|
|
 سوداني فقد سودانيته
|
دي حيثيات ونسة قبل كم يوم كده مع واحد قلت أنقلها ليكم هنا، وأناشد بكري بتزويده بباسويرد عشان الزول ده عندو وجهة نظر قاسية تجاه السودان وشعب السودان وقال ما بحب السودان ولو لقى أقرب جواز سفر من أي بلد ما بتردد إنو يرجع ليكم جوازكم وفوق كلمة farewell for the Sudan بالبنط العريض ....
قال:
بتحبوا شنو في السودان؟؟؟ بالله عليكم الله حسه السودان ده فيهو حاجة تتحبه؟؟ خليكم واضحين مع أنفسكم وجابوا بصراحة، ما تقعدوا تقولوا لي قعدة جنب النيل ورقدة في الحوش بالليل مع الهواء العليل أحسن من فندق خمسة نجوم في باريس، وأهلنا الطيبين ... مافي زول طيب في البلد ديك ... لو في زول طيب يكون بقة طيب من شهر أبريل المضى ده لغاية الليلة (تاريخ عودتي من إجازتي في السودان) .. وللأوطان في دم كل حرٍ يد سلفت ودين مستحق، ما في لا يد سلفت ولا دين مستحق، قرينا بعرقنا واتجهجهنا لامن ربنا غفر لينا عشان نحصل على شهادة جامعية وبعد ذلك أوصدت أبواب الوظائف في وجوهنا... وبعدين وهمة تراب السودان ووووو من نوع السيمفونية الوهم الكل واحد قادينا بيها دي والله أي زول عايش الوهمة دي وعارف إنها محض زيف ساي ... ترعرعنا في السودان مع بواكير عهد مايو ... سلب نهب لخيرات البلد من قبل الحُكام وكبار المسئولين ... بالله وزراء حاكموهم مع سقوط نظام مايو سارقين عيني عينك بلا خجلة الواحد تلقاهو واقف يدافع عن نفسو أمام المحكمة والأدلة تدينه بكل وضوح، أي واحد يختوهو في مكان ينهب ويسرق ويجي البعدو بلا ضمير ولا مسئولية يسوي السواهو القبلو ويمشي وننتظر البعدو وعايشين في المأساة دي وما عارفين البمرقنا منها شنو زاتو ...
الناس البنبحو بي حب السودان في الخارج ديل ويتشدقوا بسمفونية مشروخة غزلاً بشعار العودة للوطن أي واحد فيهم لو قالوا ليهو أرجع حسه الجقلبة بتحصل وأنا أولهم بالمناسبة... وأي واحد رجع للسودان، رجع بعد أن فقد عمله وفتش عن بديل ما لقى أو اللقاهو ما جايب تعبو عشان كده رجع، أو واحد هيأ لنفسو في السودان واقع أجدى اقتصادياً وكانت الأسباب الأسرية المتمثلة في ارتباط الأبناء والبنات بالجامعات في السودان هو دافعه... وقطعاً لو كان التعليم في أي مكان في السودان أقل كُلفةً لما تردد في سحب خيار العودة للسودان من قائمة خياراته، وهذه هي الحقيقة لو لا أن الجميع يدفن عن قصد رأسه في الرمل عنها ... والقاعدين في السودان: جزء يراودهم حلم الخروج من السودان ولا سبيل إليه، وآخرين يبذلون قصارى جهده للخروج ولو ببيع كل ما يملك، أما المتمسكين بالبقاء ظروفهم الاقتصادية هي التي اقتضت ذلك فيما عدا ذلك هذه الفئة الأخيرة لو انقلب عليهم ترس المجن، الدنيا أدتهم قفاها لوجدتهم أو الباحثين عن المخارجة ...
نحلها في الجنوب عشان تقيف الحرب والحال ينصلح يقوموا ناس دارفور وكمان بعدد من الفصائل مش فصيل واحد... يرضّوا ده، يطلع لينا واحد بي هناك، قالوا شنو مناضلين من أجل السودان وعندهم أجندة ... ويطلعوا ليك كمان ناس الشرق ... الوحيدين القافلين خشمهم وساكتين راضين بي واقع مرير ناس الشمالية، وديل كمان بس مغلوبين على أمرهم ساي وما ناس شدائد وإلا كان المفترض أول ناس يخشوا الغابة، يعني فرصة استقرار دي أنسى خالص مما يعزز مزيداً من البهدلة والفقر والعوز للشعب المغلوب على أمره ...لأنو في النهاية كوارث الحرب دي لا بيعاني منها البشير وبطانتو ولا رؤساء وقواد الفصائل المتمردة دي ... بيعاني منها زول مسكين ساكن مرزوق وعايش على الله وعلى الماسكين زمام الأمور في البلد عشان يوفروا ليهو حياة كريمة ... وهمة كبيرة ونقعد نتجادل جدل بيزنطي سمج لا طائل من وراءه في السياسة ونحن ساستنا أثبتوا إننا غير جديرين في الأساس بمسئولية وطن في حجم قارة متعدد الثقافات والموارد والثروات قوموا بالله بلا وهم معاكم ...
فقدنا بريقنا الذي كُنا يوماً نزهو تيهاً به ... لا شيء يميزنا الآن سوى الفشل الذي يضرب جنبات حياتنا بكل جدارة واقتدار ... وروني عندنا شنو ... وأنا بوريكم رصيدنا من كل سوء الدنيا ... بلد متخمة بالفساد والمفسدين ... أدعياء دين لا دين ولا عقيدة لهم غير بطونهم وحسابات بنوكهم ... تحول السودان لمجتمع مادي وضاعت قيم الخير والجمال والإنسانية ... عشان تعمل أي حاجة في أي مكان في السودان وطنك لازم تدفع رشاوي أو تتعامل بالواسطة والمحسوبيات ... خدمة مدنية متردية بدرجة العدم ... كلو عايز يملى شبكتو ولا حد سائل في وطن ولا تقدم ولا تطور ولا تنمية ولا غيرو ... عمرنا ما سمعنا وزير استقال لإحساسه بالمسئولية المباشرة في تردي واقع وزارته وفشل وزارته في تحقيق أهدافها الموضوعة وطبعاً أصلا ما في وزارة عندها أهداف واضحة لانجاز مهامها ... اللهم هذا الوزير أو ذاك يحشد حوله كمية من المسئولين في أغلب الأحيان من جماعته – نفس القبيلة أو البلد – ويقعدوا كلهم ينخروا في عظم الوزارة إلى أن يحين أجله ليأتي خلفه بنفس الإستراتيجية والساقية لسه مدورة ... أقرب مثال بس خلونا ناخد وزارة الصحة ومستشفياتها ومرافقها المعفنة ...
تقول لي السودان والشعب السوداني؟؟ ياخي نحن شعب وسخااااااااان وسخان أمشوا شوفو الخرطوم وتعالوا ناقشوني ... حاجة مستغرب ليها إلى يومنا هذا ... زول كبير Mature يبول واقف على حيلو في الشارع ؟؟؟ المكان منطقة WCs مفتوحة في الهواء الطلق تقيف تتبول عادي وتتخارج ... والأدهى والأمر إنو في ناس بعملوا إإح عديل كده ... أها دي بس تجي كيف دي؟؟ بس أشرحوا لي ... والله القافل على السودان ده قافل على طافي بلد لا بتتقدم ولا حتتقدم كل سوء الدنيا مستوطن هناك ومعشعش ...
كنتُ من المداومين على قراءة جريدة الخرطوم ومنذ كانت تصدر في القاهرة ولازلت أحصل يومياً عليها أصبحت الآن لا أطيق النظر إليها وقلت للزول البجيبها لي تاني ما عايزها ذاتو لمها عليك... كذب نفاق كلام في وادي والواقع في آخر ... هراء وزراء غير مؤهلين ولا جديرين بالمناصب التي يستمتعون بخيراتها من سيارات وخدم وحشم ومليارات ...
واحد مرة قال عايز يخطط وينتهج أسس علمية، عمل حاجة اسمها الإستراتيجية القومية الشاملة ... من الاسم بان عليهو مزيف وأفاق ساي طلع ليها بند منصرفات طويل عريض لغفو وتاني لا شفناهو ولا سمعنا بالاستراتيجية القومية الشاملة، وأصلاً العيّنو ده لو جاد من الزمن داك كان الاستراتيجية دي جابت آخرنا ... لكن يكون سمعها في مكان ما وقال يستهلك بيها من زمنا الما ليهو أي قيمة ده ...
هووووووي ما عندكم أي شيء ... ما تجو تتبجحو والله وهم وهم ومحض إفتراء ووطن كلكم تفضلون غربتكم عليه
|
|
 
|
|
|
|
|
|
|
|
Re: سوداني فقد سودانيته (Re: نادر)
|
أول حاجة يا نادر الزول دا مشكور
لأنو خلاك تجي راجع..
مرحبا بعودتك
يمكن ناس كتيرة يستغربو.. لكين أنا بتفق مع الزول دا في معظم ما ذكره..
بس في حاجة فاتت عليهو..
وهي إنو لو مشى أي بلد تاني، وقبلو يعتبروه مواطن..
ح يكون مطالب بمسئوليات في السودان مافي حد مطالبو بيها
أولها أن يؤدي واجبه نحو البلد قبل ما يطالب بي حقوق
وأول واجب يطالبو بيهو إنو يحترم هذه البلد وشعبها
يعني زي كلامو دا ما ح يقدر يقولو عن أي بلد تاني هو عايش فيها.
دا دليل على أنو جزء كبير من كلامو البيقولو دا حاصل فعلا في السودان.
لأنو الحكومات ما مؤدية واجبها ما قادرة تطالب الموطان يقوم بواجبو
ولأنو المواطن ما قايم بواجبو، بالتالي ما عندو قدرة يلزم الحكومة بأي شيء.
مع إنو أكثر شعوب الأرض مطالبا ومطالبة
لكن يغيب عننا دائما الجزء الآخر من المعادلة
ولدينا حجة واضحة وصريحة
وهي أننا (لن نخدم البلد، لأننا في هذه الحالة نخدم الجهة الفلانية)..
لك التقدير
| |
|
|
|
|
|
|
|
|
|
Re: سوداني فقد سودانيته (Re: عبد الله عقيد)
|
عبد الله عقيد
تحياتي
وبركة بالشوفة، كنت أتمنى أن نجلس للحديث قليلاً في ذلك المساء، لكن سارت الأمور على نحو آخر
Quote: يمكن ناس كتيرة يستغربو.. لكين أنا بتفق مع الزول دا في معظم ما ذكره..
|
وأنا أتفق معه في كلما قاله عدا جزئية إنو ما بحب السودان وهاكم جوازكم ... كتيرة شوية مش؟؟ بس لو فكرنا فيها شوية بنلقى ناس بعملوها بدون ما يقولوها!!!
المشكلة يا عقيد إننا نصل للمرحلة دي، أي كان تفسير كلامو مجرد إنو يكون في مواطن سوداني عندو الاحاسيس دي معناها وصلنا لمراحل جد متأخرة، بعدين شوف التشخيص أنا صغت الكلام ده وهذبتو بالمناسبة شوية والحقيقة أغفلت جانب كبير مما كنا نتحدث فيه ومما ساقه في معرض تنديده بالسودان وبالانسان السوداني ...
ما عارف إمكانية بكري في اعطاءه باسويرد لكن على العموم سيرد عليكم تفصييلاً صديقي ..
تسلم للمرور مرة أخرى
| |
|
|
|
|
|
|
|
|
|
Re: سوداني فقد سودانيته (Re: نادر)
|
نادر
عودا حميدا وحبابك بينا تاني..
زولك ده بصراحة رعديد ساي وصبرو قليل وخلقو ضيق واظنو محمول زينا..
ياخوي الدنيا كلها معفنة والسوس ناخر فيها..
ايما قبلةٍ توجه اليها صحبك ده فنبشره بعفانات اهلها وبؤسها وضنك الحياة فيها..
ففساد البلاد في عموم الدنيا من بديهيات سياسات راس المال ..
الدنيا دي ماشة تضيق يا حبيب..
والموارد فيها محدودة وغير متاحة ..
وطمع ابن ادم غير محدود ومتاح ولا حد له..
والناس تنسالت فتكاثرت حتى زارت المقابر ..
والعالمين جارية في الدنيا دي زي المرافعين ..
والعالمون ببواطن الامور قالو: المرفعين ما بهرول عبث..
وسياتي يوما يتقاتل الناس فيه على مخاض بعير اجرب او كما قال عبد العزيز شلال..
(31 سنة اعزب وراجي الخير)
وانماالسماحة في مقدار ما تتيحه هذ الدنيا الفاسدة من براح..
او مقدار ما تستطيع انت اغتصابه منها عنوة واقتدارا لتجميل حياتك..
مثلا
تنزل اجازة في جبره في خريف السنة الفاتت..
تطلع سطح البيت في اي ليل تختاره..
تخلي الناس تنوم في عموم جبرة ..
تمدد سريرك في نص السطح شمال جنوب ..
ترمي الجريدة الجبتها من تحت فوق حترب الطوب تحت السرير فلا ضوء بالاعلى ولامعنى لها..
تقلع قميصك وتبقى بي الحمالات..
تعاين يمين اولاد ضو البيت شادين الملايات عليهم ..
تعاين يسار لانوار نايلو لمئذنة مسجد في طرف الحلة ..
تخت مخدتك جنوب وترقد تعاين شمال تجاه بحري ..
تتاكد من انو الناس في جبرة نامت وانتا الصاحي الاوحد..ليس ثمة من يفسد فيها ويسفك الدماء..
لا صوت سوى صوت كلب طرف الحلة.. وده في اي حلة صاحي ..
لذا فلا فرق ..
الليل حينها لك بدون اي شريك ..
دي ليلة انتا قاصدها ليك حداشر شهر..
حداشر شهر من اجل ليلة..
ذلك ما يسمى اغتصاب الليالي..
تشد ملايتك وتتمدد تجر نفس لامن تعفر رئتك بهمبريب خريف هطول..
اها بعد داك اتذكر سناء على مهل وعاين تجاه المعمورة وصلي على النبي ..
احمد الله واتخمد ان جعل لك مع سناء شيئا مشترك هو:
الجواز السوداني..
اتذكر شكلك جواهو كيف وحاول اتخيل شكلها جواهو كيف..
هذا مع مودتي لك ولصديقك يا نادر..
دكين عشا البايتات..
مقتطف من كتابه(احب قانون الجوازات الهجرة والجنسية)صفحة 1
| |
|
|
|
|
|
|
|
|
 Re: سوداني فقد سودانيته (Re: DKEEN)
|
دكينز
تحياتي
ماشي معنا بالدفرة 
كيف أمورك؟
سيأتيك رد هذا الوغد قريباً فيما قلت ويبدو أن حديثك لمس هوى داخله خاصة إنك جيت على طاري الليل ونومه في الحوش ...
عنيأقول لك يا دكين
نعم الحياة مغالبة لكن هل يجب علينا أن نغالب ظروفاً كان بالإمكان تفاديها؟؟ ما ذنبي أنا كمواطن أن أعاني الأمرين جراء تصرفات بشر حظي العاثر جعلني مواطناً في دولة هم حكامها؟؟ الحياة دي قدر شنو يا دكين عشان الواحد يعيشها متجهجه جراء بشر يعيشون نعينمها على حسابنا؟؟
عاجباك الدرادر النحنا فيها دي؟؟
| |
|
|
|
|
|
|
|
|
|
Re: سوداني فقد سودانيته (Re: نادر)
|
Quote:
يبول واقف على حيلو في الشارع |
يا نادر زمان كنا نجى من المدرسة نرفع الردة ونرسم بالبول اسامى بعض فى نص الشارع لكن دة كوم والسودانيين بياكلو المرارة مكان ما بطلع الهرار بى بول الخروف فى وسخ اكتر من كدة وكمان بياكلو البيوض والكلاوى واعفن من كدة كمان بنأكل الكوارع اخخخخخخخخخخخخخخى كرعين البقر تفجخ فى البول والهرار ونجى نستطعم بها وأعفن من كدة كمان بنأكل ونقرقيش راس النيفة و لسان البقرة قاعدة اليوم كلو تلحس فى أخخخخخخخخخخخخخخخخخى .
| |
|
|
|
|
|
|
|
|
|
Re: سوداني فقد سودانيته (Re: DKEEN)
|
الأخ / نادر
سلام
الأخ / دكين
تحياتي
كلامك طيب يا عزيزي وكل ماقلته هو الحاصل ونسي الأخ صاحب الموضوع
أنه في السودان ليس محتاج إلى استخراج وثائق ثبوتية كل ما أراد
التنقل من مكان إلى مكان آخر.
الحياة خارج السودان ورغم رغدها الوقتي فإنها جحيم بما فيها من
معاناة ياعزيزي.
في المملكة العربية السعودية مثلاً المستشفيات الحكومية لا تستقبل
الأجانب نهائياً - إلا في الحالات الطارئة جداً.
أخي سيف كسر رجله في كرة قدم حوالي الساعة الواحدة والنصف صباحاً
وذهب إلى مستشفى الملك فهد التعليمي بمدينة الخبر وكان من مكتب الاستقبال
مصري الجنسية وقال له لا يمكننا اسعافك لأنك أجنبي وأن مهنتك في الاقامة
لاتسمح بعلاجك عندنا - تدخل أصدقاء أخي وكانوا كثيرين جداً ولكن هيهات
حتى أغمي على أخي
ذهبوا به إلى مستشفى فخري الخاص وقال لهم الطبيب الخاص العلاج سوف يكلفكم
الكثير لأنني لابد أن أستدعي أخصائي العظام وممكن المبلغ يصل إلى 9.000 ألف
ريال سعودي.
ذهبوا به إلى مستشفى الدمام المركزي وهناك كان الطبيب العام هندي الجنسية
فقبله وأرسله إلى أخصائي وعمل الجبس وكان سعودي الجنسية فقال لهم أين إقامته
فأعطوه الإقامة فإذا به يقول لهم حسب المهنة فإنه لا يستحق العلاج هنا ولكن
سأضع له جبس نصفي فقط وهذا مني فقط فرجعوا إلى الطبيب الهندي وجكوا له حكاية
فني الجبس فقال لهم ليس له الحق في تحديد أي شيء بعد ما كتبته له ولكنه
سعوي ولا أقدر على قول أي شيء له.
وليلها كنت نائماً ولم أعرف أي شيء إلا الصباح بعد أن وجدت كمية من المكالمات
التي لم يرد عليها من جواله واتصلت عليه وقتها فقال لي (كراعي انكسرت) وعندما
ذهبت إليه في غرفته وحكي لي أصدقائه ما حكيته لكم أعلاه كدت أموت من الغيظ
وماكنت عارف أعمل شنو غير توجيه الشكوى إلى رب العالمين.
لو كان الكلام دا في السودان - كان في زول قال ليهو جيب (.........)
الصادق أبوفتحية
| |
|
|
|
|
|
|
|
|
|
Re: سوداني فقد سودانيته (Re: othman mohmmadien)
|
سلامات يا ابا محمود(باعتبار ما سيكون قريبا)
وحمد لله علي السلامه
1- انت ما وريتنا رايك سنو في كلام الزول ده
2- اخبر صاحبك بان شخص ما خرج من السودان في العام 91
وهو يحمل افكارا قريبه من هذه (ليست بكل هذه الحده) وهو الان يحمل جواز دوله اخري
بالاضافه لجوازه السوداني ولو خير اليوم بينهما لترك جواز الدوله
الاخري بكل مزايه قبل ان يرتد اليه طرفه
هي مرحله وسيتجاوزها اخانا هذا في يوم ما
____________
انقطعت اتصالاتك ي اللخو
| |
|
|
|
|
|
|
|
|
|
Re: سوداني فقد سودانيته (Re: Omar Bob)
|
| Quote: عمرنا ما سمعنا وزير استقال لإحساسه بالمسئولية المباشرة في تردي واقع وزارته وفشل وزارته في تحقيق أهدافها الموضوعة |
والله يا نادر زولك دا روحو محرقاهو ساكت
ما ياهو دا وزير الداخلية لمن حس بي غلطو في موضوع العمارة الدقت الدلجة قام استقال....
| Quote: زول كبير Mature يبول واقف على حيلو في الشارع |
وما يربط الدكة إلا لمن يقبل على الناس
وكما يتمها برمي السفة.
| Quote: والأدهى والأمر إنو في ناس بعملوا إإح عديل كده ... أها دي بس تجي كيف دي |
ياخي الزول كان مزنوق
ما يرتاح يعني
| |
|
|
|
|
|
|
|
|
|
Re: سوداني فقد سودانيته (Re: نادر)
|
الاخ نادر لك التحية ولصديقك..
كل ماساقة اخينا كلام صحيح وفى المليان ,انا معكم من اننا اكثر الشعوب اعداء النظافة والنظام واقل الشعوب اهتماما بالجمال ورحم الله امرءِ عرف قدر نفسة .ما فى حاجة اسمها تنمية صحة تعليم الجماعة كلهم يامناضلين وشايلين سلاح يا هاربين خارج السودان,والقاعد فى البلد قاعد تحت الضل راجى الفرج من رب العالمين.
ولكن فى الخارج بنشتغل زى السم تجرى يمين وشمال عشان توفر لنفسك واهلك حياة كريمة وبعدين المحصلة صحة مهدرة مافى حاجة تعتزا بيها حاتعتزا بحق غيرك لو كنت مدير ولاغفير برضو مازى ود البلد,وحتى لو تحصلت على جنسية البلد الموجود فيهو برضو امكانياتك محدود لاعم لاخال لاعشيرة لاقبيلة لاصديق ولا ونيس لو انتقدت البلد يرجع ليك النقد نبزة لاصلك وبلدك الام.الغربة ربما تكون احسن كوضع معيشى ولكن ليس كل مايلمع ذهبا.
طيب لية ما نناقش لية بلدنا بهذا السوء هل الخطاء فينا فى حكوماتنا فى تركيبتناالاجتماعية فى اسلوب التربية وكيف نقدر نتجاوز المحن دى وصديقونى مابرتاح واحس بالامان الا فى مطار الخرطوم واحس بالعزة وبالكرامة واحس انو عندى اهل وناس وبلد اعتز بالانتماء اليها بالرغم من كل السلبيات الموجودة.
ولى عوده
| |
|
|
|
|
|
|
|
|
|
Re: سوداني فقد سودانيته (Re: نادر)
|
نادر وضيوفك
انا مختلفة مع الزول ده ... تعرف هو كلامه كله صاح... السودان كعب ووسخان والسودانيين وهم وفاكنها في روحهم والأنظمة خربانه ومستغله... وكله صاح.. لكن كان خلا جوازه ده تاني ينبّذ وين؟ يعني بلدنا دي كان فيها فضيلة، الزول بس يقعد بمزاااج وقدامه كباية شاي مدنكله وينتقدها.. وبعد يتم شايه وينتهي من هرجيه.. يقوم وفي باله الفول المصلّح بالزيت.. والسمك المحمّر بملح وشوية بهارات وزيت محمرين فيه خمسين سمكه قبله... وسلطة العجور مع ليمون وملح وشطه...
انا لما كان عمري 15 سنة رجعت السودان وعشته فيه سنة... والدي كان وقتها في الإمارات.. رسلت ليهو رسالة (اظن حكيت ليك عنها) وكتبت ليه عن رأيي في السودان... اهم حاجة كنت عايزه اقولها في الرسالة ديك انه في السودان بنتعلم not to take things for granted..
بنت الحسين
| |
|
|
|
|
|
|
|
|
|
Re: سوداني فقد سودانيته (Re: نادر)
|
أعزائي الكرام جميعاً تحية وبعد،،
أنالا أنكر عليكم وطنيتكم وعزتكم ببلدكم وتنسمكم هوائها العليل، هذا شأنكم وأنتم أدرى بخباياه لكن ألا تتفقوا معي كلكم أننا جمعياً غير راضين عن أحوالنا في ذلك الوطن؟ ألا تتفقوا معي جميعاً بأننا نمر بمأساة حقيقية ومعضلة مستفحلة؟؟ قولوا لي متى سينصلح حالنا أن كنتم تعلمون تاريخاً بعينه وفقاً لاعتبارات إصلاحات أو خلافه جاري تنفيذها الآن؟؟ الأمر خارج دائرة العاطفة التي تعمي بصائركم عن الحقيقة القاسية التي أكشفها لكم هنا، العالم تطور من حولكم والوطنية التي تتحدثون عنها أخذ وعطاء، ونحن ما أخدنا أي شيء عايزننا نعطي كيف؟؟؟ وبي ياتو فهم، وضعوا في اعتباركم أننا بشر بأحاسيس والغبن والضيم أحاسيس لا يمكن وأدها لحساب شعاراتكم الرنانة دي؟؟ أنا أمي ما ولدتني زول عاق بوطنه، دي تراكمات سنين وضيم وظلم وأحاسيس تهميش جوانا كلنا، بس أنا فرقي منكم إني بحت بيها أمام الملأ ولا أدخر وسعاً في كشفها وكشف إفلاسنا وحالنا المايل، صبرنا ونفد صبرنا، كل يوم نقول الحال ينصلح وهو ماشي من سوء لسوء.
في أي دولة من دول العالم الدولة عبارة عن مقدم خدمة للمواطن Service Provider، طبعاً نحنه لا تشاد ولا أريتريا، مع احترامي ليهم لكن نحن عندنا ما نتحدث عنه من موارد اقتصادية وبشرية وخلافه مما يميزنا قليلاً عن تلك الدول متمنياً لهما (اريتريا وتشاد) التقدم والازدهار، دولتنا تخم ضرائب مننا بالمليارات وطريق ما بترصفو لينا، ياخي شارع النص مافي فرق بينو وبين طريق القبولاب أم درمان قبل 10 سنوات عندما كان تلال من الرمال!!! شارع في وسط العاصمة الوطنية للبلاد بذلك السوء، الظلط مدفون تحت التراب!!!!! أم درمان دي عبارة عن كوشة كبييييييرة في نص السودان، عربات البلدية تلم في المخلفات والأوساخ والغريب الأوساخ في تزايد!!!! لأنهم 5 عربات في أم درمان المترامية الأطراف، وغيره الكثير من أوجه الظلم الواقع على المواطن وبعد ده كلو بيدفع ضريبة وزكاة في شنو ما تعرف بالضبط، يا أخوانا والله ولو قعدت أحكي ليكم المحن دي ما بخلص وما في داعي نلوك ونعجن ...
لو جينا للنظام السياسي، أحزاب بلا منهجية واضحة ولا برامج ولا تأثير على الواقع السياسي، تسأل الواحد انت منضوي تحت ياتو تنظيم سياسي أو ياتو حزب، يقول ليك الحزب الفلاني، طيب ياخي شنو برنامجكم، هل عندكم برنامج زمني لإسقاط الناظم الجاثم على صدر البلد وبتعارضوا فيهو ده عشان ننضم ليكم وإيد في إيد تجدع بعيد؟؟ يقعد يلف ويدور وما تطلع منو بأي شيء ذا نفع، كلهم منتظرين فرصة ينقضوا على كراسي السلطة يقعدوا فيها يوزعوا وزاراتها لي بعض ويبدوا أكل في مال وثروات محمد أحمد الغلبان، يا أحزاب السودان ضعفكم هو الذي جعل الإنقاذ تحكمنا وتفقر بلادنا سبعة عشر عاماً، عدم وضوح رؤاكم هو الكبري الذي عبرت من خلاله حكومة الإنقاذ وانقضت على خيرات الشعب، كيزان ورمانين بي حقنا وراكبين عربات ورمانة ونحن تأكلنا الشمس، ويلفح وجوهنا حر الغربة وتجوا تدافعوا عن السودان، بالله شيلوا بلدكم عليكم وأرحمونا يا أتعس خلق الله في الأرض، والله إنتو إلا تقفوا على يوم القيامة تخشوا الجنة، الدنيا دي مرقتو منها تب.
حتفضلوا كده يا الأخ القلت لي أطلع من السودان عشضان أعرف الفرق، أنا أساساً بره السودان، رجعت اجازة وجيت شهر أبريل الماضي وتاني ما راجع، بشتاق لأهلي لكن السودان ما بكذب عليكم لا قعد أشتاق ليهو ولا حاجة، في زول بشتاق لي كوم وساخة؟
أواصل غداً مع فائق احترامي وتقديري لكل المتداخلين والتحية والتقدير للأخ/ نادر عباس ويا بكري شوف لينا باسويرد، بريدي الإلكتروني [email protected]
| |
|
|
|
|
|
|
|
|
|
Re: سوداني فقد سودانيته (Re: نادر)
|
البول في الحيط كان سمة لازمتنا دهرا في طفولة مبكرة..
واستمرت حتى سنين الصبا المتاخرة ..
بالرغم من وجود مستراح طرف اي حوش في بيوت الحلة ..
إلا انو ما كنا بنحس بي عبقريتنا إلا في الترترة في ترتار مغزوز او حيطة جالوص..
تسمع شررررررررررر.. ويتواصل النخر في الحيطة..
كان حسن محجوب يجيد الرسم بالبول في الحيط (لاحقا دخل حسن كليةالفنون الجميلة) الان يعمل مهندس ديكور في شركة اثاث عالمية..
وكان عمار دوما يحاول عمل مداخلات في رسوم الاخرين في ارسال فوضوي(سنري كيف اصبح فيما بعد ضابطا في الامن) ..
لم اكن اجيد لا الرسم لا الكتابة ولكن كانت تاتني الافكار العظيمة دوما مع حالات البول طويلة المدى..
لاحقا لم اصر الى اي شي..هاجرت البلاد فعاقبني الله بحوائط من الاسمنت..
بالرغم من بلوغي سن متاخرة لاامانع اذا وجدت حيطة في ان اتعبقر عليها ..
مسالة البول في الحيط دي تراث ..
رجاءا لايسخر احدكم منها..
| |
|
|
|
|
|
|
|
|
|
Re: سوداني فقد سودانيته (Re: نادر)
|
نادر و الشباب سلامات
طبعاً الكلام جاني في محلي
انا بتفق مع المقولات دي اتفاق شديد،و زي ما اتقال المسألة الأساسية في الموضوع مسالة الأهل و الأصحاب، و شوية روابط سيكولوجية نتيجة النشأة و التعود، البلد ماعندها مستقبل على الإطلاق (يعني لو اتحلت المشكلات السياسية و الإقتصادية و الإجتماعية و و و ، الكتاحة دي البيحلها شنو الحزام الاخدر)
الاشكال الأساسي عندنا او عند البشر ككل انو الأرض القمنا فيها هي البنحس و نحنا ماشين فيها انها بتاعتنا يعني ما في زول ممكن يكرشك منها و دي زاتا هسع بين بين و بقينا في منطقة كافافي الشهيرة لن تجد مدينة أخري و كدة
| |
|
|
|
|
|
|
|
|
|
Re: سوداني فقد سودانيته (Re: نادر)
|
كلام عجيب والله ويخلي الواحد محبط جداً.
يا أخي والله أنا وزوجتي وأولادي قضينا 28 يوم في أقصى غرب السودان بعد غربة استمرت لأكثر من عشرة أعوام ولما إنتهت الإجازة تحسرنا حسرة شديدة ولما شاورت الأولاد وأمهم كلهم قالوا ما عاوزين يفارقوا البلد تاني لكن أنا طلعت جبان وخفت من الفقر وقلت ياولد أحسن خليك كده وبعدين لما تنزل المعاش ترجع لبلدك وتعيش باقي عمرك إن كتب الله لك طولة العمر.
والله الأوطان مافي زيها أبداً وأنا طول حياتي home sick بدون مبالغة.
| |
|
|
|
|
|
|
| |
Hussein Mallasi
Abureesh
hatim
saadeldin abdelrahman
عبد الله عقيد
فيصل محمد خليل
ناصر الحاج
المسافر
Saifeldin Gibreel
الصادق صديق سلمان
othman mohmmadien
Omar Bob
حسن الجيلى سعيد
مريم بنت الحسين
Mohammed Elhaj
Mohammed Haroun
فيس بوك
تويتر
انستقرام
يوتيوب
بنتيريست