|
|
 الدعوات بتمام الصحة والعافية للشاعر الكبير الأستاذ/ عبدالله محمد خير
|
الدعوات بتمام الصحة والعافية للشاعر الكبير عبدالله محمد خير
ياحلاة العشره وكتين تبقي صح صح
وياحلاة الريده وكتين تصفي تفرح
ياحلاة ليلاً معاك ما درنا يصبح
وياحلاة صبحاً تكون إنت المصبح
حبك الخلاني لي زول ما بجافي
وحبك العلمني أنظم ليك قوافي
حبك أكبر مهر لى طهرى وعفافي
آي بحبك وأصلو حبك زيو مافي
استاذنا الشاعر الكبير عبدالله محمد خير رجل نثر ورد الأمانى ورقيق المعاني على بساط من الروعه (رهيف احساس حنين قلبو بالفطره) اجزل العطاء واى عطاء اسمى من نبض الحروف في تسامي معانيها .. كلماته متأنقة في وصفها الدقيق وملمحها الجميل وخيط النور يكسو المفردة بسحر وبهاء أحاسيس فياضه ووهج الشوق الحالم في خفقانها يكاد يدوزن نبضات القلب أنغام محفلات ومترعات بألوان من الفن الأصيل تُردد في إيقاعها نشيد المحبة والإلفة والصفاء والنقاء.
الاستاذ عبدالله محمد خير طريح الفراش تمنياتنا الصادقات ودعواتنا الطيبات له بدوام الصحة والعافية وأن يعود أكثر تألقاً فهو من المؤسسين لنادي الطنبور وعضو اتحاد الكتاب وله العديد من النصوص التى تغني بها كبار فنانو الطنبور، كذلك له العديد من الإصدارات الشعرية (أنا المعجب)عام1977م، (كلام في الحب والوطن)عام 1986م، (أشجان الشيخ العاشق)عام 1993م. وله بصمته الواضحه في خارطة الأغنية فعطائه ثر يعبر عن سنوات طوال من الإبداع، فهو رجل بقامة النخيل وعنفوان النيل يستحق منا الاحترام والاهتمام.
فجل المبدعين في بلدي لا يحظون بالاهتمام الذي يليق وما يقدمونه من نزيف الكلمات وعصير الاغنيات .. يظلون في زاوية التجاهل ولا ضوء يسرى لرد جميل العطاء رغم أنهم روح اللإلهام وفجر الإشراق.
دعواتكم لشيخ شعراء الطنبور بدوام الصحة العافية.
ليك من غير تقولى سلام بقول اهلاً حباب
وافضل استناك قدر زمني الرجيتك فيهو
لو قدري استجاب
|
|
 
|
|
|
|
|
|
|
 Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
حبل الصبر
عبدالله محمد خير
صديق أحمد
تلب أمسك حبل الصبر خلو قلبك لا يبقي ني
أصلو ود أب زيد كل يوم من بلدنا يرحل جدي
شن بسويلك عاد أنا القبلك الحرمان مر بي
والضنا الهسا عليك زاد من زمان أنا زايد علي
كم حبيبا شغل الفؤاد في العيون كان متل الصبي
حل بي (توفيق) السواد مافي زول قال كفاره لي
أرقى يا تلب ودعت قبلو كم قمره منوره
وكم تحف نادرات سافرن وكم فراشه وكم جوهره
وكم قلوب متلك بالفراق الأنين والشوق سهره
شوف عوض عبدون الحروف خل من باطنه ظاهره
يا عوض مدرسة الشعر بي جداره إياك ناظره
بي غناك حرف السين بقت فوق بنات جيله مبطره
سابك اللى بلد الجليد ودعك ودقّ مغادره
يا قلب مالك انجرح ولسه ليه جرحك مابره
أما أنا المسكين الطروف غرزت في أظافره
وين غناي لي شتل الجروف والجناين وأزاهره
أسألوا الدرويش عن صديق عمرو كم جمرات عاصره
خلو يحكيلكم عن حياه النجيفى الهو معاصره
الككر يا رحمن زمان ضاع مع العشاق شاعره
مانفع تغريدو الحزين ما نفع صدق مشاعره
جننو (البتوفيق) رحل وهام ورا القام بالباخره
خلا دنياهو فرندقس ما عرف أوله وآخره
أرقى يا رحمن في السماح مافي بلداً بتجاكره
الله مديها سماحه صاح من كروها ولى تكره
أصلو ود أب زيد معترف بي جريمتو ومو ناكره
كلو جور القال سفروها وقطع ليها تذاكره.
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
دروب الريد
عبدالله محمد خير
ريدكم لي شديد يا يابا ريدي أنا للبريدو شديد
إلا أنا ما معاكم ديمه لكن عن حبيبي بعيد
خلوني اللسافر أبوي لو كان في إجازة العيد
أمشي أزور حبيبي الغالي داير أوفي حق الريد
عشان يا يابا من يوم روح ما جاب لي منو بريد
وما قال لي وين يا زولي كيف عامل براك وحيد
ليشن يابا ما بترضوني ياني وليدكم الويحيد
خايف بكره ما تلقوني إلا تتلتولي القيد
شان شوق الحبيب مالكني والنار في ضلوعي تقيد
داير يابا أمشي وأزورو يمكن شوفتو لي تفيد
يابا عليك عطفك لي ما تخلوني أبكي شديد
ويابا إن كت بتدري البي ماب تأبى لي أبقى سعيد
يابا إن كت قادر أخلي كت خليتو بدري أكيد
زولاً حبو عاش في قلبي كيفن عن طريقو أحيد
كان يا يابا ما جربت تهواها الحسان الغيد
وكان يا يابا ما أشجاك صوت البلبل الغريد
وكان يا يابا ما ساهرت وعينيك ضاقن التسهيد
ما بتهتم بي أعذاري مهما أقول ومهما أعيد
دحين يا يابا ماك مشتاق وحيدك يبقى عندو وليد
يحوم في البيت ويلعب فيهو يمرح في براءه سعيد
يقول لي يمه يا حبوبه يا حبوبه عندي نشيد
يسعدني ويسر بال أمه ليك يا يابا يبقي حفيد
هاك يا يابا من أشعاري أبيات أنهكا الترديد
كم تاه في دروب الريده قلبي وكم نظم له قصيد
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
سيل الشوق
عبدالله محمد خير
صديق احمد
اجمل منو في الكون كلو ما شفنا
جود يا الله بي لقياهو أنصفنا
راضين نحن مهما حبو كلفنا
لأنو ملك شعورنا ملك عواطفنا
والفناهو لو يرحم يوالفنا
نحن نطيعو ما دايرين يخالفنا
حاول مره زورنا عشان تشرفنا
وبي معنى الجمال الفطري عرفنا
لفينا المداين والقرى وطفنا
زيك لا بنلاقي ولا بيصادفنا
يا سواقنا قدام بيتو وقفنا
خليها الزهور تمرق تلاطفنا
ما حبينا غيرو وهو عارفنا
دايرين لي لماهو الحظ يحالفنا
ليك غنينا وتر سلكو عازفنا
نظمنا القصائد فيك وألفنا
دايم حبي ليك ومستحيل يفنى
وسيل الشوق على الحابنو جارفنا
تعال بالله أرقص تاني أتحفنا
وبي عينيك لو بتحب تكاشفنا
ناري أنا من عيونو المنهن خفنا
عيونا بالسهام كادت تنشفنا
إن نسفت سبيبه معاهو تنسفنا
وإن مالت بعد سابتين ترجفنا
حياتنا عليها من قبلك تأسفنا
ولو ما شفنا حسنك تاني شن شفنا
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
كمان زعلان
عبدالله محمد خير
صديق احمد
تعاتبنا !!! وما قبلان تكاتبنا
ما إنتو البيتو الحله يا نوره
ورحتلو بعيد بلا شوره
تراها الحله من يوم قمتو مهجوره
وما رضيانه بعدك إلا مجبوره
ومشتاقه
عارفه الدنيا لمان تقسى فراقه
حليل الحله .. وين أملاكه
(وين حوره)؟؟ وين شاديها ؟؟
يا شاديها ما تزوره ... يا فتنه
يا البعد الله منك كان مخافتنا
أكان حيين .. وما متنا
وكان حن القدر والدنيا لمتنا
وتاني الحله زي ما كنا ضمتنا
بنحلف ليك بزمتنا
سعادتك كل مهمتنا
وبلاك قامت قيامتنا.
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
هالات سماحك
عبدالله محمد خير
يا وطن أنا ديمه ليك بحن
وفي الدرب البجيبني عليك مالي محن
عيني بالدمع تاني إتفتق جرحن
شوقن والسهاد بالمره ما صلحن
داير أنظر ربوعك شان يتم فرحن
ومن هالات سماحك يلبسن سمحن
الشوق إترسم فوق العيون فضحن
نومن فر سابن وبالدموع طفحن
ناس أم زين حلاتن في رباك سرحن
غاويهن جمالك غردن صدحن
كاسيهو عفافن زينه زي طرحن
ومن غير حشمه كضاب البقول لمحن
آيات الجمال فيهن بطول شرحن
وما بينضب معينو لساني في مدحن
في بحر التحضر والعفاف سبحن
وبي درر المحاسن شيدن صرحن
تشعر بالسرور والبهجة من مرحن
ما أجمل مساهن ويا حلات صبحن.
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
رحلة النسيان
عبدالله محمد خير
نسيتك أنا
نسيتك ما لأني إنسان ونساي
نسيتك أنا
لأني بقيت لما أطراك بساهر
وإنت طيفك ماهو لولاي
نسيتك أنا
عشان ردة فعل ذكراك جواي
بقت تنتر مغس مرات ولواي
نسيتك أنا
ونسيت كل السماحه الفوق دريبا بقيت غناي
وخليت لك بلد بي حالو ورحلت بي جاي
غلطانه إن بقيت فهمتي إنو رحيلي فوق رأي
مهاجر شان أحسن حالي وأرجع ليك شاشاي
وحاتك لا لا .. دنياك ما بتوافق تاني دنياي
وحاتك لا لا .. لا داير أخادعك ولاني خازاي
قسا القلب الببكي الشوق
عليك بقي ماهو بكاي
وجفاها القمري عصرياتنا
ماعاد فيها .. قوقاي
صحيح حسدوني فيك زمن عزلتك وقالوا نقاي
ما عارفني بكدح وبشقى ساكت وماني لقاي
يفيض بحرك يعم وما فيهو من تالاي سقاي
نسيتك أنا
وبفتش في دليل لي دربي ضواي
دحين أطفيها نار الغيره أو زيديها بوباي
وأبكي على غرورك بعدي أو كوسيلو رضاي
وقول لي معاك سلامه، أو قوليها باباي
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
يا قمره
عبدالله محمد خير
يا قمره ... صبي السنسني الحمره
شوفي أبوي أنا الراجاهو كلو صباح
يا زينوبه أبوكي هو أصلو حالو بره
لو قاري العلم هو ولاهو سيد خبره
ومو زول غربه لكن الظروف جابره
مالو إن كان صبر كل الخلوق صابره والصابرات روابح لو يجن قماح
هو أصلو متين نساكم يُمة شان يطره
بيتنفس هوا ذكراكم العطره
رهيف إحساس حنين قلبو بالفطره
نديمو بقت دموعو الديمه منقطره
وأصلو إن ما قعد بينكم ولا بيرتاح
جاهو العيد كمان زاد القليب حسره
ساد العبره حلقو ونفسو منكسره
هو لا لمّ القروش لا حصل المسره
بلد ما فيها زول مات من عدم كسره فراقكم ليها يا أحباب ولا كان صاح
يا أمارتي الما طاعت الأمره
ندماني وبقت محتاره في أمره
بعد قسن الدرادر قصرن عمره
الشوق فاض وعماها الحنين غمره
الشوق للبلد لي بهجته وسمره
الشوق لي مقيلا ضم ضم تمره
الشوق لي حديثا ضم ضو قمره
الشوق للبلد جابريتا وككره كان الشوق يخفف والله يبرى جراح
مشتاق للحسيناب أسقه وبكره
مشتاق للقبيل إتربوا فوق حكره
مشتاق للدميري ومويته العكره
مشتاق للجزيري وتشقه وهكره
مشتاق لي قطع بحره ودخول وكره
مشتاق للأبي يفارق الفؤاد ذكره
مشتاق للعلى مشغول دوام فكره
مشتاق للصباح ديدن غناي شكره وياريت كت بقدر أسوي شوقي جناح.
| |
|
|
|
|
|
|
|
|
|
Re: الدعوات بتمام الصحة والعافية للشاعر الكبير الأستاذ/ عبدالله محمد خير (Re: عبد المجيد محمود)
|
وعد الحبيبه
عبدالله محمد خير
عديله عليك مشاويرك عديله
عديله إن كان قصيره إن كان طوليه
عديله عليك محل ما تمشي تمشي
يا عديله أبقيلو زي الغيمه رشي
أما أنا الهاماني راحتك أول الشي
ليك تأمرني وعلي أمرك بمشي
بس توعدني ما طول بيك غيبه
وعد من أنبل حبيب لأجمل حبيبه
فيك شفت الدنيا قاصيها وقريبه
ومنك اتعلمت كيف أقدر أجيبه
لا متين يا نومي فيك رؤياي تصدق
ولا متين يا شوق موالي قليبي تحرق
تاني جود باللقيا يا زمني المفرق
وتاني يا اجمل صباح في عمري أشرق
يا حلاة العُشرة وكتين تبقي صح صح
ويا حلاة الريده وكتين تصفى تفرح
يا حلاة ليلاً معاك ما درنا يصبح
ويا حلاة صبحاً معاك تكون إنت المصبح
في الربيع قالوا الزهور تنضر تفتح
يا ربيع في حضنو كم لفاني وارتح
صار يباب بستاني من غيرك مكردح
غير سموم في أم شير وغير أم شير تكتح
حبك الخلاني لى زول ما بجافي
وحبك العلمني أنظم ليك قوافي
حبك أكبر مهر لي طهري وعفافي
آي بحبك وأصلو حبك زيو مافي
| |
|
|
|
|
|
|
| |
فيس بوك
تويتر
انستقرام
يوتيوب
بنتيريست