|
|
|
 Re: معتصم الطاهر (Re: محمد عبدالرحمن)
|
لتكن (ضوه) مدخلنا الى عالم معتصم الشعرى الى
حين عودتى غدا ان شاء الله ..
ضــــــــــوة
عـزّ مفتاح الكلام ..
"خاطرك .."
أدينى سر الصراخ ..أبدأ
طويت كل المخاوف فيك
نعيت برد الغنا الرّدة
دندن حر الدفوف مغناك
شهق همس المسام مُدة
.. وإتقاسم الشوق دهشتك
نتقاسم الشوف والنفس الحلو
وننقسم بين اللقيا والصبر الحرام
ألقاك .. أشتاقك ..أبدأ ..
ألفاك ..أشواقك تبدأ ..
وسرق لون الفراش شوفى
صهل فينى البصر والدم
شتت مصابيح ضوة
وقهر الظلام مقدور
لو صقر المخاوف هـَوّ
ونور المنارة يغور
لو قِدْر المراكبى النوّة
وضوّت مصابيح ضوّة
يا ضوة ..
فاتنى الزمان فى الدور
قاودنى الأتر
.. مجبور
مجبور ياضوة إلا أجيك
..أشيل إسمِك
أشق قرمصيص الموت
أشيل وسمك
عنوان الصراخ والصوت
متحيّز فيك الجمال بالعدل
وجايز ليك الظلم والعدل ..
انعدلى وسط الضلوع ضوة
كِملت ليالى العدة
وانعدل فى وقفتك ريقى
ندهت الخطى .. وسميت
سميتك : مَهَل ضيقى
وشفهتَ ..
" ماتضيقى.."
ندهتَ .." ماتضيقى "
صرختَ .. " ما تضيقى
ها .. ضوة .. ما تضيقى .. ماتضيقى ..
جاتك قوافل ريد فى الرمل مغسولة
والطينة مد الأيد وعيونها مبلـولة
أبنوسة مابية تبيت والغابة بتحجّـى
ضوة،فى عتبة البيت والنخل مترجّـى
يا ضوة .. ما تضجى ..
ضجى ..
ضجى ..
ضجى ..
وقرياف الصراخ مربوط
ما تلاوزى تلجّى
ضهبت خطاوى الصوت
اتقدرى وكجى
شرك الصقور للحوت
بلّل مناديلك
سفر البكا الجبدة
والخطوة حين تبدأ
بسقط قناع التوت
فيا حاجبك المرفوع
يا شقك الرقدة
يا ضوة حين نبدأ
يا ضوة حين نبدأ
| |
 
|
|
|
|
|
|
|
|
Re: معتصم الطاهر (Re: Dr. Moiz Bakhiet)
|
سلامات
وعوافي
يامحمد نفد من جيب ذاكرتي الكلام .. فقلت لنفسي (ما الك الا الكواليس) بيد اني انتظر الملعون الكبير لبكتب عنه ما اشتهيه انا ..
وااااااااااخخخخخخخخخخخخخخخ من ضــــــــــوة
Quote: وسرق لون الفراش شوفى
صهل فينى البصر والدم
شتت مصابيح ضوة
وقهر الظلام مقدور
لو صقر المخاوف هـَوّ
ونور المنارة يغور
لو قِدْر المراكبى النوّة
وضوّت مصابيح ضوّة
|
معطونة هذه الكتابة في الجمال .. ملعون الصمت الذي يخبيء كل هذا البهاء ..
تسكرني هذه القصيدة العتيقة ..ضوة .. وليتك يامحمد سمعتها منه .. ومعتصم بخيل يامحمد بخيل للغاية وليته يخرج الينا بروائعه الكثيرة ...
وفوووووووووووووق لحين مجيء الرجل الذي اختزن في عروقه مايكفيه من العسل حتي الشتاء القادم (موسم أوبة النحل لمروجه)
| |
|
|
|
|
|
|
|
|
|
Re: معتصم الطاهر (Re: ودرملية)
|
عزيزى ودرملية
تحياتى ..
وشكرا ليك وانت تسرق الزمن اللعين لتمر من هنا ..
منو القال ليك ماسمعت ضوه ؟
سمعتها ذات مساء فى صالون نادوس وابنوسة الانيق ، المناسبة
كانت احتفاء بمقدم رقية بت وراق ، فى تلك الليلة ياصديقى
تهت بين (صقيع) رقية التى اتت تحمله الينا فى عز الصيف
وبين (ضوة) معتصم ، فى تلك الليلة شاركنا حتى الابنوس القابع
فى اقصي الركن شاركنا النشوة والسكر ...
ليلة ويالها من ليلة ..
خليك قريب ياصديقى وانت بهذا الضرب خبير ...
محبتى ,,,
| |
|
|
|
|
|
|
|
|
|
Re: معتصم الطاهر (Re: Dr. Moiz Bakhiet)
|
العزيز .. برفاهية الحرف .. وعوز الشوق ..
د. مــعــز ..
ليت فينى بعض من رائحة عفار ..
وطعم من ( صفقة ) شجرة لم يراها أحد بعد .. فى غابة منسية ..
| |
|
|
|
|
|
|
|
|
|
Re: معتصم الطاهر (Re: هشام مدنى)
|
العزيز هشام مدنى ..
Quote| Quote: : بعض الأعضاء ( ولا اسميهم كتابا ) لا يستطيعون كتابة أوحتى معرفة معاى عناوين بوستات الأخ عثمان .. |
هذا الاقتباس من تعليق على عضو كتب عن الأخ عثمان محمد صالح ..
وعثمان قامة كاتب وقامة ذكاء ..
هل ترى أننى لم أطرح نفسى لأنى أرى أن بوست شعر ( قصيدة)
سيكون مصيبه ....... مصير كتابات الأخ عثمان ؟
أجيبك : ربما نعم .. لكن الموضوع أكبر ..
كم قصيدة طرحت فى المنتدى
كم قصيدة من التى نشرت تم نقاشها أو حتى التعليق عليها ( رائع .. فنان يا فلان ) ..
والقضية أكبر ..
لماذا لا نسوق مواهبنا ..
أو حتى أعمالنا ؟؟
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
عزيزى محمد عبد الرحمن
( النشوف آخرك) ..
وثلاث قمم معك
معز الانسان ..
وود رملية الذواق
وود مدنى حكيم المنبر ..
واستقصى فى أقاصى النفس نقصها ..
حتى تزدجر من فخر ألمّ بها ..
| |
|
|
|
|
|
|
|
|
|
Re: معتصم الطاهر (Re: معتصم الطاهر)
|
الاعزاء
دكتور معز
ودرملية
هشام
معتصم الطاهر
تحياتى وشاكر هذا المرور الجميل
والله جاييكم ..بس معاي زول سمح زيكم كده فى الماسنجر اسمو خضر
بجيكم وبجى عشان اكمل
محبتى لكم جميعا
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
زول زى مدينة
لأنى البعرفك ،،
وإنك حبيبى ..
زول زى مدينة
فاضلة وحنينة
مشارع خصيبة
وشوارع أمينة
مراقد رحيبة
كحضن الحبيبة
صهيلها وأنينــا
لأنك حبيبى ..
حتماً بعرفك .. (وزولى البعرفك )
من يوم حصّلتك ..
بتنَـقِّع من قِـرَب الهم الحاصل
وتلقط من جسد الأرض الشوك
(بتكيل ) من داخلك زاد .. متواصل
وتستِّف فى (عروق ) الناس الذوق
عرفتك .. حبيبى ..
سليل المعانى ،،
سليم الطباع .. وكُـلّـك مريح
لا .. من يُشرى حرفو ..
ولا .. من يُباع .. عطاك الربيح
منو السمّاك غير اسمى .؟
نبى من نزيف أخضر
وصدّق بلاك مسيح .. ؟
فرس يركض وراهو الريح
( شنو الهمّاك غير همِّى ؟ )
منو السلاّك من لسان الحاجة
تهَمَك بالسكوت والمِيتة
وقبُـل سماك ..( عزم الريح ) .. ؟
منو السواك من حما الصلصال
وقال للقصيدة .. سجود ؟
ركع الحمام على كتفى
( سجع الحمام على كتفو)
أبى الحرف النبيل يركع ..
لو كان هواهم بغيظ النيل
ويفضل قدح الوصال مكفى
منو القال ليك .. حروف شاخت ؟
و هلالك دابو ود يومين
يوم للصفقة والأطفال
يوم تملأ بالغضب كفى
منو القال ليك ..
..جـوانا
تطلع شمس صَـبيانة ،، وتـدفّى
منو القام ليك .. مولانا
تقعد مقام أمات
تزف قداما صِـبيانا
وتدفع ليها متكفى
أنا أول بريدك زول
بزيّن بغناك كتفى
أنا صـف الحبايب فيك
كل العاشقين خلفى
هذا مدخل اخر لتجربة معتصم الشعرية
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
ومدخل جميل اخر
..........
شباك الحنين
وقلتِ ما هـَم’ نصل
ما هم طريق غير الدروب
الفاتحة حضن الريد أهل
ما هم بيوت غير القلوب
الواسعة أكبر من مهل
الهم .. المشاوير البدن
ما يلحق خطاها حد
ويتفاصح صهيل البدن
خيل اللحوق يتلبدن
وفى اللفة يلقاك المحل
وكان حضنك وهيط
واعد البرم المواسم الطيبة
ويقّن ألوان السبيط
دقّ باب الطيبة والوعد البسيط
واستبدل الدم هواك
يا قاعدة بين الجتة والروح وسيط ..
ما جدوى الجداول والمتَـر
تغسل أصابع الموية من وجع الفتر
والبينا خصب واستوائى
وما هم نصل ..
وهمِّـك نصل رمش الحقيقة
وحرّش على طيفِـك
زحم النفس على ضيقـا
واتوهط على كيفِـك
وعلى كيفِـك .. بعيد منِّـك
قريب من شهوة مجاديفك
تطفِّر من سارية نزيف آهة
يجدّف فى وجع الجرح سيفِك
تقريفى ألمى البقردِن قشعريرة القهوة
كلما سطل فنجان السفر كيفِـك
وكيفِـك .. تسلِّمى على ساكت !!
سلِّمى على النفس متصالحة
جازيتك على عيونك
فكى الضايقة يا صالحة
وأبرى من دم العشق والخوف
تنقيك الموية للورتاب
تضاريس الصبية نصاب
زكّت للحبيب قبلة
وما عرفت يمينـا ما فعل الشباب !!
وأنا ياتو باب
فى السكة لابس بسمتك
سمّاك أول المشوار وصول
حرسّك فى الجنة بيبان همتِّـك
شفِّـعك بين العاشقين رسول
شهَّـلك للعتمة حزمة ضوء
واتشهى فيك الصباح
ضحكة تقاسيم الفصول
أطراك فى شباك الحنين
ألقاك فى باب الدخول
منو !! التاتاك .. قواك .. ولم ..
لم علمِك صبر الرضاعة وانفطم
وأنا كنت قايلك ..
والدرّة بكريه ..مشحتفة
وطعم العشق فى الفم
وأنا أسه ناحتك فى جدار القلب من جوه
شباك الحنين للضم
تدخلى فى خلايا الروح
تمرقى من النفس للدم
وأنا ما مرقتك من خلية عشان عسل
ولا شهرتك للخليقة ضرب مثل
فإذا أتحجب الريد فى العروق
أتبرج الشوق فى المقل
سابق الليل الشروق
واتشابه الطين والوحل
ما تِدّسى من شبق المروق
ولا تتوبى من لذع النحل
وسلِّــمى على ســاكــت ..
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
شكرا .. أخى محمد ..
كتبت اولى قصائدى فى مدينة ربك ..
كان اساتذتنا حينها يهتمون بالطالب ..
علميا .. وتربية .. وموهبة ..
اساتذتى .. عيسى بريمة( من أبناء رجل الفولة ) والذى كان يفتت الحصة ببيت شعر
غالبا من ( شعر فضيلى جماع ) ..
أو ببيت شعر هو ..
( سألت ألارض : يا أماه .. هل تحبين البشر
قالت : أبارك فى الناس أهل الطموح ..
ومن يستلذ ركوب الخطر ")
وأهدانى فى مرضى ثلاث كتب ..
واستاذى ابو القاسم ( ابو شنب) ..
والذى يعطينى كتابا كل اسبوع على أن ألخصه
فى كراس خاص ..
وفى الصف السادس ( نعم .. الصف السادس .. كنت أقرأ لكولن ولسون ..)
حتى استاذاللغة الانجليزية ( استاذ حماد) ..
راجع معى كتاباتى ..
هكذا نشأنا فى الوسطى التى تحولت الى سادسة ثم ثانوى عام ..
كانت الجمعية الأدبية تقام كل اثنين مساءا ( بالرتاين) وعصرا
الجمعيات الثقافية ..
هؤلاء من لهم فضل دفعى من معلمى .. أدبيا ..
ولكن هنالك من أثروا تجربتى .. معرفة ونضجا ..
| |
|
|
|
|
|
|
|
|
|
Re: معتصم الطاهر (Re: فتحي البحيري)
|
الباشمهندس والشاعر معتصم لماذا تحرمنا ابداعاتك فقدذهب كل ماهو جميل ولم يتبقى سوى الكلمة نغوص فى دواخلها لتمنحنا الدفئ وتقينا قسوة الايام....
العزيز محمد عبدالرحمن...لك كل التحية اتمنى ان تستنطق كلماتك الرائعة الباشمهندس ولك ودى.. (وين اختفيت)...
قصيدة (عيد) للشاعر الباشمهندس معتصم الطاهر:
ولا اتـمدّت قـصادك ايـد
لا جـوك الـولاد هـاشين
شـايلين فـى عيونهم عيد
دمـوع الـفرقة مـا رقّت
ضلفة بابك الفاتح .. ما دقّت
دق الـقـلِب .. iiعــادى
عـصف الـهموم ..هادى
كـيف لـو طـالت الـمدة
كـيف لو غرزت أوتادى !
مــا فـرق بـين أجـيك
أو فـــوّت مـيـعادى ؟
مــادام الـحبيب مـفقود
وجـيـب الـبـلد مـقدود
لـو غـاض البحر يا نوح
ويــن الـوطن مـوجود؟
لـو رجع البصر .. يعقوب
ويــن الـبصيرة تـقود؟
لا سـويـنا فـعـلة عـاد
ولا نـحن قـوم ثـمود !!
| |
|
|
|
|
|
|
|
|
|
Re: معتصم الطاهر (Re: ابوبكر الامين يوسف)
|
بكرى صاحبى
اخبارك وامورك ..
وكتر خيرك جيت مارى بهنا ..
(اما اذا سألت عن حالنا فعلى اتم صحه وعافيه
ولانفقد سوي عدم رؤياك الغالية ) او كما قيل ..
انا موجود يابكرى بين (الدوام) و(البيت) اقضى ساعاتى ،
لااجد نفسى سوى نهاية الاسبوع ، ويكون جيد لو شفناك
نهاية الاسبوع ..بشوف ودرملية ويكون برنامج نهاية الاسبوع
شاور نفسك و(اقنع ) من الكوشتينه خميس واحد بس... مابتموت ...
محبتى ونلتقى ...
| |
|
|
|
|
|
|
|
|
|
Re: معتصم الطاهر (Re: فتحي البحيري)
|
الاستاذ فتحى البحيرى
خالص تحياتى والف مرحب بيك بعد طول غياب .
نشتاق حروفك وتحليلاتك العميقة وقراءاتك الناضحة
والبركة فى معتصم الجابك لينا ..
شرفت وشاكر مرورك
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
محطة هامة جدا كدت انساها ..
مؤتمر الطلاب المستقلين ...والمعمار ...
لى رؤية تخصنى وحدى حول مؤتمر الطلاب المستقلين
حيث كنت ارى انه (ينجب ) مثقفين ، كل التنظيمات تربى ساسه
والمؤتمر ينجب مثقفين ..فتجربة مؤتمر الطلاب المستقلين
فى الجامعات السودانية عميقة وليست سطحية بأي حال من
الاحوال ، طرحت قضايا كنا نراها (ترف مثقفين ) واليوم
اصبحت واقع وهاجس يؤرق الكل ، انها قراءة المثقف
المدرك (وان اختلفت معه فى طرحها ) لكن اثبت حقوقه فى
انه هو من بادر بطرحها وتبناها حين كانت عند البعض
(ترف) ..
ومعتصم كان من المؤسسين لهذه التجربة على حسب
علمى ، واجزم بأن هذه التجربة والمرحلة كان لها
الاثر ايضا فى اثراء المشروع الشعرى لمعتصم ..
لابد ان يقف معتصم هنا ايضا ، لنعرف مدى تأثير
هذه التجربة ...
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
الاخ محمد
سلام.
المهندس معتصم من اكثر الاشخاص الذين يثرون المنابر والحوارات وان كان مقلا فى نشر ابداعاته الشعرية.
نتمنى ان يكون هذا البوست حافزا له لامتاعنا بالجميل من الابداع.
ولكم الود
والف باقة ورد
| |
|
|
|
|
|
|
|
|
|
Re: معتصم الطاهر (Re: المعتمد)
|
Quote: المهندس معتصم من اكثر الاشخاص الذين يثرون المنابر والحوارات وان كان مقلا فى نشر ابداعاته الشعرية.
نتمنى ان يكون هذا البوست حافزا له لامتاعنا بالجميل من الابداع |
عزيزى المعتمد
تحياتى وشاكر مرورك وتشريفك للبوست ، واهو البوست ده محاولة
لوضع تجربتو تحت (المجهر) ..
شكرا ليك
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
محمد عبدالرحمن
شكرآ يا حبيب وأنت ترصد تجربة معتصم الطاهر الرائعة وتسكعه بين نافذتين للإبداع الرسم الهندسي والرسم بالكلمات
ومعتصم العاشق ملتهب العاطفة ،مشبوب الحس الثوري والوطني يتفانى في حب الجميلة هويدا ، دنياه { منى واحلام } وسلام يعم ربوع الوطن وتمتلي الجروف والضروع وتمتد خضراء الزروع و {سنابل القمح المنور } و عمائر وحفائر
و { محمد} مبعوثه لتطبيب جراح العالمين والعاملين من أجل شمس حرية دائمة الدفء والإشراق تستعصي على الغياب بفعل متآمر موتور أوعسكري طامح أو حالم
مفردة معتصم تماثله ، منفلتة من أسر العادي والمتطامن ، تحفر عميقآ مستدفة وعينا و{ أحاسيسنا الجميلة }
تخريمة:
ملحستك ما حا تشفع ليك لدى الجميلة ، ولن تفلح محاولتك في إستقطاب عواطفعا عبر مح أبيها وأنت تعرف انها به معجبة ومتيمة وبتنافس أمها
لمعتصم
هويدا
منى
احلام
سلام وحب كبير
| |
|
|
|
|
|
|
|
|
|
Re: معتصم الطاهر (Re: أبو ساندرا)
|
تراتيل للباشمهندس الشاعر معتصم الطاهر...
تراتيل
قـبلك نـسيت الـكلام الأبـاجد
عـمـيت الـعـيون الـسـوافر
مـسافر .. ومـا لاقـى جـيهة
رمـيـت الأكـف الـبنفرك ..
صـقـيع الـقـليب الـمـكابر
وحــــردان الـبـشـتـهيها
لـــقـــيـــتـــك ..
حـــدائــق تــبــادر ..
تــرســل غـصـونـها ..
تــسـأل خــدودك أزاهــر
تــنــضّـر وجــيــهـا
ولـقـيت الـحقائق .. تـجاهر
تـنزّل جـلالك فى طور الجمال
وتعلن .. وصول البت الوجيهة ..
و أجــيـهـا .. مـمـغـنـط
وحـلماً يـصحى غطاك ويسترك
.. يـنبش توابل روايعك حضور
.. وحــيــل يـمـنـحـنى
قُـــدرة أتـحـمل شـوفـك
سـتـرة مــا أقـيف قـدامك
حـــاضــر ومــافـيـش
يـاحـضرة شـربـات الـقـوم
.. ســـكــر الــعـشـاق
أنـــا جـيـتـك مـشـتـاق
فـــى حــالـة درويــش
وزهــوك مـالـينى عـنـاق
فـسحنى بـستان العشق الطازج
فـضّـلنى عـلى راحـة بـال
و عـزمنى على دهشة و ذوق ..
لـبس الـفرح الـكان مـريوق
أنــهــار الأرض تــسـاب
وغــيـم الـلـقيا خـصـوبة
وشـــال مـــن شـــوق
ودفقنى عليك .. حيل مجداف ..
وطـــــوف مـــــاروق
وبـقيت الـوليد الـبخالف القبيلة
مــشــنِّــق هـــوايــا
وابــارى الـقـمارى الـبتقطع
تـذاكـر لـحـفل الـخـريف
وتـــرقــص مــعــايـا
أقـــيــف الــنـشـوفـك
وأحـفظ مـلامحك عيون المرايا
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
ثلاث ملامح تميز بها النشاط العام بمدرسة كوستى الثانوية ( القـــوز)
جمعيتى تانهسو .. وسواعد المجتمع والتنافس الدائم بينهما ..
الجبهة الديمقراطية ..
اتحــاد الطلاب ..
1- الجمعيتان بينهما التنافس الثقافى والاجتماعى ..
فلقد اعتادت الجمعيتان تقديم (أربعة) أنشطة كبيرة كل عام
بداية العام .. ونشاط خارجى وختام العام ..ثم رحلة الاجازة ..
ولكن فى دورتنا اختلف الأمر قليلا .. بل قل كثيرا ..
- ان جمعية (تانهسو) لم تعد للطلاب الخارجيين فقط بل اشترك فيها من طلاب الداخلية..
- لأول مرة يشارك عدد من طلاب ( الجبهة الديمقراطية) فى جمعية غير سواعد المجتمع .
- قدمت الجمعية كل الذين نافسوا فى نهائيات الدورة المدرسية وفى كل الأنشطة
- أقامت رحلات أهمها الى جبل مرة ..
- قدمت ليالى شعرية ..
- قدمت مسرحيات كاملة وحفلات عامة ( دعما لمالية الجمعية) فى مسارح خارج لمدرسة ..
وهنا كانت مشاركتى ..
واستفدت من نقد كثرين منهم ( الأخ منهل موسى منهل وحيدر مصطفى وازهرى وآخرين )
وعلى راس هؤلاء استاذنا ومشرف الجمعية ( الحاج طه من أبناء قرية النوبة ) ..
حيث كنا نجتمع اسبوعيا فى حديقة البلدية لنستمع للجميع
وهناك سمعتهم وسمعونى ..
وكانت اولى مراحل التطور فى الكتابة ..
كتبت فيها من القصائد التى لا ازال أذكرها ( آية ) ..
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
لفتة بارعة منك يا محمد وفعلا معتصم الطاهر يستحق اكثر من ذلك ولكن المفاجاة الحقيقية لي هي انو معتصم الطاهر من كوستي وربك ياخي المدينتين ديل بيحتلني بصورة غريبة وعجيبة وماشاء الله الدوحة فيها ناس كتار من كوستي الحبيب الصادق خالد بابكر والاستاذ عبد الله الفنية ود الشوال والصديق الاخ العزيز محمد جاهين بالله لو بتعرفوهو ادونا تلفونو
ح ارجع راجع عشان استمتع بالبوست الجميل جمال اصحابو ومعزتم
| |
|
|
|
|
|
|
|
|
|
Re: معتصم الطاهر (Re: محمد حسن العمدة)
|
ودالعمدة
حبابك ومرحب بيك نورت البوست ...
كوستى مدينة تتنفس الشعر صباحا ومساء وتنام على دندنات القوافى .
تعال ومعك كوستى لنفيم كرنفالا من النشيد ...
محبتى ليك
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
يا نيل انت حى ؟ ولاّ مستعذب كتوفنا..
الدهشة غرّقت انفعالك..؟
لسه ماخدك طول وقوفنا؟
برضو بتصدق عيونك .. والبصيرة انسان شفيف ..
مين طفاك يا نيل
بدّل تراب الصحرا زيف ..!
كيف تفتكر طرحة حبيبتك
وانت بتغالب النزيف ..
بين حافة القيف والمخاوف
ولجة الموج المخيف ..
أفرد ضفايرك ..
..... استفز..
اقدل فى شوارع دمى شيمة .. طوق قنيص
وانا عز الغرق .. ضحك البداهة والرقيص ..
نحن ؟
من طينك النىْ .. با قديم ؟
ةلاّ منّك بالأمــر " كن"
جينا تيراب للنخيل ..
استوينا فى حقل بُـن
اصعد ضفافك يا وسيم
واغسل غناى من مدن
صنت شوارعها من وجيع
ماتت بيوتا من الحزُن
ساورنى فى شكى الخديع
تاورنى فى الناس الجبن ..
وانا ما انتخبتك للربيع
و لااستخرتك فى الغبن
يا نيل انت حى ؟
| |
|
|
|
|
|
|
|
|
|
Re: معتصم الطاهر (Re: Osman M Salih)
|
| Quote: معتصم الطاهر قـلم يستحق التبجيل |
انها شهادة من بارع حاذق خبير ..فيلتيه بها معتصم ..
شكرا استاذنا عثمان على المرور ومحبتى لك
| |
|
|
|
|
|
|
|
|
|
Re: معتصم الطاهر (Re: خالد عويس)
|
عزيزى خالد عويس
تحياتى وشاكر مرورك وان لم يكن كما ارغب نحتاج (تمحيص) اكثر لهذه التجربة
وقراءة اعمق ..
انتظر عودتك مرة اخرى
| |
|
|
|
|
|
|
|
|
|
Re: معتصم الطاهر (Re: Osman M Salih)
|
عمل اخر لمعتصم حتى اعود غدا ان مد الله فى الآجال ..
مسجون .. كان.. الريح
فى الثبات
الضُـل مبرجَـم بالضجر والانقباض
لِبـِسْ زىْ زول عادى البصــر
فرش الشـوف وقاية ... وإلتفــات
فجــأة ..
شقّ جوف الحلْق صهيل
أعلى صوت فى اللون اندلق
إنصرّ فى منبر صلاتو الألق ..
سَــلّـم ....
وفـــات
سلّم ... وفات
فـــــــات من هِـــنا .. رفيق المدعو حنظلة
المهنة ....!!
عفوا .. المهنة : شهــيد ....
عفوا .. فنان ..
الأوصاف :
فتـّر ترديدها الصدى..
المقاطع :
ترجع تباريك ..
والردى ..
نفّ على الورق الشتات..
الشوارع .. قشـّـر شبابيكا الصدأ
ونزلت على الضهـَـر الرفات..
الخيام: دفّن دوابيها الشتا
ومرقن زعاف
فى المخنوق بالضلع الأعرج
مخلوف الكى
والمريوق فى الصبح الأخرق
مسموم الدن
حصنتك
هجتتك
سكنتك رحمى البكرى
يا أصبع واقف فيتو .. قصاد الزمن العكرى
يا حنظل عندى إتوقف
أمسح بهق الخدرى
يازول براحة
عادة ريشة ولون
مشنوق الحبل السرى
فى شراع الزمن البون
بين العين الصفحة
خافى الوجه اللوحة
أمرق من رخوة قشرى
كلِّم جرحك يصرخ
مش لى حد معين
بس اليصرخ
تنسل من نزفه نواصل
ونواصل
تطعن عفن الرمة
والباعو قضيتى مخيم
وقروض من خزنة دمى
يا خـَـزَنة لحم الأطفال
و الدم الخازن طاعون
أمراء و رؤساء و ...
فيران ..
فيران ؟؟
عفوا .. فيران المعمل
نشرِّح أممنا تجارب
نفتح بنك ونضارب
لحدى مزادو ما يرسى
تخرس اجراسو الوسخة
يتشدق بين المؤتمرات
يتريل فتنة وتضليل
يتشتت وجع الحلوات
يتجمع طوبة وتهليل
يتوشح طرحة ومنديل
والوقفة فى وجه البُنبان
كالبصقة فى وجه الأمريكان
وعباية ..
وكرافتة
وكــــــــــاب
و أورشليم تتوعدنا مقاصل ..؟
عجوة وبارودة مزاجى
فرشة ورصاصة رتاجى
بلِّل ريشتك من ريقى
ما بقضى وضوك إبريقى
إتيَـتّم طُـهرى
فتيمم بعد الناجى
منو الغطّس ريشتك
غياهب الجُــب
وحتل الساق!
فصّـل مقاليع الحجر توبو
وكساك وِثاق
وسّـع مراقد الضهر شوفو
وصدر ضاق
ورباطك ضاق
ونهاية ... رصــيـف
يا أقرب رصيف للهتافات الصاقعة
والصوارى المرجفة
لازم تمـــــــوت
ولازم تموت فى الأرصفة
... وين ما بديت
يا مُـتكنى بالريش الرماح
وماكِنى بالعشق الكفى
الدروب الماشة فيك .. واقفة
فى الحد الموسم بالخطاوى
المشرِفة
على البلود الهزّ راياتا وجع الرسم
هزّم قناتا ورجّفا ..
مسبى للمدن المبردة بِالعــيا
وحردانة باب الشِفا
يا حنظـــــــــــلة
يا متكتف بالتكوين من..
إحباط الشارع
صمت الميدان الخايس
يا محتوت من جذعى اليابس
مرتب فوضى ومتجانس
يا مصيـــــــــــــــــــــود من
شط الرفض
وأول ضد
وهامش شكى
ورسما فاضح ضلعى السادس
وش ع الحيط ...!
ولاّ مقدِّم موج البحر للضفات
وش ع الحيط
ولاّ محمِّم وجه الشمس للصافات
يا شاهد عصرك
مشهود إنّك
قربان وعروس
وعزيمة
وين بنفوت إن قبّلْ
وشِنْ بنسَوْ
وتار الناجى معلّق فانوس شارع
مفلِّى وجعنا هزيمة
يا ماشى رجَعَـنا غنيمة
للمسجونين فى سيف امبارح
والملفوظين سيسة ودفيق
والنخلة برِيـــــّـــــة
والخيل الرابطة عشاك تميمة
برِيـــــّـــــة
وانت برِيـــــّـــــة
برِيـــــّـــــة
برِيـــــّـــــة
خطك ..؟؟
ولاّ الجمرة الوامضة ؟
وجهك ...؟؟
و لا الصفحة الرامضة ؟
أواسى غناك بدمعة !!
افتح عين الشمس ؟
افتح عين الشمس وغمضت لاءات الخرطوم !
يا خرطــــــــــــــــــــــــــــــــــــــــــــــــــوم
إنسلّـــى
يا خرطــــــــــــــــــــــــــــــــــــــــــــــــــوم
إنسلّـــى
من أكسوم أو حتى تعـِــــزْ
يا شعبا فوق النجمة ..
فوقك نجمة داؤود بتدلى صديدا وبتــنِـزْ
البارح كنت العـِز
وكان فسطاطك عـِـزْ
ونيلك يتحاجز همِّى
وكانت بغدادك تجلى
من قلبك خوفا يغِـزْ
وجزايرك مليونا يغلى
والناس بتكــفِّـن وبتهـِـزْ
....الناس بتكّــفن وبتهـِـزْ
فيا ..ريشة ناجى تعلِّــى
يا ريشة ناجى تعلِّــى
تعلِّــى
تعلِّــى
حنظلة بيناتى بيرِزْ
حنظلة بيناتى بيرِزْ
حنظلة بيناتى بيرِزْ
| |
|
|
|
|
|
|
|
|
|
Re: معتصم الطاهر (Re: Osman M Salih)
|
النبيل عثمان محمد صالح
بالبصيرة أرى روحا تشف عن ملائكة يحرسون ( عثمانا) بجناحين
تحسده الملائكة ..عليهما ،،
ترتشف من صباحه الحرف
ومن طهوره تتوضأ ( جنيات البحر) لمواسم أعراسهن ..
ويتسابقن على شاطئ رجل من سراط ..
ليتك تكتب عن أعمالى
فأنا فى حوجة لقلم ناقد كقلمك .. وفكر شاحذ كما أنت ..
صديقى الصالح ..
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
الحبيب محمد عبد الرحمن سلامات...
وهذه الاضاءة تعني الكثير بالنسبة لي إذ كنت وما زلت أتلصص علي كل ما يخطه قلم المعتصم وأرجع تملؤني الدهشة ...
لك وله كل التحايا.....
| |
|
|
|
|
|
|
|
|
|
Re: معتصم الطاهر (Re: بشري الطيب)
|
العزيز محمد عبدالرحمن ....كم قضينا ليلة وساهرنا مع هذا الشامخ ليلة الامس بكلمات وعبارات
دسمة..وماذلت حتى هذه اللحظة فى حالة اشباع واصابة بالدهشة حد التخمة ؛؛؛
| |
|
|
|
|
|
|
|
|
|
Re: معتصم الطاهر (Re: بشري الطيب)
|
العزيز .. البشرى الطيبة ..
كتابتى ما شحنته فى صباى و يفاعتى ..
وشكرا لمرورك ..
يعنى لى الكثير خاصة من ( الخيار المعافى) ..
| |
|
|
|
|
|
|
|
|
|
Re: معتصم الطاهر (Re: معتصم الطاهر)
|
G]
بتذكّـر سوا ..
ستّفنا الصهيل فى الخيل
قسمنا الباقى للبنوت
شتّـتنا النجوم فى الليل
دخّـلنا الفرح فى بيوت ..
.. يومن غناها عويل
يومين رفيقها الموت
بتذكّـر سوا ..
رجّـينا الحروف بالحيل
وسقينا مٌـرها الطاغوت
زى الدوا ..
و زى اللّى كان مكتوب
كل الوِلاد راحلين
وباقى البلد أيوب
والأنبياء العاشقين
صرّوا الصبُر فى توب ..
والشفع المارقين
رغم العذاب رايقين
زادهم نضال وحروب
وكل الباقى يقين ..
مارق مسافر وين ؟؟
وطرف اللسان مُلجمْ
تِمْ العِشِـق بالدْين
ما دام القلب أعجمْ
حتى الطمى المسكين
آخر الرحيل بِنجَمْ
.. تمتم غُناىَ حزين :
قال لىْ : عِدادكٌم كَمْ ؟
" شبه النخيل الزين "
مارق مسافر وين ؟؟
" خِلّـى .. التلاقى متين ؟
شان العِـداد ينتم ..
مع عودة الوزين ..
أو موسم التهجين ؟؟ "
| |
|
|
|
|
|
|
|
|
|
Re: معتصم الطاهر (Re: ابوبكر الامين يوسف)
|
حبيبنا بكه
تحياتى ...
البينا مشوار بدا قبل ان نلتقى ، وكان اللقاء لتأكيد مامضى ..
وبعدين تعال هنا الله يسألك انا شفقان ؟
لااخلو من( رواشه) حسب مايقول البعض ، ان كانت ا لشفقة تعنى (الرواشه) فقد
صدقت ..
قبل ماامشى ..حاول ان تضع مساحة لمثل برنامج اليوم ..
مودتى
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
Quote: معتصم الطاهر قـلم يستحق التبجيل
معتصم الطاهر قـلم طاهر
البقاء للكلمة الطاهرة
البقاء لمعتصم الطاهر
|
اتركوا لنا حرف نكتبه...
اتركوا لنا كلمة نسطرها....
اتركوا لنا نكتب عنه شعرا....
اتركوا لنا حديقة من حدائقة نتجول فيها....
اتركوا لنا عثماننا يخاطبنا فى منافينا....
ذاهب للحدائقك استمتع بها.....
| |
|
|
|
|
|
|
|
|
|
Re: معتصم الطاهر (Re: هشام مدنى)
|
الغالى محمد عبدالرحمن الرواشة دى جديدة على لكن شفقتك دى عرفتها لما سألت عن الراتب قبل كل شئ
واسأل باشمهندس معتصم الطاهر وابوساندرا
| |
|
|
|
|
|
|
|
|
|
Re: معتصم الطاهر (Re: ابوبكر الامين يوسف)
|
يابكرى
يبقن على اتنين شفقة ورواشه ..خلاص سحبت اعترافى بالرواشه ..
القصة كلها انهم حاولوا (تسويق ) عريس لايخلو من وسامة ..وفشلوا ..
انت لسه مافهمت القصة ...
| |
|
|
|
|
|
|
|
|
|
Re: معتصم الطاهر (Re: هشام مدنى)
|
Quote: اتركوا لنا حرف نكتبه...
اتركوا لنا كلمة نسطرها....
اتركوا لنا نكتب عنه شعرا....
اتركوا لنا حديقة من حدائقة نتجول فيها....
اتركوا لنا عثماننا يخاطبنا فى منافينا....
ذاهب للحدائقك استمتع بها |
.....
المحترم هشام مدنى
تحياتى ...
تجول ماشاء لك التجوال فان حدائقه مفتوحة للجميع يتفياون ظلالها
وازهاره وثماره لك ايضا ...
شكرا على تشرفك بالمرور
| |
|
|
|
|
|
|
|
|
|
Re: معتصم الطاهر (Re: لقمان حسن همام)
|
محمد عبد الرحمن
شكرا لك كثيرا
لفتح الحزار عن الوالد والشاعر والمهندس
معتصم الطاهر
وانا عرفتة قلم جميلا ومتزن يري وفق خطوط من الود الجميل
واكتشفت اليوم انهة شاعر مخضرم وكبير وصاحب بساط لغوي ممتع وجزاب
شكر لك اخي
ومع ودي وسلامي
| |
|
|
|
|
|
|
|
|
|
Re: معتصم الطاهر (Re: معتصم الطاهر)
|
العزيز محمد ابوالقاسم ..
تحياتى
وشاكر جدا مرورك من هنا ...وفى الحقيقة اعدت رفع البوست مرة
اخرى لانى اطمع فى مزيدا من الحوار حول هذه التجربة التى اراد
بقصد او بدون ان يبتعد بها عن الاضواء ، وهى فرصة لاستخراج
الكثير الذى تحتويه هذه التجربة الناضجة ...
محبتى ..وشكرا ليك يامحمد
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
اخيييرا قرر الاستاذ معتصم الطاهر ان يخوض تجربة النشر ..
ليخرج بهذا الابداع الجميل من الصالونات المغلقة والمنتديات
الى القارىء اينما كان ..حيث اهدأ لى قبل ايام نسخة
تجريبية من ديوانه (شباك الحنين) والذى ستقوم بطباعته ونشره
دار عزة للطباعة والنشر ، وطلب منى ابداء الرأى حول الديوان
قبل نشره ، وهذا من تواضع معتصم .. على كل قضيت ليالى جميلة
وانا استمتع بقراءة الديوان ، وفى كل اعادة للقراءة تزداد المتعة ،
فالخوض فى عوالم معتصم الشعرية الباذخة متعه مابعدها ..
الاهداء جاء جميلا ومعبرا ...
الى من ارضعتنى الشعر ..
وفطمتنى عليه ..
فاطنة بت مصطفى الفكى
والى من وهبتها تعبى
فأهدتنى حنانها ...
الى ..هويدا
والى احلام ، منى
ومحمد عثمان
اهديتهم بعضى ، فصاروا كلى ...
اهديكم بعض من حقكم على ..
اهداء ..
الى كل محرض او ملهمة ..
ومن له فضل حرف على ...معلمى
..ثم اخص ازهرى محمد على وعفيف اسماعيل ..
ابراهيم عبدالله ..وكثيرون أخر يستبقون النبض ..
الى اصدقائى بالمنتديات السودانية
والى كل من يحبونى و احبهم ...
واليك ...
| |
|
|
|
|
|
|
|
|
|
Re: معتصم الطاهر (Re: محمد عبدالرحمن)
|
زكريات جميله تجمعني
بشعراء الحصاحيصا التي حببها اليا
الجميل عفيف اسماعيل
سمعت معتصم الطاهر في تلك الليله البارده بود سلفاب
في ليلة تكريم مصطفى قبل موته وهي الاولى
وفي وداع احد الاصدقاء ببيت ازهري في حي ذلك المصنع التليد
سمعتهم وانا ذلك الصغير عمرا وتجربه يتداولون الشعر( كالحرام)
اسف لهذه الكلمه وللحق تقال في الحصاحيصا كان في جهاز امن اصعب
ما يكون ودكتور شاهد
اما عفيف ذلك الشفيف الذي يحب الوطن اكثر من نفسه جعلوه يهرول نحو المنافي وقيسوا
المسافه ما بين ذلك الحي النائم بجوار الكنال اركويت ومدينة بيرث في استراليا
بيته كان منتدى دائم الشعراء ده داخل وده مارق برغم عيون الشوارع كنت احضر الى الحصاجصيا وانا خائف
ازهري عفيف طلال معتصم وكاتب القصه الجميل عثمان ابو نبته
الحصاحيصا عصيه عليهم برغم غيابهم جميعا
معتصم سيد احمد
| |
|
|
|
|
|
|
| |
محمد عبدالرحمن
Dr. Moiz Bakhiet
ودرملية
معتصم الطاهر
فتحي البحيري
ابوبكر الامين يوسف
المعتمد
أبو ساندرا
Osman M Salih
بشري الطيب
محمد ابو القاسم
معتصم ود الجمام
فيس بوك
تويتر
انستقرام
يوتيوب
بنتيريست