|
|
 رسوم عبور
|
ظروف شغلي بتحتم علي سفر كتير بالطيارة داخل السودان (الشقيق) - كماوصفه سفيرنا بالسعودية. المهم مرة نزلنا في مطار المتمة غرب شندي. نزلت في فندق المك نمر (خمسطاشر نجمة) صحيت الصباح حاسي بشوية وجع في اضاني, مشيت المركز الصحي وقلت اشوف الحاصل شنو....... دخلت لقيت الجعلية الفي ( Reception ) سمحة عدييييييييييييل ... المهم زولتك قاااعدة وفاتحة الكمبيوتر تتصفح في سودانيز بييوند لاينزSudanese Beyond lines)) شافتني طبعا قفلت البايج(Page) وإبتسمت لي وقالت: مرحبا أي خدمة (How can I help you)؟؟؟
قلت يا أخواننا أقول ليها عندي شنو وللا أحسن أدخل للمساعد الطبي جوة ( ما هي في النهاية قطرة أضان وإنتهى الموضوع) ........... إتوكلت و كلمتها. سألتني من إسمي وتاريغ وصولي للمتمة ( قلت الموضوع حايجيب ليهو تلفونات و مواعيد طوالي) المهم نزلت البيانات في جهازها وقالت لي : عاوز تقابل (بروف) منو تحديدا؟ أنا في سري طبعا كنت متوقع مساعد طبي أو ممرض بالكتييييير كدة داية. المهم قلت ليها أي زول ............. إستغربت (هي) وقالت لي: إتفضل أقعد ... إنت رقمك 6 عاين في الشاشة الفوق دي لما يولع الرقم أدخل طوالي للدكتور !!!!!!!!!!!!!!!
أمك الرقم ولع ......... طوالي جريت دخلت للدكتور وصلت جوة لقيتو فاتح الصفحة بتاعة حالتي في الكمبيوتر, سألني عن أخباري و الأولاد والجري والمعايش و بعد شوية كدة قال لي أمشي المعمل جيب لي الفحوصات دي ( أنا طبعا منتظر الورقة بتاعة الفحص) قال لي يا إبني أمشي المعمل بس. أها مشيت المعمل – انا تفتيحة- أنتظرت لما رقم 6 ولع في شاشة المعمل حتى دخلت ..... شالوا الفيها النصيب من دمائي الطاهرة وقالوا لي: أرجع الدكتور ......... جري مشيت و زي الفالح أنتطرت الرقم 6 ولع ودخلت الدكتور تاني, طمني وقال لي دي أصلا فطريات في الأضان بتنشط في حالة الطيران لفترات طويلة عموما أمشي الصيدلية تحت وأصرف القطرة دي وبرضو رغم إني تفتيحة لكن دقست تاني لأني وقفت منتظر الروشتة قال لي يا إبني أمشي الصيدلية بس ........ يا خواننا الشغلانية كلها طلعت (paper less)
أخوكم نزل الصيدلية واستلم القطرة و قالوا لي عندك قطرة تانية حاتنزل بعد 27 يوم
رجعت لزولتي السمحة قلت أدفع الحساب ..... ضحكت و قالت لي ( Sorry we are not dealing with cash here) الحساب حايتحول من رصيد الشركة بتاعتكم لينا هنا.
الدواء نفع معاي شديد وبعد 27 يوم من الكلام دا كنت في الضعين وقلت ياسيدي نشتري الدواء القالوه دا. مشيت جبت الفتيل الفاضي و دخلت لإقرب صيدلية وقلت ليه داير من ده...... بتاع الصيدلية عاين لي ( شذراً أنا متأكد أنها دي شذراً ذاتها البقولوها) وسألني من إسمي وتاريغ وصولي الضعين ... نزل ال (data) في كمبيوتره وقال لي: إنت عندك دواء نزل الليلة يا دوب... خد إتفضل ,,,,, إستلمت الدواء و قلت أدفع الحساب ..... ضحك و قالت لي ( Sorry we are not dealing with cash here) الحساب حايتحول من رصيد الشركة بتاعتكم لينا هنا.
وأنا شايل الدواء و عايز أطلع من الصيدلية ,,, إتزلقت في الرخام و راسي خبط في باب القزاز وشفت ليك الدنيا دي حمراااااااااااااء و سامع صوت الناس : يا زول يا زول والله دة نمرة 6 لما فتحت لقيت نفسي واقع في حفرة في نص الظلط قدام مركز صحي (...............) المزدحم بالمرضى في قلب العاصمة الخرطوم.
قبضت يدي شديد و طلعت من الحفرة ولما فتحت يدي لقيت فيها فتيل الدواء ( الفاضي طبعا) لأنه في رحلة العودة من الحلم إتصادر الدواء كرسوم عبور من الحلم للواقع
|
|
 
|
|
|
|
Mahir Ali Bob
عبد الله إبراهيم الطاهر
فيس بوك
تويتر
انستقرام
يوتيوب
بنتيريست