|
|
 الله....يكــضـب...... الشيـــنـة
|
صحينا من النوم انا والمرا.....وكل زول يطرش بي جيهة...... طراش شديد..... استأذنت من الشغل..... مشينا المستشفى....... قابلنا الدكتور...... فحصنا الاتنين..... انا كنت قايلو تسمم... نكون اكلنا لنا مصيبة وسوت فينا كدي...... بعد الكشف والفحص...والقومة والقعدة..... الدكتور نادني...... قال لي اسمع يا اخينا مبروك.... المرا حامل.... وقاعدة.... تتوحم...طيب مشكلة المرا وعرفناها...... انا مالي؟...... عاين لي كدي..... وضحك...وقال لي انت برضو قاعد تتوحم...... افو انا اخو اليحردن..... اتوحم كيفن يا دكتور؟..... يعني انا برضو حامل؟..... قال لي دا نوع من الوحم السايكلوجي... بيجي للرجال...وحالة نادرة.... يعني سايكلوجي الجن دا الرجال ديل كلهم خلاهم وما عزلني الا انا؟....يا دكتور كدي ... افحص تاني يا زول.....ما تتلوم فوقي.... يا عاجب لك..... انا ود قبائل....وجنس النضم دا ان سمعو بو اهلي في البلد علا اشوف لي بلد تانية.....اتوحم كيفن آزول؟......فحص تاني من اول جديد....وابدا رايو ياهو رايو..... سجيماااااااان قاااااااعد يتوحم......والنضم دا يا دكتورتقولو لي قدام المرا.......وانا عندي مرا الحبة ما بتتبلى في خشمها....قول باكر ... حدثت اهلها....واهلها من عامنهم... مكجنني.... يطلقو الخبر في البلد....وناس الطاهر ود نفيسة.... يتربعو فوق البرش ويقعدو يتونسو فوقك يا سجيمان.....بختك يا الطاهر....اامانة ما اتونست......رجعنا البيت.... انا فوق عنقريب...والمرا فوق عنقريب...وكل واحد متجبّد لو في توب.....ومرة مرة يكشف وشيهو ويبصق......... واظنو نضم دكتور الشوم دا صح....بقيت ما بدور ريحة السمك....ولا اللحمة....ولا الريحة الحلوة البتريحبها...... ابدا بس ياهو الوحم زااااااااااااتو....بقينا انا والمرا....نكوس في الدراب وفي الفحم ونقعد ناكل.....والهم الشايلو... انا.....علي الوحم خلاني رقيقوني....والفي ايدي ما تاخدها....قلت الوحم كلها كم يوم ويروح....... المشكلة... باكر دي...... يقولو لي الدكاترة....... انت حامل... اهه اطير وين؟ واقبل وين؟.....واتخيلت نفسي لابس جلابتي ومارق من صلاة الجمعة مع الرجال البي صح......وخاتي ايدي في صفحتي ولازي كرشي قدامي....وحات الله حياة الدنيا مسخت علي............. غايتو الحمد لله الحكاية وقفت عند الوحم.........
البارح...... بنيتي الصغيرة.... قاعدة تسنن......عيونها معكرات...ومورودة....وحالتها حاله... الغربية انا عندي نفس الاعراض برضو....مشينا الدكتور....... قال لي يا اخ سجيمان انت برضو قاعد تسنن.....تسنين سايكولوجي.... الله ينعل ابو السايكلوجي دا الما شاف لو شغلةغيري.....اسنن كيفن؟ والسنون يقومن لي وين؟ خشمي مليان لمن مدفق... آ يا دكتور السنون يقومن لي وين؟ الكتور عاين لي وضحك ضحكة خباثة.... انا عرفتو قاصد وين يقومن لي السنون.... لكن ان شاء الله هو يقومن لو سنون و لسان ويخلي النضم بي خشمو وينضم بمحل ما يقومن السنون الجداد...
.لكن بيني وبينكم التسنين ما ابيتو.. عشان اتحل من مصاريف البيت و الشغل.... في شافع بسنن سعلوهو من مصاريف؟........رجعت البيت...... المرا..... قالت لي دي عين يا سجيمان وصابتك.... دحين..... البس الحجاب دا...ومرقت لي الحجاب ومعاهو عراقي.... لبستهن بعد ما كبيت لي موية فوقي.......... لبست الحجاب في رقبتي...... ووقفت في نص الاوضة..... شبكتي ايديا في بعضهن....وقعدت اتلولح.....واغني......
لما كنت صغير....... بلعب في التراب
ما ما لبستني..........العراقي والحجاب
|
|
 
|
|
|
|
|
|
|
 Re: الله....يكــضـب...... الشيـــنـة (Re: سجيمان)
|
سجيمان
عقبال تلبس الجزمة والشراب يا حفيان
لكن دكتورك دة نصيح كدى ؟
سايكلوجى الشابكك بيها اكان
ادتك قروش ما كان احسن
من مسكة صفحتك الحاتبهدلك
بهدلة ...
بعدين وحات الطاحونة
ود نفيسة دة يشيل حالك
فى كل الحلال وناس غينيس
يسمعوا بيك....حظك
بس خلى بالك منهم
ديل احسن منهم ودنفيسة
| |
|
|
|
|
|
|
|
|
|
Re: الله....يكــضـب...... الشيـــنـة (Re: سجيمان)
|
حلوة والله يا سجيمان مرقتك من الجامع دي
ههههههههههههههههههههههههههههههههههههههه
ضحكتني والله
اها ما شاء الله ده الجنه الكم
حق المرة ما حقك انته
محنك محن يا سجيمان الجن
لكن مبدع
والله واصل
والبورد بلاك خربان
| |
|
|
|
|
|
|
|
|
|
Re: الله....يكــضـب...... الشيـــنـة (Re: سجيمان)
|
والله دى بالغتة فيها ياسجيمان. الواحد كان محتاج لحاجة زى دى لأن البورد شايف الطقيع فيهو كتر الأيامات دى لكن بوستك ده جاب الفرق
أرجو أن لا تقطع عنا مثل هذه الاٍبداعات
اٍديك العافية يارجل
ماجد
| |
|
|
|
|
|
|
|
|
|
Re: الله....يكــضـب...... الشيـــنـة (Re: Maged)
|
الولد حا تسمي منو يا سجيمان سمي سجومي عليك الله وبعدين ما تاكل توب مرتك عشان التسنين ده خبيث
والله يا سجيمان دايرين بوستات زي دي والله الايام دي المنتدي فلانة مرقت وفلان زعل وفلان مشاكل علان والحركة الاسلامية تصطاد في الموية البتشبهم وحكاية ربنا يكون في العون
| |
|
|
|
|
|
|
|
|
|
Re: الله....يكــضـب...... الشيـــنـة (Re: سجيمان)
|
سلام مربع
سجيمان
ماوريتنا الوحم بتاعك كان على شنو
؟؟
منو الكان بيجيب ليكم انت ومرتك
طلبات الوحم
هسع نقول انت اتوحمت فوق (بطيخ)تايلندي
واكيد مافيش حد جابو ليك
الطبيخ بطلع في الطفل بتاعك
ولا بتاعت المراة
يعني قصدي طفلك الايحائي
اقصد السايكولوجي
غايتو قلبي على الجنين
لانو في النهاية ح يتلموا عليهو
وحمين
بتاع الام
وبتاع الاب
| |
|
|
|
|
|
|
|
|
|
Re: الله....يكــضـب...... الشيـــنـة (Re: سجيمان)
|
الأخ ........ سجيمان
آآخوي أمانة ما اتلوم ،، أودي وشي وين ، على الطلاق
ناس البلد أكانو فاكرين .. من ضكوريتك .. جسمك متل
القرد .. كلو شعر .. لمن جار عليك الزمن جابتلها
وحمة .. وطراش .. عيلا باكر الله يستر من الداهية الما
تتسما ديك .. البتجي مع المهية .. وعلاجا شن بقولولو
كور وايز .. ذات الأجنحة .. المتل طير الفيرة الليلنا
أودي وشي وين .. ها جنا أكان سمع نضمك الكُتر دة .. ود
عامك " الماحي ود المصران " برتكب فيك جنية .. بعد ما
كنت ود عامو .. تبقالو بت عامو .. وتَحِل ليهو .. الله
يحل مسامير الزمن الفارغ .. تنوم زاهر .. تصبح أزاهر
من موجب .. بي قدرة قادر تتحول سالب .. بدل تتخوجن في
بطن عَمتك متل العمدة " ود الطاهنجي " .. تقلب طرحة متل
نقر الفريق القالي الحلي قلي .. تف .. يا زمن تف .. متل
ما قال ود حميد
ها المطيميس بدور تسعالك خشمين ،، وتسويلك لسانين ..
.. أها كمان بتحتاجلك فرشتين .. واكان بتتسوك تلاتي مرات
كدة بتكون عملتلك تسعة تِريبات اللات سِواكات .. بتقد جيبك
عديل كدة !! وبتفقد عقاب سوايلك الباقيلاك .. الله يقطع التِسنن
والوحم وايامو يا أخوي
| |
|
|
|
|
|
|
|
|
|
Re: الله....يكــضـب...... الشيـــنـة (Re: سجيمان)
|
الله يا سيجمان خلينتنا نضحك لما جننت المرة جن قالت دي عين وأصابتك .ز يا ود امي لا في هنا التجاني الماحي لا طه بعشر ولا عيادة د/ سحبو (رحمه الله) .. نوديك وين شن اصابك .ز قلت ليها أصابتني كلات سجيمان .ز قالت شوف الراجل بقى يهضرب سيجمان دا شنو .. قلت ليها دا ما سيجمان المشى يكشف لي زوجته ولقوه خو ذاتو بتوحم معاها .. قالت هوي يا ناس الحلة ما تحصونلي الراجل دا ما جن بجده ..
يا أخوي سيجمان .. أنا خايق يلبسوك العارقي الخفيف والجرتق ويدوك للبحر عشان تفك عارضك ..
والله إنت تحفه يا سيجمان ..
| |
|
|
|
|
|
|
| |
سجيمان
hammama
alfatih
albagir altahir
أحمد أمين
elsharief
خالد
ابو جهينة
shiry
aboalkonfod
tariq
garjah
قلقو
فيس بوك
تويتر
انستقرام
يوتيوب
بنتيريست