|
|
 الحـــــب... الكبـرا تيكــي
|
شفت قبل فترة برنامج تلفزيوني....... حسي تجي واحدة عاجباها روحها....وشعيراتها الكاوياهن في درجة مائة وتمانين درجة مئوية.......وتقول لي انت ما عندك شغلة غير مصاقرة التلفزيون.....والفرجة.... اسوي شنو .... نصيحة لله ما عندي...... المهم شاهدت برنامج.... كانت مقابلات مع مجموعة من البنات من بنغلاديش......كلهن وشياتهن مشوه....ومحروقة........ ومنظر يحزن ويلين القلبو حجر......المثل بتاع قلبي علي جناي وقلب جناي علي حجر..... بالمناسبة اتغير....وبقى قلبي علي جناي وقلب جناي علي الماسنجر عشان يواكب العولمة..... وبعدين كلمة مِس كول بقت كتيرة ومسيخة.....والواحد يخاف يوم يسمع امام جامع في صلاة جهر..... يقول مِس م الله الرحمن الرحيم بدل بسم الله... ولاّ يغنو لينا الشوايقه.....
اجمل الحلوين.....وين مسجاتك وين
لو بي تمسمس لي
كان عرفت البي
.....ملحوظة لضعاف النفوس..... الكلمة دي تمسمس ..... أي تحوير او تحويل.... انا غير مسئول.... والموقع غير مسئول....
...ارجع لي بنوت بنغلاديش.. البنوت ديل حكو قصصهم...وكلها كانت انو في واحد شاب... عاوز يتزوج البت والبت رفضت....وقام هو....في ليلة ليلا... لبد لها.. في زقاق...وشايل موية نار... حامض كبريتيك....... في كوز.....واول ما تجي ماشه البت... يروح راشي وية النار في وشيها...ووشيها يتلخبط....ويصاط....وبضاعتها تبوظ.....وما تعرس تاني لي يوم الدين......وهو يكون ارتاح.... لا انا ولا غيري يلا..... شفتهم عشرات البنات..... وشفت صورهم قبل ... الحريق.... سبحان الخالق....غاية الجمال.......والغريبة قالو انو حكاية موية النار دي بقت موضة ومنتشرة....ودا نوع من الحب الكبراتيكي
تفكير اجرامي..... ما سبقوم عليهو زول......واتبسطت جدا....انو شبابنا ما وصلو مرحلة زي دي ..... اكتر حاجة... الواحد يقول انو اخد شاكوش....ويرقد لو كم يوم تحت العنقريب.تعبيرا عن الحزن والألم....وفي الليل يقعد يتحيحي....ويبكي.....ويغني مع هاشم ميرغني حان الزفاف......وانا حالي كيفن بوصفو..... والغريب فيهم ناس اصبحو مدمنين شواكيش.... من شاكوش الي شاكوش....وبين كل شاكوش وشاكوش شاكوش..............
|
|
 
|
|
|
|
|
|
|
|
Re: الحـــــب... الكبـرا تيكــي (Re: سجيمان)
|
الرائع سيجمان
لوووووووووول
والله انت بتحيرنا عديل
شنو الافكار الهدامة دي؟
ياخي ما تسمع الناس ديل الكلام ده
تاني يعني بعد الشاكوش
الواحد ما يطلع من بيتهم ولا شنو؟؟
وكان ما طلع يعمل ليه شاكوش تاني كيف؟؟؟؟
لا ياخي بلاش الكلام في الموضوع ده
تحياتي
| |
|
|
|
|
|
|
|
|
|
Re: الحـــــب... الكبـرا تيكــي (Re: Hozy)
|
سيجيمان
سلام
يا خوي سيرة موية النار دي تاني ما تجيبها ولو ملاحظ ده أسبوع الحب في البورد يعني ، يعني ، يعني ربك يستر ما تجيب ليها شاكوش ونبقي في الجري وانا شخصيا ما سمعت بي عملية تجميل عن طريق المسنجر لكن بعد كلامك ده حقو نفكر فيها
الله يكضب الشينة
| |
|
|
|
|
|
|
|
|
|
Re: الحـــــب... الكبـرا تيكــي (Re: سجيمان)
|
دكتور سجيمان
الشواكيش ذاتها تطورت مع التكنولوجيا ، في شاكوش بمسيج وشاكوش بالستالايت يعني بعد شوية حنلاقي الشواكيش بتتذاع في نشرات الاخبار
وبعدين ناس شرق اسيا ديل هم البيصدروا الحب والتكسر للعالم التاني عشان كده حوادث موية النار ممكن تكون كتيرة عندهم
| |
|
|
|
|
|
|
|
|
|
Re: الحـــــب... الكبـرا تيكــي (Re: maia)
|
سجيمان لوووووووووول
لكن
ما تدخل الافكار دى لبعض الناس
فى قصيدة يا عبدو لا
دى قصيدة تمثل خطاب الشاكوش الرجالى
فى وجدان الامة السودانية
لووووووووول
شوفتا بقيت مسغفاتية كيف كلام كبار كبار
اكعب حاجة شفتها عملها زول انضرب
فى السودان
كشح جوابات البت فى درب ابوها
عشان كدا اصلو الزول ما يرسل جواب
ينضم بخشمو بس
عشان الخسيس ما يلقى حاجة يكشحها فى درب
الابو
| |
|
|
|
|
|
|
| |
سجيمان
aba
مريم بنت الحسين
bit barber
bayan
merghani hamza
yasiko
فيس بوك
تويتر
انستقرام
يوتيوب
بنتيريست