فكرة طرح هذا الموضوع للنقاش في بوست منفصل مستقاه من مداخلة لاحد الاعضاء في المنبر ، اشكر له بديهته و استنباطه للافكار الجيده من مداخلات الاخرين . ما هو الماعون الفكري ؟ و ماهي الافاق التي تغطي المواعين الفكرية للانسان ؟ لكل مخلوق علي هذه الارض ماعون فكري يولد معه و يظل ملازمه طيلة وجوده ، ما سنتعرض له في هذه المساحة الماعون الفكري للانسان و ليس لباقي المخلوقات حيث ان مواعينها لم تستخدم كما استخدم الماعون الانساني ، كما ان باقي المخلوقات تحافظ علي مواعينها بنفس الكيفية التي خلقها الله بها ، بعكس بعض البشر الذين يتلاعبون في ما حباهم الله من مواعين ، و يستخدمون هذه النعمة في غير ما حكم بها الله ان تكون .
نواصل >>>>
06-29-2006, 06:05 AM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
مدي مساهمة الفرد نفسه في توسيع ماعونة الفكري ، عبر اجتهاداته الشخصية في اكتساب الافكار المختلفة من تجارب الغير ليرفد بها ماعونه و يغذيه ؟. هناك بعض المواعين الفكرية غير الطبيعية ، هل هي مواعين شاذة بالفطرة ، ام ان هناك ظروف بعينها قادت لهذا الخلل في التفكير ؟.
06-29-2006, 04:34 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
دور الجغرافيا البشرية في رفد المواعين الفكرية للانسان بتجارب غير مسبوقة تثبت كتجربة انسانية جديدة تضاف الي تجارب الفرد المكتسبة خلال دورة حياته ، مع الاخذ بالاعتبار دور ابناء امدرمان في رفد المواعيين الفكرية للعقل الباطن للبعض من خلال التاثير المباشر و غير المباشر في الماعون الفكري الفردي .
06-29-2006, 05:07 PM
DKEEN DKEEN
تاريخ التسجيل: 11-30-2002
مجموع المشاركات: 6772
ان الدور الطليعي الذي لعبته نفسية اولاد امدرمان في تطور مواعين الفكر السوداني لاينسى .. فقد اثرو ساحة مواعين الفكر الغنائي بمالاينسى ..
وكان لاحساسهم العظيم بانفسهم دور بارز في ابراز تلك الموهبة.. وظل ذلك الاحساس ملازمهم الى خارج حدود امدر وحدود الوطن.. ويحكي لي صديقي (كنكون) في لاس فيغاس - وهومهاجر غير شرعي وصل الى الولايات المتحدة سباحة عبر الريوغراندي.. يحكي فيقول : مرة جانا واحد جديد من السودان وكان من اولاد امدرمان.. اها قمنا مشينا سقناهو( نايت كلب )وكده لزوم عزومة.. اها يازول جبنا ليك البلو ليبل والبلاك هورس ده رصيناهو قدامنا.. وقعدنا نكتح ونغني لي الايام السمحة الجاية.. اها بس جا ليك واحد زنجي مصلع ضراعو زي ضهرية الكومر.. كف نف شال قزازة وكتحها من طربيزتنا بدون اذن ورماها وفات عااادي.. اها قام زولك بتاع ام درمان ده قام علي حيلو وعايز يلحقو يخلصا منو.. قتا ليهو: وين يا زول ماشي قال لي : ماشايف استفزاز العب ده؟؟ قتا ليهو :اها وانتا ماشي تعمل ليهو شنو هسي؟؟ قال منفعلا وبلاوي فيني عايز يتفكفك : انا بوريك البعملو فيهو ..حرم اطرشها ليهو انا ود امدرمان...وقعد يجعر في نص البار.. مسكتو ليك من رقبو وقتاليهو : اقعد اتكسر قبلك بلا ام درمان بلا كـ.....م . شوف ياخينا ..هنا لاس فيغاس..دي ما الكباجاب ولا القماير.. هناقصة كربون وطالعني الخلا وبنيةوشلاليت ماف ... هنا في حاجةاسمها 5 ملم .. واحدة في راسك الكبير ده وبنمرق من البار زي الما بنعرفك..
دمتا رايق ياحمد..
06-30-2006, 01:17 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
الاخ دكين تحياتي و تقديري اشكر لك ايرادك لهذه القصة الواقعية الشيقة لاثراء الحوار في هذه القضية . كما اود ان انوه لدورك البارز في اثراء المواعين الفكرية المفتوحة ، و دور افكارك التقدمية في رفد هذه المواعين و توسيها . نعم يا عزيزي نحن في عصر جديد اختلفت ادوات تكويناته الذاتية تماما عما كان عليه قبل الدخول في عالم اليوم ، و لكن لا زال البعض يحتفظ بعقلية الاجيال قبل عصر العولمة ، برغم انفتاح مواعينهم الفكرية علي ثقافات جديدة اخري متنوعة . و سنقوم لاحقا بلقاء المزيد من الضوء علي هذا الخيط الذي ابتدرته .
Quote: مع الاخذ بالاعتبار دور ابناء امدرمان في رفد المواعيين الفكرية للعقل الباطن للبعض من خلال التاثير المباشر و غير المباشر في الماعون الفكري الفردي .
تحياتي حمد ودكين ..
المقصود اعلاه اولاد امدرمان علي مر الاجيال او الوقت الراهن فقط ؟ وهل المقصود باولاد امدرمان هنا كمجموعة حناكيش او مجموعة تعني بامر الحركة الثقافية والفكرية في البلد القارة ؟ يعني الغبش منهم .. و للعلم امدرمان الي سنة 1989 تختلف عن امدرمان 2006 م وهل المقصود هنا اولاد امدرمان كمثال لبوتقة انصهار الجمع الاثني والعرقي والثقافي في مفهوم كامل لمعني الوطن الضايع ام كحركة حنكوشية تسعي لتمجيد محمود وفرفور وندي القلعة ؟
افرزوا عشان نقدر نفهم بس ..
06-30-2006, 06:16 PM
DKEEN DKEEN
تاريخ التسجيل: 11-30-2002
مجموع المشاركات: 6772
ام درمان دي وهمة كبيرة يا تنقو ماتطرشو فينا وتعملو لينا منها صنم.. زيها زي بري والدناقلة شمال وحلة خوجلي وربما الاخيرة احسن منها ذاتو.. كل احياء الخرطوم والخرطوم بحري وامدرمان تجد فيها المجتمع متعدد الثقافات والاعراق.. لم تساهم بيوت الجالوص في اذكاء الحركة الثقافية وانما اذكتها مشاعر الادميين هناك.. والادميين في بحري والخرطوم لهم نفس الجينات يا تنقو.. والنيل الذي يجري هناك جرى في هذه الانحاء.. امدرمان دي وهمة ذهنية ومسالة وجدانيات ليست إلا.. حنك بيش وفردوس مفقود مستوهم.. بقعة عادية جرى فيها السلب والنهب والاحتراب والتجارة والغناء والاشياء الجميلة .. صادف قيام الاذاعةهناك قيام النوادي الادبية وظهور الشعراء فيها.. ولو قامت الاذاعة في ام دوم لظهر منها شعراء وملحنين يطرب لهم الوجدان.. جاءت اغاني تلك الفترة في عهود رخاء وصلاح حال .. فارتبط سماع تلك الاغاني بتلك الايام السمحة فاحبها الناس .. ومابرح الناس يحبونها حتى استغرقتهم فظنو ان امدرمان هي السبب.. ولما كانت الاذاعة في ذلك الزمان ذات نهج قومي والرابط الحاضر لما بين اقاليم البلاد ارتبط اسم (هنا امدرمان) قي ذهن المستمع بحنين جارف الى اهل المستمع اينما كانو في اطراف البلاد.. فمازالت تذكر الناس بحنينهم الى اهلم والديار حتى ظنو ان امدرمان هي السبب.. فاحب الناس امدرمان وخلقو لها شيئا من العدم .. وما امدرمان إلا بيوت عادية وحيشان وكتاحات وبشرية .. كغيرها من بيوت الخرطوم وحيشانها وبشريتها.. وكغيرها من بيوت بحري وحيشانها وبشريتها..
Quote: ام كحركة حنكوشية تسعي لتمجيد محمود وفرفور وندي القلعة ؟
والله الطريقة الغنى بيها محمود قائد الاسطول لو سمعها سيد عبد العزيز لحرم على غيره ان يغني بها.. وندى الانتا مستهتر بيها دي بتغني اغاني الحماسة كما لم يغنها احد..
ما جيتني من الاخر يا دكين .. وقعت في التنميط البقع فيهو الاخرين وكنت اظنك اكثر ذكاء ..
متفق معاك تمام في جزئية هنا : امدرمان زي باقي مدن الدنيا مافي اي خلاف .. الناس الفيها زي باقي الناس .. مافي اي خلاف في العمران اقبح ما يكون .. مافي خلاف ..
اولاد امدرمان زي باقي ااولاد المدن الاخري مافي خلاف برضو
طيب وين الخلاف هنا ..
انا اقول ليك ..
لمن اولاد مدني يتحدثو عن مدني وانا اعلم حبهم لها .. ما بنقول حاجة لمن اولاد كوستي او القضارف او بروسودان .. يتحدثو او يحبو مدنهم ما بنقول حاجة ..
لما واحد يقول انا من امدرمان تبقي وهمة كبيرة !!
هنا في ضبابية في الفهم من المتلقي او تضليل من القائل لسبب يعلمه هو ربما عقدة تحتاج الي دراسة متانية ..
حمد تحدث عن الماعون الفكري وافاق حوار .. ذكر اولاد امدرمان دونا عن العالمين الانت قلت احسن منهم ديل ودي ممكن نعتبرها من محاسن الصدف زي باقي الصدف الاخري
انا الاجيك من الاخر ...
نحبها ولو كانت بها كل عيوب الدنيا ..
بس ما اشوفك تتحاوم بي هناك ساكي ليك طرحة ..
المثال المذكور اعلاه مردود يا دكنز لانو ممكن في شوارع وحواري الغربة الممتدة دي اجيب ليك عشرة زيو ابتدا من الجعلي القال ما بقعد في امريكا لانو بساوهو مع العبيد الامريكان وانتهاء بي مثال لشخص من اقصي مدينة في اقصي هامش .. يعني دي انفة ووهمة تنتمي للضمير الجمعي للاوهام السودانية العامة وليست مخصصة في منطقة معينة
__
بالمناسبة نظرية الغناء والاذاعة والهلال والمريخ والشعر والثقافة و بيت الرئيس دي الناس بقت ما بتعول عليها كتير في تقييم امدرولا في النقاشات الفكرية لسبب واحد لانها صدفة فقط
اما قولك :
Quote: والله الطريقة الغنى بيها محمود قائد الاسطول لو سمعها سيد عبد العزيز لحرم على غيره ان يغني بها.. وندى الانتا مستهتر بيها دي بتغني اغاني الحماسة كما لم يغنها احد..
معليش يا فردة هنا دخلت في تخصصي يعني زي لمن انا اجي انظر ليك في القانون وتقول لي : معليش دي ما واردة في القانون بتاعنا دي ممكن تكون في الميثاق الخاص بقناة روتانا .. وتتمها لي بي عين حقارة : انت العرفك في القانون شنو كمان ما تمشي تشوف ليك اغنية تنفعك ..
يعني ندي ومحمود مع احترامي ليهم ولي جمهورهم بنحتاج لي جهاز قياس خاص عشان نفرزهم .. ......
خلي امدر في حالا وركز علي الماعون .. والافاق ..
....
اقول قولي هذا وانا لا اعلم الان اين حدود امدر وبارك الله في برنامج قوقل الخلاني اشوف ودنوباوي وقبر المرحومة في مقابر احمد شرفي وشجرة النيم بتاعة الحاجات بنات صالح واقدر اميز محل فيها بعد 16 سنة غربة وزيارات خطافية ..
قال صدفة قال .. حلوه الصدفة البيك جمعتنا ياخ ..
07-01-2006, 07:51 AM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
Quote: المقصود اعلاه اولاد امدرمان علي مر الاجيال او الوقت الراهن فقط ؟ وهل المقصود باولاد امدرمان هنا كمجموعة حناكيش او مجموعة تعني بامر الحركة الثقافية والفكرية في البلد القارة ؟ يعني الغبش منهم ..
شوف يا عزيزي عندما نتحدث عن اولاد امدرمان فاننا نتحدث عن مجتمع سوداني عادي له ما لبقية المجتمعات و عليه ما عليها ، و لكن يختلف معها في الادوات التي ساهمت في تكوينه كمجتمع ، هذا اولا . و لكن ربما نتفق علي تثبيت ملاحظة معينة و هي ان عدد مقدر من كتاب و سياسي و فناني السودان اما انهم ولدوا في امدرمان او انهم سكنوا فيها في فترة معينة من حياتهم ، و اعتقد ان العوامل التي ساعدت علي سكنهم في امدرمان معروفة ، اما لقربها من الاذاعة و التلفزيون و بؤر الانتاج الفني كا اشار الاخ دكين في مداخلته ، او لمحاولتهم السكن قرب من سبقهم في الحقل الابداعي المعني ، او لاسباب اخري موضوعية و غير موضوعية ساهمت في ذلك . عموما يا تنقو نحن عندما نتحدث عن ابناء امدرمان فاننا لا نقصد هؤلاء ( البيض ) الذين ملأو الدنيا عويلا و ضجيجا باننا اولاد امدرمان الفن ، و نحنا الكورة و نحنا الادب علي حساب غيرهم من المبدعين ، و ما اقصده بالبيض هنا هم عديمي المواهب و ارباع المتعلمين او ما اطلقت عليهم انت لفظة الحناكيش ، مع اختلافي معك في وصفهم بالحناكيش . و الملاحظة الاخري في حديثك التي ربما نتفق فيها ان ابناء امدرمان قبل 1989 يختلف عنهم الان ، فقد زادت نسبة ( البيض ) عما في السابق و كثر الادعياء او ما يطلق عليهم لفظة ( الوهم ) الذين ندعوهم صراحة الي مراجعة انفسهم مرة اخري ، و فتح افاقهم و مواعينهم الفكرية لافكار الغير التقدمية ليتم رفهدها و توسيعها و اعادة صياغتها لهم مرة اخري .
07-01-2006, 11:24 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
لحد الان ماقدرت اعرف معني الماعون الفكري بدقة .. هل هو الثقافة أم المعرفة.
المسالة ما خاصة بي اولاد امدرمان بس كمنطقة جغرافية لكن حتي علي المستوي القبلي موجودة فكرة الأنا العظمي. ---------------- دكين ازيك ياخي ورسل لي انشالله رقم موبايل ودجيرانكم.
07-01-2006, 11:45 AM
tmbis tmbis
تاريخ التسجيل: 10-19-2002
مجموع المشاركات: 24862
أيووووة يا حمــد.. .. مسالة الماعون الفكري ... كان ضيق وكان واســـع .. افـــرزهـ لينا.. انا منتظر مسالة الفرز دي .. وبعدين السبب الاساسي شنو أنو مركزين على مواعين أمدرمــان كان أنت كان دكيـــن؟؟ مافي مواعين فكرية تانية في عطبرة مثلا .. أو الدمازين يا كســـلا .. طيب مدني دي ما مليانه مواعين فكريــة من ما قمنــا بنسمع بيهــا..
التنميط ده بيثبت الحقيقــة الفكرية الاصلهــا ثابتـــة.. عن حقيقة ما يحاول البعض العبث بــه.. الثوابت .. لا يمكن العبث بهــا مهما ضاقت أو وسعة المواعين الفكرية . . اتمنى أنو كل واحد يخلي بالــو من ( ماعونو الفكري ) .. وبقدر الامكان يحاول ما يعرضو لي أي تشوهــات .. ولو قدر لــه ما أعني من تشويـــه .. بيكون زول ( بيضة ) كبيرة أو كمــا تفضلتم واسهبتم في طرحــه ..
قد اكون مخطئة, لكتتى استنبطت ان معنى الماعون الفكرى, بالنسبة على الاقل بالفرد, يعنى معرفتة و ثقافتة و ادراكة لمجريات الامور بالأضافة الى التحليل الشخصى لكثير من الامور.. و هذا يتطلب بالضرورة دراسة, و قراءة و مواكبة للجديد فى العلوم, كالموسيقى و التكنولوجيا.. و كل هذة الاشياء, فى اعتقادى, هى اجتهاد من الشخص على سبيل الارتقلء بالنفس..
و نتابع, و نواصل معكم خالص الود و التحايا غادة
07-01-2006, 05:43 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
العزيز تمبس التحية و التقدير ما يحدد حجم الماعون هو قابلية الفرد نفسه لتوسيعه ، هو قدرته علي فتح افاقة و مواعينه امام الثقافات و الافكار المختلفة . اما عن التركيز علي اولاد امدرمان ليس تقصدا لابناء امدرمان في شخصهم و لكن لسهولة التمثيل و سهولة وضعهم كنموذج او حالة دراسية ليس الا . نعم يا عزيزي اشتهرت ود مدني علي مر التاريخ بالمواعين الفكرية المتطورة و المنفتحة علي ثقافات و معارف خارجية مختلفة ، و يبن ذلك في الكم الغير قليل من الفنانين و لاعبي كرة القدم المعروفين علي المستوي القومي ، و لكن كما اوضحت لك يا عزيزي لسهولة اخذ المواعين الفكرية الامدرمانية كحالة دراسية في حالتي النموذج الفكري المنفتح المتطور او المنغلق المحافظ جري التركيز .
Quote: ولو قدر لــه ما أعني من تشويـــه .. بيكون زول ( بيضة ) كبيرة
و هذا بالتحديد هو القصد من فتح هذا البوست ، عدم تعريض المواعين الفكرية للتشوهات و الافكار الخارجية الشاذة .
احيي فيك حفاظك علي مواعينك الفكرية رغم الحال المايل و كمية البيض و الغربة البائسة المحيطين بينا .
07-01-2006, 04:59 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
الاخ جعفر بشير تحياتي حسب المفهوم السائد للمعرفة البدائية المتمثلة في مجموعة العلوم و المعارف المنظمة المكتسبة للفرد عن طريق القياس و الملاحظة و من ثم التجربة ، و المفهوم القائل بان الثقافة هي الكل المركب الذي يكتسبه الفرد و يرثه خلال فترة تكوينه ، و اذا اخذنا في الاعتبار مكونات المعرفة التي تكتسب عن طريق القصد المتعمد و التلقين و بالتالي قابليتها للتطور و التوسيع ، و محددات الثقافة التي يجد الفرد نفسه فيها دون ان يكون له يد في اختيار تكويناتها الاساسية ، فان الماعون الفكري للفرد هو المزيج الذي يخرج به الانسان للعالم من ثقافة مور وثة و معرفة مكتسبة و تجارب ذاتية تكوّن في النهاية ماعون فكري خاص بكل فرد .
Quote: المسالة ما خاصة بي اولاد امدرمان بس كمنطقة جغرافية لكن حتي علي المستوي القبلي موجودة فكرة الأنا العظمي.
و هنا اتفق معك تماما و اضيف ان هذه الانا ليست لدي الفرد في المجتمع السوداني وحده ، و لكن تجدها في كل المجتمعات بصورة او باخري كان تكون الانا الخاصة بخريجي جامعة او كلية او حتي الانا الخاصة باعضاء فريق رياضي عادي او اي رابطة اجتماعية اخري . اذن الاشكالية الكبري ليست في الانا ، و لكن في الادعاء الاجوف المرتبط بهذه الانا ممن لم يقدم للمجتمع المعني شيئا .
Quote: عموما يا تنقو نحن عندما نتحدث عن ابناء امدرمان فاننا لا نقصد هؤلاء ( البيض ) الذين ملأو الدنيا عويلا و ضجيجا باننا اولاد امدرمان الفن ، و نحنا الكورة و نحنا الادب علي حساب غيرهم من المبدعين ، و ما اقصده بالبيض هنا هم عديمي المواهب و ارباع المتعلمين او ما اطلقت عليهم انت لفظة الحناكيش ، مع اختلافي معك في وصفهم بالحناكيش .
دا كلو واضح ياحمد عشان كدا قلناافرزوا ...
وجاييك بي مهله عن الافاق والتاثيرات ..
07-02-2006, 03:51 AM
DKEEN DKEEN
تاريخ التسجيل: 11-30-2002
مجموع المشاركات: 6772
الماعون الفكري ان شئتم الدقة ليس المقصود به المحتوى الذهني او المحمول الثقافي للافراد كما تبادر للاخ الفاضل ابو امنة .. ولان الامر قد يقود إلى مجاهيل اصطلاحية وظنون .. نورد اليكم المعنى محذرين في ذات الوقت من مغبة استخدامه في غير موضعه والزج به في غير دلالاته.. الماعون اصطلاحا هو : في معنى السطل والعبار وهو كل ما جاز ان يحتوى شيئا بداخله.. ولذا فالمقصود بالماعون الفكري به هو مدى اتساع آفاق الادمي للاستيعاب في مفهوم الاستيعاب المطلق.. بصورة ادق هو مدى مرونة آفاق الفرد في التلقي The flexibility باتساع مواعين الافراد في المجتمعات تكون هنالك دوما مساحات لتلقي الاخر وبالتالي توفر مساحات اوفر للحوار... وكلما ضاقت آفاق الفرد كلما قلت قدرته على استيعاب الجديد في عموم الحياة.. اي ان المجتمعات الذي يمتاز أفرادها بمرونة في تلقي الجديد يقل فيها التوتر باعتبار ان الشي الذي استقر عليه حال الناس هو حال صفائهم.. وأي إضافات غير متعارف عليها قد تعكر صفو صفاء المستقر عليه وبالتالي توتر المعتاد.. وعليه فان الفكر المرن ذو الافق الواسع ليس ثمة ما يوتره او يعكر صفاء ه فهو فكر حر قادرة على الحفاظ على استقراره في وجود المتغيرات.. لذا فاننا نجد انه في أكثر المجتمعات مرونة تكون الفوضى والتوترات في اقل مستوياتها.. ويزداد الهدوء باتساع الافق وتقبل الاخر .. وينعدم كليا استخدام السلاح في المجتمعات ذات الافاق الواسعة.. فكل شي هناك يتم تقبله دون ادنى انحياز اوتطرف.. وكل شي متوقع عند ذوي الافاق الواسعة طالما انه لايوجد لذلك الافقlimitation احبابي يا من بالأعلى:- إن الشعوب التي اتسعت مواعينها الفكريه هي شعوب لا تدهشها المفاجأت اذ ليس ثمة مقابل معنوي لمفردة مفاجاة في معاجم تلك الشعوب.. فالمفاجاة مفردة جاءت اول ما جاءت حين اندهش الإنسان الأول لوجود ما يدهشه فكانت الحروف التي صدرت من فمه حينها ميم، فاء، الف، جيم، همزة صدرية ومن ثم التاء المربوطة... فانتظمت خارج رئتيه وحنجرته فصارت ( مفاجأة) وربما لان بالدهشة شي من الخلعة وحرف الفاء والجيم والفاء والهمزة حروف ذات علاقة بكتمة النفس واطلاقه حيث ان اول مايصيب الانسان المخلوع هو انقطاع النفس وزيادة ضربات القلب.. والخلعة خمة النفس عند الكثيرين
لذا ايها الاحبة من العبط ان تغيب طويلا عن حبيبتك في قبيلة اتسعت مواعينها الفكرية ثم تاتي اليها دون سابق موعد وتقفز امامها وتقول : مفاجاة موش كده؟؟
07-02-2006, 05:29 AM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
نورد اليكم المعنى محذرين في ذات الوقت من مغبة استخدامه في غير موضعه والزج به في غير دلالاته..
وفي النهاية ...
لذا ايها الاحبة من العبط ان تغيب طويلا عن حبيبتك في قبيلة اتسعت مواعينها الفكرية ثم تاتي اليها دون سابق موعد وتقفز امامها وتقول : مفاجاة موش كده؟؟
بغض النظر (حبة) عن محاولاتك الزج بالمصطلح في صراعات جانبية الا اننا نؤكد التالي:
اذا ما اعتمدنا التعريف أعلاه وهو (مدى مرونة آفاق الفرد في التلقي The flexibility) هذا يعني ان الماعون الفكري هو مسالة خاصة بالأفراد ولكن استخدام المصطلح مرة أخري لوصف القبيلة فهو يبتعد عن المسالة الفردية الي المسالة الجماعية وبالتالي يكون اقرب الي الثقافة او المحمول الثقافي ... وفي الحقيقة لاتستخدم كلمة ماعون فقط للدلالة علي الماعون الفكري وفق التعريف أعلاه فهنالك عدد من المواعين التي قراتها اللهم الا ان يكون استخدامها مثلاً استخدام غير دقيق .. وهذا يندرج بالتاكيد تحت بند التحذير أعلاه ... مرة أخري وفي الكثير من الأحيان لايتم استخدام الوصف الجمعي في الاتجاه الموجب وينفي بالتالي ما ذهبت اليه من مسالة ان اتساع المواعين يعني بالتالي قبول الاخر سواء الافراد او الافكار ... فعلي ما أذكر ان الأخ خالد عويس (كنموذج) استخدم مصطلح الماعون الانقاذي في احدي مقالاته واتذكر انني وقفت عندها طويلا فهو يتحدث حول ماعون انقاذي اتسع ليشمل افكار ومفاهيم جديدة ادت الي تمزيق النسيج السوداني وانتشار التوتر والحروب علي اساس قبلي ...
وبعدين مع القصة الجايطة دي؟ بعدين في سؤال في البداية نسيناهو ... هل (الماعون الفكري) مصطلح أكاديمي متعارف ومتفق عليه؟
07-02-2006, 03:50 PM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
Quote: هل (الماعون الفكري) مصطلح أكاديمي متعارف ومتفق عليه؟
الاخ جعفر لكي استطيع ان احدد هل هذا المصطلح اكاديميا و متعارف عليه ام لا ، يتوجب علي الاجابة علي سؤالين ، اولا : هل هناك موسوعة اكاديمية تضم جميع المصطلحات الاكاديمية المتعارف و متفق عليها ؟ و الثاني : هل كثرة ترديد المصطلح في الدوائر الاكاديمية يجعل من هذا المصطلح مصطلحا اكاديميا متعارف و متفق عليه ؟ اذا كانت اجابة السؤال الاول بنعم فيعني ذلك ان هذا المصطلح مصطلح غير اكاديمي متفق عليه حسب ما اعلم حيث انه لم يصادفني في احدي موسوعات العلمية او الفلسفية . و اذا كانت اجابة السؤال الثاني بنعم فان هذا المصطلح يكون مصطلح اكاديمي متعارف و متفق عليه حسب علمي ايضا لانني اعتقد انه قد صادفني في عدة مواقع اكاديمية . اما اذا اردنا ان نبحث عن معني المصطلح بصورة دقيقة و قاطعة يتفق الجميع عليها فان ذلك من الصعوبة بمكان و ذلك باعتراف عدد من الفلاسفة قدمائهم و محدثيهم ، و يتجلي ذلك في شعار الفيلسوف فتغنشتين : ( لا تبحث عن المعني ، ابحث عن الاستخدام ) ثم قوله ( انظر الي الجملة علي انها اداة ، و الي معناها علي انه وظيفة تلك الاداة ) و هذا الموقف كله ينتج من الخلفية البرغماتية للغة حسب راي الفرد آيار . غير ان هناك من يري عكس ذلك يا جعفر من ان الجملة تكتسب معناها اللغوي عن طريق التكرار و يتثبت هذا المعني بمرور الزمن و بالتالي يصبح للكلمة معني واحد فقط متعارف عليه . اذن حسب فهمي ايضا فان الامر في النهاية يتعلق بمدي ايمان الفرد باي من نظريات المعاني اللغوية ، او حتي كفره باصنام هذه النظريات ، و بالتالي يعتمد تفسيرة لمعني المصطلح حسب مبدأه الفكري و مدي تجريدة لمدلول المعني بالنسبة اليه .
07-03-2006, 07:15 AM
DKEEN DKEEN
تاريخ التسجيل: 11-30-2002
مجموع المشاركات: 6772
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حمد فتح الرحمن
tmbis
غادة عبدالعزيز خالد
فيس بوك
تويتر
انستقرام
يوتيوب
بنتيريست