كوني اسميها خواطر يمكن ما يكون اختيار موفق.. لكن أهو موضوع داير في دماغي ليهو كم يوم.. وتكاثر الأدله حولي عنه مخليني أحبط واتغاظ... في مواصلة للكلام المحبِط والمحبَط عننا كشعب كسلان وفاكيها في روحه... وفي تعزيز لهذه الفكرة باتجاهات مختلفة... سرح خيالي في الشعوب الأخرى (القاعده في واطات الله دي وعارفه قدرها)... وقارنتها بينا... وبي حضارتنا المتأصله من ما معروف متين.. كنت بتفرج في التلفزيون، لفت انتبهاي آله ظريفة كده بتهب الهوا في النار.. الآلة شكلها زي الأكورديون كده... تضغطها من الجهتين.. تطلع ليك هوا كتير.. غالبا بتستخدم مع المدافيء البتعمل مع الحطب في البيوت... عشان تبدا في الاشتعال... فورا اتذكرته الهبابه حقتنا.. على الرغم من انه لزمن طويل جدا السودانيين اعتمدوا على الكانون في طبخهم، مافي زول فكر في ابعد من انه يستخدم الهبابه زاتها الاستخدمتها امنا حواء.. وابعد شي قدروا يفكروا فيه هو انه يلونوا السعف المستخدم فيها يعني نظام ديكور!! الفكرة دي وديتني لاتجاه التفكير ده.. احنا شعب كج بحب التعب ولا بكسل من تسهيل حياته ما عارفه... يعني احنا ابداً ما بنفكر في اتجاه (اختراع) أشياء تسهل حياتنا الصعبه ... يعني اديكم مثال آخر حيوافقوني فيهو الأخوات المتزوجات... من متين المرأة السودانية بتحنن؟ من الله خلق الحنة والسودانية تتحنن.. وعشان كربت زمانها لازم تكو نحنتها سوداء، لازم تطبق الحنة مرتين تلاتة عشان تصل للون العايزاه.. على العكس من الشعوب الأخرى البتحنن فرد مرّه ... اها.. انا متأكده اني بتحنن بنفس الطريقة الاتحننت بيها حبوبتي الخمستاشر ... تمسك أصبع أصبع... وتحنسوا .. قصدي تحننوا ولحدي ما تنتهي من خت الحنة تكون روحها طلعت.. مافي واحده جات قالت النسوي لي آلة... فيها فراغات للأصابع... تكبي فيها عجنت الحنة وتغمسي فيها اصابعك .. وتراااا تطلعي محننة... لا لا.. تحنن بذات الطريقة وإلا ما بتبقى زاتو... حسي الحنة مما اشتهرت في اوروبا كبديل للوشم tato... اخترعوا فيها مليون اختراع... شوف عيني، عملوا ليهم قلم بتاع حنة.. تشتريه.. وترسمي... المشاط...الواحد تقعد للمشاط كم يوم عشان يمشطوها.. وتلقى نص الشعر منكش لحدي ما الله يهون ويتم.. وبعداك تخليه شهر عشان فرتيقه صعب ومشاطه تاني صعب... اها افروامريكانز لما طلقوها موضه في الدنيا والناس بقوا عايزين يتمشطوا.. برضه شوف عيني.. اخترعوا آلة... تمسك تلاتة خصل شعر.. وأررررررررررر تمشط ليك الشعره في ثانية.. ده كمان كان ما ختت ليك لون في الشعر لزوم الموضه وكده..
اواصل ولا كفاكم؟
بنت الحسين
07-13-2006, 12:52 PM
lana mahdi lana mahdi
تاريخ التسجيل: 05-07-2003
مجموع المشاركات: 16049
تعرفى تحدثنا فى هذا الامر من قبل كان معز يقول, لو الامريكان ديل هم البيعملوا الحنة كان تمشى الدكان تقولى ليهم عاوزة حنة مقاس تمنية و بس يدوها ليك واصلى متابعاك و خالص الود غادة
07-14-2006, 12:16 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
لنوية صاحبتي... غادة عبد العزيز... أخونا لؤي.. عليكم الله ما مغسة.. أديكم دي كمان... المقشاشة حقتنا... لحدي الآن الواحده تلقاها تقش وحانية ضهرها، كان غزت ليها عود ووقفت على حيلها وقشت الدنيا بتطير؟ وما تقولوا لي اختراع حديث.. ما حصل شفتوهو في المسلسلات التاريخية؟ بلاش ده... كربت زمانهم البمسحوا بي قطعه قماش وجردل ديل.. ضهرهم ما اتقص النص؟ حصل في زول فكر ليهو في عويد يخفف الحال ده؟
بجيكم تاني كان دايرين امثله...
07-14-2006, 12:46 PM
عادل فضل المولى عادل فضل المولى
تاريخ التسجيل: 11-28-2004
مجموع المشاركات: 2165
الاخت مريم بنت الحسين السلام عليكم هناك تفاصيل كثيرة (لابدة) في طريقة حياتنا السودانية ومكبلانا..وياريت تباريها لينا واحدة واحدة وتسليها لينا من عيشتنا الشعوب الناجحة استثمرت في الوقت وفقاً للامكانات المتاحة لكن نحن اي حاجة عندنا نديها (شيك زمن على بياض) خدي الحنة الجبتيها دي مثل وأسألي اي واحد زوجتو بتعملها عن يوم الختة البيحصل شنو..؟ ببساطة بيكون في يوم راح هدر وانا شخصياً بكره ريحتها خصوصا (الريحة الكريهة) ديك الفي الفتيل الصغير ريحة نافذة تثير في صدري الحساسية والرشح واليوم التكون هناك في حنة معناها في مشكلة صحية جاية والحمد لله الوليدات برضو ماشين في طريق ابوهم (خساسية وكدا) وطبعا الحياة بتتعطل في البيت اليوم داك..لأن سعادتو مصلوبة على السرير وماقادرة تحرك أي حاجة وكمان تنهر في الشفع... يا ولد زح ما تخربا اماانت الأب فنصيبك شوية اعتذارات مغلفة بي مراسيل (حسب الحاجة) وما يغيظ الواحد (شخصياً) إنواناما شايف ليها أي مسحة جمالية وصدقيني كل الذي احسه ان المرأة المتحننة (مشروع مريض بالفشل الكلوي وما جاوره) .... أها ازيد ولىّ كفاية بالمناسبة المرأة هي محور الحياة في السودان وحسب قدرتها على ادارة (الموارد) يكون شكل الدولة نفسه
07-15-2006, 08:50 AM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
أخونا عادل تحياتي... انا عشان كده بنقنق... ما لأنه الحنه ضرورة في حياة المرأة السودانية، لازم زول يخترع شي يسهلها شويه.. يعني هي حاجة جميله جداً في تقديري.. وبتدي المرأة المتزوجة شكل مميز واطلالة جميلة ورائحة حلوة.. لكن ما ممكن تكون بالعذاب ده ياخوانا... يعني ما ممكن المره تقعد ساعة ونص تختها.. بعداك انتظارها ما مشكلة.. لكن ختها زاتو مشكلة... مشكلة الرائحة والحساسية القلت عنها والله دي صعبه تتحل.. لكن هدي لنوية بت عمي د.مهدي أدتك الحل.. تعرف لنا دي بتكون اكتر زول مستفيد من أبوه في الدنيا.. الله يعينك يا عمو مهدي... غايته دي براءة اختراع ما تتخلى عنها أصله.. انا عارفاه لنا ما بتكون جابته من راسها..
لنوية شايفاك هجتي .. عارفاك الموضوع ده ما بترضي فيه.. عفيت منّك.. ههع
07-14-2006, 01:51 PM
lana mahdi lana mahdi
تاريخ التسجيل: 05-07-2003
مجموع المشاركات: 16049
Quote: وطبعا الحياة بتتعطل في البيت اليوم داك..لأن سعادتو مصلوبة على السرير وماقادرة تحرك أي حاجة وكمان تنهر في الشفع... يا ولد زح ما تخربا اماانت الأب فنصيبك شوية اعتذارات مغلفة بي مراسيل (حسب الحاجة) وما يغيظ الواحد (شخصياً) إنواناما شايف ليها أي مسحة جمالية وصدقيني كل الذي احسه ان المرأة المتحننة (مشروع مريض بالفشل الكلوي وما جاوره)
حقو يا عادل تجمع المداخلات الفي البوست دة و تسميها "يوميات زوج يعاني" أما تفنيد ما ورد عاليه من مداخلة الزوج المُعاني قتصريفه كالآتي: من ناحية العطلة كل القصة ساعة و نصف من ناحية المراسيل فلا يلزم حالة طوارىء حناوية كي تتم،المراسيل نكهة المنزل(أسأل بارعة) أما كون قصة المرأة المتحننة مشروع مريض بالفشل الكلوي فهناك حنة بدون صبغة،نباتية بحتة. وبالنسبة للرائحة النفاذة التي تثير الحساسية من (دوا الحنة)كالمحلبية و السرتية فيتم الإستغناء عنها وإبدالها بزيت الكافور،ويتم شراؤه من الصيدليات تحت الإسم: Eucalyptus Oil وهو بالمناسبة مهدىء للحساسية و يدخل في تركيب الفيكس أها فضل شنو؟
Quote: وما يغيظ الواحد (شخصياً) إنواناما شايف ليها أي مسحة جمالية
دي بقا حتت أمزجة لا تنظير يها البتة لك محبتي و لمريوم ست البوست
07-15-2006, 09:36 AM
عادل فضل المولى عادل فضل المولى
تاريخ التسجيل: 11-28-2004
مجموع المشاركات: 2165
الاخوات الرائعات مريم ولنا سلام شديد يا مريم اها ما بقيتو تلاتة ... قلت
Quote: يعني هي حاجة جميله جداً في تقديري.. وبتدي المرأة المتزوجة شكل مميز واطلالة جميلة ورائحة حلوة.. لكن ما ممكن تكون بالعذاب ده ياخوانا
تعرفي انا شدة ما كنت مغرم بي جماليات الحنة عندي نص قصصي منشور عام 1995 واسمو (ليلى.. ارتداد اللون الراحل) النص محوره الحنة ليس كمصدر جمالي فحسب بل للخصب ايضاً،(إذا توفر وقت سأقوم بنشره هنا لاحقاً).. لكن والله المسألة دي مما جاتني في روحي (مسخت وبقت حاجة ثقيلة) عشان الريحة النفاذة وتعطيل الحياة..اها طبعاً حكاية الحنانات دي عادية عندنا في السودان, لكن المشكلة في اتنين:دايما بيمشو ليهن في المناسبات ودي ذاتا عايزة حجز احيانا وعربة تنتظر وما عارف شنو، دا غير الصبغة المستعملة..(ما تقولي اوكسجين ولى غيرو الحريم ديل ما بعرفن غير الصبغة)..اها ولأنو الجماعة بيكونو في الشغل طول النهار يبقى ما عندهم فرصة يمشوا للحنانات ديل في الكوافير او في البيوت، والحل اما ان تلقي جزءاً من يومك عشان توديها وتاني تجيبها أو تجي الحنانة عندك في البيت ودي اصلاً ما مبلوعة.. والحل ياهو البرنامج المعروف دا.. باقي حديثك في محلو لكن الموضوع بياخد أكثر من 6 ساعات.. ****** لنا بت المهدي تحية بعد غيبة شكراً على الاقتراح وانا مبسوط من الوجوه الضاحكة.. الحمد لله ..وحاجة جميلة انك تنبسطي من المداخلة مقترحاتك على العين والرأس بس الأول يرجع الاقتناع بـ(الجدوى الجمالية للحنة) عشان خلاص بقيت اشوفها بي عين واحدة وانت اختصرتيها في
Quote: دي بقا حتت أمزجة لا تنظير فيها البتة
وحتى يتغير ذلك المزاج فأنا في حل من تأييد الحنة والموضوع بيد سعادتو في النهاية
07-14-2006, 02:14 PM
Adil Osman Adil Osman
تاريخ التسجيل: 07-27-2002
مجموع المشاركات: 10208
الاستاذة مريم تحياتى خواطرك مرحة وجادة فى نفس الوقت. الناس لو شغلت امخاخها صاح بتلقى حلول مبتكرة لكتير من المشاكل والازمات. اسه شوفى فكرة تركيب عصاية للمقشاشة ممكن تكون بسيطة ومريحة قدر شنو!
ودى مكنة لمشاط الشعر فى ثوانى! تكنولوجيا!
07-18-2006, 01:31 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
استاذنا عادل عثمان... والله صورك أضافت بعد لزيز للموضوع.. تعرف انا شفته المقشاشه دي في فلم (تاريخي) بي عصايتها دي.. يعني الناس بذلوا مجهود كبير من زمان في الامر ده.. لكن احنا لازلنا لحدي اللحظة دي بنستخدم نفس المقشاشه الزمااااان... أديك مثال تاني... شي بشوفه في الأفلام القديمة... احنا موش بنغسّل بالطشت (لحدي اللحظة دي) ؟ اها.. الناس زمان عشان يسهلوا موضوع الغسيل بالطشت ده بستخدم آلة بسيطه عبارة عن مجموعة من الحدايد المرصوصة مع بعضها كده الواحده بتخت القطعه من فوق للحدايد دي وتحرك فيها القطعه فوق وتحت.. وبكده ما بتبذل مجهود عضلي كبير في الغسيل... شوفها في الفيديو بتاع نانسي عجرم... أداة بسيطه وسهلة الصنع وبتوفر وقت وجهد كبير
Quote: مافي واحده جات قالت النسوي لي آلة... فيها فراغات للأصابع... تكبي فيها عجنت الحنة وتغمسي فيها اصابعك .. وتراااا تطلعي محننة... لا لا..
مريم الآلة دي شكلي حأخترعها أنا"ما حك جلدك مثل ظفرك"، بس يبقة السؤال بخصوص حنة قدم المرأة، هل بتكون ملحقة في نفس الآلة ولا حتكون آلة منفصلة؟؟ شفتي التصور للإختراع من بدايتو شامل وكامل كيف؟؟ الحاجة أم الاختراععععععععع
07-18-2006, 01:33 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
نادر ازيك .. ومشتاقين.. والله زي ما قلت.. انا من جرستي مع الحنة ومحنها بقيت افكر في الاختراعات... موش بقولوا الحاجة ام الاختراع.. يا ربي الحاجة دي منو؟ لكن والله تعال نخطط للآلة دي... بشوية تفكير وحبة خيال.. وتسويق كويس.. ودعاية... وحاة الله يبقى مشروع خطير... وننافس بيهو في السوق.. بس دايرين لينا اسم خطير برضه
07-19-2006, 07:20 AM
خدر خدر
تاريخ التسجيل: 02-07-2005
مجموع المشاركات: 13188
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مريم بنت الحسين
lana mahdi
لؤى
غادة عبدالعزيز خالد
عادل فضل المولى
Adil Osman
خدر
عنيده
فيس بوك
تويتر
انستقرام
يوتيوب
بنتيريست