|
البانتومايم الزوجي (( مسرحية ممكونية يومية ))..!!
|
البانتومايم فن تمثيلي راقي صامت..يعتمد فيه الممثل على الإشارات و الإيماءات دون الحوجة للغة حوار أو ديالوج. يعود أصل كلمة بانتومايم الى اللغة الإغريقية، وهي مشتقة من كلمتين: (Panto) وتعني كل شيء و(Mimeomai) وتعني أقلِّد، ومن مجموع هاتين الكلمتين إنبثق مصطلح البانتوميم أو فن التمثيل الإيمائي الذي يعني فن التقليد أو فن المحاكاة لكل ما تحتويه أضرُب الحياة.
|
|
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
الخرس الزوجي هو حالة تنتاب كثير من المتزوجين بعد إنقضاء فترة شهر العسل..و في أحسن الأحوال بعد الأربعين... !!! و فيها يكون الزوج أو الزوجة (( عشان ما أكون منحازة )) متحدث لبق خارج حدود المنزل لكنه أخرس و أصم و أحياناً أعمى..داخل أسوار المنزل. مع ظهور الموبايل أو الجوٌال أو المحمول..تكوٌنت أنواع جديدة من حالات الخرس الزوجي. إضطر فيها كل أفراد الأسرة إلى إبتكار إسلوب جديد للتخاطب, و تطورت هذه الإبتكارات حتى أدٌت إلى ما يُعرف ب (( البانتومايم الزوجي )).
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
المشهد الأول:-
يجي الزوج داخل بيته و في إذنه سماعة الموبايل و هو يتحدث بكل لطف مع صديق. تعترض طريقه الزوجة لتسأله إن كان قد أحضر دواء القُحة لولده المحموم من امبارح ..يرد عليها بإشارة لأ لأ و هو يرمقها شزراً . تبرطم الزوجة متذمرة فيشير بإصبعه إلى فمه ثم إلى الموبايل بغضب ..يعني (( إتكتمي أسكتي ..ما شايفاني بتكلم في الموبايل ؟؟!!)).تتحرك الزوجة بإتجاه المطبخ و تعود بصينية الغداء و تشير بيدها للأكل و هي تبرطم و لسان حالها يقول (( .!!!!...))) أترك لخيالكم العنان..لتخيل البتكون قالتو شنو!!! يتقافز حوله أطفاله.- بما فيهم أبو حمى داك - يحاول ملاطفتهم و مداعبتهم بينما يصرخ مع محدثه (( و الله يا فضل الله..الشيك ده ما يتغطى...بيني و بينك القانون )). يرتبك الأطفال لكنهم يواصلوا تقافزهم و بعد كده يترصو معاهو حول الصينية و كلما حاول أحدهم الكلام إنتهره والده بنظرة حادة وتشويحة يد ...بينما يواصل الوعيد و التهديد مع محدثه .تتحول المكالمة – فجأة - إلى ونسة فيضحك ل نكتة حكاها مُحدِثه . يتشاكل إتنين من الأولاد مع بعض و يعلو صوتهما ..لا تكفي النظرة الحادة فيعاجل كل منهما ب لبعة في ضهره بينما يواصل الضحك و القرقرة..يبكي الأصغر في صمت و هو يشير – صامتاً – إلى رأسه ثم يد شقيقه..(( يعني فلان ده ضربني في رأسي في الأول)). يتحنفش الأكبر و هو يشير بإصبعه للسماء ثم إلى رأسه..(( يعني و حياة الله هو الضربني في الأول)). تشير الوالدة إليهما مع زمجرة و همهمة و تضع أصبعها في فمها ثم تطرقع أصبعها عدة مرات زي كأنها بتبشر في عريس ..(( يعني خلاص أسكتوا..دايرين تتلبعوا تاني؟؟!!)) يرن صمت مطبق على المكان بينما يواصل الزوج الضحك و القرقرييب.
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
المشهد الثاني:-
تنتهي المكالمة الطويلة مع إنتهاء الوجبة . يتشعلق كل الأطفال في عنق والدهم بما فيهم أبو قحة و حمى داك. يذكرونه بإنو الليلة الخميس و هو وعدهم يمرقوا يتفسحوا. يرن الموبايل قبل أن يتسنى له الرد على اطفاله...يرد على الموبايل و هو يشير إلى قميصه و يمرر يده على سائر جسده (( يعني أمشوا ألبسوا هدومكم )). ينشغل هو بالمكالمة بينما ترتب أمهم عملية إستحمامهم و إلباسهم . تلتفت إليه و هي توصد أبواب المنزل و تشير إلى محفظتها ثم تضع سبابتيها جنب بعض ثم تشير إلى العربية (( يعني عايزة أودي قروش الصرفَة لأختي ))..يرد ب هزة من رأسه علامة الموافقة. يركبوا العربية. ما زال الأب في حالة كلام بالموبايل و الأطفال في حالة صمت مطبق و الزوجة تتلفت محتارة . تتحرك العربية و تتجه ناحية الحدائق . تشير الزوجة غاضبة و تلوح بيدها ناحية الخلف...(( يعني إنتَ ماشي وين؟ أختي ساكنة في بيت المال )) . لم يفهم ما تقوله فبدأ يلوح بيده (( قلتي شنو ..أنا ما فاهمك )) ما بين إشاراته و إشاراتها...العربية قطعت كوبري شمبات و ضاع مشوار بيت المال...!!! مافي داعي نحكي أكتر من كده...يتخيل لي الرسالة وصلت.
دخلتوا المسرحية دي قبل كده ؟؟!!!
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: Tumadir)
|
تموضُرختي.. مشكووووورة يا ستي على اللينكات و على المتابعة. اللنك الأول: الراجل ده بياكل في تفاحة جد جد و لا لسانو طويل!!! اللنك التاني: المسرحية دي إحتاجت لبروفات مكثفة...عمل رهيب جداً جداً.
يللا يا ستي - بما إنك متخصصة مسرح ممكوني و لا ممكوني عاوزين لينا مشهد سيزيفي بانتومايمي مدنكل!
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: رشا سالم)
|
Quote: ردي سريع عليك الله عشان ما نجهجه الزول ده |
يعني (ضااااامنه) انو لو في جهجهة فهي (في كل الأحوال) من نصيبه وحده. بالله شوفو.
في طرفه قديمه يا رشا بتقول انو واحد سألوهو عن العزوبية والزواج قال ليهم لما كنت عزّابي كان عندي عشره قمصان و كل قميص فيهو زراره واحده وبعد ما اتزوجت بقى عندي قميص واحد فيهو عشره زراير.
انشغالنا البانتومايمي الماعجب ممكونه ده لأننا بنلهث عشان القميص الفضل لينا ده ماتبقى فيهو زراره واحده.
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: محمد المرتضى حامد)
|
Quote: حالها يقول (( .!!!!...))) أترك لخيالكم العنان..لتخيل البتكون قالتو شنو!!! |
زمان يا ممكونة بتذكر خالتي بتقول لاي واحد فينا يستهبلها ( ده ابو الامور)
دحين زولتك دى بتكون قالتها لزوجها بدون شك .
والله يا ممكونة اختى كلامك بتاع البانتيومايم ده واقع معاش انا ذاتي مسويهو مع بت عمى شامة .
تحياتي
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
Quote: الممكون قال ليك لو ما إتعرفت قصة (( قواسيب )) دي .. لاقيهو مَشمٌر بره البورد ! |
ممكون بي جهة .. وناذر بجهة ! إنشاء الله في ال week end حأشوف الموضوع دا ! عليك الله سبتي لي ممكون دا شوية ، وقولي ليه الزول دا يتيم وأمه متوفية ! وبعدين يااخوانا ناقل الكفر ليس بكافر ، أنا بصراحة شفيت من أبو الحسين قايلو كتاب وفاهم تراهو وداني الآخرة !!
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
يا ممكونه وصابره
الظاهر عليك كملتي كلام ابو الولاد قبل العرس ننصح بالحب بعد الزواج لمحربة البانتومايم ده سطر جديد, شوفتا قبل 9 سنوات فلم صامت لمدة ساعتين اسمو sidewalk stories حقيقي رهيب..احداث رهيبة و دراما و الكل صامت انجزاب للآخر لحدي ما تنسي انو الفلم صامت وفجاءة ينتهي الفلم و تنبعث الموسيقي التصورية ترجعك للواقع و تفهمك انو كل الفلم دا كان صامت....رهيب جدا
والغريب في الامر انك بعد الفلم تجد نفسك صامت ولا تطيق الكلام و لا تحب تسمع صوت.
الله يوعدنا بحالتك دي و اجد زوجة تجيد وتتفهم فن البانتومايم
تحياتي...وبوستك اكتر من روعه و مثير و مدهش
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: eyes of liberty)
|
سلام يا ممكونة
البانتومايم الزوجى تعبير ما سـليم . السـليم (بانتومايم الزوج) الذى تم إخراسـه تمامآ بالنقة المتواصلة والطلبات والتعليمات اللانهائية . يعنى ده فى حقوق الإنسـان يعرف (بتكميم الأفواه) ويدخل فى بند المصادره للحريات ,
ويا رشا أمسـكى قوى وإسـتعجلى عشان كان قرا البوست ده بزوغ هو
سلام
رأفت
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: رأفت ميلاد)
|
Quote: بالنقة المتواصلة والطلبات والتعليمات اللانهائية |
يا رأفت يا خوي.. كل القلته ده بيحتاج ل كلام لا ليهو أول و لا آخر..
النقة المتواصلة...يقابلها...حوار متواصل أو - كالعادة- نقة مضادة. الطلبات....يقابلها...تنفيذ للطلبات أو - كالعادة- مراوغة و مزاوغة و كواريك. التعليمات..يقابلها...تنفيذ للتعليمات أو - كالعادة- تنفيذ لعكسها.
حسي الخَرَس و البانتومايم..موقعو وين؟
و حسي المتجندر إنتَ و لا تماضر؟؟!!!
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
ممكونة يا رايعة .. والله يصبرك ويصبرنا
كل واحد بيقر إنو بانتومايمي، فرقو من البقية إنو شجاع وإعترف.
مسرحيتك رائعة .. الفكرة معاشة بس السرد فنان
مرة واحد جاء داخل البيت زي صاحبنا ده، والموبايل في أضانو وأثناء كلامو مع (الطرف التاني) يقول كدة الموبايل يرن
هسة غلطان هو واللا الموبايل الما عندو ذوق؟؟
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: محمد أبوالعزائم أبوالريش)
|
خالتى ممكونة الفايتنها بالصبر البانتومايمى
لك كثير الود والتحايا
إينما حللتى أتيتى بحدائقك المزهرة وما هذا البوست إلا حديقة وارفة الإزهار البوست فى غاية الروعة والذكاء
سأتخيل الموسيقى التصويرية فى المشاهد السابقة
مخرج
البانتو نافيقيتر قادنا فى مدينة الضباب الى ومضة سبقتنا بأيام .. شفتى الحظ عندما يكون كدقيق إدريس جماع
عبدالعزيز خطاب
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
يابتي
Quote: العرس ده زي حبوب الكلوروكوين يصرفوهوا ليك وبالغصب تقرشه |
كلام شنو دة .. دييل ناس مودريين ساي .. وحاسديين ما عايزنك تضوقي عسل الدنيا زيهم ...؟؟ ما تسمعي الشائعات المغرضة دي...وبالذات من المولانات زي عادل ما شايفا صورتو مجضم كيف اها لو ما العرس كان بقي كده والا كان اصلو عرف النت وسودانيزاونلاين لانو بتو هي العندها الكمبيوتر والنت وهو مستولي علي كمبيوتر البت .. يعني لوما العرس كان لقي كومبيتر كيف ... قال عرس الكلوركوين قال !! ما سمعتو عرس ارالين ولاريام وكويندكس وكوينرفا( اها يا مولانا دييل لا في القانون الهندي ولا الانكليزي ولا نيانيام ؟ ) ؟؟؟ ؟؟؟
ختي الرحمن في قلبك وعرسي كيتا في دييل كلهم وان ينصركم الله فلا غالب لكم او كما قال
يدييكم العافية
ابوبكر
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: abubakr)
|
Quote:
تنتهي المكالمة الطويلة مع إنتهاء الوجبة . يتشعلق كل الأطفال في عنق والدهم بما فيهم أبو قحة و حمى داك. يذكرونه بإنو الليلة الخميس و هو وعدهم يمرقوا يتفسحوا. يرن الموبايل قبل أن يتسنى له الرد على اطفاله...يرد على الموبايل و هو يشير إلى قميصه و يمرر يده على سائر جسده (( يعني أمشوا ألبسوا هدومكم )). |
لا حولااااااا يعني مزيدا من الأجيال التى تتعاطى التعامل بصمت و مزيد من الزوجات التعيسات مستقبلا كملي ما تتأخري في انتظارك
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: منى أحمد)
|
Quote: يعني مزيدا من الأجيال التى تتعاطى التعامل بصمت و مزيد من الزوجات التعيسات مستقبلا |
العزيزة منى.. كنت لأوافقك الرأي فيما يختص بالزوجات التعيسات.. إلى أن فاجأني إتصال من صديقة قرأت ما كتبته و كان ردها..
(( أحسن ليٌا ينشغل بالموبايل و يكون التفاهم بيناتنا بانتومايمي..مما يتفرغ ليٌا و يسٌمعني كلام دُراب دُراب !!!!
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: abubakr)
|
شفتى يا ممكونة انا مرات فى تعابير بيقولوها الخواجات ديل بفتكر انها فى "التنك" ...يعنى تمام!!
حسى اتأملى معاى التعابير دى
mother tongue و
father image
يعنى بالمفتشر كده ..الام ادوها اللسان ادوهو للام ...والابو ده ..جماد ساى
اها تاريكم خامننا وفى الحقيقة كلكم طلعتو single mother
كان متزوجين ولا مطلقين ..ياكم single mother
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
ازيك يا ممكونة
شوق شديد والله
كمان جابت ليها خرس ، بعد شغل السخرة دا ؟
يمين الله الراجل دا لو ما كان بضحكني بالقرقراب مش تبسما يومياً كدا سبعة تمنية مرات في اليوم ، الا اطلقو طلاق تلاتة ولا اخعلو خلعة تقطع خلفو
قال خرس زوجي قال ؟
الف شكر يا ممكونة دي الذ حاجة اقراها من شهور وعلى فكرة ما قاعدة اقرأ زاتو ( وش بكاوي ومادي لسانو ) لا بالجد كدا بوست دمه شربات بس
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
والله انا حامد شاكر ربنا الواهب العادل كثير كثير ... لسبب او اخر وانا اليوم كهل ما تعرضت لحاجات زوجية بقرا عنها في الكتب والقصص والمنتديات وزمانك كنت بستغرب لما اشوف كاريكاتيرات صلاح جاهين وجورج ومصطفي حسين وخلافهم راسميين الزوج ململم بنطلونو وشايل جزيماتو في يدو ومتسحب داخل البيت وزوجتو - ودائما كانو بيرسموها وكانها سيد قشطة وعيونها كشافات المطار- شايلة قبقاب (كركب يااهل الوسط )ومتحكرة وراء الباب راجياهو والباقي اكيد يتعرفو ... وكمان فيلم سي سيد ما اقنعني رغم شهرته .. يعني هو مين سيد ده قاطع نفس الزوجة والعيال في البيت و حايم علي حل شعرو .. ليه .. وبعدين حكاية "الجماعة" او "الاولاد" حتي لو الزوج ما عندو اولاد وهو وزوجتو فقط في البيت او الدنيا ... ليه المسميات دية ايه ما سامية؟ وليه ما ابوبكر؟ وانتهي الموضوع .. ما تقولو بربري ما عندو دين زي ما كان بيسمينا ابو عاج سئ السيرة والله ود شيخ طريقة وملتزم بكل القوانيين الارضية والشرع ولم اجد فيها حكاية الكركب ولا سي سيد ولا الجماعة كلها(الشرائع والقوانيين) بتقول عكس داك... عموما علي مسئوليتي انا ربيت بناتي وولدي علي كدة كلنا سوا سوا ومافيش سي سيد ولا صاحبة الكركب ولا ابو موبايل العندو حديث الطرف الاخر اهم من صبوحتو مراتو حبيبتو شريكتو ... واية واحدة تتعرض لمثل ما ذكرته ممكونة فلتلقي بالموبايل في اية خور والماعجبو ما يتغدي ..هو اكل ومرعي وكمان لغة اشارة ؟؟...وبعدين اهو التسميات هي البتساعد ابو موبايل في شغل الاشارة والبنتومايم يعني يابتي/اختي ممكونة ما يمكن حكاية انك ممكونة خلتو يستمر في شغل الاشارة ويحرد الكلام وبيقول في نفسو ما هي راضية وممكونة ..سمي نفسك "الغضب الساطع" وشوفي لوما قفلتي اضنيكي بالمخدة عشان تعرفي تنومي وهو بيلعلع ليل نهار.. كلام ساي بدون موبايل
لكم مودتي ابوبكر حاشية: يا رافت الكلام البخسك بس تقراه وكذلك يا مولانا
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: abubakr)
|
ممكونة سلام
والله كتابتك سمحة باللحيل ... لكن ... عنوانك البشبه عناوين هشام هباني دي خلتنا ما ندخله إلا بعد أن حدثني عنه صديق ... عليك الله أكتبي عنوان لا تشوبه الريب ( يعني هسي البانتومايم الزوجي بتاعك دا ما ود عم الكندومات بتاعت هباني عديييييل كدا ) ... بالله لا دعي للتضليل .
لك الود والإحترام
واصلي كتابة دون تشويش ... وتجنبي ما يريب إلى ما لا يريب .
شكراً ... ممكونة
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
Quote: Quote: الممكون قال ليك لو ما إتعرفت قصة (( قواسيب )) دي .. لاقيهو مَشمٌر بره البورد !
ممكون بي جهة .. وناذر بجهة ! إنشاء الله في ال week end حأشوف الموضوع دا ! عليك الله سبتي لي ممكون دا شوية ، وقولي ليه الزول دا يتيم وأمه متوفية ! وبعدين يااخوانا ناقل الكفر ليس بكافر ، أنا بصراحة شفيت من أبو الحسين قايلو كتاب وفاهم تراهو وداني الآخرة !! |
سلااااااااااااام عموم ديار بتنا الممكونة...
الحقيقة ما كُت داير أجي بي هنا مقبوض في قُوالة...
لكن أسوي شنو... الدكتور عادل إستجار بي علي الممكون...
فقلت أجي أوضح وبعدين أجي راجع للحكي التاني...
يا اخواننا قواسيب دي معناها...
قواسيب دي... جمع قِيسَاب... وهو كُوم العيش أو القمح أو الفول في التَقَة...
أها التَقَة دي فهمتوها ولة برضو أشرحها ليكم؟؟؟
وإنشاء الله أكون أوفيت المعنى... وما تجيب ليها شمِّير وعكاكيز...
قواسيب مودتي... لصاحبة البوست ولعادل أخوي والممكون المشمر وإنشاء الله يكون فك الكفكَفة بتاعتو خلاص...
أبو الحســـــــــــــــــين...
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: أبو الحسين)
|
Quote: شفتى يا ممكونة انا مرات فى تعابير بيقولوها الخواجات ديل بفتكر انها فى "التنك" ...يعنى تمام!!
حسى اتأملى معاى التعابير دى
mother tongue و
father image
يعنى بالمفتشر كده ..الام ادوها اللسان ادوهو للام ...والابو ده ..جماد ساى
اها تاريكم خامننا وفى الحقيقة كلكم طلعتو single mother
كان متزوجين ولا مطلقين ..ياكم single mother |
وقمتى كدة يا تماضر وإتجندرتى علينا
الراجل image؟؟؟
طبعآ الحالة دى جاتو بعد ما عرس بيوم يا mother tongue
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
Quote: أبو الحسين... إنشالله ما نجرجر ليك عزيز في قوالة.
لكن... الممكون قال ليك كان ما وريتنا (( التَقَة )) دي شنو..
لاقيهو إنتَ!!!!!! |
اللللللللللله يجازي محنك والممكون ومولانا عادل معاكم...
أنا ماااااااااااااالي ومال الشِبَك دي...
زي ما قالو جيت أكحلها عميتها...
أها يا أختي... التَقَة دي هي أرض مسطحة مدكَّكَة بيدقوا فيها العيش والقمح والفول وبعد ما يدقوهو وينضفوهو يكون مجموع قواسيب قواسيب...
وفي ناساً لينا في الشايقية بيسموها برضو (البَرَازِي)... بس أوعك تقول لي مولانا قال ليك لازم توريني البرازي دي شنو؟؟؟
البرازي تعني التَقَة... بروايةٍ أخرى...
ولك وللجميع قواسيب مودتي...
أبو الحســـــــــــــــين....
| |
|
|
|
|
|
|
Re: البانتومايم الزوجي (( مسرحية ممكونية يومية ))..!! (Re: mamkouna)
|
يا اخوانا ما الشغلانية واضحة قدام عيونكم..مادايرة مصباح ديوجين.. اذا كان الحب اعمي فان الزواج نظره (ستة على ستة)..! وزمان اهلنا الكبار قالوا: السعيد يشوف في اخوهو والشقي يشوف في نفسو.. دوروها في راسكم وحددوا الفئة التي تودون الانتماء اليها.. اما انت يا (الممكونة).. فاروع ما في الموضوع اسمك الذي يتماشي مع الموضوع بشكل مبالغ فيهو ويلخص حالة الوضع الغارق في (التمكن)..وليس (التمكين)..باختصار (اسمك) هو قمة الحبكة الدرامية في الموضوع كلو.. بالله دا جا كيف..؟؟ حليمة
| |
|
|
|
|
|
|
|