|
|
 الحنتشة ... وحكمــة بت الحســن
|
بت الحسن الله يرحمها لما كانت تجيها فردتها بت السُني مغبونة وزعلانة من عمايل الوليدات وأبو الوليدات ونسوان الفريق والظروف والحياة البقت صعبة ....بتقوم تهديها وتطيب خاطرا ...وأحياناً كتيرة تحس انو الموضوع ما بستاهل الزعل ده كلو...وشويتين كدة بعد فنجان الجبنة بتلقى الزولة دي مرتاحة وزي الما حصل شيء وتطقطق شبشبا وتتخارج...وتخلي كل هموما عند بت الحسن.
كانت عاجباني حكمة بت الحسن دي لدرجة بعيدة..كيف انها بتمتص زعل بت السني بصورة ما عادية وبكل أريحية بتقدم ليها الجبنة ...بس كنت ملاحظ دايما انو بت السني بتكون متضايقة ونفسا حاااااار ..لكن بقدرة قدر أول ما تقعد مع بت الحسن بروح منها كل شيء زي كأنو بتعمل ليها سحـر.
قمت سألت حبوبتي – طبعا لما كبرت شوية- انتي يا حبوبة هي مالا صاحبتك بت السني دايما بتجي زعلانة....ضحكت بت الحسن وقالت لي أصلو يا ولدي هم عايلتم دي كلها عندها الحنتشة دي ...بس هي طيبة...كان أول مرة أسمع لفظ الحنتشة....ما لقيت ليهو تفسير...بس قياساً علي حالة بت السني ... فهمت إنو الحكاية : نفس حار+ تحفز دايم للمشاكل+حالة هياج زيادة عن اللزوم+ ما داير معاك كلام+ حاجات تانية حامياني
لاحظت في المنتدى في حنتشة برضو زيادة عن اللازم زائد ليها تصيد لأخطاء الآخرين وإن كانت في أغلب الأحيان ما بتعني أي حاجة
عشان ما أبراكم...محتاجين لي حكمة بت الحسن دي هنا ومن غير جبنة...عشان نعفص للحنتشة الزائدة
رأيكم شنو؟
|
|
 
|
|
|
|
إدريس البدري
فيس بوك
تويتر
انستقرام
يوتيوب
بنتيريست