|
عرس الصقر من الحمام أكبر حرام..قصيدة حلمنتيشية
|
دي قصيدة حلمنتيشية عن قصة شاب قالوا حبيبتوا(بنت العشرين ربيع) خطفها منه رجل مسن عمرو ستين سنة
وللمبالغة ذكر الشاعر (ثمانين سنة) ..
لا أدري من هو الشاعر...المكلوم في حبيبته
عشرين سنة.. شن جابا للتمانين سنة!! شن جاب شجرة القرضة جنب السوسنة يا عمو جاي كايس العرس؟؟ بيتك أنيق في الإمتداد عربية بيجو ومرسيدس !!قايل الزواج حزمة قروش؟؟ ..عربات وحوش? وللا التياب وللا الزفاف
وللا الفساتين و النفوس??!!
كل السعادة الفي الزواج .. الريدة بس..
والباقي في حكم العدم
ناس الرطوبة الفي العضام والسكري المليون صليب يا عمو كملت السمك..
عاوز كمان تشرب حليب؟؟ يا عمو لا يا عمو عيب
يا عمو بتك قدرها!! ويمكن تكون.. أكبر كتيير من عمرها!!
حتقول شنو لمن تجيك وتكلمها!!
حتقول:
زمااااان كيلو اللحم كان بي قرش!!
والسكر الراس بي قرش..
والويكة مفروشة في السوق بالبرش!!
عقلك يعود للماضي من تمانين سنة..
تحرم مشاعر خضرا دابا ..
تشقي البنية وتحرما يا عمو عيب يا عمو لا
حتعيش معاك..
زي راهبة بس في جوه دير
ويمكن تخونك يا ..عوير
وأسمع كمان ..يا دون جوان
يا قيس ويا عمر الشريف خليك حريف.. وريني ..شن جاب الربيع واخر الخريف؟؟
يا عمو أحسن ليك أمسك الدرب العديل
وأبني جامع وإستبالية
خلي القريشات تبني جيل
وأعمل عمل خير ينفعك قبل الرحيل..
ويا عمو..
لو عايز تحج ..أحسن تحج وشوف صلاتك والصيام
وأعرف تمااااااام ..
عرس الصقر من الحمام أكبر حرام عرس الصقر من الحمام أكبر حرام
|
|
|
|
|
|
|
|
Re: عرس الصقر من الحمام أكبر حرام..قصيدة حلمنتيشية (Re: شهاب الفاتح عثمان)
|
الغالي د.شهاب الفاتح
أستمتع كثيرا بقراءة وحفظ الأشعار الحلمنتيشية
وموعود بــ( سيد اللبن)..
ودي كمان قصتها قريبة من القصة اعلاه
لكن هنا المشكلة مع سيد اللبن الذي يقابل المحبوبة ويسلم عليها في حين لا يستطيع الحبيب فعل ذلك!
فما كان منه إلا وأن كتب:-
إنشااااااء الله يا سيد اللبن ما تنفعك..
تاريك تجيهم كل صباح والشافعة تلمس أصبعك
... ... ...
... ...
دمت..وسأكتبها وأتمني أن تسعفني الذاكرة
| |
|
|
|
|
|
|
|