|
|
 مضايقات بنات !!!!
|
خطرفات تحتيه خالص
الدخان والدلكة خلو عقلى لكة..
هواصلا مصلح الراس بحاجة خفيفة لزوم الشجاعة وكدا ، الولية كملتا ليهو بحركات الهنود دى ........الله يستر عليهو
واعدنى الساعة ستة...
دا كضب عديل أو يكون كاتبها واحد مغترب ،السودان كلو فيهو خمسة انفار ملتزمين بالمواعيد والغريبة كلهم مسافرين .... ونسوان كمان
مشهد جانبى موُتر:
الخلانى ألبس القميص الابيض دا فى اليوم المسخن دا شنو ...أقدار بس -حسى الواحد يخش المعاينة والقميص كلو خرايط عرق .... مشاكل
الخرطوم -عربى عربى" سمعتها بعد تعب وانا انزع عيونى من جركانة الموية الباردة بتاعة برُد بعد ان حسبت (الشرتيت)
جرى ركبتا جنب الشباك ..عشان السفة والناس الطالعين نازلين ما يوسخو القمبص زيادة.طوالى سرحته ...لمن أصل. لابد أورنش الجزمة ..لكن بشنو ,اديها فرشة ساكت...وأراجع الاوراق وبباقى الرصيد أعمل مكالمة لمولانا ضرورى عشان اتأكد إنو كلم ناس اللجنة ...
طيب الخيارات شنو لو الواحد عينوه هنا ممكن يجازف بالركشة بالليل .. ولو ودهو الولايات بدرس حصص رياضيات وكمب....... _
بسم الله_ الزولة الجنبُى دى مالها والجابا جنبى شنو..!؟
لاحولة الا بالله -
النسوان ديل عوارض عديل
ياالله الدنيا سخانة وماناقصة
..الزولة دى عصرتنى على الشباك عديل
ياربنا ما تزح لهناك شوية ماعشانى عشان القميص بس
لو سمحته الساعة كم ""أيوه دخله بايخة .. لكن اخوك مفتح حيشتتا من دربو بالكيماوى طلعت الموبايل ومعاه كيس الصعوط
-تسعة الا ربع-
وطوالى بديت أدنكل فى سفة دقار لورى
يالله ما حأصل بدرى وبطارية موبايلى نازله أعمل شنو
... إتلفت علىُ:لو سمحت ممكن موبايلك دقيقة واحدة أخت شريحتى ..تلفون ضرورى بس
يا كرييييييييييم....
أنا جنى و البتاع الدهبى العامل ذى الترر بموية الدهب البختو فى الخشم
جداً ...اتفضلى
المساحة ضيقة زاد الاحتكاك والالتصاق واتلخبطت الايدين شويه وابتسامتها فى اتساع
أيوه .. الو ... معليش ..متأسفة ...لكن قلت أذكرك
لا خلاص ..شكرا ..بعدين بجيك ..سلامات
ملعون دى بلد ، عدييييييييل كدا... ياخى أنا مالى مافاضى
إتأكدت من الموبايل والجزلان وانا نازل -الحمدلله كلو تمام
..
..
..
مشهد آخير:
صدفة كان نفس المقصد
أهه.. إنشاء الله شالوك معانا
لا والله .. لكن مافى مشكلة ..بعد ثلاثة شهور فى تعينات تانى
يازول خيرا فى غيرا .. طيب دا تلفونى لو فى تقديم لمؤسسة احسن من دى إتصل بى طوالى
أكيد ...طبعاً.. سلام
أكيد ... كان حتى القمصان وبناطلين الجنيز ضايقتونا فيها ...
الا الواحد بعد دا ...........
|
|
 
|
|
|
|
فيس بوك
تويتر
انستقرام
يوتيوب
بنتيريست