|
|
 يوميات الشرامه المفتحين
|
خرج محمد زرديه الميكانيكي من منزله ليلتقى بأصدقائه عمر حريقه وعباس أب كراع جوار ميدان الحي ....وأول ماوصل الحجر اليقعدوا فيه دار الحوار التالي :
زرديه : الأمور كيف ياشبيبة القبائل إنشاء مسلكين... إتلفت أب كراع بنظرته البارده ورد عليه : التسليكه تجي من وين ياعمك مابراك شايف حالنا واقف ولساتكنا منفسه ومافي اي برنامج... إعتدل عمر حريقه في جلسته وقال: ياأب كراع ياخي إنت طوالي شاري همك في حبالنا انحنا ماناقصين ياخي والتفت الى محمد وسأله : الساعه مك يافردتي ياخي أنحنا مهنقرين خلونا نمشي نجازف لينا طريقة عشاء؟؟
محمد: الساعه متنيه اللا تنيه (8 اللا 8 دقائق) إنتو عندكم قنزب وللا مغبشين كالعاده ... تنحنح حريقه ورد عليه مغبشين كيف ياعمك مايومي قاعدين نعشيك بقروشنا بس الليله مفلسين شويه ...
ضحك زرديه لمن قرب ينشرط وقال ليه ياخي انت معقد من الفلس مالك ماعادي يامان حسي أنا عندي ليكم فكره نحنا نمشي نشوف لينا بتاع دكان فاره كده نزبط عنده الفوله وبعد بجوم صااااح كده يافرد نعمل ليك زغبير براااااحه واحد واحد رايكم غنش (شنو)... ضحك عباس وقال : يازرديه يافردتي أنحنا بتاعين الدكاكين ديل كلهم ناقشيننا ودكاكيين الحلل الجنبنا ديل برضو عارفننا ومافي بتاع دكان بكشح لينا فول في صحن كان ماقبض الضحاكات بالأول ...
جلس الجميع يفكرون ويتبادلون كيس الصعود يبنهم واثناء جلستهم جاءهم صوت حفله من بعيييييييد فنط حريقه من الفرح طرب يافرد طرباااانه الليله أرحكاكم نمشي نجوم ونهجج ... تابعوا صوت الحفله وكان زرديه خبيراً في معرفه منبع الصوت رخى زرديه أضانه ثم أشار إلى اتجاه الحفله ..وأول ماوصلوا الحفله وخشوا ليك بي تحت الخيمه وبعد جازفوا العشاء وأكلو وشبعوا يادوب بقوا يعاينو لي ناس العرس .... هنا حصلت الطامه الكبرى فقد تعلق قلب زرديه بفتاه جميله جداً ولفت عباس :ياعبس كشف للجاحه دي امنت بالله ياعبس انا لازم اثبت الجاحه دي ياصاحبي والله جاحه سعد قشره عديل كده(دلاله على قشرتها وذوقها في اللبس) ...عاين ليه عباس من فوق لي تحت ورد : يامان انت سيجارة أمس دي حلحلت صواميلك وللا غنش والله دي كن عاينت لي خلقتك دي يجيها طمام بطن شهرين ماتاكل .........
To be continued
|
|
 
|
|
|
|
|
|
|
 Re: يوميات الشرامه المفتحين (Re: محمد فرح)
|
تشجع عباس أب كراع وتقدم بخطواته الثقيله نسبة لوجود جرح قديم في رجله جعلها أضخم من المعتاد ووقف أمام البنت وقال : لو سمحتي يالقطه ممكن نتعرف أنا أب كراع ... نظرت له البنت شذراً بدون أن ترد عليه فأردف : والله أنا زول ظريف ومفتح ولو سألتي مني بتاعين الرقشات الفي الموقف ديل كلهم بعرفوني وممكن أوصيهم بخفضوا ليك ... تحركت هنا الفتاه خطوتين للأمام كي تبتعد عنه ... وهنا أحس أصدقائه بإقتراب الكارثه وحسوا إنو في مشكله حتحصل فقال محمد لحريقه : يامان (جهز قارديك في طقطقه حتحصل حسي) وفعلاً إستنجدت الفتاه بأحد أقاربها الذي جاء لينفش ريشه : يازول انت ماتزح من هنا يللا أطلع لينا بره الحفله دي انت صعلوق وللا شنو .... وفجأه طار فيه أب كراع بي شلوت بين كرعينه خلاه يفرفر وفي روايه قالوا الزول ده بفرفر لي حسي المهم جاطت الحفله وإتدخلوا الشباب وطلعوا من الحفله في النهايه (الكثره تغلب الشجاعه) وفي طريق عودتهم للحله قال محمد زرديه ياعبس ياخي إنت طوالي اي حفله داير تشاغل فيها وتعمل مشاكل وبعدين إنت ماعندك علاقه بي حواء كلاب الفنانه ياخي ماتخليك زول مخلص ... (مخلص عبد الشكور) رد حريقه وواصل ياأخوانا خلاص ياخي مامشكله حصل خير وقال عباس : ياأخوانا والله أنا نفسي أحب لي بت حنكوشه كده وتكون حنيييييييييينه والله أنا فاقد حنان ياأخوانا لاأبوي دلعني لاأمي ولاحواء كلاب زاته دلعتني .....
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
| Quote: جلس الجميع يفكرون ويتبادلون كيس الصعود يبنهم واثناء جلستهم جاءهم صوت حفله من بعيييييييد فنط حريقه من الفرح طرب يافرد طرباااانه الليله أرحكاكم نمشي نجوم ونهجج |
والله يا ابوفرح
ناس ديل شماشة جد جد !!!
ربنا يعينهم ويعينك
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
Quote: والله يا ابوفرح
ناس ديل شماشة جد جد !!!
ربنا يعينهم ويعينك |
مشكور على المرور ياودالمامون على المرور والناس ديل هم شريحه من مجتمعنا وأنا حبيت أعكس جزء من حياة هذه الشريحه ......
معاك سلاااااااامه
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
الرائع ناذر محمد الخليفه مشكور على المرور وتوقيع الحضور....
وعلشانك ياغالي بهديك الحلقه التالته...
خرج الشباب ذات مساء وكان في خطتهم الذهاب لسينما الوطنيه لمشاهدة فيلم هندي كارب نصصحهم بالذهاب له زرديه عندما قال : والله ياشباب شاكوش قال لي في فلم هندي غرييييب فيه كاجول ماكرجي الحنيييينه والله دي (عبدالعزيز الحلو) بس يافرد نمشي طوالي الليله مادايرين عشاء زاتو حق العشاء نخش بي السينما مكسب ...
إتفق ثلاثتهم على دخول السينما وبعد أن بدأ الفيلم وظهرت ماكرجي صعد أحد الشماسه الجالسون بالصف الأمامي ووقف امام الشاشه وبدأ يتلمس موقع البطله على الحيطه إعتقاداً منه نسبة لأنه زاد كمية السلسيون الذي إستنشقه نهار ذلك اليوم أنه سيتمكن من ملامسة البطله الجميله مما أثار حنق الشباب وقنبوا يكوركوا ماتنزل ياحيوان ينعل أبو شكلك بلى يخمك ... وحين ظهر الخائن صعد ذات الفتى ليضربه بعود القصب الذي كان يأكل منه ....
المهم حضروا الفيلم ولم يعكر صفوهم غير بتاع السينما الذي كان يقطع المشاهد الخليعه من الفلم حيث كانوا يبادرونه (الله يقطع رأسك ياكلب ) .... هنا قال أب كراع : والله ناس السينما ديل كرهونا زاتو يجيبوا ليك البطل ماشي على البطله كده وخاشه غنيه حنييييييينه في الفلم فجأه يجيبوا ليك البطل واقف مع أخوه الناس ديل قايلننا فارات وللا شنو؟؟!!
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
العزيز ناذر مشكووووور على تصحيح حقيقه أنا خاتي صوره راني موكرجي لكن أخوك لخبت كبرنا والحقيقه أنا طولت جداً من السينما الهنديه وقلبنا على ناس هوليوود ديل
هدي ليها الأنا قاصدها (عليك الله مامبالغه)
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
أحمد معتصم ..
Quote: ياناذر راني موكرجي أخوها لو طلع أســد محمد الضحك شرطو..
وكمان الدليل الصورة..
|
زي صورة راني موكرجي دي أخوها بيكون اسد لو كانت سودانية ..
لكن في الهند الانا خابرا دي ..راني قطع شك أخوها بيكون (نعجة) !!
| |
|
|
|
|
|
|
|
|
|
Re: يوميات الشرامه المفتحين (Re: محمد فرح)
|
العزيز ناذر
العزيز شهاب مشكورين على المتابعه
ونواصل...
لم يستطع الشباب الثلاثه الصبر على حالتهم الرمتاليه دي لأنهم حسو بإنو حياتهم لافه في دائره مفرغه فقرروا أن يعملوا وذلك لإحساسهم بعدم قيمتهم في المجتمع وتهميشهم من قبل ناس الحله...
وهذا بعد أن نسى زرديه مهنة الميكانيكيه كما زادت صعوبة المهنه بعد وصول العربات الكوريه التي لم يستطع التعامل معها ......
المهم جمعوا بعض المال وإشتروا بعض الأواني المنزليه وطربيزه وتوجهوا للسوق الشعبي ...وجنب موقف الحافلات وضعوا الطربيزه وعرضوا البضاعه ونسبة لأن حريقه صاحب أجمل صوت منهم فقد قرروا أن يكون هو المنادي وهم الشيالين ....فأنشد حريقه (بألف ونص اي حاجه بألف ونص وكل حاجه بألف ونص وهم يرددون ورائه) ويالتايه تعالي وشيلي ليك كبايه وياعائشه وشيلي ليكي كمشه...
وكانت أول زبونه لهم مره قليصه جداً جات ماشه وتطقطق في اللبان (دي بيكم الكمشه دي ياولدفرد أب كراع بي ألف ونص بس ..رفعت المرأه الكمشه وتمعنتهاوأظهرت علامات الإنتعاض على وجهها وقالت دي شنو الكمشه المبشتنه دي جايبنها من وين دي والله بششششششششتنه ورقاد واطه والله أنا دي مجاني ماأشيلها مجاني ... إنتعض الشباب من الوليه ونهرها زرديه قائلاً: ياوليه بالله إتخارجي لينا من هنا كان مادايره تشتري بالله إتخارجي بعدين نحنا حركات النسوان دي مابتنفع معانا يللا دردقي لينا من هنا بالله ردت المره : هييييييييي وتاني هيي كركدي وماعرفت ليه تره تره ووسخ اللساتك الوره ياولد ماتكورك فيني والله انت مابتعرفني أنا علويه كمال المابخاف من الرجال بديك كف بحلحل ليك صواميل حنكك دي أعمل حسااااابك .... إشتعل أب كراع غضباً وقال : ياوليه والله نحنا الضربنا السماء جير والضبان منكير أعملي حسابك نحنا مابندق النسوان بس أخير ليك إتوكلي ....
ولولت المره ونادت العسكري الذي إتضح انه على معرفه قديمه بها وربما يكون مشرك وللا داير يعرس بتها المهم وقف أمام الشباب : إنتو صعاليق وللا شنو بعدين وين التصريح بتاع الطربيزه دي إنتو بتفرشوا سااااااكت قايلين البلد سايبه وللا شنو شايلين قروش وللا نشيل حاجاتكم دي نوديها القسم ... رد زرديه : قروش شنو ياجنابو رد العسكري وهو يغمز بعيونه : اي حاجه ياشباب حق العشاء وكده يعني خليكم تفاتيح ...... ومن سوء حط الشباب أنه لم يكن لديهم ولا مليم أحمر فقد إشتروا البضاعه والطربيزه بكل مالديهم من نقود وهنا وجدوا أنفسهم في القسم وقد رجعوا لنقطه الصفر مرة أخرى......
معاكم سلااااااااامه
| |
|
|
|
|
|
|
| |
محمد فرح
مهند مامون
ناذر محمد الخليفة
احمد معتصم الطيب
شهاب الفاتح عثمان
فيس بوك
تويتر
انستقرام
يوتيوب
بنتيريست