|
|
 رسالة الي وزير الداخلية: سجمــــنا البوليــص هجمـــنا
|
السيد البروفسير وزير الداخلية
المحترم
انا المواطن سجيمان اشكو لكم ناس البوليص حيث انه في يوم لسبت 26\8\2006 وفي تمام الساعة الواحدة وخمسة وتلاتين دقيقة بقرأة موبايلي التلاتين عشرة....وبينما ان ومجموعة من زملائي من فقراء الشعب السوداني....الذين لا ينتمون الي اي حزب من الاحزاب ومافي حزب مالي عيونهم...كان حكومة كان غيرها...كنا نركب حافلة تلاتين راكب لكنها كانت شايلة تلاتة وتلاتين راكب بعد مضايرة مننا....وبعد ان دفعنا الكمساري التعريفة الجديدة بعد ان زاد السيد وزير المالية ربنا يغتي عليهو ويزيدو كمان وكمان ويعلي مراتبو بركة شيخي ابو الجاز....بعد ان زاد اسعار البنزين والجاز والزيت والسكر والبصل وكل شي... الحقيقة انا ما لايمو تب... لمتين البنزين دا يكون رخيص ؟؟ لي يوم القيامة يعني؟...ما لازم يزيدوهو....وبينما نحن دفعنا حق الحافلة وكل واحد قاعد مؤدب ومربع ايديهو وخشمو ما فتحو...واثناء عبورنا الكبري الجديد بين امدرمان والخرتوم ونحن جاين من امدرمان.... اذ بمجموعة من عربات البوليص وبها مجموعة كبيرة من رجال البوليص الاشاوس...تمر بالقرب منا.. واذ بالبواليص يحمرو ويكورو في الناس الراكبين في الحفالة....وانا شخصيتن حمرو فيني اكتر من عشرين بوليصايي...وخفت وحات الله يقومو ينزلو ويجدعوني في نص بحر ابيض...ويصفقو..قلت البد تحت الكرسي حق الحافلة قدر ما حاولت ما لقيت طريقة...وبعدين استغربت والله انا وزملائي فقراء الشعب سوينا شنو؟؟؟ ..والله وما طالبني حليفة... مافي ولا زول كان زعلان في زيادة البنزين ولا حاجة...وكمان عارفين انو الحكومة محمولة... ومصاريفها كتيرة... اها تجيبها من وين؟...كان ما زادت البنزين....الوزراء براهم كتار خلاص... والمستشارين... والمساعدين...وعيييييييييك... اها ديل يجيبو ليهم مصاريف من وين؟؟ عندهم وليدات دايرين مدارس..ودايرين ياكلو ويشربو.....نحن بنتحمل لكن الناس الكبار ديل ما متعودين علي المعمسة...والبشتنة...دحين يا سيادة البروفسير الوزير..حدس ناس البوليص ما ينهرو الناس من جم....حسي افرض مع نهرهم للناس دا في واحدة حامل ومن الخلعة ولدت في الحافلة.....والله انا دا زات نفسي من الخلعة نطيت ووقعت في بحر ابيض وانا معرفتي للعوم شبه؟.....المسعول منو؟؟؟؟؟....
مقدمه
المواطن الماشي في ضل الحيطة سجيمان
|
|
 
|
|
|
|
|
|
|
|
Re: رسالة الي وزير الداخلية: سجمــــنا البوليــص هجمـــنا (Re: محمد الامين محمد)
|
انت نان تفرش لي لاب توبك من ضل لي ضل...وداير تشيلو في الحافلة وما يسمعوا بيه؟
دا زمن العولمة يا صاحبي ..أتلقي لاب توبك لامن جات الحافلة بي جنب البوليص
قال صررررررررررررررررررررررررررررررررررررررررررررررررررررررررررررررررر
اها هن صارين لي الصررررررررررررررررررررررررررررررررررررررررررررر دي
وما عندهم شغلة بي باقي الركاب..
دحين لاب توبك ما فيه بلو توث؟
| |
|
|
|
|
|
|
|
|
|
Re: رسالة الي وزير الداخلية: سجمــــنا البوليــص هجمـــنا (Re: سجيمان)
|
ياسي جي
,هسع مساهر بينا وضارب حروفك بالأحمر عشان تقول:
| Quote: وانا شخصيتن حمرو فيني اكتر من عشرين بوليصايي... |
إنت ماسمعت بالمثل البقول:
(الكتابتو حمراء بشوف العين الحمراء)
سلامتك من الهجمة
..............................................................................................
عليك بالهجمة المرتدة
| |
|
|
|
|
|
|
|
|
|
Re: رسالة الي وزير الداخلية: سجمــــنا البوليــص هجمـــنا (Re: سجيمان)
|
سيجيمان ازيك ,
انت ظنيتك بتاع مشاكل و كبب سااااااى دحين ات فى نهاية جوابك داك اليوم ماك قايل لسعادة الوزير الكلام ده الكلو تحنس لناس البوليص :
(...دحين يا سيادة البروفسير الوزير..حدس ناس البوليص ما ينهرو الناس من جم....)
تقوم تجينا بالفوقانية و تحمشنا  مافي ولا زول يشجب ويدين الصرة حقت ناس البوليص دي؟) ها تلقاها عن غافل
لا ما نشجب و لا بندين مالك ما عندك لسان ماك فصييييييييييييح و نصيييييييييييح.
نادية السر
| |
|
|
|
|
|
|
|
|
|
Re: رسالة الي وزير الداخلية: سجمــــنا البوليــص هجمـــنا (Re: Nadia Elsir)
|
اللخو
والله انا برضو جني وجن البوليس
خسوساً بوليس النظام العام
وعلي راي المثل
أبليس ولا البوليس
زمااااان يا سجيمان حبوبتي الله يطراها بالعافية
ويوسدا الباردة
قالت لي يا المبروك
ربنا يكفيك شر الظلام والحكام و بوليس النظام العام
وأبوي كان بدعي عليهم و بقول
ربنا يكفينا شر بوليس الكشات و الهرشات
اللهم شتت شملهم و أديهم الحاجة
ياخ  كرهونا
| |
|
|
|
|
|
|
|
|
 Re: رسالة الي وزير الداخلية: سجمــــنا البوليــص هجمـــنا (Re: سجيمان)
|
عزيزي سجيمان،
كيفنك يا خوي.. ما بركة الما وقعت في بحر أبيض!! العلي العليهو زايد شديد اليومين ديل..
| Quote: وبعدين استغربت والله انا وزملائي فقراء الشعب سوينا شنو؟؟؟ ..والله وما طالبني حليفة... مافي ولا زول كان زعلان في زيادة البنزين ولا حاجة...وكمان عارفين انو الحكومة محمولة... ومصاريفها كتيرة... اها تجيبها من وين؟...كان ما زادت البنزين....الوزراء براهم كتار خلاص... والمستشارين... والمساعدين...وعيييييييييك... اها ديل يجيبو ليهم مصاريف من وين؟؟ عندهم وليدات دايرين مدارس..ودايرين ياكلو ويشربو.....نحن بنتحمل لكن الناس الكبار ديل ما متعودين علي المعمسة...والبشتنة... |
شكرا على أدب المقاومة المتفرد!!!
ياسر
| |
|
|
|
|
|
|
|
|
|
Re: رسالة الي وزير الداخلية: سجمــــنا البوليــص هجمـــنا (Re: سجيمان)
|
تعرف ياسجيمان أنا لاعبك راس في كتابي الذي شارف على
نهايته وهو بعنوان (الظرفاء) وهو يتناول الظرفاء منذ
عهد خليفة المهدي وحتى الحقبة الانقاذية الحالية .
أمنيتي أن يتوسط لي صديقك الجنرال عند الأستاذ حسين
خوجلي لبدء نشره على حلقات في صحيفة (ألوان) .
ولاعندك اقتراح تاني لجريدة تانية.
بالمناسبة أين زميلنا الصحفي الرياضي الجميل أحمد
محمد الحسن يا جنرال ؟
مع محبتي
فاروق
| |
|
|
|
|
|
|
| |
سجيمان
محمد الامين محمد
nazar hussien
عبد الله عقيد
Saifeldin Gibreel
abas
ترهاقا
حبيب نورة
الصادق صديق سلمان
عاصم ابوبكر حامد
Yasir Elsharif
فاروق حامد محمد
saif massad ali
فيس بوك
تويتر
انستقرام
يوتيوب
بنتيريست