|
|
 فـــــأر.........و.........شـــــوال بصـــــل
|
يا زول اسمع..... انت قلبك دا داير محافظة.... تحافظ عليهو ما بتجيك عوجة...... احافظ عليهو كيفن؟ما تتعب ما تزعل ما تنفعل ما تفرح......... اذكرت كلام الدكتور دا وانا راقد في الواطة ومكوع..... وعيني وقعت علي جحر فار..... مرق منو فأر....ووقف وشرف اضنيهو وقعد يعاين لي... قدر ما انا حدرتو وصريت ليهو ابا ينزل عينو مني....دخل الجحر وجا تاني المرة.. دي معاهو رفاقة.... اتنين... واترصو قدامي وقعدو يعاينو....بيني وبينكم انا خفت زحيت عيني بعيد منهم.... زمان قالو لي الجن ممكن.... يكون كلب.... كديسة..غنماية... حمار....... لكن اصلو سيرة الفار دي ما جابوها....لكن جن الالفية التالتة دي ممكن يكون غير رايو..... ممكن يكون كمبيوتر ممكن يكون عربية ممكن يكون جوال.....وممكن يطير فررررررر ويركب في اقرب قمر صناعي ويبقى محطة فضائية....ويقعد يرسل في كلام الطير في االباقير.....والله ممكن يتقلب الفضائية السودانية.... لانو بصراحة انا شاكي في جلاليب وشالات المذعين ديل...لانه واضح انهن شالات جن وجلاليب جن..واليوم كلو يبقى اسماء في حياتنا....ويقعد عمر الجزلي يغني ويبشر ويصفر مع الضيف.ويستضيف لنا الصعوط لانو اسم في حياتنا برضوويعتبر علم من اعلام السودان..... وله تاثير في مسيرة السودان الحضارية... والله يستضيف لنا..... ام فتفت....و.. وووووب علي..... واخواتها... سجمي... و...كر علي... و...الله لي.....والله يستضيف لنا الاخ بالغت....والله الحاجة مبالغة....ودي وغيرها اسماء في حياتنا لها تاثير كبير....
المهم ارجع للفار....لي زمن وانا اهرج واكورك فوق المرا...... لانها كل يومين تقول لي البصل كمل... والغريبة انا بجيبو بالكيس بالشوال يعني.....ومرة جمعت الشفع...... واديتهم محاضرة طويلة عريضة عن مضار الادمان.... وفي النهاية طلبت منهم يورونو منو فيهم مدمن بتاع بصل.....وكنت خايف وايدي فوق قلبي تطلع المدمنة واحدة من البنات..... لانها حتبور مافيها اتنين تلاتة.....انا بتكلم مع الشفع وكل مرة اعاين للمرا....وبيني وبين نفسي اقول ...والله خايف تكون المدمنة البصل هي.......اعاين للفار اب عين قوية دا...واحسست بالندم.... لما فعلت بافراد اسرتي الابرياء....قلت لو..... انت عارف ...كنت حتكون سبب في دمار اسرة سعيدة... شوال البصل ياخد معاها الشهر والشهرين....لكن الغريبة عيونك بيض وما فيهن نقطة دمعة.... وبت الشيخ ان قطعت بصلة واحدة.... الدموع اليوم كلو يجرن؟.....الغريبة اول ما نشاكل انا وهي تجري تقطع البصل........على حد قولها...
|
|
 
|
|
|
|
|
|
|
|
Re: فـــــأر.........و.........شـــــوال بصـــــل (Re: سجيمان)
|
سجيمان
يا رائع
وحات المكاشفي الحلفت بيهو المطلقه
شيري كان سمعتك جبت طاري ام فتفت
بس خليها في حنانك
بعدين ضحكتني في كان طلع مدمن البصل بت
ما تخاف ...عندي ود خالتي مدمن
ليمون....حيعملوا سلطة مدنكله مع بعض
بالنسبه للفأر
عندي ليكم مشاكوس اوربيه
علي شرط اكون الراعي الاول
للمفاوضات ...وعلي الطاحونه
اكان ما خليت ليك فأرك ده برة الطاولة
اخوك متفنن مع الكدايس
| |
|
|
|
|
|
|
|
|
|
Re: فـــــأر.........و.........شـــــوال بصـــــل (Re: alfatih)
|
الأخ سجيمان ......... سلام
عندي فكرة بت ستين كلب .. للتخلص من
الفأر اللعين دة ...
الكان داير يفركش ليك حياتك
الأسرية زي البصلة الفي الزلط
يا أخوي .. عرس ليهو ..
ولا أقول ليك جكس ليهو ..
أسمع ..
لو كان فأرك راجل جيب ليهو
فأراية .. وسيمة وجميلة ..
وليها عوينات ،،،،
أما لو كان فأرك مرة
حا تتعب شوية ..
لأنك حا تضطر تجيب ليها فأر قندولي
ما شرطا الوسامة المهم الجيب والرصيد
.. وأكان لسة بياكل في بصلك
المرة دي .. يا أخوي لازم تدبل ليهو
بي فأراية " جكة " كاااااااربة وسمينة
عشان تتور ليهو نفسو .. وتقطعو ليهو
وأكان ليسة مستمر في أكل بصلك ..
يا زول دي عندها حل واحد وبس
ترحل من البيت، واكان باراك في
البيت الجديد .. سجمك .. بكون حباك
بالذات لو ما عندك بصل ..
بيكون دايرك عديل كدة .. كشاسي
أي بمعنى .. في العضم ... يعني
دايرك من غير بصل ولا عسل
وبي كدة بنكون وصلنا للمرحلة
الثالثة لعهد الوفاء الفأري
فتك عاافية يا أخوي
| |
|
|
|
|
|
|
|
|
|
Re: فـــــأر.........و.........شـــــوال بصـــــل (Re: aboalkonfod)
|
تعرف ياابوالقنفد....... لو كان عايزين انا في رقبتي دي تكون مصيبة كبيرة..........وبعدين يا اخي شكلو كدة......فعلا يكون........ لانو نظراتو ما اعتيادية....... فيها هيام.....و مفعمة بالحب...... خلي بالك دي فأرة ومطلوقة.....اكان كدي التاكل البصل كلو ماني ساعلها
| |
|
|
|
|
|
|
|
|
 Re: فـــــأر.........و.........شـــــوال بصـــــل (Re: سجيمان)
|
الاخ سجيمان
السلام عليكم ورحمة الله وبركاته
جاءت امراة لامير المؤمنين هارون الرشيد وكان يجلس وسط الامراء والوزراء
فأتي الحارس وقال للخليفة بان امراة تريد الدخول فاذن لها الخليفة وحين راة الجمع جخلت وقال لها الخليفة ماهو طلبك فقالت لهو اني اشكو من قلت الجرزان فامر الخليفة لها بـ 1000 دينار فتعجب الحضور من امر الخليفة وبعد ذهاب المراة سالوه تشكو من قلت الجرزان وتهب لها الفلوس قال لهم انها تشكو من الفقر يعني لا يوجد في بيتها ما تاتي اليه الجرزان
مني الجرزان هو الفيران
| |
|
|
|
|
|
|
|
|
|
Re: فـــــأر.........و.........شـــــوال بصـــــل (Re: انور عمر)
|
انور بارك الله فيك.......... دا زمن ناس سيدنا عمر....... الفئران لسة ما لقو لهم دواء يكتلهم...... لكن حسي..... العندو فيران يعني ما عندو حق دواء الفيران...... يعني فقيران.... زي اخوك سجيمان...... الشفع راقدين بالملاريا..... والفيران حايمة في نص الدانقة
| |
|
|
|
|
|
|
|
|
|
Re: فـــــأر.........و.........شـــــوال بصـــــل (Re: سجيمان)
|
ياسجيمان فارك ده صاحبه وبعدين فارك ده من زمن
الفيران بتاكل بصل فيران الزمن دول بياكلو ايس كريم
وفانته علمه اكل الجاتوه والايس كريم عشان يبقى راقى ويوفر
ليك البصل وبعدين مرتك المسكينة مشاكلها طوالى فى اقل حاجة
تتهرش فى الشغل وتجى تتفشه فيها
الله يكون فى عونها ماكفاية عليها شقاوة الاولاد
| |
|
|
|
|
|
|
| |
سجيمان
ابو جهينة
ودقاسم
alfatih
aboalkonfod
انور عمر
ودرملية
Ahlalawad
فيس بوك
تويتر
انستقرام
يوتيوب
بنتيريست