رن الموبايل وكان المتصل شقيقي الأصغر من أمدرمان صبيحة اليوم ... وأنا متعقد من التلفونات البتجي بدري لأنها دائماً ما تحمل أما خبر موت أو مريض خطر من اللأعزاء من الأهل والأقارب ، ولكن صباح هذا اليوم كان الأمر مختلفاً... وطبعاً قمت مخلوع من النوم وسألته بلهفة إن كان الأمر خير ... - لا خير بس الحاجة ست النفر جارتنا؟ - خير مالها؟ - في مركز البوليس مقبوض عليها... فقلت ليه، الحاجة ست النفر مرة مسالمة وصديقة المرحومة الوالدة وصديقة خالتي المقيمة معنا وهي جارتنا مما فتحنا عيونا في الدنيا... خير عملت شنو؟ - موضوع بسيط دقت ليها موظف أثناء تأدية واجبو؟ - إنشاء الله سليمة؟ - قالوا أذى جسيم أكثر من 21 يوم علاج؟ - يعني شنو؟ - كسرت ليهو أيد وضلعين وتمتوا بي نبوت في الراس!! - أكيد الموضوع كبير؟ - كبير شديد - أحكي لي الحصل - الحصل إنو قاريء عداد الكهرباء جاء وقرأ العداد وقال ليها إنت يا حاجة عليك متأخرات 31 مليون جنيه قيمة إستهلاك كهربا وغير كمان الفاتورة الجديدة لما تجيك بعد القراية دي المبلغ حيكبر. - يا ولدي إمكن غلطان ... معقول الأودتين ديل بستهلكوا كهربابالملايين دي وبعدين يا ولدي إستنى أجيب ليك الفاتورة حقت الشهر الفات أنا مسدداها!! - ولا تجيبي لي ولا أجيب ليك أمشي إتظلمي في مكتب الكهربا..أنا شغلتي أقرا وأحصل - هي يا ولدي كدي خت الرحمن في قلبك وإتفاهم معاي أمكن في ست النفر تانية وممكن يكون عندها مصنع .. شنو إمكن الفاتورة دي حقت مصنع النفيدي واللآ ود البرير؟ - يا ولية بطلي الجقليب ويا تدفعي واللآ حنقطع منك التيار!! - تتر ما ترجع والله الجمرة الخبيثة أحسن للعندهم من السلبطة بتاعتكم.. إنتو بتين حتغيروا لينا العداد الجايب لينا المصايب ... والله الناس ساكت خافت من الجمرة الخبيثة كان عارفين بلوة ست النفر كان سكتوا ساكت وحمدوا ربهم؟ - أنا ما لي دعوة عندك الإدارة إتكلمي معاها - والله يا ولدي دي سرقة عينك عينك!! - يعني أنا حرامي يا مرة؟ - يا ولدي أنا هسه قلت ليك إنت حرامي؟ مالك شلت الكلام لي نفسك؟ وبعدين أنا قدر حبوبتك ما عيب تقول لي يا مرة.. ما إنت بتعرفني زي جوع بطنك وكل شهر بتمر علينا بتقرا العداد؟ - أمانة في ذمتك أنت يوم واحد جيت قريت العداد ده لقيتو وصل حتى ربع مليون... تقول لي 31 مليون - الظاهر عليك إنت مرة بتاعة مشاكل؟ منو العارف ما إمكن بتستهلكي الكهربا لأعمال التقطير؟ - تقطير شنو يا ولدي؟ تطير ما ترك إنشاءالله - يعني ما عارفه تقطير شنو؟ - والله ما عارفه إنت بتقصد شنو؟ - تركيب العرقي؟ - يا جنا حرام عليك أنا مرة حاجة وممدنة ( ناديت على خالتنا وجارتها التانية حاجة السرة - هوي تعالن شوفون البلا الجانا من الصباح قال عاوز 31 مليون متأخرات والله أنا كان باعوني ما أجيب مليون خلي 31 مليون... يا كافي البلا وقايد المحن!! جاءت الوالدة وحاجة السرة وبدأت تحكي لهما ما دار من حوار وأمامهما إستأنفت الحوار: - ما عيب يا ولدي تقول علي بركب العرقي وأنا مرة حاجة بيت الله قالت الخالة: - يعلم الله إتلومت يا ولدي دي مرة مصلية وخايفه ربهاوكمان بت قبايل من ناس الشيخ المكاشفي أهلها من الشقينيبة... وجارتنا من 30 سنة ماشفنا منها إلا الخير والجيرة الطيبة .. تب ما بتعرف الحرام!! - خير شر ما يهمني الدفع أو القطع ثارث ثائرة الحاجة ست النفر وقالت ليهو:- - الله يقطع خلف أمك... كان راجل إستناني دقيقة بس؟ - حتعملي شنو يعني ؟! والله ما بتقدري تسوي أي حاجة .. وأنا قاطع ليكي الكهربا قاطعها إنشا الله ليلتك ضلمة!! - إنشاءالله ليلة أمك وكل أهلك يا ود الكلب ... إنعل أبوك قَلَبَه وعَدلَه دخلت ست النفر لدقيقة وإذا بها تحمل قرجة المرحوم عم حمدالله شيخ الظهر وتهوي بها على جسد صاحبنا!! - طيب وبعدين حصل شنو؟ - لا الوالدة ولا حاجة السرة ما قدروا يفكوها منو - طيب وبعدين؟ - بعدين شنو... ما كومته قاطع النفس... كسرت ليهو يدوا كسر مركب ... والضلوع الإثنين ... وكدمات في كل جسمو وحسه رقدوا في المستشفى بعد ما جا البوليس وساق الحاجة ست النفر وقالوا أذى جسيم أكثر من 21 يوم ولازم تتحبس في الإنتظار لحدي ما تتضح الصورة والمعالم - معالم شنو؟ - معالم صاحبنا المصاب أصلوا وشو ومعظم جسمو مغطى بالشاش ... خايفنو يموت لأنو بعدما إتكوم ناولته قرجة في راسو كمان!! وجهو ليها تهمة التعدي على موظف أثناء تأدية واجبو والأذى الجسيم والسب وإنشاءالله الحكاية تقيف على كده ما تكبر وتبقى ضرب أفضى إلى الموت!! - طيب إتصلت بي أعمل شنو هسه؟ - قلنا تتصل لينا بصاحبك العميد بتاع الشرطة يساعدنا نطلعها بضمانة. - طيب إنتو أمشو ليهو أحكو ليهو الموضوع وقولوا ليهو رسلني ليك أخوي فلان وأنا حأعمل جهدي أتصل بيهو. حاولت الإتصال بصديقنا وللأسف لم أوفق ولكن بعد ساعتين إتصل سقيقي تاني وقال: - مشينا لصديقك وإستفسر عن حالة المصاب وقالوا ليهو ما مستقرة وعلى بال ما تستقر لازم ست النفر تبقى محجوزة ولكنو قال: دي متهمة في تلاتة قضايا حتة واحدة وقال: والله عافي عنها الأدبتو ... وقال في واحد زي المصاب برضو متلحو وبعد شوية قعد يدندن ويقول: ست النفر زولا ضكر تب ما برضي القهر ست النفر كان ما عندها ضهر بالقرجة تدق تكسر!! ست النفر ما بتنحقر!!
والله معاها حق ست النفر ... تعمل شنو... تسرق؟! وأنا كمان عافي عنك يا ست النفر يامرت حمدالله شيخ الظهر ... كسري كسروا الضريب!! _ قلت لأخوي: عجبتني ست النفر وأنا حأدفع ليها الغرامة وحأكلم صاحبي عشان الموضوع ما يكون فيه حكم بالسجن!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست