|
|
 صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟
|
إحتضن هاشم صديق محمد الأمين ..
الدموع التي حاولا إخفاؤها خرجت من الشاشة .. و هطلت علينا .
و الملحمة تخرج أثقالها .. و أكتوبر يفرهد في القلب تاني .
( نذرنا الروح .. مسكنا دربنا ..
للشمس النايرة قطعنا بحور
حلفنا نموت أو نلقى النور )
الناس أدمع .. العازفين .. رجال الكاميرا .. الحضور .. المشاهدين ..
كل شيء يدمع ليلتها .
و أم بلينه ترتج بالبكاء ..
و المسرح القومي .. سال ..
( و سال الدم في أرض الوادي
فدينا النور بالروح يا بلادي )
.............
تلك الليلة ..
بحثت طويلا عن الأكتوبريات ..
صلاح عبدالله لا يتعلم الدرس .. قلت له :
غبي من يعير كتابا لغيره , و .. أغبى منه من يرد كتابا إستعاره .
صلاح يعيرني تسجيلات ما أنزل الله بها من شي .. درر و كنوز أجزم حتى إذاعة أمدرمان طيبة الذكر أهملتها .
وجدته , شريط أسود قديم و مترب .
أغلقت الغرفة و أدرته :
( هبت الخرطوم في جنح الدجى - كابلي / في الحادي و العشرين من شهر أكتوبر – صلاح مصطفى / المجد للآلاف تهدر في الشوارع كالسيول – محمد الأمين / إسمك الظافر ينمو – وردي / يا ثوار أكتوبر يا صناع المجد – وردي / اليقظة الحذر – محمد الأمين ...... و .... و )
.............
لماذا هي يقظة ما زالت ؟؟
لماذا هذه الأناشيد الأماجد لا تزال تعصف بالقلب و الوجدان ؟؟
ما الذي فيها يميزها و يجعلها حية ؟؟
أم ... نحن من مات ..
و نغبط هذه الحياة السرمدية لأكتوبر ؟؟؟
|
|
 
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: أبو ساندرا)
|
الأخ عماد عبدالله
تحياتى لك ولكل الأكتوبريون
أنا من الأكتوبريون
يمكن أكبر منك شوية وما كتير
طبعآبعد ما شفت صورة بتك ما صورتك
ما أطلع بعيد عن أكتوبر الأخضر
لقيت قصيدة وبخط يدي بين الأوراق
قصيدة رائعة
هى ما عن أكتوبر . لكن عن الناس الباعوا أكتوبر
عن الزين يحصدون دم الأبطال وعرق الرجال (على الجاهز)
وسطوا على الإنتفاضة (وراجين هسه فى الطابور)
ما أطول عليك
طبعآ بصفتك شاعر
داير أعرف عنوان القصيدة وإسم الشاعر
مطلعها بقول
ها قد إسترد السادة الخلفاء والأمراء أملاكهم وأسلابهم
قصور المدائن... حدائق بابل
إيوان كسرى ... وبيت المزارة
ولكن متى يعيدون لبيتك أشيائه
فأنت تباعآ... لتسكت جوعك
بعت الأثاث بأرض الدلالة
وجل الأوانى... وراديو الأغانى
صور الجدار... لعب الصغار
وحتى الأمانى... بثمن خسارة
آسف عل الإطالة ومنكم نستفيد
ولك الود
| |
|
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: Emad Abdulla)
|
عماد عبدالله
مع انك فرحان اليومين دول
لكنك ما زلت باركت تحت وتهب في نيران الاسئله
ونيران اكتوبر (الميت والمغطغط بثوب بتوب الحياه)
Quote: لماذا هي يقظة ما زالت ؟؟
لماذا هذه الأناشيد الأماجد لا تزال تعصف بالقلب و الوجدان ؟؟
ما الذي فيها يميزها و يجعلها حية ؟؟
أم ... نحن من مات ..
و نغبط هذه الحياة السرمدية لأكتوبر ؟؟؟ |
عماد عندي سؤال محرقني من زمان والله ضيفو لاسئلتك ورد لي عليهو
لي كل مانسمع شي من العمل الثوري (شعر ,غناء, اناشيد ,مارشال عسكري اي مصيبه عندها علاقه بي
كده) تلقى شعرة جلدك (كلبت) على قول امي السؤال لييييييييييييييييييييييييييييييه
(رد سريع انشاء الله بالليد)
ويسلم حميد البيقوم ديمه شعرة جلدنا ده كان شفناهو في راس الشارع بس ناهيك عن سماع قولو,,,,,,
| |
|
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: Emad Abdulla)
|
العمدة ..
آسف يا صديقي على التأخر في الرد ، السبب أكل العيش ، واللهاث وراء الرزق ..
أولاً ، أشكرك يا صديقي أن جعلتني أكتوبرياً ( بالإحساس ) فهي صفة لا ينالها ألا ذو حظ عظيم..
فالانتماء لتلك الحقبة / الجيل شرف لا يدانيه شرف .. ليتني عشت ذلك الزمن النضير .
فأنا لست من ذلك الجيل ، كما أنني لم أحضر أكتوبر ، ولكنني عشتها ، وذلك من خلال إنتاجها الفني ، والأدبي الراقي والصادق..
أكتوبر أول الثورات الشعبية بعد نيل الاستقلال ..
كان كل الشعب السوداني (سياسيون) وقد كان لمقاومة الاستعمار ، وبعدها التجربة الديموقراطية الأولى أثرها المباشر في خلق ذلك الوعي لدى الشعب السوداني وكان للبلد ( وجيع) ..
المبدعون وباعتبارهم جزء من هذا الشعب ، وهم القادرون على التعبير عنه ، هبوا جميعهم للتعبير عن فرحهم بتلك الثورة ، وكانوا منزهين عن أي غرض سوى حب هذا الوطن ، وكان نتيجة ذلك ، هذا الانتاج الفني الخالد ..
هي أناشيد أكتوبر إذن !!
هي إغنيات ( إدمان ) ..
هي الأغنيات الخالدات ، والتي لم تطفئ السنوات وهج لهيبها ..
من منا لم تهزه أغنيات أكتوبر ؟؟
وهي كشعر أبوصلاح ، الذي أدهش البروفيسور على المك وجعله يوجه سؤاله الشهير لشاعرنا الضخم ( قل لي يا أبا صلاح ، كيف يبقى الشعر وتفنى الملهمات ؟؟) ..
الفارق هنا أن ملهمات أبا صلاح قد فنيّنَ ، فهن أجساد ، تبلى ، أما ملهمة أفذاذنا الأكتوبريون من ، شعراء ، مغنيون ، كُتّاب ، أدباء ، سياسيون ، فلم تفني (ثورة أكتوبر) بل بقيت جذوتها متقدة وستبقى لأجيال قادمة ..
شعب صادق في حبه لوطنه ، تشرب بذلك الحب حتى الثمالة..
شعب مقاوم ذكي ، رفض حكم العسكر ، فخرج في ثورة شعبية زلزلت اركان حكمهم ، وتولت أمرها ..
هذا الشعب هو من كتب قصائد أكتوبر ، ولحنها ، وأداها ، بهذا الحس الوطني ، الفني ، الأدبي ، الصادق ، فكتب لها الخلود ..
وأعتقد (وهذا رأي شخصي) أن السر في بقاء هذه الأغنيات خالدة ، يكمن في كلمة واحدة ( الصدق ) ..
سأعود ..
تحياتي
| |
|
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: Salah Abdulla)
|
عماد .
سلام .
عدنا ..
(عليك الله رجع لي شرايطي) ..
هناك الكثيرين من أعضاء هذا المنبر يستطيعوا التحدث عن أكتوبر ، بشئ من التفصيل ، وبالطبع هم الأولي بالحديث عنه ، وعن انتاجه الأدبي والفني عامة ، ندعوهم للدخول مع الأخ أبوساندرا هنا ..
لذا دعني أستغل بوستك هذا وأوسعه قليلاً ..
أغنيات تلك الحقبة لا تقل جمالاً و خلوداً عن أغنيات أكتوبر ، عشان كده خلينا نتناول كل انتاج تلك الفترة من اغنيات.
اذا كان في اربعين فنان ( جديد ) الآن ، فتسعة وتلاتين منهم معتمدين على الغنا القديم .
الانتاج الفني الحالي لمن بقي من فناني الستينات ( أمد الله في أعمارهم ) لا يرقي الى مستوى وجودة انتاجهم في تلك الفترة .
في تلك الفترة ، لم يكن هناك ( معهد موسيقى ) ولم يتلق كثير من العازفين والفنانين دراسة أكاديمية علمية في الموسيقى.
في تلك الفترة ، لم تكن أجهزة التسجيل ، كما هي عليه الآن .
جيب ليك شريطين ، واحد قديم ، والتاني جديد ، أسمعهم الاتنين ..
في القديم ، ركّز في سمعك على نظافة التسجيل ، نقاء وقوة وجمال صوت الفنان ، تناغم وانسجام العازفين ، يعني يدوك الحرف الانت عايزو ، بدون زيادة ولا نقصان ، الكلمات بتاعت الأغنية ..
مع ملاحظة أن بعض الآلات كانت غايبة ، مثل الجيتار الكهربائي ، البيز جيتار ، البنقز ( في كثير من التسجيلات ) الاورغ ، وبعض الالات الخشبية ، او النفخ ، او النحاسية ( سموا الصاح فيهن ) .
وبعد كده ارجع للشريط الجديد وأسمعو ، وخت جنبك أسبرو وكافينول ، وبندول ، وجردقة وحرجل ومحريب ، وباقي عمّه عشان تربط بيها راسك ، وما تنسى نص ليمونة ، عشان الطمام ..
التسجيل ، جامد ، قاتم ، جاف ، كـأنه مسجل في بير ..
الفنان ، تحس أنه مجبور على الغنا ، وزي الما أتعشى كده ، وصوت ناقصاه فيتامينات كتيرة ، فيهو تعب ، وباقي ملاريا..
وفوق هذا وذاك ، تلقى الصوت عااااااادي ، يعني أي واحد ممكن يتونس بيهو مع اصحابو بالليل ويغني أحسن من الزول الفرضوه علينا داك وأطلقوا عليه لقب فنان .
العزف ، ركّز على الآلات (كل آلة على حدة) وعلى العازفين وح تلقى أنه كل ( فردة من بلد ) وكل واحد شغال بالطريقة الهو شايفها ، وكل واحد عايز يظهر امكانياتو ، ويعمل فنيات من عندو ، وهي في الآخر تؤثر على جودة العمل وشكلو العام ..
وتلقاهم كتير بيعاينو للفنان بي عيون زايغة كده زي الخايفين منو كده وكأنهم منتظرين منه حركة عشان يستمروا في العزف ، أو يسألوه ( كده كيف ؟؟) يعني ما واثقين من شغلهم ، في حين أنه مفروض أنه الاغنية عملوا ليها بروفات ووقعوها ، وحفظوها ، وبعد كده عليهم التنفيذ ..
مرة حضرت حفلة جنبنا في حي الزهور وكانت بالفنان محمد الأمين .
الراجل بيغني في أمانة الله ، فجأة الفرقة وقفت العزف ، كل واحد منهم كان بيعاين للتاني ومنتظرو عشان يخش في الجملة .
وفي الآخر وقفوا كلهم ، والحقيقة الراجل ما زعل منهم أبداً ، لكن قرّب يقع من المسرح من الضحك عليهم ..
وهم كل واحد يعاين للتاني ، ومحرجين غاية الاحراج ، والمعازيم المساكين وقفوا الرقيص ، والعريس زاتو كان قعد يبشر خلى البشير ووقف متمحن ..
دي نقول عليها شنو ؟؟
سألت مرة واحد من الفنانين خريجي معهد الموسيقى وقلت ليهو ليه التسجيلات القديمة أجمل وأكثر نقاء من التسجيلات الحديثة ، فقال لي حسب علمي أنو اجهزة التسجيل زمان كانت الأجهزة ( أم لمبة ) والهسي دي ديجيتال .. والقديمة أحسن من الجديدة .
الكلمات ، الشعر ، قارن شعر الزمن داك ، وكلمات الأغنيات ، وتعال شوف الكلمات حقت ناس قريعتي راحت ديل ، وما محتاجة لتعليق .
التلحين ، الألحان ، الملحنين ، قارن ألحان زمان ، وشوف الابداع الذي يكاد يسوقك ( غصباً عنك ) الى حافة الجنون ، والألحان الحالية ، والتي تحس فيها ( بالاستهبال ) والخواء ، يعني بيغشوا منو ؟؟ ألحان فاضية ، وما فيها أي فنيات ، ولا ابداع ، ولا مجهود ، فارغة ، ومشوهة وتوسخ الاضنين ..
في نهاية الثمانينات ، كنت متعود عند رجوعي من الجامعة أغشى ، فنان صديق كان زميلنا وكان وقتها في الكفر والنجم الأول بلا منازع لكل حفلات العاصمة .
وكان يعمل مديراً لواحد من المعارض الكبيرة في شارع مزدحم في قلب العاصمة .
الساعة كانت زي اتنين كده ، لقيتو قاعد في مكتبو في صالة المعرض المفتوحة أبوابها على الشارع ، والسخانة (ألف) والناس داخلين وطالعين .
لقيت قاعد جنبو واحد شايل ليهو نوته موسيقية ( كراس ) وقاعد يدندن ويهز في راسو ، ويكتب بقلم الرصاص ويمسح .
عرفني بيهو صاحبنا وقال لي الأستاذ فلان الفلاني طبعاً ملحن كبير ومعروف .. قلنا أهلاً ، واتشرفنا ..
تخيل نص النهار وسخانة تقلي ، وقيامة قايمة ، وده قاعد قال بيلحن قال .. تصور أنت اللحن ح يكون كيف ؟؟
لسه ما خلصت نقتي ..
بمشي وبجي ..
| |
|
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: معتصم الطاهر)
|
معتصم ..
إزيك يا ود مدينتنا (هنا)..
| Quote: أنا واقف من زمن ( قامت أدتا برتكانة ) .. |
كده إنت جديد ، لكن ما( لنج ).
بمناسبة الأغنية بتاعت أبو عركي الذكرتها دي يا معتصم ، أنا في كلام ح أقولو وعارف أنه ح يفتح لي أبوب الجحيم ..
لكن والله إلا أقولو إن شاء الله يفتح لي باب بيتنا زاتو ..
وهو أنه في فترة ، الغنا بتاع الأستاذ أبو عركي ، تحس بيهو ( ألواح مركّبة ) ..
تشم فيهو ريحة الكتب والكراسات شغل ( أكاديمي ) جامد ( في نظري ) ..
شغل ما بيهبشك .. عموماً ما في زول بعيد من النقد ..
ما أود التأكيد عليه هنا ، هو أن مداخلتي أعلاه ، ليست عامة ، فهناك فنانين جدد ، نحنى هاماتنا إحتراماً لهم..
هذه الآراء خاصة يا جماعة ، وأرجو أن لا نظلم غيرنا ، ونتهمهم بها ، إذا كان هناك من اتهام ( لا قدر الله ) فأرجو أن يوجه لي ، وليس لغيري ..
وعشان نكون أكثر انصافاً ، فلا بد هنا أن نذكر أن الأحوال الاقتصادية ، الاجتماعية ، السياسية ، لها أثر كبير جداً في نوعية الغنا البنسمعو هسي .. ولكن ليس ذلك هوالسبب الوحيد.
سبب خلود الأغنيات القديمة (في رأيي) هي الأسباب التي ذكرتها أعلاه ..
أصبحت قصة الغنا ( أكل عيش ) ما وراها اي دافع غير ( القروش ) وده رأي حاد ، قابل لآن ترد به بعض الاستثناءات ، لكن هذا لا ينفي أن واقع حال الغنا الآن يا هو ده ..
واحد شاب صغير ، يكتب الشعر ، يلحنه ، ويبيعه للمغنيين غنا جاهز، راكب ليهو ( من ورا الشغلة دي ) عربية جديدة ..
هذا ليس حسداً ، ولكن ما هي نتيجة ذلك على الذوق العام ؟
علماً بأنو الغنا حقو ( عاااااااادي جداً ) ممكن أولاد المدرسة يلحنو أحسن منو ..
أنتو سيد البيت ده وينو ؟؟
نرفعو ليهو لحدي ما يجي ..
برجع ..
| |
|
|
|
|
|
|
|
|
|
Re: صلاح عبدالله .. أبو ساندرا .. و بقية الأكتوبريون .... لماذا ؟؟؟؟؟ (Re: Emad Abdulla)
|
لعل الشفرة تكمن في { تلك الحقبة } فترة عنفواننا الوطني
إلتقطها صلاح عبدالله ولم يذهب عميقآ
إكتفى بالحقيبة ليلحقها بالأناشيد المجيدة
وجذوة إكتوبر { دنميتنا } التي مازالت متقدة
في ضميرنا الوطني والثوري
إنها فترة الستينات
أحلى وأغلى وأعظم حقبنا الوطنية والثورية والعالمية
في الستينات:
مجد الأغنية السودانية وإنبلاج فجر إبراهيم عوض وإبراهيم الكاشف
وعثمان حسين وحسن عطية وسيد خليفة وابوداؤود والجابري والكابلي ووردي
يواكبهم شعراء مفوهين ، حسين بازرعة وعوض أحمد خليفة وحسن عوض ابوالعلا
وعبدالمنعم عبدالحي وإسماعيل حسن ، والحسين الحسن
ومن خلفهم أساطين الموسيقى برعي محمد دفع الله ومحمد عبدالله محمدية وإسماعيل عبدالمعين
وعبدالفتاح الله جابو
في الستينات :
كوكبة الشعراء الأماجد ، صلاح أحمد إبراهيم و محمد محمد علي وإدريس جماع
ومحمد الفيتوري ومحمد عبدالحي ومصطفى سند و تاج السر الحسن
في الستينات:
العصر الذهبي للكرة السودانية ، صديق منزول والهادي صيام وبرعي أحمد البشير
ونصر الدين عباس جكسا وسبت دودو وعبدالماجد عثمان وإبراهومة ووزة والقطر قام
وحسبو الكبير و الماوماو وجقدول ويوسف مرحوم
في الستينات :
أفضل إنجاز يحققه الفريق القومي { منتخب السودان } لكرة السلة ، وامجاد سطرها
خميس جلدقون ومحمد علي الأعيسر وحبيب إسطمبولية ووليم أندريا
في الستينات :
القبضات الفولاذية والملاكمة ، عبدالوهاب عبدالله وكسميرو كاساري وتمساح ملوال
وعبدالحميد لوممبا ومحمد علي طنون و علي الأقرع و يوسف زكريا
في الستينات :
إنسكب عرق حار وذكي من أولاد الذوات في ملاعب كرة التنس في حي المطار
خالد وماجد طلعت فريد وأولاد عبدالرزاق وأولاد عامر
في الستينات :
الفترة الزاهية الزاهرة لليسار السوداني ، عبدالخالق محجوب وجوزيف قرنق
ومحمد إبراهيم نقد ، والجزولي سعيد والتيجاني الطيب
وعمر مصطفى المكي وقاسم أمين والجنيد علي عمر وعبدالرحمن عبدالرحيم الوسيلة
والحركة النقابية تضع بصماتها بقيادة الشفيع أحمد الشيخ وسلام والحاج عبدالرحمن
وحركة المزارعين وفي قلبها الشيخ الأمين محمد الأمين ويوسف أحمد المصطفى
في الستينات :
أبو الفنون ، المسرح يزدهر ويقدم عروض رائعة في المسرح الوطني وفي مدن البلاد
في الستينات :
تنهض حركات التحرر الوطني في العالم الثالث في إفريقيا جومو كنياتا
وبياتريس لوممبا وامركال كابرال وأوغستينو نيتو و موديبو كيتا وسام نجوما
ومانديلا
وفي أمريكا اللاتينية كاسترو وجيفارا وثوار الفارباندو مارتي والساندنيستا
في آسيا ماو تسي تونغ والفيات كونغ وهوشي منه والجنرال جياب وسوكارنو
ومؤتمر باندونغ
والثورة العربية ، جمال عبدالناصر و أحمد بن بيلا وهواري بومدين
والثورة اليمنية وعبدالفتاح إسماعيل
وغزو الفضاء يوري قاقارين وفالنتينا
الحنين لتلك الإنجازات
والصعود الثوري والفني الجميل
هو الذي يجعل الحقبة متقدة جذوتها فينا
وحا نعود لإكتوبر المجيدة وأناشيدها
| |
|
|
|
|
|
|
| |
Emad Abdulla
أبو ساندرا
رأفت ميلاد
فيصل عباس
معتصم الطاهر
فيس بوك
تويتر
انستقرام
يوتيوب
بنتيريست