لو قلنا خدع ،و بغض النظر عن الخدعه كان مفروض يكون انسحب من اول لفه لقطار الحركه الاسلاميه ، لانو القصه ما شعارات و لا كتب ،القصه تطبيق علي أرض الواقع و ممارسه فلو كنت مقتنع او مخدوع بالكلام و الغايات النبيله و الاحلام فالواقع و التطبيق(الغايه ابدا لا تبرر الوسيله) و الممارسه هم كانو اكبر كف و جردل مويه بارد يفوقك من احلاها حلم (تبا لك يا.... يا وسخ) ، فلو اتفقنا على انو ماسوى و عندو مشكله في الراس فكيييييبف يكووووون كفاءه.
اي كوز في تقديري واجب الكنس و المسح(و الحساب) لانو مضر و خطر ومجرم لسببين :
اولا لانو شارك في السناريو المقيت الحضرناهو كلنا خلال ال٣٠ سنه الفاتت. ثانيا ولو اثبتنا انو ما شارك في شي بشكل مباشر او غير مباشر ،فدا ابدا مابعفيهو من الذنب لانو مستمر في الانتماء أو متعاطف او خلينا نقول ساكت لاسباب تخصو(حرامي في الغالب😊). لو كان الكوز كفاءه جد جد كان نفض يدو من ايام الدمقراطيه ، لمن الجماعة كانو بيدفقوا الكر في البحر ويدفنوا الدقيق في الحفر عشان الناس تسخط وتطلع الشارع، لو كان كفاءه جد جد كان اتخارج لمن..... و لمن..... ولمن.... ماكان انتظر لحدي هسي مكنكش ليهو في فكره و غايه ، كان تمن تحقيقها موت و دمار و خراب و تنكيل و تعذيب وحاجات تانيه حامياني !؟ و ياريت لو كان تحقق منها علي الاقل القليل ،كان لقينا ليهو حبه عذر. بناءا علي هذه الحيثيات فالكيزان :- لازم يطلعوا بره الصوره عشان نقدر نرجع نتوحد ونتآخي و نحب بعض لانهم كانوا دعاة حرب وفرقة. لازم يطلعوا بره الصوره عشان نقدر نتحرك و ننجز اهداف الثوره. لازم يطلعوا بره الصوره عشان يستقل القضاء و نقدر نجيب حق الشهداء والمصابين والمظلومين و حق الناس الصابره سنين. لازم يطلعوا بره الصوره عشان الاجيال الحالية تقدر تعيد بناء وطن منهار تماما وتم تخريبو بالكامل والجايه تقدر تحيا وتعيش و ......و ...و ...وتقول انا سوداني وافتخر ... IMG_3128.PNG
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.عمر حافظ عباس
فيس بوك
تويتر
انستقرام
يوتيوب
بنتيريست