أُغنية تدور في الأعراس هذه الأيام ، تحكي علناً قصة فتاة أعجبها (راجل مرة) بالرغم من أنه متزوج إثنتين بل وتصفهما : (حنينة مرتو الصغيرة .... شينة مرتو الكبيرة) .. وتسهب في أنه عرّفها على إبنته (ركبنّى عربيتو .. وعرفنىّ ببتو) ... ليتضح من سياق الأُغنية أنه (راجل مُرتاح) عشان كدا وصفته أولاً بأنه (حلو ... حلاة) .... (الحلاة) أوالجمال هنا المعنى به فلوسه ، دراهمه ، ودنانيره .. غير مهم إن كانت حراماً أو حلالاً .. مغترب كان ولاَّ ود بلد المهم (إنه عندو قروش) !!... ولتأكيد الأمر لنسمع في الأُغنية الثانية : خليه يفوت يُما * * عدمان حق الصعوط يُما خليه اليطير يُما * * عدمان حق العصير لنجد أن الأمر بجلاء لدى فتياتنا منحصر في (شيلتو بالدولار) . ثم تنسحب الأُغنية لتجاهر علناً بتفكير الصبايا السودانيات في (راجل المرة) كواقع لا مفرّ منه بعد قلة الرجال وعزوفهم عن الزواج إما لأنهم ما شغالين أصلاً أو (لأنه ما في داعي للزواج أصلاً) وتتحكم في ذلك ظروف ومناخات إقتصادية وعوامل نفسية وبيئىة .. فالفتاة الشاطرة صارت هي الفتاة (الملحلحة) اي التي تأتي وزوجها في يدها بغض النظر عمن يكون هو ، المهم أنه يستطيع الإنفاق عليها ، وهو أمر غير حقيقي ، فالنصيب هو المكتوب وتسبق القسمة أي (لحلحة) أو شطارة بعد ذلك تدخل الأُغنية في الغيرة بين الزوجات .. وأن الفتاة مستعدة لمواجهة غيرة الضرات أياً كان نوعها فهي أجمل منهن وأصغر لأن (الجديد شديد) ... تتطرق الأُغنية كذلك لسبب رئىسي لقبول الصبية (براجل المرة) ؟!... فهي تصف وبلا حياء او خجل وتقول لتنهي أمراً هي مقتنعة به (وكية للعزابة .. عجبني !!.. وقبلتو !!...) ...واصفة الإعجاب كمسوغ اساسي وخطير فهو يملك عربة ، (وأعجبها) الإعجاب هنا يعني أنه وسيم وبالضرورة مقبول وأهم حــاجة (عندو كامري ، فيرنا ، نوبيرا) وسجـــــل لي عرباتك .. والباقي معروف ... الإشهار العلني لطموحات الفتيات السودانيات وبهذا الشكل يصب الزيت على النار و(يخلي الفار يلعب في عب) أي امرأة سودانية متزوجة فالأمر صار حلبة تنافس ، التي تكسب فيها هي التي تكون (مرتو) وتتعامل مع كل الأمور لصالحها . المهم أن تتباهى الفتاة بوسامة ومال زوجها بين قريناتها والمُهم أن (تطلع وتنزل) ويديها ملأى بالذهب ، يوم في لندن ويوم في ماليزيا .. ويوم في بلاد ما عندها إسم ( زاتو) ... (ما دايرين نخوفكن) لكن الأمر كله متروك للظروف ونقول لهُنّ : ما تهتموا للأيام ظروف بتعدي ... طبيعة الدُنيا زي .. الموج .. تجيب وتودي .. مصير الزول حياتو .. يا ما فيها يشوف وفي دُنيانا .. بنلاقي الألم والخوف . ودا الخايفين منو ذاتو.. ويا نِسوان الرجال !... (سجم خشُمكن...) ؟!!.... ___________________________________________ نادرة مهدي - صحيفة الوطن
06-08-2006, 02:36 PM
luai
luai
تاريخ التسجيل: 02-27-2002
مجموع المشاركات: 2251
وازيدك من الشعر بيت يانادية ... قال ليك كمان لو كانت الزوجة اديبة ولا شاعرة ..دي فرصة خطف (بعلها) سريعة لانها بتكون منهمكة في الكتابة ..وفي واحدة منهمكة في (خطف) الزوج
تخريمة : التحويشة مهمة ياستي ..لزوم المستقبل
06-08-2006, 04:24 PM
luai
luai
تاريخ التسجيل: 02-27-2002
مجموع المشاركات: 2251
ثقافة العفة انتهت يالؤى زمان: المهيره عقد الجلاد الان سجل لى دهب امك وتعال لى عشان اضمك كل شى بحقو لكن بينى وبينك اختطاف راجل المرة شائع فى اوروبا وامريكا شوف الممثلات ديل بقلعن من بعض كيف طبعا الواحد بكون راجل مرة واحدة لكن موزع احضانه على خمس عشان كدة احسن الصراحة والاقرار وعلى كل حال زواج راجل المرة احسن من الزواج المثلى الخايف بكرة يظهر لينا فى هذا البورد من يتبناه من منطلق حضارى زى موضات فكرية كثيرة شائعة فى هذا المكان والله يالؤى بعرف اسرة فى الرياض (الخرطوم) اخوات جميلات الى حد الجمال وآسرات لكن متخصصات زواج رجال نسوان طبعا بتزوجوا (القناديل)يعنى ( الهوامير) يعنى ( الكبروسات)
وباقى القصة بسيبولمداخلة اخرى
06-08-2006, 05:42 PM
luai
luai
تاريخ التسجيل: 02-27-2002
مجموع المشاركات: 2251
سيد تحياتي وسلامي الممثلات والممثلين الاجانب لما يقولوا ليك واحده اتزوجت من ممثل ولا فنان لازم يعملوا ليك فلاش باك للاصدقاء السابقين وللازواج السابقين وهم ايضا لابد من فلاش بك ليهم ايضا ..
Quote: وعلى كل حال زواج راجل المرة احسن من الزواج المثلى الخايف بكرة يظهر لينا فى هذا البورد من يتبناه من منطلق حضارى زى موضات فكرية كثيرة شائعة فى هذا المكان
في الصميم ياسيد ..انت مالك عايز يصنفوك رجعي وظلامي!
سمع اضاني يا لؤي في التلفزيون السوداني دا و في بداية التسعينات.. زمن التلفزيون كومر جيش.. زمن المشروع الحضاري و عرس الشهيد و العرس الجماعي.. جابو دقن كبيرة بتكلم عن الزواج.. قال شنو قال: أنا في راي حقو البنات يكونن واقعيات و ما يفكرن في الشباب الصغار لانو الشباب ديل يادوب بادين حياتم و تنقصم التجربة الواقعية .. و احسن البنات يفكرن في الرجال المتزوجين لأنهم عندهم سابق تجربة و ما بتهيبو الزواج.
قال تأصيل لتعدد الزوحات قال
عارفو كان بقول في الكلام دا ليه؟؟؟؟؟؟
06-08-2006, 05:56 PM
PLAYER
PLAYER
تاريخ التسجيل: 04-23-2002
مجموع المشاركات: 10283
يا بنات ونسوان البوردكدا ورونا مراة الراجل...كيف اصلوا انا والكاشف أخوي عندنا النية من أجل رد الاعتبار لراجل المرة حكمة اليوم اذا كان حلالآ للمرة راجل مرة تانية فحلالين للراجل مراة راجل تاني
06-09-2006, 02:32 PM
luai
luai
تاريخ التسجيل: 02-27-2002
مجموع المشاركات: 2251
Quote: قال شنو قال: أنا في راي حقو البنات يكونن واقعيات و ما يفكرن في الشباب الصغار لانو الشباب ديل يادوب بادين حياتم و تنقصم التجربة الواقعية .. و احسن البنات يفكرن في الرجال المتزوجين لأنهم عندهم سابق تجربة و ما بتهيبو الزواج.
(وجه ضاااااااااحك ) ياحافظ ياخي مالو تعدد الزوجات ياااخ ؟ مادام الواحد مقتدر وناوي العدل ؟ بعدين الشيوخ الكبار ديل كلامهم كلو حكمة ... عموما ياسيدي الحكاية الان ولا عايزه كلام شيوخ الحكاية الان على الجيب ومامهم لو معرس اثنين ولا ثلاثة ..
Quote: قال تأصيل لتعدد الزوحات قال
عارفو كان بقول في الكلام دا ليه؟؟؟؟؟؟
لييييييييييييييييييييييييييييييييييه ؟ اوع تقول لي عشان هو نفسو عايز لي واحدة ؟؟
06-10-2006, 03:36 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
احتمال الظاهرة دي في الخرطوم لكن عندنا في اهل العوض الحكاية غير كدا خالص صراحة أصبت باحباط وعقدة منها يعني كلما التقي واحدة واصارحها بانني متزوج تقوم جارية صوووووووف لدرجة انني عندما أذهب لمناسبة عرس بدأت اتفادى ذلك كثيراً علني أحظى بصيد ثمين من هذه المناسبة واذكر أنني التقيت فتاة في منتهى الجمال طبعاً زمان كنا بنقول في منتهى الأدب المهم الظاهر الغبيانة أعجبتها شخصيتي المتهالكة وبدأنا نتحدث عن المستقبل وانت عارف عشان الواحد يلمع نفسه شوية لازم يقول عنده شركة ومارسيدس آخر موديل وهلمجرا هلمجرا دي بتدخل فيها اشياء كثيرة بت اللذين دي اقنعتها وسال لعابها ونحن في غمرة هذه اللحظات الجميلة اذ يخرج ابني كالفار وياتي ليقول لي 00 باباأمي قالت ليك عاوزة ليها خمسة ألف للعروس قلت ليه : انعل ابوووووووك 00 بالله دي لحظات تجي فيها قال تواجب العروس قال
06-10-2006, 07:07 AM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
Quote: اذ يخرج ابني كالفار وياتي ليقول لي 00 باباأمي قالت ليك عاوزة ليها خمسة ألف للعروس قلت ليه : انعل ابوووووووك 00
يا ابوحراز عليك بكتاب الوصايا الحروز في الظفر بالعروس ولو كنت متزوجا لكن اخوي هوووي زي ولدك دا ابعده بعيد .. دا بجيب ليك الهوا وبخلي الوصايا كلها مافي صالحك .. والبيسأل ما بتوه ..
06-10-2006, 07:14 AM
Ahmed Mohammed Osman
Ahmed Mohammed Osman
تاريخ التسجيل: 10-10-2005
مجموع المشاركات: 1381
قصة والله وحكاية راجل المرة قال لكن احسن شي لانو بنات الزمن دا بقن دايرات القرش واحنا شباب الزمن دا اخر حاجة ممكن تكون عندنا القرش بالكمية المطلوبة دي عشان كدا ريحونا واهو لو سالونا ليه ما عرستو نقول ما لاقين
06-11-2006, 10:03 AM
luai
luai
تاريخ التسجيل: 02-27-2002
مجموع المشاركات: 2251
زمان راكب المواصلات من الثورة بالنص الى الخرطوم في الباص ركب واحد (عاقل) كان واقف في وسط البص ويصرخ ياجماعة القيامة قربت ياجماعة النسوان بقوا اكثر من الرجال ..ما مصدقني احسبوا النسوان كم في الباص دا ؟ ما مصدقني عاين عاين (كان يؤشر للطالبات في الصباح) اسه ماشين لينا نص ساعة مافي عشرة رجال في الشارع .. ياجماعة القيامة قاااااااامت ياجماعة ..لمن وصلنا الخرطوم ..
اها ياحافظ الزول العاقل دا عمل الاحصائية دي كيف ؟
06-11-2006, 04:35 AM
قرشـــو
قرشـــو
تاريخ التسجيل: 02-05-2002
مجموع المشاركات: 11385
Quote: وعلى كل حال زواج راجل المرة احسن من الزواج المثلى الخايف بكرة يظهر لينا فى هذا البورد من يتبناه من منطلق حضارى زى موضات فكرية كثيرة شائعة فى هذا المكان
الأستاذ سيد احمد خليفة
لك التحية
يسلم يراعك الذهبى سيدى كنت اظنك غائبا عن منبرنا هذا ولكن ملاحظتك اعلاه تدل على انك تقرأ السطور بعمق كبير
الله يديك العافية ...
الأخ لؤى
لك التحية
نفهم من كده انه عدد البنات فى تزايد حتى اصبحت الحكاية فيها مجابدة ولا كيف رحم الله شيخنا البرعى الذى وجه بناتنا بقبول راجل المرأة كحل عوضا عن التوحد الطويل..
ولكن أخى ماذا لو انعكس الحكاية وتغنى الشباب لزوجة الرجل مثلا ترى هل نقبل ذلك ؟؟؟؟
ولكن يحدث ان يتفق احدهم مع زوجة آخر ليطلقها ويتزوجها ...
فى الاسبوع الماضى كنت فى معية احدهم فى القنصلية لتوثيق صورة قسيمة زواج سمعت العجب هنالك وان البعض يطلق زوجات اخرين دون علمهم ليتزوجها
الدنيا دى حصل فيها شنو يا عالم ؟؟؟؟
06-11-2006, 09:23 AM
doma
doma
تاريخ التسجيل: 02-04-2002
مجموع المشاركات: 15970
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة