|
|
 نص المكالمة الهاتفية التي تمت بين توني بلير وعمر البشير بخصوص القرار1706/تاج الدين عبدالله آدم
|
نص المكالمة الهاتفية التي تمت بين توني بلير وعمر البشير بخصوص القرار1706
تاج الدين عبدالله آدم
في إطار المساعي التي تقوم بها الاطراف الدولية لإقناع الحكومة السودانية لقبول إتفاق اديس اباباالذى دعا الي نشر قوات مختطلة من الإتحادالافريقي والامم المتحدة في دارفور, قام رئيس الوزراء البريطاني توني بلير بإجراء مكالمة هاتفية مع الرئيس السوداني عمر البشير. فيما يلي نتابع معآ تفاصيل ما ورد في المكالمة:
(للإختصار نشير بإسمي رئيس الوزراء والرئيس بالحرفين 'ب' و 'ع' علي التوالي)
بلير: آلو مستر فريسيدنت..البشير?
البشير: أيوه; نعم معاي منو?
ب: معاك رئيس وزراء المملكة المتحدة توني بلير.
ع: (مهمهمآ بعبارات غير مسوعة; ومضيفآ) والله العظيم ديل كرهونا العيشة ذاتو; هسع دة مالو وعاوز شنو.أيوه أهلا وسهلا بسيادة رئيس الوزراء, كيف الحال والاحوال و...
ب: (مقاطعآ) أسمع يا السيدالريس; انا مستعجل وما عندى وقت كتير للسلام وعبارات المجاملة; بس عاوزين نعرف عملت شنو في الموضوع المتعلق بالقرار1706, لانو المهلةالأديناك للتعامل مع القرار شارفت علي الإنتهاء وما فضل قدامنا وقت كتير, عشان كدة عاوزين نسمع الرد منك بشكل مباشر بدلا من ناس علي كرتى ولام اكول.
ع: ياخ الموضوع دة ما تدوه حبة صنة يا توني; الشفقة في شنو, انا ما زلت ساعي عشان احل في المشكلة ياخ; وبعدين دارفور شنو الإنتو جايطيين بيها الدنيا وما مديننا راحة; دي منطقة من يوم الله خلقها مليانه مشاكل وناسها ناس مشاكل.
ب: تقصد شنو يعني?
ع: تقصد شنو كيف يعني? إنت ما تقرأ التاريخ ولا شنو يا توني, ياخ انت زمان اجدادك لما جو وحكمو السودان, قام الامام المهدى وتمرد عليهم واعلن الحرب; في الوقت داك ما لقي ناس يقيفو معاه في حربه ضداجدادك إلا ناس الغرب اللي منهم ناس دارفور ديل; يعني بالواضح كدة ياتوني بلير ناس دارفور ديل الناس الكتلو أجدادك في السودان...وإنت بدل ما تساعدنا انحنا في حربنا معاهم جاي تناصرهم وتطلع كمان ضدنا قرارات من الامم المتحدة; والله جنس بشر.
ب: (مندهشآ) معقول الكلام دة?
ع: ايوه معقول ونص. وعشان أزيدك اكتر; سمعنا تحت تحت كمان- وبعدين بالمناسبة; دة ما كلامي انا, دة كلام بتاع الناس الكتبو التاريخ, يعني اساتذة جامعات وكدة..عشان بعدين ما تقول لي انت يا عمر بشير زول عسكري العرفك التاريخ شنو..-آي سمعنا تحت تحت قالوا الزول الكتل غردون باشا وبعد داك قام قطع....
ب: (مقاطعآ) إنت عارف يا عمر البشير غردون دة ببقي لي شنو?
ع: (مبتسمآ) أها وريني ببقي ليك شنو?
ب: الزول ده ياخ خال حبوبتي ليندي الإتوفت قبل ست سنوات في مدينة ادنبرة.
ع: (يحشو كمه في فمه حتي لا ينفجر من الضحك) خال حبوبتك عدييل? طيب إنت ليه سكت المدة دى كلها? والله الخواجات ديل إنتو ناس عجيبين خلاص, ياخ في زول في الدنيا دي بدافع عن قتلة جده. طيب انت هسع ما اكدت لي الكلام الأنا كنت بقول فيهو قبل شوية, انو الناس ديل ناس بتاعين مشاكل; عليك الله شوف هسع مشكلتهم الصغيرة البدأت بسبب جمل كحيان كان باقي ليه تلاتة ايام عشان يموت من العطش شوف وصلوها وين!!!
ب: اسمع ياخ ما تميت لي القصة بتاعة مقتل غردون.
ع: آي انا ما ناسيها!, بس إنت ما أديتي فرصة. انا كنت بقول ليك انو الزول الكتل جدك غردون باشا يوم فتح الخرتوم وقام بعداك قطع راسو وجايز يمكن تكتك بيهو زي كورة شراب; الزول دة غرابي.
ب: شنو يعني غرابي?
ع: غرابي عندنايعني اي زول جاى من الغرب; والي هم ناس كردفان ودارفور.
ب: معني كلامك دة يعني انو الزول الكتل جدي غردون باشا ومثل بي جثته دا من دارفور.
ع: أيوه نعم.
ب: يازول إنت متأكد من الكلام دة?
ع: أيوه متاكد منو مية المية; وحتي إسمو كمان ابكر.
ب: ابكر دة (فاميلي نيم) ولا (فيرست نيم)?
ع: قلت شنو?
ب: إنت قلت لي الزول الكتل جدي غردون باشا وقطع راسو إسمو ابكر; مش ياهوندة كلامك?
ع: أيوه.
ب: وقلت لي متأكد من الكلام ده مية المية; صاح ولا ماصاح?
ع: أيوه صاح.
ب: طيب انا قلت ليك ابكر ده (فاميلي نيم) ولا (فيرست نيم)?
ع: يا الدين النبي; ياخ اسمع يا بني آدم; ياخ قلنا ليك الزول ده واحد غرابي وإسمو ابكر, مالك داير تحرق اعصابنا بسين وجيم وتكرر في الكلام المامفهوم دة.
ب: طيب اوكي معليش ;انا هأقوم اطرح السؤال بصيغة مبسطة:ابكر دة إسم الزول الكتل غردون ذاتو ولا إسم ابوه?
ع: (منزعجآ) طيب ما تقول كدة من قبيل وتريحنا. ابكر دة إسم الزول الكاتل , ما إسم ابوه.
ب: طيب, ابوه إسمو منو?
ع: (يفكر قليلا) ابوه إسمو إساغا. وبعدين لعلمك; القادة بتاعيين المتمرديين الهسع عاملين لينا وجع دماغ ديل, كلهم من اسرة ابكر إساغااللي كتل جدك غردون.
ب: يازول الكلام دة صاح?
ع: أيوه bien sur
ب: دة كلام تمام. علي كل حال انا كتبت المعلومات الخطيرة دي هسع, وهأرفع قضية كبيرة في المحكمة ضد الجماعة ديل; بس إنت لازم تجيى تشهد وتجيب معاك إثباتات و...
ع مقاطعآ بحدة) شوف يا توني إنت خليك رجل عندك كلمة; اولآ دة كلام انحنا قاعدين نقولو بيناتنا في التلفون أيش معني تقوم تكتبو, وتاني حاجة انا حكاية الشهود والاثباتات والمحاكم والكلام الفارغ البقولو فيهو ناس كوفي عنان وبت خالته; المرأة الساقينها طوال والعاملة لينا فيها ولا بلقيس ملكة سبأ دة ما بنفع معاي انا ولا داير أسمعه..آي عشان نكون واضحين من هسع ; وإنت ذاتك لو دا موضوعك انا بخت السماعة 'ناو' بلاش قوات دولية ولا إتحاد أفريقي. وانا اصلآ معتبرك إنسان صديق وكدة; لكن, وحيات ديني وأيماني, لو إتضح لي انو لازينك ناس كوفي وشلته و....
ب: (مقاطآ) كدة روق المنقة شوية يا ريس...
ع: (مقاطعا) يا زول ما تقل لي روق المنقة; تقول لي شهود ومحكمة وإثبات وتجي تقول روف المنقة? إنت قايلني انا داقس زي صاحبي بتاع ليبيريا الدقسو ناس ابوسانجو ورفعو للاهاي ولا شنو?....إسمع يا فردة وبعد خلينا نديك بالرندوق ذآآتو; وزي ما انا قبل كدة قلت ليك إنت مزنوق زنقة غسال يوم الوقفة; إنت الواحد ما يقدر يفهمك إلا بالرندوق, شوف يا فردة; إنت لو عامل لي فيها دارس قانون وماسك مفاتيحها, انحنا الامور دي نقشناها من ايامنا القضيناها في مصنع الرجال وعرين الابطال, وإنت لو عامل فيها ود لندن وبتاع آيسكريمات, أنحنا نص عمرك دة قضيناه مع ناس سيلفاكير في أحراش الجنوب وضربنا الكبد بتاعة الضفادع والمرارة النية بتاعةالتماسيح..
آآي يا فردة الجماعة ديل ما يجو يدقسوك ويقولو الزول ماناقش حاجة في السياية , وبعدين ناس كوفي انان و....
ب: (مقاطعآ بغضب) ياخ هسع الدخل كوفي عنان في الموضوع دة شنو? وبعدين ياخ الراجل دة ما واحد منكم وفيكم; يعني اخوكم.
ع: شنو? كوفي عنان? منو القال ليك?
ب: منو القال لي كيف ياخ? كوفى دة ما زولكم; ما كلكم افارقة!
ع: لا لا يازول; كلامك دة احسن تسحبه.
ب: أسحبه كيف? يعني داير تغالطني إنو كوفي عنان دة مامنكم وفيكم?
ع: لا يازول دة ما مننا.
ب: ما منكم كيف يعني?
ع: يا زول دة ع....
ب: شنو?
ع: (مع نفسه:إستغفر الله)
ب: آلو ريس, انت معاي? مالك سارح?
ع: لا لا; ابدآ مافي حاجة.
ب: أسمع خلينا نرجع لموضوعناالاصلى; إنت قلت لى ناس دارفور ديل ناس مشاكل, مش كدة?
ع: أيوه يا توني, خليك كدة; دا الكلام الأنا عاوزك تركز معاي فيهو. الناس ديل,زي ما قلت ليك, هم ناس جنهم جن حروبات ومشاكل; والدليل علي ذلك كل الحروبات القامت في السودان من زمن جدك غردون حتي اليوم هم السبب فيها.
ب: كل الحروبات?
ع: أيوه كل الحروبات.
ب: حتي حرب الجنوب?
ع: (يتململ في جلسته) ياخ إنت ما جيتني في النقطة الأنا دايرك فيها ذآآتو -أسمع يا بلير بالله بس دقيقة واحدة وارجع ليك; بس خليك معاي-
ع: (ينادي سكرتيره الخاص جدآ) اسمع يا ولد أقفل الشبابيك البي وراي ديل ونزل الستاير; ولو جا مني اركوري حايم بجاي وسأل عني قل ليه الزول دة مافي.
السكرتير: نقول ليه مافي! وكان قال مشي وين?
ع: قل ليه مشي يفتتح مسجد التوابين بحي الزرزور وسط
السكرتير: حي الزرزور وسط?!!!! دة وين? انا عمري ما سمعت بيه?
ع: إنت بس قل ليه; إنت قايل صحبك دة بعرف الخرتوم كويس; هيدقس ويصدق.
السكرتير: والله لاكين يا ريس إنت تفتيحة هي..هي..
ع: أيوه ياتوني آسفين للتأخير; أسمع شفت حرب الجنوب الإستمرت عشرين سنة وراحو فيها إتنين مليون دة; معظم الناس الحاربو فيها كانو من دافور; شفت كيف ديل ناس حروبات وفتن.
ب: لا لا يا عمر البشير; الكلام دة اظن تفسيره ما كدة! والناس ديل سمعت قالو أنهم ناس مسالمين وطيبين و...
ع: (مقاطعآ بإنزعاج) يا زول إنت الكلام دة سمعتو من وين?
ب: الكلام دة?
ع: آآي الكلام دة.
ب: الكلام دة قالو لي سيلفاكير!
ع: متين?
ب: لامن جاني هنا قبل اسبوعين.
ع: قال ليك شنو?
ب: قال لي ناس دارفور ديل هم ذاتم مهمشين زي ناس الجنوب, واللي حاربو منهم في الجنوب ما حاربو كرهآ في الجنوبيين لكنهم كانو مضطرين; لأنهم كانو يمشو الجيش عشان ما عندهم وسيلة رزق آخر, وبعد إلتحاقهم بالعسكرية مباشرة يرسلوهم للقتال في الجنوب; وإنت تعرف يا فريسدنت بشير إنو العسكرية اوامر وإنو الواحد لازم يجاوب بدون خيارات.
ع: (مع نفسه; والله سيلفاكير دة ببالغ عدييل كدة, ياخ دة كل مرة نكلمو نقول امشي صلحها شوية مع الجماعة ديل; يمشي يطيينها ويجي) أسمع يا بلير! ياخ الكلام دة ما صاح; طيب انا عاوز اعرف الزول دة بالضبط قال ليك الكلام وين وكان في منو حاضر?
ب: قالو لي في بيتي في داونغ ستريت وكانت حاضرة معاي مرأتي شيرين.
ع: قلت لي وين?
ب:قلت ليك داونغ ستريت نمبر تن.
ع: ياخ ما تتكلم بوضوح وتقول لينا; مالك داير تعكر جونا?
ب: قلت ليك هنا في بيتي الهسع انا قاعد فيهو دة. يا أخي دة حتي ناس دارفور بعرفو; إنت رئيس ما سمعت بيهو?
ع: لا لا ياتوني بلير; إنت عاوز تجنتر عدييل..ناس دارفور في لندن وفي بيتك? معقول الكلام دة?
ب: أيوه ياخ ديل كل يوم مع صباح الله كاتبين يافطاتهم وواقفين لي في خشم البيت ويقولو لي لازم اتدخل واساعد أهل دارفور و..
ع: ( متسائلا بإستغراب) يقولوا ليك? وديل إنجليزي ما بعرفو; وإنت ما تفهم عربي; يقولو ليك كيف يعني?
ب: يا زول الناس ديل بتكلمو انجليزي والله, وانا ذاتي بينك بينك, في البداية كنت قايلهم جامايكيين لكين كانو بدون راستات عشان كدة عرفت إنهم من دارفور.
ع: بقو بتكلمو إنجليزي? لا حول ولا فوة إلا بالله ,والله ديل غرابة آخر زمن; ياخ أنحنا في السودان ما علمناهم غير أ, ب ,ت ,ث وباللوح والدواى كمان هسع تجو تفولو لينا إنجليزي?
ب: إنجليزي شنو يا راجل; يا عمر البشير دحين انا اقول ليك كلام بخليك تفوت مواعيد الغداء مع الولية.
ع: يعني إنت عاوز تقول لي أكتر من كدة?
ب: أيوه طبعآ. ياأخي انا اتذكر إنو في يوم من الايام; في واحد من ناس دارفور عاوز يقول لي صباح الخير بالانجليزى نسي وقال لي bonjourno; يعني بالطلياني.
ع: سبحان الله ثلاثة وثلاثون مرة; ودي كمان لقوها من وين?
ب: بكون لقوها من الكنيسة!
ع: كنيسة شنو يا راجل; إنت عارف يا تونى بلير; إنت مما هزموا الجمهوريين أهل صحبك بوش بقيت تتكلم كلام خارم بارم زي كلام أخونا زمان يونس محمود, يا توني الناس ديل مسلمين مية المبة البوديهم الكنيسة شنو?
ب: دة إنت الكلام بتاعو طلع خارم بارم مما بديت شكلتك مع ناس دارفور; دة إنت بدري لو تتذكر كان قلت إنو في كنائس في إيطاليا قاعدة تنصر في أهل دارفور.
ع: لا لا يازول انا الكلام كان قلتو عشان اخم بيهو الوهم ديل لاكين هو اصلا ما صحيح.
ب: طيب دة معناه إذآ كذب ; وقانونيآ الناس الإضرروا من الكلام دة ممكن يقاضوك.
عيرمي بالسماعة)
ب: آلو..آلو..الو
-توت..توت..توت
|
|
 
|
|
|
|
بكرى ابوبكر
فيس بوك
تويتر
انستقرام
يوتيوب
بنتيريست