|
كتب الكاتب الفاتح جبرا المتوفرة بمعرض الدوحة
|
|
 Re: تسافر الحبيبة .... تنبت أشجار الحســـرة (Re: أسامة معاوية الطيب)
|
ها أنذا احترق وأدفن أصابعي في رماد القلب
البيت قفر ... كل حكايانا ... صوتها ... ضحكتها الصاهلة ... أسئلتها الطفولية ... رائحة المطر عبر النافذة ... الدب الصغير الذي يربض بجانب الوسادة ... الذي علمني الغيرة ... الثلاجة التي ضاعفت برودتها على فراغها
كلها تمد لسانها صوبي
أتكوم في حصيرة من أمل مهتوك
أتمنى ... قاس هذا التمني حين يعرف حوجتك إليه
رائحة الحناء ... رائحة الطبيخ النص نص ... ومرات الكعب ... رائحة محاولات صنع الحلوى ... ورائحة ضحكاتي الساخرة من تجارب المطبخ ... كلها الآن تعلق بطرف عيني فلا أري سوي الدمع
الحبيبة هذي تجربة مهلكة
تجربة تفتح بابا من إلف غريب وتغلق نوافذ من وطن وبيت وشعر
وتفتحها كلها في لحظة واحدة
إطار الصورة يتراقص على حزن واضح
والصورة لا تقوى على انكسار عيني فتغيم في سحاباتها
يا إلهي
كل هذا وأنا لم أبدا بعد ؟
إذن
| |
 
|
|
|
|
|
|
|
|
Re: تسافر الحبيبة .... تنبت أشجار الحســـرة (Re: أسامة معاوية الطيب)
|
عساك طيّب
يا سيد الكل أيا حبيّب
عساك طيب
عساك قدر الغنا النبّص أصابع حرفي واترجّاك
تقيف بين دمعتو وضحكك عشان يلقاك
حنين الصِح
وكت توقد قوافيك فيهو سهراجة
ويغيِّبك وحين فوقة مساديرو بتكونولو الروح
ويستغفر قدر حبّك .. قدر ماغنّى يحلفبك
يلاقيك في سما الخاطر قريّب منّو من بوخ شهقتو
ودمعاتو
يكتبلك بآهاتو القبيلك
ما قدر بي حرفو يكتبو ليك
أيا حبيّب
أيا طيبة أهلو وأمَّاتو وحنينو الفيك
أيا سهكة كلام الشوق قصاد محبوبو يوم يصلك
ويشخت بي عويد الدمعة في وش الأماني البيك
تطير أشواقو بين سهرك وبين الركّ من نوماتو في عينيك
أيا حبيّب
عساك طيّب
و أظنك عارفو قدر ايش بي سماك مليان نجوم ونجوم
مسلّف كل ليالي البكرة قمراتو وخيوط نورو
مدوّر من صباحات الله فوق نوّار بسيماتك بوابيرو
ومحننلك غناكَ عريس يبشّر فوق مساديرو
و أظنك عارفو حد من غاب بيطلع زي وتر ممكون
يلوّن حن طنابيرو وينادي عليك
قماريهو القبيل ترجع .. لياليهو الزمان تنكع
محل قعداتو بي شوقك يبل كل الدروب بي نسمتو ويقراك
كتاب مفتوح في وش العافي والغيمات وباقي الروح ويتربَّع
على قلبك حلم اخدر قلم اخدر بلد مجروح بطيبة الكل
سماك خاصم هجاير فرقتو وصبّاك مطيرة وضل
وتتوضا الليالي حنين يصليبا الصباح حاضر
يشطّف شفّع الأيام براحة بالو والخاطر
ويكتبلك رجيناك في الغنا المليان
رجيناك في نشيد امبارح اللليلي والباكر
عساك قادر تبل أشواقنا بي جيتك عساك قادر
يا سيد الكل أيا حبيّب
عساك طيّب
| |
|
|
|
|
|
|
|
|
|
Re: تسافر الحبيبة .... تنبت أشجار الحســـرة (Re: أسامة معاوية الطيب)
|
العزيز اسامة ،، علك طيب يا الطيب ،،
سافرت وخلتك تبكي وتنزف ذكرى وشوق ، قلبي معاك وانت تعاني وحدة وغربة وشوق وشوك
بس المفروض انك كان تعمل باغنية الحجل بالرجل ياحبيبي ....
وهنيهتئذ اهديك اغنية المبدع الراحل سيف قدقود
كيفن تسافر تاخد قليبي معاك والعين تساهر (من هواك يا ملاك). له الرحمة ولكمال حسن الاماني بالصحة والعافية ، ولك الله في غربتك وحنينك.
بالمناسبة ماعدت تظهر بهناك عسى المانع خير (او كما قال).
| |
|
|
|
|
|
|
|
|
|
Re: تسافر الحبيبة .... تنبت أشجار الحســـرة (Re: شرووم)
|
ياصديقي ابكي وانزف واشتاق لأني بعمل ليكم في رصيد ( يومكم جاي )
تحياتي يا صديقي ليك وللدكتورة
الليل وغناك
أنا يا حبيب والليل وأنّات المسادير الحنان
واقفين ننادي على غناك
والشوق موسّدنا الجراح
ونزيف ليالينا الوراك
ومجملين العشق بي كحل السهر
وعيونا كم نامت معاك
والذكرى يا ناسج خيوت الفرحة
تتلملم وتر مليان مستف بي هواك
وأقراك
تتاوق في النشيد كلما القصيدة تبق ضياك
وأنا يا حبيب راجيك مدوبني الحنين
على كيف ما ترتاح النجوم راسم سماك
ومكلم الليل الطويل عن سر ونسة
الموجة للقيف الشهد غنواتنا
والنسمة البتفتح بين أصابعنا الوتر شبّاك
يا مخلّيني بيني وبين عيون الوردة
واقف منتظر
مشدود على باب طلّتك
لما السحاب غسّل دروب الحلّة بي نمّة خطاك
كاتب غرامي وجاي ليك
عصفور من الوله الحريق
راكز جناح بيهاتي بيك وفارد جناح
على سكة الأحلام رفيق
عينيك زاد مشوارو والأمل الطريق
فوق شدرة القلب الرهيف ترتاح حروفو
تغني بيك
أنا يا حبيب والليل وغنواتنا السهارى
ونجمة تتلاصف بريق
نتناجى بيناتنا القمر
وجوّانا أيام مشتهاك
كل ما الليالي تطول
نقول
لي خيت صباحنا يطول معاك إبر الوصول
ويغزل مناديل الهطول بي غيم رجاك
وأنا يا حبيب والليل وأنّات المسادير الحنان
واقفين ننادي على غناك.
| |
|
|
|
|
|
|
|
|
|
Re: تسافر الحبيبة .... تنبت أشجار الحســـرة (Re: أسامة معاوية الطيب)
|
بينات البحر والموج والرياح
بلقاك في غنايا في الدم في الجراح
بلقاك في الليالي زي هبّة نسِّيم أو نبض الصباح
با الجوايا داخل ضاقتبي المداخل ومليانبك براح
وقمريات يقوقن رجعّن الأماني وصبري الياما راح
وأدّن عيني دمعة لا طالت فراقك لا طالا النواح
وكلما الغيبة طالت بتذّكر عيونك كيف سايلات سماح
وبينّا الدنيا طيرة الأحلام غناها والأيام جناح
| |
|
|
|
|
|
|
| |
أسامة معاوية الطيب
تولوس
شرووم
فيس بوك
تويتر
انستقرام
يوتيوب
بنتيريست