|
|
 من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو)
|
الإخوة الأحباب :
بالعديل والزين ونمة فرح تجمع الأحباب يسرني دعوتكم أحبتي لمشاركتي في حفل زفاف كريمتي (هيام) إلى عريسها زين الشباب ، ود المتمة الذي نشأ وترعرع مابين الخرطوم 2 والامتداد ، الابن المهذب الخلوق (محمود حسن محمد عثمان – ود البيك) وذلك أمسية الأربعاء 24 شوال 1427هـ الموافق 15 نوفمبر 2006م بقاعة الجوسق للاحتفالات بحي الشفاء طريق ديراب .
حرَّكت ليك .. عصب السكون ..
جلبت ليك الغيم رحط ..
طرَّزت ليك النيل زفاف ..
حرقت ليك الشوق بخور ..
وفرشت ليك الريد لحاف ..
لا السكة بيكي بتنتهي ..
ولا معاك مليت طواف ..
ولتعلموا أحبتي الكرام ، خاصة زملائي في مجموعة بورداب الرياض ، أن تشريفكم لنا بالحضور يسعدنا ويدفئ قلوبنا ، مع إطلالات نسائم برد الرياض .. وبمشاركتكم لنا تكتمل البهجة ويعم السرور ، ونستمتع جميعنا بالطرب الأصيل ونحن نزف العروسين إلى عش الزوجية ، حيث يشاركنا البهجة والأفراح في هذه الأمسية ثلة من مبدعينا من مطربين وموسيقيين في رياض الخير والبهجة .
أجيك فارساً يشق صمت المتاهة الطال ..
مواعدك بي غناوي الشوق ..
وبي شمساً وراها منال ..
وبي فرحاً يغرِّد في سماك ألحان ..
وهذه دعوة لجميع الأهل والأحباب والإخوان والأصدقاء ، ممن وصلتهم أو لم تصلهم كروت الدعوة .. فهلا شرفتمونا بالمشاركة حتى تكتمل الأفراح بهذا الزواج و الذي ندعو الله أن يجعله مباركاً .
(( هيــام ومحمــود ))
اللهم بارك لهما .. وبارك عليهما .. وأجمع بينهما في خيرٍِ دائماً وأبداً .
عبدالحليم خالد التلب
( ليمو )
|
|
 
|
|
|
|
|
|
|
 Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: abdulhalim altilib)
|
عماك الفرح .. وإتحققت آمالك ..
لي بيت الحلال .. مولاي شد رحالك ..
أبارك للعريس .. وأمك وأبوك وخالك ..
يادرت بناتنا .. بدر الضلام الحالك ..
وارثه العزة من .. أمك وأبوك وكبارك ..
ومرتاحت الضمير .. الدنيا ماهمالك ..
أنا عاجبني ليك .. جيت أهنئ أبارك ..
ألف.. ألف ... ألف ...ألف مبروك للعروسين ....
أه الحفلة كيف ... أجيب سوطي معاي .. دايرنها دلوكه ساكت ...
برسل سلام لي بنات جعل .. في شندي نايرت المقل ..
تحياتي لك وللأسرة .
خالد الأرباب
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: خالدة البدوي)
|
أخي عمر الفاروق
شكراً ليك وحضورك يشرفني ، بعدين بدل (عباسية موردة) مع بيت المال
خليها ليهم (عمارات ومنشية) امكن تصدق معاهم ويبقوا من الناس الخموا المال.
تسلم أخي .
أخونا خالد ود الأرباب
ألف شكر ليك على الكلمات الطيبة الحلوة ، وبعدين مافي داعي تجيب سوطك معاك
أصلوا عريسنا مجهز سوطوا .. وأكيد إنت عارف ، باقي نحنا الجعليين ناس (بطان)
ساكت ، وأهل دلوكة ونحاس .. وهسع لو كان الزواجة دي في (الجيلي) عند أهلنا
كنا دقينا ليها نحاس الباشا(الزبير باشا) ، حيث مازلنا نستعمله حتى اليوم .
وكنا كمان بالمرة أرسلنا دعوة خاصة من هناك ، من سرايا الباشا لأخينا د. سجيمان .
الأخت خالدة البدوي
تسلمي أختي وربنا يديم الأفراح والليالي الملاح ، وحضوركم يسعدنا كثيراً ويشرفنا أكثر .
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: abdulhalim altilib)
|
أخي العزيز ود حيمورة
يسعدنا حضوركم ويزيدنا شرفاً وجودكم معنا ونحن نحتفل بزفاف
كريمتنا (هيام) .
| Quote: قول للعروس اعملي حسابك هبة الله ما تخرتك .. |
نسأل الله أن يهب لك السعادة بهذه (الهبة) من المولى ،
وقول ليها يا هبة الله يا رهيبة من هسع حاجزنك لولدنا
كمال (كيمو) ، وما عندو مانع ينتظرك حتى تكملي
تعليمك (وهو كمان) ، بس على شرط ما(تخرتي) أختو في العرس .
دمت والأسرة والأمورة بخير ، وإلى الملتقى يوم الربوع بإذن الله .
أخونا وشيخنا ود الباوقة ،
لك الود والتحايا ،
وشكراً على دعواتك الطيبة ، وربنا يجعله بيت مال وعيال
وفي إنتظارك تشريفكم لنا بالحضور والمشاركة في حفل
زواج ابنتكم (هيام) .
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: امير عوض الجمري)
|
أخي العزيز أميرنا ود الجمري ،
الله يبارك فيك وفي أيامك ويسعدك ،
ونسأله تعالى أن يجعل كل أيامنا
أفراحاً ومسرات .
ومؤكد سوف تزدهي قاعة الجوسق بتشريفكم لنا ومشاركتنا
الفرحة بهذا الزواج والذي ندعو المولى عز وجل
أن يجعله مباركاً ، ويلم العروسين في خير دائماً .
| Quote: وانشاء الله بعد تسعة شهور واسبوعين نحتفل بي عبد الحليم الصغير (الحفيد) |
أيوه ، وكمان امكن قبل كده بشهرين ؟ يعني إمكن بعد 7 شهور وإسبوعين !؟،
لأنها هي نفسها مولودة في الشهر السابع ، ( يعني بنت سبعة) ، وساعتها
إمكن تعملها (وكما تدين تدان) ووقتها يا خوفي من اللقب الجديد ( جدو ليمو ) ؟!
وصدقني .. زمان كنت (بتريق) على أصحابي ممن نالوا لقب (جدو) ، هسع
الحكاية جاتنا لحدي عندنا ، وبقينا مرشحين لنيل اللقب الجديد (جدو) .
يا ساتر يا رب .
وفي إنتظاركم أمسية الأربعاء بإذن الله .
لك مودتي وتقديري ،،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: DKEEN)
|
أخي دكين ،
لك تحياتي ،
شكراً على المرور والمباركة ، وربنا يتمم على خير .
إنت يا الأبيض ضميرك :
| Quote: فرصة ذاتوالواحد يشوف ليهو عروسة عندها ضمير.. |
وحتماً بكم تزدان قاعة الجوسق وأنتم (تفنجلون)
عيونكم بحثاً عن شريكة الحياة .
وأبشِّــرك سوف تجد ضالتك بإذن واحد أحد
وسوف يكن كثيرات للدرجة التي تجعلك
تدعو معك الثنائي العظيم ، نوارة شباب بورداب
الرياض الأخوين (تمبس ومعتصم) للبحث لهما
عن شريكة حياة تؤانس وحدتهما في صحراء
حياتهما في قاحل هجير الرياض هنا !!
وفي انتظاركم بالأربعاء لتكتمل بكم الأفراح والليالي الملاح .
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: abdulhalim altilib)
|
( جدو ليمو )
من هسع أنا لا دفعتك لا قريت معاك في حي عبد المنعم ولا الخرطوم جنوب
ولا الخرطوم الجديدة ولا حاجة
مالك عايز تكبرنا ؟؟ إنت طبعا اتزوجت صغير بس ما( جاهل )
قرط على كده وبس !!!!!
مبرووووووك ومليون مبروك وربنا يتمم ليهم على خير ويرزقهم
البنين والبنات الصالحين والصالحات وبيت مال وعمارات ومهندسين
ومعمورة كمان وسنكون حضورا بإذن الله أنا والوالدة طبعا الأولاد في
السودان لزوم الجامعة وكده ...
باقي ليك الجوسق بتشيل ؟ إنت أصلك إجتماعي وأخو أخوان وناسك كتار
ماشاء الله على كل حال نحنا حنجي بدري ونحجز مكانا00
تهانينا مرة أخرى أخي ليمو 000
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: عادل جبارة)
|
أخي العزيز ود جبارة
لك التحية والمودة والتقدير ،
وجزيل الشكر على التهنئة ، ومبروك علينا كلنا ، وربنا يتم على خير ،
ونسأله جل وعلا أن يجعل أيامنا وأيامكم وأيام كل الأحباب سعادة وحبور
ويجمعنا دوماً في ساعات الخير وأوقات المسرات .
Quote: مالك عايز تكبرنا ؟؟ إنت طبعا اتزوجت صغير بس ما( جاهل )
قرط على كده وبس !!!!! |
( أضاعوني وأي فتىَ أضاعوا .. ليوم (عرسٍ ) أو طعان (حفلةٍ) !
وهذه من حسنات الزواج المبكر ، أن يجعلك تحوز - ضمن ما تحوز -على اللقب العالمي
(الجدودية) في وقت مبكر ، ولكنك من جانبٍ آخر تخسر كل فرص المباهج
المتاحة للشباب من رقص وغناء وماشابههما (بس طبعاً الرقص المهذب والغناء الطالع ، مش الهابط) !
وحكاية صغير دي تجعلني أتذكر حكاية حصلت معنا أثناء عودتنا من شهر
العسل من القاهرة أنا وزوجتي (بس ما تقول لي متين ؟!) مررنا في
طريق العودة (عبر مطار بورتسودان) بمدينة كسلا والتي مكثنا فيها زهاء
الاسبوع . وفي إحدى جولاتنا مع أقاربنا هناك في جبل التاكا ومياه توتيل
صادفتنا إمرأة طاعنة في السن ، وعندما شاهدت زوجتي (العروس وقتها)
هجمت عليها سلام وتهنئة بالزواج ، ثم سألتها : أين زوجك بين أولئك
الشباب .. وكنا أمامهن بعدة أمتار ، فأشارت لها زوجتي ناحيتي ،
فعلقت العجوز قائلة : حلاتو ، لكن ما صغيـِّـــر ؟!!!
ومن يوميها وأنا (مقرِّط ) على كلام تلك العجوز ، وكل ما جات سيرة
العُـمُــر ، أقول لزوجتي : لدي شهادة معتمدة من إمرأة خبرة في
الحياة أفتت بأنني صغير ، وماعندك كلام معاي بعد ده .! شفت كيف (التقريط) !
وسوف تزدهي قاعة الجوسق بوجودكم في معية والدتنا جميعاً ، ربنا يحفظها
ويديها الصحة والعافية وطولة العمر . ونسأل الله أن يديم الأفراح
وإن لم تسع قاعة الجوسق الحضور الكريم فسوف تسعهم قلوبنا ، وسوف نحملهم
في حدقات عيوننا ونشيلهم فوق راسنا ، إخاءاً ومحبةً وتقديراً وتجلة ً .
وربنا يتمم على خير .. وفي إنتظاركم لتكتمل بكم بهجتنا ومسرتنا .
مع مودتي وتشكراتي ،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: معتصم دفع الله)
|
أخي العزيز معتصم ،
لك مودتي ،
الله يبارك فيك وفي كل أوقاتك ، وأن يوفق
العروسين في حياتهما ويجعل بيتهما ذاخراً
بالعيال والمال .
كما ونسأله جل وعلا أن يسهل طريقك لمغادرة
دنيا العزوبية عاجلاً وأن نسعد بك ونفرح
ونحن نشوفك مُجَرْتك وفوقك الحنة والضريرة
ونغني ليك يا عديلة يا بيضا ويا ملائكة سيري
مع ود دفع الله .
شكراً لك أخي الغالي ، وربنا يتم على خير .
وإلى الملتقى أمسية الأربعاء بمشيئة الله .
لك تقديري ،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: حاتم هاشم)
|
أخوي ود هاشم  حاتم) ،
لك معزتي وتقديري ،
الله يبارك فيك ، وشكراً على هذه التهنئة ،
وندعو معك لهما بالرفاء والبنين ، وأن
يجعل الله كل حياتهما خيراً وسعادة ، وأن
يمد الله في الآجال حتى نرى أولادهم ، وياحبذا
كمان لو شفنا أحفادهم .. مش خلاص دخلنا
منطقة(جدو)!؟ ، واقتربنا من حمل اللقب إياهو ؟!
اذن مرحباً بـ ( ليمو) الصغير ، وبذاك اللقب
الذي يجلب معه الزهايمر / باركنسون !
وقول معاي يا ساتر ، وربنا يديم الصحة والعافية
على الجميع ، وكذا السعادة والهناء .
شكري لك بلا حدود ،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: نجوان)
|
الأخت الفاضلة نجوان
يباركو ليك السمح أختي ، وشكراً على الطلة والمرور
للتهنئة ، وربنا يسعدهم ويبارك لهم في حياتهم .
وفعلاً فرحة الأب بإبنته العروسة شعور لا يمكن وصفه ،
حاجة كدة ، أو كما قال ودسيدأحمد على لسان هاشم صديق :
حاجة زي ما تكون محلق ..
في العواصف .. فجأة تهبط للسكون ..
حاجة زي نقر الأصابع ..
لما ترتاح للموسيقى ..
حاجة زي أخبار تناغم في جريدة ..
حاجة زي وتر المواني ..
لما يصدح لي سفينة ..
لك مودتي ،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: ajaj)
|
الأخت العزيزة بت عجاج ،
لك تقديري ومودتي ،
الله يبارك فيك وفي أيامك ،
ويحفظ ليك (يوسف) ويسعدك معاهو .
وربنا يسعدهما ويرزقهما من وفير المال
وصالح الذرية .
والظاهر نحنا عجّـزنا قُبّّال يومنا ، وبرَاي
سوّيتا في نفسي قلبي (الوافق) وماواعي .
وحيث أنه لابد مما ليس منه بدٌّ ، إذن لا داعي
للسكلبة ، فمصيرنا والحال هكذا أن نصبح
(جدود) .. و جدودنا زماااااااان .
وحقك في العزومة محفوظ ، وسوف نقدمه مناولة
لأخينا ود الفاروق ليوصله لك وحواليه رتوش من
(المخلل)ً ، بس أوعه يخمك وينوم بالمخلل ،
ويقول ليك (يطرشني ويعميني) . !؟
تحياتي ومودتي ،
جِد المستقبل :
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: ايهاب نميري)
|
أخي العزيز ايهاب نميري
تحياتي لك ،
وربنا يبارك فيك وفي العرسان ، ويتم ليهم على
خير ، وبيت مال وعيال ، وعقبال لمن لم يتأهل
من إخواننا/أخواتنا في حوش بكري وخلافه أن
ينعم الله عليهم بالنصف الآخر فيعيشوا في سعادة
ووئام ويخلفوا بنين وبنات مع وفرة في الدينار.
| Quote: ونحنا موجودين في الخدمه |
شكراً ليك كتير أخي ، عارفك أخو أخوان ، وما بتقصِّــر تب ،
ودي المحرية فيك . نتمنى حضوركم وتشريفكم ليزدان بكم الفرح
فالعهد بكم تجلبون البهجة والسرور حيثما حللتم .
فإلى الملتقى في رحاب الجوسق حيث الفرح يرفرف بجناحيه محتفياً
بالعرسان .
سلمت أخي ود نميري .
مع مودتي ،
( ليمو )
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: يوسف السماني يوسف)
|
زمراوي الولي يحيي العروسين وابويهما
زغرودة فرح ومبروكين
زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين
زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين زغرودة فرح ومبروكين تحياتي
يمكن نجي لكن اذا أكدتو لينا انو حيكون فيه غناء نوبي ولا ساي نطيط عرب بس ونكون ما فاهمين حاجة... ولو في الصالة المغلقة ديكا امنعوا التدخين وخلوا الشاشة شغالة في الصالة التانية عشان عندنا ونسة تقيلة بيبرا طبعا مع عواجيز سودانيز اونلاين... مش كدا يابن عمي؟؟؟ طبعا حيعرف نفسو براهو...
| |
|
|
|
|
|
|
|
|
|
Re: من أفراح الرياض : زواج إبنتي (هيام) بالأربعاء ، فهلا شاركتمونا الفرحة؟ - (ليمو) (Re: محمد زمراوي عبدالعزيز)
|
عزيزي وأخي ود زمراوي ،
نضيف إحساسنا لي بُكرة ..
يا بُكرة .. يا بكرة ..
يا بكرة الغصن ناشف ..
يا بكرة الفرح يوماتي ..
بيكاتل حُزن أطفال ..
بتتشابا عشان تعرف ..
شنو الفي إيدنا لي بكرة ..
شنو الداخرنو للسكَّـة ..
جعل الله كل أيامك زغاريد أفراحً ، ومتعك بالصحة والعافية .
وبارك الله لك في أيامك وقيض لك السعادة فيها دوماً .
شكراً على عميق التهنئة ورقيقها ،
وطالما الخال (حمزاوي) موجود فأكيد سوف يكون
عامل حساب الغناء للناطقين بالعربية المطعمة
بالتركين ومحلاة بطيبة وصدق إخاء أهلها .
تعال يا سيدي وشرفنا بحضورك الكريم ، وسوف يطربك المبدع مرزوق حتى الثمالة .
معزتي لك ومودتي ،
( ليمو )
| |
|
|
|
|
|
|
| |
abdulhalim altilib
عمر الفاروق
Khalid Saeed
saif massad ali
خالدة البدوي
garjah
علاء الدين حيموره
ابو جهينة
عبدالمحمود محمد عبدالرحمن
امير عوض الجمري
ghariba
JAD
د.محمد حسن
Muna Khugali
حيدر حسن ميرغني
معتصم دفع الله
نيازي مصطفى
خضر الطيب
حاتم هاشم
SAdo7
ايهاب نميري
ajaj
إسماعيل وراق
نجوان
أبو الحسين
أبو ساندرا
abuguta
يوسف السماني يوسف
محمد زمراوي عبدالعزيز
سيد محمد احمد سيدنا
فيس بوك
تويتر
انستقرام
يوتيوب
بنتيريست