|
|
 قلبك اسود، او السواد كرمز للشر، لماذا؟
|
تفتكروا ليه، واحنا المختوم في شهادات ميلادنا او
تسنينا، ســـــوداني، او ســـــودانية، لازلنا نرمز للشر بالسواد وللخير بالبياض؟
مش حاجة غريبة؟
من ذلك سواد القلب، او سواد النية في مقابل "بياض" القلب و "بياض" النية، كناية عن الخير.
في رآي ممارسة ذي دي مننا احنا السودان او السود بالذات، تنطوي علي دلالات عميقة جدا في دواخل لاوعينا.
بالذات واننا بنمارس هذا الاحتقار لذاتيتنا، من دون ما نرمش، او حتي نلتفت مجرد التفاتة لخطيئة، مش خطأ، ممارسة كهذه!
في اكتر من بوست بل عناوين بوستات، السواد مشار ليه كصنو للشر ورمز لكل ماهو باطل وضار الخ اخر المفردات المعبرة عن كل ماهو سلبي.
اول مرة انتبه بدوري للممارسة دي، كان في فلم مثلي الاعلي، مالكوم اكس، لمان ناس اليجا محمد، بدأو يجندو في مالكوم، بشرح معني Black في القاموس.
حقيقة حينها زهلت لي كمية المترادفات الممعنة في السلبية بل الاحتقار، كمعني لي كلمة سودان او Black، او كيف ابدا ما انتبهت لي وجود واقع ضخم كهذا، في حياتي اليومية.
الغريبة اول يوم عرض فيه فلم مالكوم، كان يوم مهيب فعلا، لايزال منحوت في الذاكرة، لانو كان في خوف ورعب في عيون البيض بالذات، بطريقة ما شفتها قبل كده، الا مرتين.
الملاحظ الان انو الامريكان، في اجهزة الاعلام بالذات، بستعمل مصطلح Dark اكثر من Black متي ما احتاجو يعبروا عن قيمة سلبية.
هذا البوست المقصود بيه، ان يكون بداية لي حملة متواصلة، لتحرير السودان او اللون الاسواد من براثن الشر!
لانو اذا كان الشر اسود، فتلقائيا، كل سودان شرير، الي ان يثبت العكس!
سنواصل، لان هذه الممارسة، تمثل فقط، راس جبل جليد كراهيتنا، لانفسنا، وماترتب علي ذلك من ادعاء لهوية الغير، وما نتج عنه من alienation انتهي بنا لننظر لانفسنا، كقوميتين متنافرتين، متقاتلتين، في جوف وطن واحد "افتراضا".
مالم ننجح في ايجاد اساس جديد للوحدة، فلن يكون هناك سلام او ستقرار، في السودان، الي ابد الابدين!
المطلوب من المتداخلين، المساهمة في ايجاد تعابير بديلة، بدلا عن التعابير الحالية، المسيئة علي نحو مخجل لكل ماهو سوداني او اسود.
من ذلك:
*بدل "قلبك اسود" نقول قلبك او دواخلك ما نظيفة.
*بدل "قلبك ابيض" نقول، انت علي نياتك مثلا.
وهكذا.
|
|
 
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
الأخ الكريم بشاشة
قلبك زي الورد و ما عندك مشكلة
كدة كيف
| Quote: مالم ننجح في ايجاد اساس جديد للوحدة، فلن يكون هناك سلام او ستقرار، في السودان، الي ابد الابدين! |
ما لم ننجح في إيجاد موطيء قدم بين الساسة, الذين يحسمون هويات إنتمائنا بقرار لم يسبقه بحث فلن يكون هناك سودان من أصلو...يعني مثلآ يا بشاشة كلامك دة عديل و داير وقفة, لكن أنت و أنا لا نملك غير رأينا و مصطفى إسماعيل يحسم {الأمر} بإجتماع في كارثة الدول العربية متحدثآ باسمنا عربآ نحن حملناها و نوبة...نحتاج أن نـكــون و أن نملك ما هو أهم من جمع التوقيعات و الإقتراحات نحتاج أن
نـ تـ جـ ـ مـــــــــــ ع.
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
العزيزة سارة يامراحب
قلتي عم بشاشا؟
الله يجازي الكان السبب!!!!!!!!!!!!!!!
انتي عارفة، ده كلو من تحت راس دومة، البدت الموضة دي!
حتي ناس عجب الفيا، شابكين ليك استاذ شوقي بدري، ياعم!
انا من دربي ده ماشي انكت البوست بتاع الصورة، انتهي من المسابقة، واعلق الصورة، قبل اشاعة "عم بشاشا" دي ماتنتشر.
بالله سلمي لي علي عاصم.
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
الطيب بشير يا مراحب
الطفل المعجزة او وزير خارجية النظام، يبدوا لي من ارزل كوادر الرساليين، حسب ما روي عنه الاخ المحسي.
هذا المنحط قالوا ساعي لتوطين المصريين في اقصي الشمال، "لتحسين النسل" او كلام من هذا القبيل.
اتخيل انسان بمثل هذه الكراهية لنفسه ولجنسيته، ولشعبه، يكون واجهته للعالم!
يالسخرية الاقدار!
تمسحو بالمصريين، يدل علي هذا!
نمشي او نجي، العيب فينا، او شذاذ الافاق من امثال الكوز اعلاه، ما مقطوعين من شجرة.
كيف كنتم، يولا عليكم!
| |
|
|
|
|
|
|
|
|
 Re: قلبك اسود، او السواد كرمز للشر، لماذا؟ (Re: Bashasha)
|
سلامات يا بشاشا
اولا اوعك تعلق الصورة خليها مستورة
بعدين موضوع قلبك اسود
واقتران السواد بالشر
دا مفهوم عربي لا يخلو من استعلاء
ومنه التشاؤم بالغراب
وقرشك الأبيض ليومك الأسود
والصورة سوداء كمستقبل السودان
اما حكاية الطفل المعجزة دي بالغت فيها
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: ahmed haneen)
|
الأخ بشاشة .. أشكرك على هذا البوست المسلي
| Quote: بدل "قلبك اسود" نقول قلبك او دواخلك ما نظيفة. |
وبدل السوق الأسود نقول قلب السوق أو دواخل السوق ما نظيفة
والله يا بشاشة مشوارك طويل خلاص. خليك مع الخواجات ديل .. اللي قلت انهم بقوا يقولوا Dark بدل أسود .. وخليك ناسي إنهم .. برضو بيقولوا dark-skinned or dark-skin للزول الأقل سواداً .. واحتفي يا عزيزي بأنهم بقوا يقولوا Dark بدل Black .. ولله في خلقه شؤون.
بشاشة .. انتي ظريف بالجد.
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
كوستاوي منور، يامراحب.
ابو حميد
ارتباط البياض بالخير، والشر بالسواد، ماوقف علي العرب، وانما ظاهرة كونية، تذكرنا من جديد بي واقع وضعيتنا كسود، في مؤخرة البشرية.
الدارس للتاريخ لابد يتعجب من حكمة كيف الدنيا فعلا دوارة او الزمن دولاب! او كيف ان دامت لغيرك لما الت اليك!
يوم من الايام، في تاريخ البشرية، حدث عكس ما نعايش اليوم، تماما!
حيث الانسان الابيض، ذو الشعر الاشقر، والعيون الزرقاء، كان بالضبط من حيث الوضعية ذي "الزنجي" او النقرو بتاع ناس دكتور عبدالله علي ابراهيم وقوبيني منظر النازية!!!
كلام اقرب للخيال، لكنو حصل!
من شدة ما اللون الابيض كان مكروه، مر علي البشرية حين من الدهر، كان الانسان الابيض البشرة بيقتل في مصر القديمة، محل ما وجد، باعتباره ينبئ عن شؤم!
اي والله تماما كما سواد الغراب اليوم!
ده كلو حنفصلوا انشاء الله، لو الوقت سمح، عشان ما نعرف، احنا جايين من وين!
وبما اننا طاشين، عشان ما نعرف نحن وين، لازم نعرف احنا اصلا جايين من وين؟
شنتير يامراحب
شايفك بتضحك علي مخ بشاشا، الاكلو الخواجات!
جميل جدا، انشاء الله تكون قدر الضحك علي بشاشا!
ياعزيزي في اي مسابقة للضحك، بشاشا دائما بفوز بالضحكة الاخيرة!
عييييييييييييييييييييييييييييييييييييييييييييييك!!
البعرفوا عنك، انك ما بتتحمل نار الصراع الفكري، ام لهيب جذابة، ذي ما غني اسحق كرم الله!
شايفك لمان وقفت "لر" او كبست حتي للخلق الاخت رودا!
طبعا ما بتعل كده مع "بت عرب حرة"، ولاشنو يافارس البضانة!
فقط امسك الخشب!
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
شنتير مرحبتين.
قلت لي ما بتاع صراعات؟
غريبة وانت في قلب ممارسة ذي دي، تكون ماعارف انك بتصارع؟
يعني لمان قلت للاخت رودا:
.... الخلقك،
ده كان شنو؟
هل ده نقاش او مجادلة او كده، بي نفس طريقة "نقاشك" مع الخواض مثلا؟
غايتو بالنسبة لي شخصيا، المسألة عندي بتتدرج من نقاش، مرورا بي حوار، وانتهاء بي صراع عديل كده، لايختلف عن دواس الدم الفي الجبال، جوبا، والجنينة!
التدرج او الاختلاف اساسو، مدي الارضية المشتركة!
الصراع الفكري، كبديل للدواس البدني، بجي في الارضية صفر! عييييييييك!
حسب الزمان، المكان، الموضوع، والطرف الاخر!
كمثال معركتي مع دكتور عبدالله، ولا السنجك، ولا الساحر، ولا كوز ابن كوز، مثلا، فهو دواس فكري لا شك!
لكن كلامي مع طناش، ولا مريود، ولابكري الجاك، ولا رودا، وكل رواد التفكير الجديد، بهذا المنبر "الدقة قديمة"، فهو نقاش او حوار، او Brain storming مثلا!
فمافي معني ياعزيزي لي ايحاءك، من طرف خفي، باني زول صراع او شكل، وانت لانك راقي شديد، فبتاع "النقاش أو المجادلة أو التفاكر .. أو المداعبة أو التباحث"
شايف بشاشا بضحك كثيرا لانو بضحك اخير، كيف؟
لسة موضوعنا الفوق ما عرجنا عليه، رغم انك جاري واطي سلفا!
هاهاهاهاها!
خليك مع الزمن، ذي ما قال رمضان ذايد!
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
اتمنى إنك تضحك يا بشاشة .. أبداً ما بيضيرني إنك تضحك ملء شدقيك.
شنو الجاب أسامة الخواض هنا؟ وشنو الجاب روضة برضو؟. قلت لي دواس فكري؟ أها أنا ما بتاع دواس فكري .. أبداً. انت بتاع دواس فكري؟ أها دوس يا حبيب .. وربنا يضحكك في كل دوسة.
والعفو
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
الأخ بشاشا
لو وقفت خلافاتنا على اللغة والمسميات لكان من الهيّن علينا حلها ولكن الخلاف راسخ في الطرفين بكل ماتعني الكلمة والشئ البغيض أن عنصرية اللون هذه متواجدة بصفة غالبة في الجميع حتى وأن تجملت الكلمات والحروف علينا أن نبدأ من قبل الصفر حتى نزيح تراكمات السنوات الماضية
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: ali othman)
|
الأخ بشاشة .. أنا نعست ولازم أنوم. لكن داير أؤكد ليك اني بتفق معاك في العنصرية المضمرة في وصف الاشاء السئة بالسواد .. مع أن السواد جميل .. كلون ضمن الألوان.
أنت أيضاً ترى أن اللون الاسود يجب ان لا يربطه الناس بالأشياء السيئة .. وأنا أرى ذلك ايضا. وقد تجاوزت هذه المرحلة منذ زمن بعيد ولم أعد حبيس القشور.
اخيراً اتمنى لقلبك ولمستقبلك ولنفسك أن يكونوا أسود من فحم الدمازين أو الاسفلت. وأن لا ترى غير السواد الحالك في دنياك.
بشاشة أنا اختبر مدى تقبلك لهذا اللون بما كتبت. البيان بالعمل عندي هو الفيصل. أتمنى أن تتقبل دعائي أعلاه .. وأن تعلم أني لا اكن لك غير الاحترام .. ما دمت تبادلني ذلك الاحترام.
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Bashasha)
|
الاخ بشاشه
كيف الحال والاحوال.
انا اكاد اجزم ليك عنصريه اللون صعب تغيرها لا في السودان ولا في العالم قاطبه بنشر افكار عازبه اي افكار مجرده ليست مصحوبه بتربيه ضمير كوازع مؤنب انساني بحت, فحب الانسانيه لجوهرها الفريد وليس لمظاهرها وقشورها المتمثله في اللون و... وذلك لسبب بسيط جدا لانها اي العنصريه كامنه في الاعماق ومعشعشه هنالك ( احب السود, البيض او اكرهم او استغل اللون لأمور تتعلق بالخير او الشر لا احد يستطيع تغيري او دحري الا شخصي والذي خلقني).
وعولجت من قبل فطاحله كثر شهد لهم تاريخ الانسانيه بالاعمال الصادقه والخالصه لطرق باب العنصريه لكي يتسني لهم ايجاد حلول ناجعه لها. هؤلاء الفطاحله هم في شكل علماء سايكولجي وعلماء متخصصون في مجال حقوق الانسان وفلاسفه وعلماء لاهوت وانبياء ورسل والقائمه تطول, فوصلوها الي نقطه ثم كمنت قنابل موقوته في شكل بريجدس مكمنها سويداء القلوب تظهر عند اللزوم الا من رحم ربي. بمعني اخر هذا شيئ نسبي يعتمد علي زوق الفرد او الجماعه ويعتمد علي الملابسات الظرفيه التي تلابس الوقت الحاضر لتلك الملابسات نفسها.
فيمكن ان نتغير ونرمي بالعنصريه بعيدا اذا اخذنا بمكارم الاخلاق بمعانيها وضغطنا علي تربيه القلوب في الأتجاه الصحيح, ولكي يكتمل هذا الاساس يحتاج لرجال والرجال قلائل!! في هذا الزمن. وعليه انا متأكد من ان هذا البوست لم يزل في طوره البدائي اي لن تكتمل مادته بعد علي حسب قولك سابقا فنحن في انتظار المزيدمنه لكي نتعلم منه كما نأمل ان لانكون صبقنا الحوادث. وشكرا لك عزيزي.
ملحوظه:-
الاخ بشاشه انا كنت اشبهتك لشخص عزيز علي لا افضله عليك من حيث ظلال كتاباتك المتمثله في اسلوبك لمعالجه القضايا فانت صوره كربون من ذالك الصديق.ولم يزل يراودني ذلك الشك.فأن لم تكن هو فانت توئمه.
لك ودي.
| |
|
|
|
|
|
|
|
|
|
Re: قلبك اسود، او السواد كرمز للشر، لماذا؟ (Re: Mohamed Adam)
|
الاخ بشاشة
اذوب طربا فكريا لا حدود له وانا اقرا لك , وللامانة ما يجعلنى معجبا بكتاباتك هو محاولاتها الجادة تاسيس نفق معرفى جديد ينطلق من المركزية الافريقية كاساس له, و منذ سؤالى البريء الذى وجهته للاخ تناش رد الله غربته فى احدي حواراتنا عن منطلقات المركزية الافريقية ومنذ ذلك الوقت اري فى كتابتكما بعدا معرفيا جديدا بل اكاد ان اجزم انه غير مطروق فى الدراسات التاريخية والانسانية عموما.
اعتقد اننا فى حوجة الى تقديم تعريف شامل باسس ومنطلقات المركزية الافريقية و مناهجها العلمية فى التعامل مع القضايا الشائكة التى نحن بسببها نحترب و نقتل بعضنا البعض, و من خلال منهج بحث المركزية الافريقية اعنقد انه سياتى اليوم الذى سيحضحك كل المحتربون ضحك من نوع التراجكوميدي على الجهل المذري الذى دفع بعض المتوهمين منا نقاء عنصرهم فما برحوا ان حملو السيوف و الاسلحة لقتل من لم يرق لهم لون بشرته ولون عينيه, فواصل يا صديقى وارجو ان نري شيئا للاستاذ تناش مساهمات فى هذا الشان, اعلم ان الوقت هو العن من ابليس فى زمن الاستبعاد العولماتى, فمصيبتنا اننا اذا تحررنا من الاستلاب و من الاستعلاء فسنظل عبيدا للوقت بلا محالة.
مسالة اللبس التاريخى الذى طال اللون الاسود فى مستويات اخري متعلمقة بالمعايير الجمالية و مستويات ارتباطه بالخير والشر , اري ان العالم اجمع وخصوصا الجزء الجنوبى من الكرة الارضية هو يعانى من حالة استلاب اري انها مبررة فى سياق سيرورة التاريخ ولكنى لا اري لها مبررا فى عصر انفتاح الذهن على انجازات البشرية و امكانية تبادل خبراتها, فلا شك عندي ان سيادة حضارة الاسنان الابيض بعد ان انهيار حضارة السود الكوشية فى الجزء الجنوبى من الكرة الارضية اصبح الانسان الابيض هو الاقطاعى وهو المالك وهو الماستر و هو اللورد و اصبح الانسان الاسود هو من يساق من رباط فى انفه مقيدا كعبديعمل فى مزارع التبغ و فى تشحيم سفن السادة الكشاف الجغرافيين, بل و يعمل فى الاعمال المنزلية بعد ان يتم اخصاءهم ختى لا يؤثروا على نقاء اللون الابيض فى حالة اختلاطهم بالبيض, بل حتى ان المولودين من اباء بيض وامهات سود لم يجدوا اي درجة فى سلم التراتبية اللونية بل و جدوا ان مكانهم الطبيعى هو الانتماء الى السود. هذه هى الخلفية حسب فهمى التى انمتجت دلالات سالبة عن اللون الاسود فاصبح هنالك مفاهيم تؤكد على ارتباط اللون الاسود بالشر و بالسوء
ولك اقول مثل
Black list
Black dreams
Black feelings
اما فى اللغة العربية فقط تفضلت انت بايراد نماذج يظهر درجة الاستلاب الهويوي فقائل هذه الكلمات لا يدري انه هو من يساء اليه, حتى وان كان يعتقد انه عربى فهو بالمعايير الانترناشيونال ايذا اسود بلا اي مواربة. فى الرابط ادناه
ماهية المعايير الجمالية ( علاقته بالهوية و الاستلاب ) - خصوصا للنساء-
ادير احوار عن علاقة المعايير الجمالية بالالوان و تعرضنا فيه الى علاقة اللون بالخير والشر , كل يوم يتاكد لى انه حوار لم يكتمل واعتقد اننا فى حوجة الى فتح نافذة جديدة لاكماله. اتمنى ان نباصر طريقة لمواصلته
و ليبقى حوارا يستجلى بعض المسكوت عنه فى ثقفاتنا, قبل ان امضى دعنى احكى لك نكتة حقيقية حدثت للكوماندر بيور اجاك, للذين لا يعرفون بيور اجاك فهو من القادة الميدانيين فى الجيش الشعبى,
فحدثنى الرجل قائلا انه اتصل بالتلفون الخاص للفريق البشير بناء على طلب من الدكتور قرنق ليهنئه بعيد الاضحى اثر توقف مفاوضات السلام فى نيفاشا, فعندما رد عمر البشير على المكالمة فاذا بكوماندر يقول له معاك شيخ بيور اسود, والمعروف ان بيور فى لغة الدينكا تعنى الابيض . فليس فى كل الاحيان حينما نتحدث عن سوادنا نكون مستلبين او نتحدث بشيء من الخجل بل انى لا اري مبرر على الاطلاق يدفع اي انسان اسود الى التنكر و الخجل من لونه فهو لون مميز له ابعاده الجمالية الخاصة التى افضل السبل عندي لا تحاكم بمعايير الجمال الخاصة باللون الابيض.
بكري الجاك
| |
|
|
|
|
|
|
| |
Bashasha
الطيب بشير
Kostawi
ahmed haneen
Shinteer
Mohamed Adam
Bakry Eljack
فيس بوك
تويتر
انستقرام
يوتيوب
بنتيريست