«حلو حلا» عبد اللطيف البوني

Quote: قالت البنت لأمها: «والله يأ ماما الليلة ركبت معانا في عربية بابا واحدة شغالة معاه في المصلحة ظريفة ظرافة كأنها بتعرفني من زمان». فانتفضت الأم كالملدوغة ورمت بصحن الصيني الذى كانت تحمله في يدها بعنف جعل حبيباته المتناثرة تملأ الغرفة، وصاحت قائلة «سجم خشمك وسجم خشم أمك ما أصلها بتبدا كدا» فأخذت البنت ترتجف كالقصبة فلم تكن تتخيل ردة الفعل هذه من أمها لانها لم تقل شيئاً يستحق ان يقابل بهذه الثورة العارمة فأخذت تصيح قائلة: «مالك يا ماما في شنو؟ الحصل ليك شنو؟ مالي أنا قلت ليك شنو؟» فردت الأم بنفس الثورة: قلتي شنو؟ انت ما عارفه قلتي شنو؟ انتى جبت لى الخبر أكيد بعد ما كنت شاكة فيهو؟ انتي ما سمعتي البت البتغني قالت: «شنو؟» فقالت البنت «الجاب الغنا هنا شنو؟ أها قالت شنو؟ قالت الأم «غنت قالت «ركبني عربيتو وعرفني بى بتو» فانتفى الذعر عن البنت وضحكت قائلة «آآآآ اتذكرت انت قاصدة أغنية راجل المرة حلو حلا، والجا فيها: «كان انت مرتو الكبيرة انا ببقى ليهو الأميرة، وكان انتي ودرتي شبابو أنا بعوض ليهو أيام عذابو». حكت البنت لامها عن صديقتها التي تزوجت «راجل مرة وكيف إنها سعيدة الآن معه وكيف أن اولاد الزمن دا ما عندهم مسؤولية، فسألت الأم ابنتها إن كانت ستقبل برجل متزوج من أخرى، فردت البنت قائلة «والله لو كان واحد ظريف زى بابا دا مالو؟» فعادت الثورة للأم وهاجت وصاحت: «أبو بو اليشقك انت يا بت جنيتي ولا شنو؟ ومالك ذنبك شنو وسويتي شنو عشان تعرسي راجل مرة؟؟ هو راجل المرة فيهو شنو عشان تضيعي شبابك معاهو» فردت البنت «كان ما فيهو حاجة إنتى زعلانة هسة كدا مالك ما تخليهو يمشي محل ما ماشي؟» فزادت ثورة الأم : «يعني الكلام جدّ أبوك عندو النية، انا شايفاهو اليومين ديل ما ماشى عديل قال ايه؟ قال داير يعمل نيولوك «New look» والله وأها مليت خشمي بي الله يقوم يسويها يا انا يا هو في البيت دا» أرادت البنت اعادة الهدوء لأمها فقالت لها إن والدها ليس من ذلك النوع وإن كل الحصل انو بتعامل مع مرؤساته في المصلحة بذوق عالٍ فقالت الأم: هو ابوك ذاتو البقاهو رئيس منو؟ مالو ومال الرئاسة ما يقعد في ا########## دى ويرتاح ويريحنا معاهو». قال الراوي: عندما ظهر التعدد الزوجي فى البلاد كان في بداية التسعينات إذ كان مرتبطاً بالمشروع الحضاري فقبل ذلك كانت العلاقات الجنسية لا تشكو من قلة البراح ولكن عندما وجد أهل المشروع الحضاري المال والسلطة أرادوا استمرار البراح ولكن بصورة مقننة تتفق والمشروع الحضاري فاعادوا التعدد «القالو بين الناس خرف» اما الآن فالتعدد جاء من مشروع اسفل المدينة ووسطها من بنات المدينة فاصبح موضة هذه الأيام فنشأت حوله القصص والأغنيات الشعبية. وفى حلقة قادمة إن شاء الله سوف نستعرض اغنية «مفرزة، راجل المرة حلو حلا

Quote: وفى حلقة قادمة إن شاء الله سوف نستعرض اغنية «مفرزة، راجل المرة حلو حلا