|
|
 يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضحك!!
|
و الله غلبني أفهمهم اليابانييين ديل!!!
زلزال يهز الدنيا و يرج البيوت رج.. وهم عااااادي زي الما حصل شيء..جارتي في وقفتها زي ما هي تشر في غسيلها ..!! بعد الزلزال بنص ساعة و نحن نزازي بعربيتنا برة غالبانا الرجعة للبيت..و هم بيشتروا في الورود و الآيسكريم!!
قبل ثلاثة شهور..بتي الصغيرة وقعت من الطابق التاني للجنينة تحت..أغمي عليهاو شلتها وجريت بيها زي المجنونة..جارتي بالحيطة شافتني..و ليوم الليلة ما جات قالت لي بتك حية و لا ميتة!!
لكن الشفتو الصباح ده خلاااااص.. أعصابي ما قادرة تستحملو و عقلي ما قادر يستوعبو..
يوم السبت الما فاتوا عليهو اربعة أيام.. (هسة صباح الأربعاء) ..حصل حادث شين في مدينتنا دي.. واحد سايق سكران في كوبري ضرب عربية قدامو رماها في البحر.. العربية فيها أسرة..الأب ..و الأم و تلاتة أطفال..أعمارهم 4 سنوات و 3 سنوات و سنة .. الأم و الأب نجوا.. و الأطفال التلاتة ماتوا غرقانين..
من يومها و كل ما اشوف الأخبار أبكي.. (طبعاً اليابانيين أخبارهم لت و عجن في نفس الخبر لشهور مش لأيام..
يجيبوا القصة و الصور و الفيديو..و يعملوا تمثيل للحوادث..و ينكتوا تاريخ الجاني و الضحية من يوم ولادتهم..المهم أنا بأشوف أخبار غرق الأطفال دي على القل مرتين في اليوم..من يوم الأحد..و ليوم الليلة ما سكت من البكا..
لكن..قبل نص ساعة جابوا برنامج مباشر ..عرضوا فيه فيديو منزلي للأطفال و هم مع أهلهم بياكلوا و بيلعبوا..
و بعدها جابوا الأم و الأب..من بيتهم.. على الهواء مباشرة.. و الله العظيم مباشرة.. قاعدين جنب الركن العملوه تذكار للأولاد..خاتين فيهو صورهم و ألعابهم و صناديق فيها (((((رماد أجسام أولادهم الحرقوهم أمس))))
و قاعدين بيحكوا ((الأم و الأب))) عن الحادث..الأم جسمها لسة مربط و آثار الكدمات فيه.. و هي بتحكي كيف انها غاصت أربعة مرات عشان تطلع أولادها.. وكيف دخلت بالقزاز الخلفي المكسور.. و مشت أول حاجة للبت العمرها سنة..المربوطة في كرسي الأطفال..و هي بتقول ليها انا جيتك يا سايا.حسه حأطلعك..و فكتها و طلعت بيها أدتها لأبوها..اللي ما نزل معاها لأنو حسب كلامها جسمو كبير و ما بيقدر يدخل بالقزاز..غطست الأم تاني و طلعت الولد التاني ..
لكن غطست مرتين و ما قدرت تطلّع الولد الكبير..لأنو نزل مع العربية في القاع..و ما قدروا يطلعوهو إلا بعد ساعتين لما انتشلوا العربية.. لكن هي حتى الطلعتم كانوا ماتو في لحظتهم..
أنا مصعوقة لأنو الأم و الأب و هم بيحكوا في ده كلو و لا دمعة ما نزلت منهم..بالعكس كانوا مبتسمين أغلب الوقت.. و الله كانوا في لحظات بيضحكوا..نعم ضحكات خفيفة..لكن بيضحكوا..المذيع اللي بيتكلم من الأستديو..(وهم من بيتهم) قال ليهم..هسة الساعة تمانية..عادة زي الوقت ده كانوا بيكونوا جاريين حواليكم و البيت كله حركة.. لكن هسة بيتكم بقى صانّي ..مش؟! الأم..(عمرها 29 سنة).. قالت ليهو أيوة أيوة معاك حق..لكن ما في شيء اتغير.. ما في شيءاتغير..و هي مبتسمة..
ألب قال انو مبسوط انو أولادو ماتوا و هم مبسوطين بعد ما كانوا راجعين من رحلة قبضوا فيها الحشرات البيحبوها.. و ودعوا إجازة الصيف!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
الناس الفي الاستديو المستضيفهم المذيع قالوا للأهل..نحن مبسوطين انكم انتو كويسين و متماسكين..
الناس كلها مبسوطة!! و أنا زدت زيادة في البكا..و جيت قلت اشوف الناس البيشبهوني.. بأكتب ليكم و ما قادرة أشوف قدامي..
|
|
 
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
العزيزة سناء
كيفك؟
انا بفتكر الاسيوين ديل بيتعاملوا مع الموت كحدث عادي..
قبل سنوات عندما كنت ادرس. تاتي الطالبة. ومعها رسالة اذن تغيب
وبكل بساطة. تقولي
يا ايتها الاستاذة قد ماتت امي قبل الامس.
ومتاسفة لانني تغيبت بالامس لانني ذهبت الى البيت..
وانا اقوم واحضنها واعزيها بعداك اعاملها معاملة اليتيمة.
وهي ما متاثرة..
او تسالي من طالب بكل بساطة يقول لك الطلاب ايتها الاستاذة الله يرحم قد مات..
دون تاثير وانا اكون اتبشتنت لفكرة واحد من اولادي قد مات.
السودانيين الموت عندهم حاجة عظيمة..
مرة قبل سنوات ذهبت لزيارة احد طالبات الدراسات العليا تسكن في قرية صغيرة
وبهذه القرية عدد من الطلاب المتزوجين
اخذنا الاطفال ليلعبوا في الخارج
عينا لواحد من طلابي. ماسك زوجته متكلها..
مشينا ليه سالناه
قال لي : يا استاذتي قد مات ولدنا الصغير..
اها انا و صاحبتي دي استملنا البكاء...
اذن اذان العصر طوالي الام قامت صلت صلاتها..
ونحنا نبكي ونتنخج..
اخبرني صديق
ان جارهم الشاب كل يوم يقابلهم يحمل طفلته عمرها 6 اشهر
يتحدث معهم يلاعبون الطفلة ثم يمضون في حال سبيلهم.
يوم اتى والد الشاب ونسبة لمشكلة اللغة
فهموا منه انه يدعوهم لطعام.ز
ذهبوا اكلوا وسالوا عن ولدهم الشاب
رد الاب انه مات وهذه صدقته..
لا عويل لا صراخ لا بكاء
وهم جيران الحيطة بالحيطة..
ما عرفوه مات..
ولد صغير لقوه في الهاي وي يبكي جنب عربية
مقلوبة واهلو كلهم ميتين
يصرخ ويضرب في القزاز
آية آية (بابا بابا)
اها حبوبتو جابوها تحكي لا بكى لا دموع..
يعني البكاء والحزن الذي لا ينتهي دا هنا مافي..
ما عارفة ليه هم كدا..
متصالحين مع الموت للدرجة دي..
مجرد فكرة انه طفلك ممكن يموت تخليك تبكي
تحياتي لك وطلعنا جيران..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: bayan)
|
العزيزة بيان..
شكراً أن كنت أول معزيي..
ما عارفة و الله.. حاسة بكآبة غير عادية..الله لا يوريك.
Quote: مجرد فكرة انه طفلك ممكن يموت تخليك تبكي
|
عارفة .. أي طفل يموت..في أي حتة في الدنيا.. باحس بالإحساس ده.. و بتسيطر علي الفكرة دي..
و بأقعد أتخيل أمه يكون حالها كيف..
أمبارح كنت باقول لخالد انو لو الأسرة دي كلها ماتت كان أحسن..!!
هسة أمهم حتعيش عمرها كله تتعذب بذكرى أولادها..!!
عشان كده ما قدرت أصدق و أنا بأشوفها بتضحك ..و هي قاعدة جنب رمادهم!!
هم الكانوا قبل يومين جاريين حواليها!!
أنا مفجوعة في البشر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
لا حول ولا قوة الا بالله العظيم ...
يابت الناس دموعك وعواطفك بعد كده حافظي عليه لناسك ... دييل اهو خلقهم المولي كدة يا ضحكهم بكا او بكاهم كدة الله اعلم ؟؟ الغريبة ان الحوليهم بكايين مقارنة بما ذكرت ومما بنشوف في التلفزيون وشوية البلاد الزرناها في الشرق ... انا عندي بنية مهووسة باليابانيين وكمان اتعلمت كلامهم وبتعمل كرتون زيهم وكلو رسمها - وهي دارسة فن - فيه ياباني واللحظة قاعدة من الدغش تشوف مع اخوها الصغير افلام كرتون ياباني ودة لسه ما مشت اليابان عندكم وناس جعفر وبركيه يعني لو جات هناك ياني الودرتهالكنها باقية لي من حكاية دروسها في اللغة الياباني ناوية تمشي يوما ما ...عندي واحد بلدياتي وصديقي كتير فنان ( الله يرحمو) جاء اليابان في الثمانينات وكان بدرس هناك موسيقي ورجع ياباني نوبي واتزوج يابانية غيرت اسمها الي اسم نوبي "نبرا" وبقت ترتطن زي الجن وبعد ما صحبي مات في مايو الماضي هي الان النوبية المسؤلة عن ارثه النوبي الفني ... ديل ناس عجب الله يعينكم
تحياتي
ابوبكر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
| Quote: لو جيتوا اليابان بننتظركم تزورونا.. وبنتك معزومة (Home Stay) |
عزيزتي سناء والجمع الظريف
كتر خيرك انا بس السفر الطويل بكدرني ودحين كل سنة بشيل هم السبعة ساعات طيران من دبي الي كوالمبور..اكره ان اكون مربوطا حتي بالحرير وكراسي الطيارات دي ما بتفرق كان سياحي او رجال اعمال اهو في النهاية كرسي .. وكوني من اولاد اهل سكة حديد السودان بحب القطر كتيير ويمكن لما القطر بتاع دبي البوصل من المطار االي طرف المدينة يقومو العرب يدقو صدرهم ويوصلو اليابان حتلقيني هناك .. لكين بنيتي الكبيرة البتحكي ياباني ( بدل رطانتنا ماهي لا شافت حلفا ولا حتي الخرطوم الا وهي طفلة ) وبتاكل سوشي ( عيوني وامها اتحوصت ونحن في مطعم السوشي والصحان الصغار البتجري قدامنا في سير زي بتاع العفش في المطارات وهي مبسوطة تضحك علينا ) وقالت حتلبس كومينو ولازم تمشي اليابان .. وهي في قريد تن كانت بتفتش لوحدها علي جامعة يابانية بتاعة Digital Animation ويالا لما قدرنا نحول انظارها الي واحدة في كوالالمبور اهو الماليزيين بني اديين زينا وبيبكو زينا لكن عندهم شوية ملاوعة ودحين اتخرجت وعلشان نحول انتباها من اليابان برضو شجعناها علي الماجستيرفي بكانها والسنة الجاية نشوف طريقة تانية .. اهو كل ما يحصل زلزال عندكم عيوني تدمع ساي واقول يعني لو كانت هناك ...الخ ...
ما تقولن الرجال ما بيكو والله نبكي ونص - بسو بنقول لما واحد يسال والله عندي حساسية في عيوني - ودي لا فيها راجل ولا مراة دي عاطفة وربنا اداها لينا لحكمة ولانها ضرورية فلا ساموراي ولا نسخ اراوح بتودرا ...وبعدين انا جني رطان وبسمونا بامهاتنا لما عايزين يكرمونا لانو امهاتنا واخواتنا هم بيجن الاول بعدين نحن ( دة من زمان من زمن اماني ريناس ام بعانخي المشت برجليناها 900 ميل علشان تخلس مصر من قبضة البيزنطة وهذا للعلم علشان المصاروة دايما بيقولو نحت امنهم الجنوبي والحقيقة كنا امنهم الشمالي والجنوبي )
ودمتم
ابوبكر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Ehab Eltayeb)
|
أخي إيهاب..
Quote: ومدينتكم الكلها حوادث دي اختوها ساكت....
|
تعرف اليابان من أأمن بلاد الدنيا..و فوكوكا مدينتنا من أجمل و أأمن مدن اليابان!!
لكن شكلها كده البلد كلها ابتدت تفقد الميزة دي..
تعرف في نفس أخبار الصباح ده..كان في خبر في هوكايدو..في أقصى الشمال
ولد عمرو 15 سنة.. طلب من صاحبو العمرو 16 انو يقتل ليهو أمه و أبوه.. مقابل ما يعادل 3 آلاف دولار!!
طبعاً داك ما كضب خبر.. و البوليس هسة بيفتش لجثث الأهل الرموهم الأولاد في البحر!!!!!!!!!!!!!!!!!
الشهر الفات في مدينة تانية.. ولد عمرو 15 سنة برضو حرق بيتهم و جواه زوجة أبوه و أخوانه الإتنين..
و لسبب عجيب جداً.. انو أبوه (الطبيب) و زوجة أبوه (الطبيبة) التي شهد لها هو نفسه إنها كانت بتعاملوا كويس ما بيرضو منو بدرجات منخفضة في الدراسة..
و اليوم داك كان مواعيد أبوه مع مدرّسه عشان يتلقى التقويم لأداء ولده للفصل الأول..و الولد خاف انو يتهزّأ!!
طبعاً قلت ليك قصة انو أهلو دكاترة لأنو ده في اليابان دليل قوي على حسن الظروف المعيشية للأسرة...و كمان على حسن التربية و الحرص على السلوك الجيد!!!!
و زي ده -رغم الأمان- كتير.. و قصص تشيب..
لكن الظاهر أنا الما قادرة أتعود!!
تحياتي و شكري ليك..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
لست عليما في سلوكيات البشر لكن كلنا خلق الله ناتي بعواطفنا ويختلف التعبير او شكل التعبير وفقا للمكان والموروثات ..فهل في نفس السياق تعجبهم النكتة مثلا او يعبرون عن حبهم وغضبهم ورفضهم -ولا اريد ان اضيف "غير حبهم " لا نني صائم عن الكلمة باذن الله -.مثلنا .. فنحن نزعل كثيرا ونصرخ كثيرا ونعود احبابا بكلمة وتبكينا حتي قصة نقرؤها في كتاب وكم بكينا ونحن نشاهد افلاما هندية ومصرية وحتي اجنبية وتشاركنا في ذلك اقوام اخري فاذكر في مطلع الثمانينات ان ذهبت مع بعض اصدقائ لمشاهدة احد افلام الاوسكار حينئذ في دار للعرض في الشارقة وكان الفيلم عن قصة لملاكم لا اذكر كثير تفاصيل عنه الان ولكن كان جد مؤثر وعند نهاية الفيلم بقي الجميع في مقاعدهم رجالا ونساء واطفالا من عرب الشرق الاوسط وافريقيا واوربيون وهنود فقد كنا جميعا نجعر وبعض بالصوت العالي ..
عرب الخليج كذلك عواطفهم او التعبير عنها ليس كما نحن ..يدفنو مو تاهم ويعودو الي مجالسهم العامرة بكثير من الولائم يستقبلون المعزيين لا تسمع صوتا باكيا الا فيما ندر يهتمون بالمراسيم كثيرا .... هل هذا من قساوة مكان و ماض ( الطقس اسلوب الحياة الزلازل حر الصحراء الحروبات الكثيرة ..الخ )..
سلوكيات البشر متعددة .. مساء الامس ذهبت مع بنتي وولدي الي مطعم حيث ازور الان لم انتبه كثيرا -بطبع عادة - للموجوديين حولي ولكن بعد فترة التفت وشاهدت امراة من اهل البلاد عرفتها حيث كنت اعيش تعمل حيث اعمل وكنت صديق كل جماعتهم التي اتت لعمل محدد , اخذهم الي بيتي دوما واعرفهم بالبلاد والعباد و اوجه من اراد منهم في العمل الي اخره ولكن حيث ان الناس هنا تتشابه نوعا ما وهي لم تعرني اهمية ووجها في وجهي فقلت ربما ليست هي وانصرفت عنها وعند التفاته اخري وجدت زميلا اخر كان اكثر قربا وزيارات وتواجد معي يتحادث معها ولم يعرني انتباها فقلت ربما هو ليس هو وعند مغادرتي المكان كان يجب ان امر من امامهم فاضطرت الي تحيتهم ووجدتهم يتحدثون عني وعن شركتي التي اعمل-والتي كانا يعملا بها- فيها وهم انفسهم..سالاني "ماذا تفعل هنا ؟ " وهم عليمان بسنوات كثيرة اتي هنا وعليمان بافراد اسرتي -فكما ذكرت كانا قريبان جدا منا هناك - وانني قبل عام وانا هنا اتصلت بهما فوعدا بالزيارةولم ياتيا فذكرتهما بتلك وسالت عن اعمالهما وصحتهما واخبرتهما علي عجل باني مغادر غدا حتي لا احرجهما بدعوةليست في ميزانيتهما وخرجت ...كعادتي احاول دائما ايجاد مبررات لخلق الله في مثل ما فعلا فربما استحيا وربما ظنا انهما ربما يجب عليهما تسديد فواتير طعامنا وهما لا يملكا ن....الخ .. بنتي يعرفان طباع اهل البلد كونهن يعيشان معهما لسنوات طويلة وبنتي اشارت الي انهم هكذا ولكني اصريت علي تبريراتي حتي لا اظلمهما ... هوايتي عند سفري ان اراقب سلوكيات البشر في المكان الذي ازوره لافهم ولا اتي بما يهيين او يضر او يزعجهم واحاول دائما ان اقوم باحتياجا تي لوحدي وعائلتي اعتادت علي ذلك فما هو متيسر من اجتماعيات بحكم الوقت والاهل في السودان لا يمكن ان يتوفر لنا في المهجر وحيث نزور..
فالذي عندنا هناك في بلادنا مختلف ورغم قسوة حياة وقلة معينات فالناس هناك بالناس ولولا تكافل اجتماعي رباني كذلك لا نقرض معظم اهل السودان وهم يتعرضون الي ضيق في الحياة ومجاعات وقلة زاد..
والله المستعان
..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sobajo)
|
سوباجو تحياتي..
هو ممكن فعلاً يكون اختلاف ثقافات.. يعني مثلاً عند المسيحيين (لا أعرف إن كان التعميم هنا صحيحاً) ..
ما بيزعلوا زينا على الميت لأنو بيفتكروا انه حتماً و لا بد هو في الجنة و هم حيلاقوه تاني هناك..
الكلام ده كنت بأتناقش فيهو مع أمريكية مسيحية متدينة جداً كان معها بنت صاحبتها اللي اتيمت قبل ايام..
سألتها انو البت كيف مع فقد أبوها..قالت لي انها كويسة و اتقبلت الموضوع ببساطة.. لأنها عارفة انو أبوها في الجنة..!
اليابانيين.. كتير منهم بيفتكروا انهم حيجوا تاني..غالباً في شكل الحيوانات اللي هم بيحبوها..
مرة واحدة قالت لي انها بتحب الكلاب جداً ..و انها حاسة انه روحها قبل كده كانت روح كلب.. أو بعد ما هي تموت حتبقى كلب..!
أنا لما أسمع الكلام ده بابذل مجهود كبير عشان ما أضحك.. لأنو بالنسبة ليهم ده نوع من الإعتقاد الراسخ!!
مرة واحدة زعلت من التانية..
قالت ليها إن شاء الله تموتي.. و روحك تجي في بعوضة.. و يضربوك كده تموتي تاني..!!
الكلام معاكم فرق علي.. و خلاني أضحك و أنا بافكر في حاجاتهم..
الله يعينا على روحنا..
تحياتي مرة أخرى..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: abubakr)
|
تعرف يا باشمهندس.. هنا في تناقضات كتيرة..
خاصة في قصة التعبير دي.. يعني في السينما البنات اليابانيات بكايات بكا شديد..
لكن في الحياة العادية ما قادرة أشوف العاطفة الشديدة دي..الحوادث الذكرتها فوق دي مثال بسيط..أنا مستغرباها لأنها في نطاق الأسرة..!! صاحبتي كانت متزوجة راجل عندو مشاكل نفسية, بيقول انو أمه لما كان صغير عشان تعاقبو أو تخوفو, بتشيلو من رجلينو و بتدلدلو بالشباك من الطابق التاني..و بتهددوا انها حترميهو لو ما مشى مظبوط معاها!!!!
أنا بس كنت فاكرة انو الضنى ده واحد في الدنيا كلها..و انو الأمهات احساسهم واحد..!!
أما قصة أصحاب العمل.. فصدقني ده برضو عاااادي هنا..
الصداقة هنا مربوطة برابط أو مصلحة مشتركة.. بمجرد انتهائها..تنتهي الصلة!!
يعني يكونوا اولادنا زملاء في فصل واحد.. شوف الصحبة و الزيارات و البرامج مع بعض..لما السنة تنتهي.. و الأطفال يتفرقوا في الفصول.. بيبقى السلام بحنية راس من بعيد.. !!
أحكي شنو ولا شنو..
طبعاً في استثناءات لصداقات قد تدوم لزمن اطول..لكنها تظل باردة و رسمية رغم طول المدة!!
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: abubakr)
|
Quote:
فهل في نفس السياق تعجبهم النكتة مثلا او يعبرون عن حبهم وغضبهم |
أخي الحبيب الباشمهندس أبوبكر
السلام عليكم ورحمة الله وبركاته وآمل أن تكون والأسرة الكريمة بخير.
يندر جدا أن يُظــهِر الياباني عواطفه أو يضحك لنكتة لأن حياته تتصف بالجدية المبالغة. في أكثر المواقف غضبا وهيجانا أو مرحا تلقاه عاديا جدا وقادرا على كتم عواطفه.
قبل فترة كان إبني أحمد وصديقه أبوبكر بركية يحكيان لصديقهما الياباني نكتة أدروب والكرت الذي أعطاه حكم كرة القدم للاعب إرتكب لعبة خشنة وأن أدروب قال للجماعة ما أداه ..الخ ، ولكن صديقهما الياباني بكل هدوء وبدون ضحك سألهما " هل أدروب عميان؟
وأكثر ما يعجبني في اليابانيين أنهم شعب مؤدب ومهذب للغاية.
تحياتي وأشواقي.
جعفر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Gaafar Ismail)
|
| Quote: يندر جدا أن يُظــهِر الياباني عواطفه أو يضحك لنكتة لأن حياته تتصف بالجدية المبالغة. في أكثر المواقف غضبا وهيجانا أو مرحا تلقاه عاديا جدا وقادرا على كتم عواطف |
استاذي جعفر والجمع الظريف تحياتي
التماسك في امور العمل والسياسة امر مهم وهذا يفسر المقدرة الصناعية الدؤوب لليابانيين فالصبر ليس كافيا للانتاج ا انما التماسك والجدية ...
اكثر ما يثير دهشتي هو السيد غصن البناني شكلا وموضوعا وثقافة والذي تمكن من انجاز لم تقدر عليه كل ادارات نيسان التي سبقته ودفع بالشركة الي المقدمة في وقت تهاوت فيه شركات كبيرة في كوريا واليابان ورغم منافسة قاسية تمكن من ان يحسن اداء نيسان لدرجة اعتبرها الاقتصاديون اعجازيا والمكتبات بها كتب عن غصن ونيسان .. ما يدهشني وانا اتذكر فيلما كوميديا امريكيا شاهدته قبل سنوات عن شركة سيارات يابانية اتت بيابانيين الي مصنعها في امريكا وما حدث من مفارقات كادت ان تنهي الشركة نسبة لاختلاف ثقافة عمل بين القيادات المريكية والصناع اليابانيين عمالا ومهندسيين فكيف تمكن غصن الامريكي اللبناني الاصل والثقافة واللسان من ان يصل الي معادلة توافقية بين ثقافته وثقافة اليابانيين ؟
تحياتي لبركية وامل ان نلتقي يوما ان امد الله في الاجال
ودمتم
ابوبكر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
يا سناء يا حبيبتي لو قعدنا نحكي عن الناس ديل وغيرهم لا باكر ما بنخلص..
قبل سنة كدا
قاعدة في امانتي الله.
ضربت لي بتي.
تبكي يا ماما ام ناس رقية ماتت,,
اها رقية دي من زنجبار..
امهم جابتهم هنا عشان يقروا الجامعة
وجابت وليداتها الصغار
ولدها الصغير رجع من المدرسة لقى امه راقدة في الارض
ما بيعرف زول ضرب للمدير
طوالي داك حرك الاسعاف
وجا لقوها ميتة..
اها اختك جرت ركبت تاكسي وابكي واجعر
وصلت لقيت كم سودانية قعدنا نبكي ونجعر..
الناس كلها مخلوعة مننا..
استملنا البكا تب وحررناه
ولما شالو الجنازة سكلبنا وصرخنا..
الناس كلها مهجومة
حتى بناتها الكبار..
ولما ماتت صديقتنا السودانية
هنا تاركة اطفال صغار.. قربنا نموت وراها..
ما فارقنا اولادها شبر لما سافروا
كل الجامعة مندهشة للسلوك دا..
حتى العرب
وفي واحدة سورية محاضرة وزميلتي في المكتب حفيدتها صديقة بتي
عمرها 8 سنة ضربتها عربية ماتت وهي قاعدة مع حبوبتها لانه امها متزوجة راجل تاني,,
الحبوبة دي البت دي بهجة حياتها..
اتميلنا مشينا
وحاتك بس السودانيين..
حتى المقابر مشو بس سودانيين.
والزول الاساسي كان راجل سوداني,, عمل كل الاجراءات
وزوج بتها واهلو هنا ما جو خالص..
جد كلام سباجو
احتمال يكونوا شايفننا ما عندنا شغلة
مدفقين عواطف ساكت.. لكن الهنود زينا بيجروا وراء الجنازة وبيسكلبو.
اطمني اولادك بيطلعوا ذيك
اسع بناتي عاصرات كل الفراشات واي زول يودوه المستشفى
متغزيات في الاسعاف معاه..
الحاجة دي في الجينات ..
وهنا لو رقد سوداني في المستشفى والا عايزين يعملو ليه
عميلة سجم المستشفى وناسها
لانه اي ريسبشن بيكون مليان ناس.
قالو في واحد ماليزي بيتكلم مع صاحبو
قاله
الكنق حق السودان راقد هنا..
اي سوداني في ازمة هو كنق في قلوب الناس ودي حاجة نحمد الله عليها..
من السفير لغاية اصغر الطلاب بيجو يزوروه
قصص ما بتنتهي...
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: bayan)
|
Quote: بنفس المستوى ... تلقاهم هسع بقولو فينا : ...
بالله شوف الناس الماعندهم شغلة دي ... مكملين حياتم عواطف و مجاملات ...
الواحد ابوه يموت ... يقعد يبكي و يخلي شغلتو ... و يزعل على شي راح ....
ولدو يقع من البلكونة ... الناس تخلي شغلتها و تقعد تحرسو ...
ناس ما عندها شغلة ...!!
|
الاخ سوباجو
بس انا بشوف انهم على حق .. فالحى ابقى من الميت .. وقد تحزن فى دواخلك
لموت عزيز ولكن هذا لا يمنع من مواصلة الحياه .. وشوف نحنا فى السودان لمن
يموت لينا عزيز يتخيل ليك انو الدنيا قد توقفت عند هذا الحدث .. وان كنت
من الصابرين المحتسبين الامر عند الله يذهب صبرك هذا سدى بمجرد ان تطأ قدمك
بيت البكاء .. تجد رجال كبار دقونهم بيضاء من الشيب يبكون ويجعرون كما النساء
والاطفال .. مما يدفعك لاظهار حزنك رغما عنك
وتعال شوف فراش بكاء لعدة ايام .. وناس الشماليه وصلوا والا لسع .. وناس كسلا
والقضارف ومدنى وعطبره ... الخ الخ
وبيت البكاء من الصباح تلقى الناس قاعدين ليك منتظرين الفطور ومقسمين الى جماعات
شله تناقش الكوره والهلال والمريخ .. وشلة السياسه واخر تطورات الوضع السياسى
وشلة شنو كدا ما عارف .. والنساء حدث ولا حرج !!!!!!!!!
وشوف الاسويين الذين يتعاملون مع الموت كأمر واقع وشئ محتوم .. شوفن وصلوا الى اى
مدى فى تطورهم من كل النواحى .. وشوف اليابان التى اتت منها الاخت سناء بهذه القصه
شوف مأساة الحرب التى عاشوها والقنبله الزريه التى القيت عليهم وشوف الزلازل والبراكين وطبيعة ارضهم ورغم ذلك هم الان من اكبر البلاد الصناعيه فى العالم .. فياترى
لو كانوا مثلا فى الماتم والاحزان فهل كانوا وصلوا الى ما وصلوا اليه ؟؟؟؟
والشكر للاخت سناء لطرحها هذا الموضوع .. وبقول ليك دى فرصه انك تحاولى ان تتخلصى
من العواطف الزائده فى مثل هذه الامور ..
ولكى الشكر
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: مروة احمد مكى)
|
تحياتي مروة .. و ترحيب متأخر بيك في البيت الكبير ده..
بيكون نفسي ارحب بكل عضو جديد أول ما ينضم..لكن للأسف ما باقدر اواكب!
تعرفي دعوة ربنا يحفظنا.. كل يوم الصباح و أنا بأوصل الأولاد للمدارس.. بعد قرآن الصباح بتكون دي دعوتنا..
و اللذيذة هديل (3سنوات) بتكون حريصة انها تقول الجزء ده بصوت عالي..(ربنا يحفظنا كلللنا)..
زي زميلتكم دي.. تكون بالنسبة ليها أمها ماتت من يوم دخلتها لدار العجزة ..
اتذكرت مرة واحدة سالتني إذا كان عندنا دور عجزة أو زي ما بيسموها تلطيفاً دور رعاية مسنين..
فحسيت بفخر كبير عكس ما هي كانت متصورة.. و أنا بأقول ليها انو ما عندنا و ما بنحتاجها..
و انو كيف المسن عندنا لحد ما يموت بيكون راعيه أولاده.. أو اخوانه..أو أولاد أخوانه .. و انو ما بيعدم القريب البيراعيهو..!
ربنا يخلي لينا تخلفنا إذا كانت حنيتنا مربوطة بيهو!
أسعدني تداخلك..شكراً ليك..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: على محمد على بشير)
|
الأخ علي محمد علي.. اسمح لي أن أختلف معك بشدة..
عمرها الحياة ما كانت بتقيف بينا لموت زول..
حتى لو من حزننا عليهو اتخيلنا كده..
طول عمرهم الناس بيموتوا و الحياة بتستمر بأهلهم.. لكن من حق العزيز البيموت لينا انو نحزن على فراقه..
ياخي الضيف البيجي يقعد معاك يومين.. بتفقده لما يمش.. كيف حبيبك لما يمش و ما يرجع؟؟!!!
بعدين المعزين و بكل الظواهر السلبية البتصحبهم لبيت البكا.. برضو وجودهم بيخفف على أهل الميت..و بيسليهم عن حزنهم..
و قصة ونسة الكورة و ما شابه.. برضو دليل انو الحياة بتمشي.. لكن صدقني.. محروقين الحشا الوقت داك ما بيشتغلوا بالكورة!
اليابان و الدول الكبرى ما وصلت للوصلت ليهو بسبب انعدام العواطف و المشاعر.. لكن بسبب الجد و الإجتهاد..
لكن عايز تعرف انعدام المشاعر عمل ليهم شنو؟!
حكى لي زوجي مرة انو سايق عربيتو لقى مرة عجوز واقعة في الشارع و العربات و العجلات ماشة جنبها و ما بتقيف..
ما في زول كلف نفسو يشوف الحاصل عليها شنو..لحدي ما مرّ هو ولقاها..و قف و شالها وداها المستشفى..
نفس الموقف اتكرر معاي أنا بعدها بسنة..!!
هنا ما في حق والد.. في دار عجزة تقريباً في كل حي.. و حتى دار العجزة ما بيدفعوا حقها الأولاد العاقين ديل..لكن بتدفعها الحكومة في شكل التأمين الإجتماعي!!
هنا العجايز لو ما فقدتهم الحكومة..ممثلة في الجزء المختص بالعجزة من المجلس البلدي.. إلا يعرفوهم الجيران ماتوا بعد ما ريحتهم تطلع!! مع العلم انو العجايز بيمثلوا النسبة الأكبر من عدد السكان..!!
هنا الأم ولاّ الأب لو ضرب ولده أو اختلف معاه الولد مستعد يقتله !
هنا ممكن أطفال يموتوا من الجوع و هم في بيوت أهلهم..القادرين و مستطيعين و ما ناقصهم القرش ..لأنو الأم و الأب ما بيهتموا يأكلوهم..حصلت مرتين في الثلاثة سنوات الأخيرة.. و بيكون الطفل محبوس في البيت ما في زول شافوا قبل كده لحدي ما يموت!!
هنا الوالدين الشباب الصغار في السن ممكن يقفلوا البيبي في خزانات الشنط (Lockers) عشان هم يدخلوا السينما!!!
هنا في بلاوي كثيرة بتتكرر كثير.. أحكي ليك منها شنو ولا شنو عشان تعرف اننا في مجال العلاقات الإنسانية أرقى و أكثر تطور منهم مية مرة!
ما تشوف الأجهزة و التكنولوجيا دي..هم أبرد منها..
و ليس كل ما يلمع ذهباً..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
كيف حالك اختي سناء والف حمدا لله علي سلامة هديل ورد الله غربتكم وغربتا
ياختي ما حدث عندكم غير مسغرب كثيرا قد تصابي بالدهشه والغرابة في البدء
ولكن بعد ان تسترجعي موضوع انهم غرباء عن جنسنا وديننا ولغتنا قد تجدي العزاء
ولكن ان تكوني وسط عرب ومسلمين ويحدث ما يشبه هذا الموقف فهنا الغرابة الاصيله
قبل فترة واحدة سودانية بتحكي انها بالليل وزوجها ما زال بالدوام وعيالها صغار لا يحسنون
التصرف ، اشتعل فيها فرن الغاز ودون ذكر للتفاصيل اصيبت في جزء من وجهها ورقبتها
واخذت تصرخ مستنجدة بالجيران مع العلم بان جيرانها سعوديين اي انهم بقليل من التركيز سيتبين لهم ان من يصرخ امراة وفي موقف حرج هل تعلمي انه لا احد رد عليها لا من قرب ولا من بعيد الى ان عاد زوجها واسعفها .
بعد كم يوم زارتها جارتها وسالتها عن صراخها في ذاك اليوم استغربت اختنا
قالت ليها طالما انك سمعت لماذا لم تاتيني وقتها ، فاتضح ان السعوديه كانت تحسب انه شجار بينها وزوجها واستغربت حينها لماذا كل هذا الصراخ.
في حين انه في مرة ونحن في الجامعه كان زواج الاخت فاطمه عجبنا والاستاذ عزالدين عز العرب
المناسبه كانت في امتداد ناصر والكل مبتهج فجاءة سمع البعض صراخ شديد جدا فتوقف كل شئ وجرى الناس باتجاه الصوت فتبين انه زوج دخل على اهل بيته مخمورا ضرب الام وابنائه فانقذوهم منه
فلك اختي ان تقارني ولا تستغربي فالكثير الكثير من هذه المواقف تمر يوميا في غربتنا
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: اسماء الأمين)
|
العزيزة أسماء..
الله يرد غربتنا... و يريحنا من الحاجات العجيبة دي..يعني الجيران ديل..حتى لو كانوا بيفتكروا انها مشكلة عائلية..
طيب ما فيهم خير يفضوا الإشكال..
أو على الأقل يختوا احتمال واحد في المية انو في حاجة خطيرة و بناء عليها يتصرفوا..!!
طبعاً برضو حاجة زي دي لو حصلت في اليابان.. ما في زول بيفتح بابه عشان يشوف الحاصل شنو..
عشان كده مرة واحدة يابانية قالت انو امها موصياها لو في زول اتهجم عليها.. ما تصرخ بس.. لأنو ما في زول حيفتح شباكه و يشوف الحاصل شنو..
قالت ليها.. قولي حريقة.. حريقة.. كده الناس كلها بتجي طالعة من بيوتها.. وطبعاً البيتهجم عليها حيخاف و يجري!!
و ما أفتكر انو في شعب في البرود و عدم القدرة على التصرف أو التدخل الحكيم..زي اليابانيين..!!
قبل كم شهر واحد من امريكا اللاتينية اعتدى على طفلة عمرها 6 سنوات و قتلها..
في التحقيق.. واحد من الجيران قال انو شاف اللاّتيني ده قاعد و بيتكلم مع الطفلة دي و هي راجعة من المدرسة..
و اللاّتيني اصلاً كان راحل جديد للحي..
استغربت انو الجار ده وقت شافو بيتكلم معاها ليه ما سألو داير منها شنو ..!
خصوصاً و انو عزابي و ما عندو سبب يخليهو يتكلم مع طفلة قدر دي !
أو ليه ما وقف يطمئن لحدي ما البت تمش بيتها..!!
لكن (دي ما شغلتي ) هي طريقة التفكير التقليدية عند اليابانيين!!
لكن زي ما قلت..إذا كانوا المسلمين بيتصرفوا كده!
لكن الأم دي انا كنت قايلاها واحد.. أكان في السودان و لاّ في اليابان..ولاّ في أي حتة في الدنيا!
طلعت غلطانة!
تحياتي..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
العزيزة سناء
السلام عليكم ورحمة الله وبركاته
ألف حمد لله على سلامة هديل.
اليابانيون شعب فريد في التعامل مع أخبار الموت. قبل عشرة سنوات كانت عندنا سكرتيرة في المكتب والدها مريض في المستشفي ، وفي أحد الأيام وأثناء ساعات العمل اتصلت بها والدتها في الصباح لتخبرها بوفاة والدها.لم تظهر أي نوع من الحزن أو الجزع ولم تخطرنا بوفاة والدها ولكنها استمرت في عملها عادية جدا . وفي نهاية ساعات العمل أخبرتنا بوفاة والدها وطلبت أذن بالغياب ليوم واحد لتقبل العزاء في والدها مع والدتها على أن تعود للعمل في اليوم التالي .
Take it easy
تحــياتي
| |
|
|
|
|
|
|
|
|
 Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
العزيزة سنــاء السلام عليكم ورحمة الله وآمل أن تكونوا بخير.
من الأشياء الجميلة التي يتعلمها الإنسان في اليابان هـو الصــبر : الصبر على العمل ، الصبر على المصائب والصبر على الأحزان والصبر على الغربة الصعبة..لقد شـــاهدت اللقاءات التلفزيونية التي تمت مع العائلة اليابانية المنكوبة ولم يدهشني صبرهها كثيرا فقد اعتدت على مشاهدة مثل هذه المواقف التي تتكرر كثيرا في التلفزيون الياباني .
أحسب أن غربتكم في مدينة فوكوكا حيث لا يوجد سودانيون هي أصعب غربة على الإطلاق وأسال ألله أن يعينكم على تحملها . ولكن مما يبعث الإطمئنان أن هذه البلاد أكثر بلاد العالم أمنا واحتراما للأجنبي .إذا استطاع الأجنبي أن يتغلب على حاجز اللغة ويعتاد على الهزات الأرضية التي تحدث كثيرا يمكنه أن ينعم بحياة هادئة مطمئنة . صحيح من الصعب بالنسبة للأجنبي اختراق المجتمع الياباني وبالتالي يصعب خلق علاقات اجتماعية وإن حدث ذلك فهو في أضيق الحدود ، ومع هذا لا يجد الأجنبي هنا أي مضايقة مثلما يحدث في بعض الدول الأوربية.
أسأل الله أن يحفظكم ويحفظنا جميعا.
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
الاخت سناء خالد
الله يخليك ويخلي لينا حنيتنا دي
برضو انا بتذكر مشيت السعودية ... كان ابن بنت خالتي (عثمان) مريض وله ست سنوات طريح فراش المستشفى الى ان رحمه الله . كنت مع امه الشفوقة الحنونة التي لا تبارحه لحظة أاتي الى المستشفى.
وبجانبه فتاة تعاني من الموت الدماغي - كما كان يعاني هو - يتم التعامل معها عن طريق عيونها فهي جميلة العينين - وتدعى بذلك Beautiful eyes .
ومجرد من ان اسلم علي (عثمان) أذهب اليها وأسلم عليها وتجاوبني كما تجاوب الجميع برومش حباها الله لها للتعامل بها وكأننا جميعا نفهم لغتها ....
وعندما اكملت الاسبوع الاول معهم .... توفيت البنت .....
بكت ام عثمان كما وأن المات هو فلذة كبدها - تركتها تبكى لتخرج ما بداخلها من ألم وحتى تتنفس ... الى ان اتصلت بنا كبيرة السسترات بانه يمككنا ان نرافقها الى ام الطفلة ...
وبالفعل ذهبنا
وثلاثيتنا نبكى - لما عيونا وارمين -
وبالفعل تفاجانا - لما وجدناه - اسرة عادية وكأن شي لم يكن - الحالة الام شالتها في ايديها الى المقابر حيث تم دفنها ...
وانا وبنت خالتي الالم يعتصرنا ... ولما جينا راجعين البيت عزينا بعض حتى بعد يومين تلاتة حتى العبرة فكت مننا
اما عند وفاة عثمان فحدث ولا حرج ...
ربنا يتقبلهم قبولا حسنا ( نورا وعثمان)
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
الاعزاء
بعد كتاب الاخت سناء والمداخلات التي ازددت بها علما فللجميع الشكر حاولت ان اجد اجابة لتصرف اليابانيين هذا فسالت وعلمت انها من اثر ثقافهالساموراي Samurai- ثقافة ذكورية - تتطلب ان علي الرجل الا يبكي مطلقا ولا يبدي مشاعرا تقلل من مكانته وقوته في الخطوب اما المراة فان ذلك من فكر دياناتهم التي تؤمن بتناسخ الارواح ٌReincarnation فالميت عندهم راجع في صورة اخري... وارجو من الاستاذ جعفر كونه عايش اهل اليابان عمرا طويلا ان يزيدنا في ذلك للمنفعة
ودمتم
ابوبكر سيداحمد
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: abubakr)
|
الأخت الغالية سناء
أتارينى ما براى البكاية فى الدنيا دى. أنا طوالى شكل مع راجلى فى (قلبى الرهيف) و (دموعى القراب)، أى حاجة فى التلفزيون تبكينى و تنكد على، الأفلام الأمريكية دى أنا بكيت فيها بكى!! أنا عندى ولد أختى بيبكى فى أفلام الكرتون، و لمن أمو تقول ليهو يا محمود دى أفلام كرتون ساكت، يقول لها من بين دموعو (لكنها بتحصل فى الواقع برضو)!!
و القصة دى حصلت معاى لمن كنا فى بريطانيا، عندى صاحبتى أسكتلندية (الله يرحمها) إتوفت بعد معاناة مع المرض، و كنت فى اليوم الإتوفت فيهو مواعداها إنى أزورها فى البيت، و فى مواعيد المدرسة جيت أسوق بناتى لاقيت ديفيد راجلها و كان شكلو هادئ و مترقب ، قلت ليهو (جين كيف) قام مسكنى براحة كدة و قال لى (جين ماتت قبل ثلاثة ساعات) ، عاد فرجت فيهم المدرسة، و يمسكوا فينى صاحباتاها و يقول لى ياخى ما كدة عشان أولادها لسة ما عرفوا، و إلا قادونى للبيت حتى قدرت أمشى، أها تانى يوم من الصباح جاء ديفيد (يعزينى) فى صديقتى الغالية فى بيتنا !! أنا أكبرتها فيهو جداً لأنو ما قدرت أدخل بيتها إلا بعد شهر و بس من الباب.
يمكن فعلاً نحن ما عمليين ، بس نسوى شنو؟؟
يعنى برضو أنا كنت طوالى بتخيل لمن (أفقد والدتى) ح أعمل شنو؟؟ و تقوم الدموع تعمينى من مجرد الفكرة، بس سبحان الله لمن جانى خبر وفاتها( رحمة الله عليها) نزلت على سكينة و صبر ما كنت ممكن أتخيلها. و الحمد لله ربنا فعلاً بينزل الفاجعة و معها الصبر بإزن الله.
و ربنا يرد غربتكم و غربتنا يا بت الحلال.
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: نوسة)
|
الأخت الحبيبة نوسة..
رمضان كريم و تصوموا وتفطروا على خير.. (اعذريني على التأخير)
ربنا يرحم الوالدة و يسكن روحها الجنة يا رب..تعرفي أنا باتخيل انو صبرك على فقدها كان من رحمة ربنا بها هي.. و أيضاً بك..
قصة وفاة صاحبتك الله يرحمها, بتثبت انو نحن بنحس بروابطنا بالناس البنحبهم..أكثر كثير من غيرنا,
يعني حتى لو كان راجلها ده متأكد انها حتمشي الجنة و هو حيلاقيها هناك, كيف هاين عليهو الزمن و العمر الحيعيشو بدونها لحدي ما يلاقيها!
دي الحاجة الأنا ما قادرة أفهمها!
خليني أقول ليك جزء من تعليقات خالد زمان على بكاي..هسه اتعود بقى ما بيعلق!
..غايتو نحن الدموع دي دايرين نعرف بتنشف متين!
..أول مرة أشوف لي زول أكان زعل يبكي و أكان فرح يبكي!!
ربنا يرد غربتكم و غربتنا و يمتعنا بطول صحبة أحبابنا..
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
Quote: وأكثر ما يعجبني في اليابانيين أنهم شعب مؤدب
ومهذب للغاية. |
هذا ما أدهَشنِي حقاَ أنهُ شعبْ طيّبْ وراقِي كَمان..
كُنت بِمنطقة "هَجُوجِي" فِي طريّقِي لقلبْ طوكيّو بالقِطار أي نِهاية
رحلتِي "شِنجِكو" بالقِطار العادِي ومِنها أركبْ "البولِيّت ترِيّن" لمدينة "ناقويّا"...
شعرتْ بأن لَيّ مُتَسع مِنَ الوقتْ .. فقُلتْ أحسن أنزل فِي "اليّونو إستيّشن" ومِن
بعدها أواصِل مُشوارِي..وأنا داخِل القِطار مُمسِك علي خارطِه عليّها
كُل محطات هذا القِطار بِتَفاصِيّلها وما مُحتاجه مِني أن أسأل شخص
ليوضح لِي محطة ما.
فكُنتْ أعايّنْ فِيّ الخارِطه لأعرفْ أين موقعِي مِن المحطه المعنيّه..
جاء واحِد معه صاحِبته يسألانِي لو بإمكانهُما مُساعَدَتِي ونَحنُ "مِشمعيّن" لأن
القِطار مَزحومْ و الأكسجيّن يكاد يكُون مَعدومْ...
نَزلا معي مِن القِطار ليوصفا لِي تِلكَ المحطه..
وطَلَبا مِنِي لو إحتاج إلي أي مُساعده أخري ÷ما فِي خدمَتِي !!
الشَعبْ الياباني جد شعب فَريّد مِن حيّث مُساعدة الآخر..
رغم كُلْ هذا هُنالِكْ عيّوبْ شاهدتُها بِطوكيّو!!
وطوكيّوهِي فِي قِمة النَظافه والأناقه:
شاهدتْ ، الناسْ الغلابه مُفترشه مراتِبها ومُتغطِيّه بالبَطاطِيّن علي أطراف الأزِقه وبَعض الطُرقات ذات الإزدِحام وكأنهم عائشين فِي السودان ..
الله يِكرِمكُمْ الواحد مِنهم عادِي جِداَ ييِتبول علي الشَارِع (الهُووم لِيّسْ)..
ولا يُبالِي..
هُنا شابهه لِي السُودان تَماماَ.
تحِيّاتِي لكِ يا أخت سناء.
سلامِي لأمجد وأزهرِي بِطوكيّو.
| |
|
|
|
|
|
|
|
|
|
Re: يا جماعة الناس ديل حيجنوني !! الأم أولادها التلاتة ماتوا في لحظة واحدة.. أنا ببكي و هي بتضح (Re: Sana Khalid)
|
سناء و المشاركيين
رمضان كريم و الله لا وراكم مكروه فى عزيز ان شاء الله .... قبل كم اسبوع مشيت اعزي صديق عزيز فى وفاه امه المهم الفاتحة اقيفو معاي شويه فى موضوع الفاتحه شويه انا اشك انو كل زول خاشي البكا بقر فاتحه القرآن كامله يعني ما ممكن الزول مما يخش الباب يعزي الزول و تكون كبايه الشاي في يدو وفي نص الونسه ده كلو فى اقل من دقيقة .
المهم جابو لي الشاي و شكرتهم و قعدت ساكت اظن الناس كانت مدوره فى موضوع ما و جيت انا خاشي و سكتو شويه مع الفواتح لكن بس وحاتك شويه كده و الناس دورت الونسه تاني شي غربه و شي مدينه السنط و شي تجارة عربات و ضحك و قههقهه و القا ليك ود المرحومة زاتو شغال ونس و ضحك طيب في داعي للعطله بالجد فقدنا احترام الموتي و الناس بقت بتنضم فى اي مكان دون مراعاه شعور الزول الفقد عزيزو حسبنا الله والنسوان بهناك مدورات الونسه و الشفع غلبه و اكل و شراب الزول يشرب بدل كبايه الشاي سته كبابي لا يخلو الزول يخزن و ولا يرتاح
| |
|
|
|
|
|
|
| |
bayan
abubakr
Ehab Eltayeb
Sobajo
Gaafar Ismail
فيصل نوبي
على محمد على بشير
اسماء الأمين
غادة عبدالعزيز خالد
doma
إسحاق بله الأمين
انعام حيمورة
نوسة
Mohamed Adam
Mohamed Ahmaed Olyesh
Abureesh
Sayed Bekab
فيس بوك
تويتر
انستقرام
يوتيوب
بنتيريست