حاولت مراراً وتكراراً ان اربط بين الشعر والطب فلم اجد العلاقة وربما عند الدكتور معز الخبر اليقين ولكن لا ادري لماذا يحاول معظم الاطباء ان يكون الشعر ملاذهم !!؟؟ نعم بعض الاطباء يكتب شعراً وهنا صراحة اتكلم عن الدكتور عمر محمود خالد والدكتور معز عمر بخيت وهذا ليس من باب المجاملة رغماً عن مريخيتهم الصارخة .. ولكن وبكل صراحة اجدني متأرجح الرأي عندما اتحدث عن التجربة الشعرية للدكتور علي الكوباني .. نعم علي الكوباني ربما يحاول ان يتنصل من كلمة شاعر فيصبغ على نفسه الشاعر الغنائي اكثر .. ونعم ربما كتب الكوباني بعض الأغاني الجميلة والتي ربما رسخت في اذهان الناس إما للحنها او لكلماتها .. ولكن ..!!!! الدكتور الكوباني في الفترة الاخيرة اصبح يكتب الشعر الغنائي بصورة اراها مكررة بي صورة واضحة بل ويكتب بمعدل القصيدتين ربما في كل يوم .. فما من شاب انتج البوم غنائي إلا وكان للكوباني بصمة فيه وتوقيع لحني وكلمات .. حقيقة انا اشعر ان الكوباني يكتب بي إستايل غنائي واااااحد وصار محفوظاً للجميع .. فما ان استع لأغنية حتى وانني استطيع تميزها من بين الف اغنية ان كاتبها هو الكوباني .. فالكوباني ينتهج في جميع او معظم قصائده طريقة شعرية تبدأ بقافية ثم بيتين او ثلاثة بقافية مختلفة ليعود في البيت الاخير من كل كوبلي ليوازن قافية البيت الاول مع الاخير ( ما تسألوني دي إسمها شنو يا ناس الشعر انا ما عارفا .. ) مثلاً : كلك كلك كلك حلو ..انت الجمال في كل معنى تكملو يقوم يجي يقول ليك : لأنك ملاك ..خلقوك براك.. يا راقي يا اب طبعاً حلو .. كلك كلك كلك حلو ..
ومثال اخر اغنية علي كيفك ..
مثال ثالث اغنية بساط الريح ..
إذن معظم اغاني الكوباني على هذه الشاكلة وصراحة بعض هذه الأغاني تكون جميلة ولكن معظمها صار رتيباً ومكرراً بل ويمكن لأاي شخص ان يجاريه أو يكتب مثله ..
المشكلة الثانية التي يثيرها الكوباني هو محاولته لتبني بعض الشباب فيكثر من اعطاء هذا الشاب مجموعة من الاغاني متدثراً بثوب نصرة الأغنية التي يسميها شبابية فهاهو شخص لا ادري من ايت اتانا فيقول إنه احمد بورتسودان فيطل عبر الفضائية السودانية فيقدم لنا ثلاثة اعمال ركيكة وقبله ظهر طه سليمان في التلفزيون بصحبة الكوباني في سهرة تلفزيونية وتغنى بأعمال خاصة كلها للكوباني .. حقيقة الكوباني قدم تجربة ناجحة مع جمال فرفور وربما ساعد في ذلك الصوت الجميل لفرفور والقبول الجماهري منقطع النظير لهذا الفنان ولكن الكوباني ولظروف غامضة اختلف مع الكوباني وتضاربت الاقوال فمنهم من يقول كانت بسبب صلاح ادريس ومنهم من يقول انها كانت بسب ... و سبب.. وسبب... الكوباني صار حالياً كثير الظهور إعلامياً وكثير الكلام حول تطويره للأغنية السودانية مستخدماً نهجاً جديداً لتسريع اللحن والايقاع ليصير راقصاً إضافة لألحانه المتكررة التي تكون في الغالب على إيقاع السيرة .. الكوباني في الماضي كان قليل الإنتاج ولكنه يجود هذا الانتاج ولكنه صراحة الان يكثر من الانتاج ولكن وبكل اسف صار مكرراً .. فهل يتريث الكوباني قليلاً ام تاخذه الهاشمية فيواصل إصدار هذا النمط من المدرسة الغنائية ؟؟
دقيقتان بس والجرس حيدق وأول ما قريت عنوان البوست وقبل ما أدخله قلت عمر الفاروق ود العباسية حيأكل ليهو دقة جامدة من علي الكوباني ود الخرطوم غرب..تاني لما دخلت انشغلت بمعتز نظارة في ونظارة ما في وشنطة في مطبوقة وشنطة مافي وتي شيرت في الحالتين ودامة في حالة واحدة وما مطبوقة..والجرس دق.
05-28-2006, 02:33 AM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
عندي إلتهاب حلق ومصمم ما أبلع ليهو شيء غير البنادول والحمى بتاعته انت عارفه ودخلت في الموضوع لأن الدكتور علي الكوباني غير شاعريته الغنائية قريت ليهو قبل فترة رد على محجوب حسين، محجوب حسين في مقابلة صحفية رمي بكل أدواء السياسة السودانية ومشاكل السودان على جامعة الخرطوم كمؤسسة صنعت الساسة وأفسدت السياسة ولذلك لم يسعى محجوب حسين لدخولها بل تخرج من جامعات المغرب..وهسع ما بتذكر رد الكوباني. ولكن أولاد أقصد قصائد الكوباني ما بلعب فيهم وما بعرف ليهو قصائد غير ما يغنيه ترباس وقصائد قرأت أنه سحبها من فنان شاب وعشان كدا خفت على عمر الفاروق من الكوباني ذو الجثة العيدي أمينية.
أما أنت يامعتز صورتك المدبلة خلتني أظن أن الحمى طلعت في رأسي فمرة أشوفها صورة واحدة ولابس فيها نظارة ومرة أشوفها صورة واحدة برضو ولكن بدون نظارة ومرة بشنطة ومرة بدون شنطة ومرة جنبك بنت ومرة براك وأخيرا ظهرن لي الصورتين ولكن التي شيرت مختلف كله واحد مكتوب عليهو كلمة ولما العرق تصبب مني نسيت كل شيء وجاتني بردة وانشغلت بشيء واحد منو الإلتقط الصورة أو الصورتين.
هل اكتفي بالبنادول أم أديها سوبراكس يامعتز ياخوي؟
05-28-2006, 10:09 AM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
كدى نبدا بتشخيص كلامك الموجه لعمر رغم انو الشى لمن يمرق من نفسى تانى ببقى زى اعراض الملاريا عدم الرغبه فى الاكل رغم انك لازم تاكل حتى لو استفرقته. . المهم حاالخص ليك بانو اتوقع ان اسمع عمر الفاروق ده بعد كلامو ده محمول فى تابوت.. اليوم داك دكتور كوبانى ماحيخلى عمر الضحك يشرطو ده اذا قدر يضحك ولا يعمل ضحكو الهنا ده... .
بخصوص كلام محجوب حسين من وجة نظرى ممكن نحللو ... 1- اذا كان محجوب فُصل من الجامعه رغم تفوقوا.. 2- اذا فُصل من الجامعة بسبب تاخرو لاى الاسباب اهمال بالرغم من ذكاءه او اهمال ناتج عن (قلة نسبة ذكاء) 3- او اساسا لم يدخلها لاسباب عدم ايفاء الشروط او قد تم قبوله فيها لكن لظروف ماديه منعت من دخوله.. يلا بعد ده كل رد فعل ليهو تقيم براهو على حسب الحاله one or two or 3
كذكلك موضوع سحب الاغانى وغيره انا عندى عليها اعتراض كبير قد لاارمى اللوم على الشاعر فى الاول مثلا: لانو لايعقل ان يقوم الشاعر دكتور معز باعطائك قصيده انت غنيتها وصارت مثل اولادك -عادة المغنين والشعراء باطلاق هذا المصطلح .. اتى انا كمطرب حديث ؛اراد الشاعر ان يقوم بترويج القصيده من جديد من خلال اقبال الشباب من خلالى فيقوم بقلعها منك واعطائها لى .. صراحه اللوم هنا يقع على شخصى واراها عملية بعيده اخلاقيات فى ان اقوم بقبول هذا القصيده ثم ياتى ثانيا الشاعر الذى قام ببيع مبادئه من اجل الماده حيث تكون النسبه فى اعتقادى.. تروتسكى مطرب حديث 55% دكتور معز شاعر القصيده 45% وفى الحالتين انت الضايع استاذنا. .
حتى هنا انت برضو فى الحالتين ضايع..( عندي إلتهاب حلق- حمى طالعه فى الراس ده غير موضوع الغنا والشعر الاتقمصناهو.. ).. اوقول ليك بخصوص الصوره؛ الفوق صورة سنيرى واخى وحبيبى الدكتور والى الدين الذى له معزه لايعلمها احد.. الحمى دى فى اغلب الاحيان معناها انك ماشى على احسن ؛. . ولو قمت افتيت ليك اكتر من كده بقولو كلام تانى ولا بلحقك لى كوبانى. . فافضل اسال مولانا المعز..
وتبرى انت من الالم استاذنا..
ولى قدام انتو الا انا خلاص دربى مرق من البوست ده نتلاقى فى مكان تانى لو مادعت الضروره الحضور او اصبحت الاجواء خاليه من الغيوم. .
كاضافة ايضابخصوص متى يتحول الشعر الى اغنية اعتقدى اكثر من يستطيتع ان يتكلم فى هذه هو الاستاذ حمزه لانه من اكثر المغنين فى الوقت الراهن له المقدرة على تطويع القصيده القويه ان صح التعبير .. بخلاف التجارب التى يٌقاس عليها سابقا للبعض الفنانين امثال ابو السيد..
دكتورنا : ياخ اول شي ولدك ابو عمير ده شوف ليهو حل ..خوفو بي اي شي وقول ليهو البيشجع ارسنال بيودوهو النار ونجي للمهم :
Quote: كوباني لم يكتب الشعر ونحن طلاب لكنني أحد الذين تفاجأوا بأغنياته الجميلة
وحقيقة كوباني لا زال يقول بأنه ليس شاعراً إنما كاتب أغنيات
اهاااااااااااا ده الكلام البجنن بوبي طيب نحن في السودان عندنا كاتب الأغنية ده طوالي بنلصق ليهو اسم الشاعر وحتى في الشرايط بتلقاهم في كتير من الاحيان بيكتبو كلمات الشاعر فلان .. طيب لو عايزين نفرق بين الشاعر وكاتب الاغنية حا نفرق بينهم كيف وفي كتير من الاحيان انت بتلقا الشاعر مرات عندو اشعار قد تلحن !!!! وخصوصاً بعد تجربة الراحل مصطفى سيد احمد واللي خلت الناس تقول لو جبت ليهو جريدة حا يلحنها .. يبقا معناها ممكن اي شعر تكتبو يتلحن ويتغنى وده معناها ممكن تتحول إلى شاعر غنائي .. والدليل على كده يا دكتور اغنية شروق الإنت اديتا ليها فهي في رأيي قبل ان تكون قصيدة غنائية هي في الاول قصيدة شعرية ويمكن ان تتصدر قائمة ديوان شعر مثلاً ..
Quote: قاعد تشوف نانسي عجرم في دعاية الكوكاكولا وهي بتغني غنيتها المكسرة الدنيا؟؟؟
مغرم معجب أنا مش عاوزة إلا هو مشيتو همستو بتحرك قلبي جوة حد يقولو حد يحنن قلبو عليا أنا مكسوفة اروحلو واقلوا
بالله يا دكتور اسة الغنية دي مالا ؟؟؟ عيبا لي نحن نانسي دي ما بنرضا فيها وإيه رايك كمان دي النحن بنراهن بيها تقلب خارطة الغناء العربي بالجد يا دكتور كلمات تعبانة شديد ولصقوا ليها اللحن اها شفت نفس الكلام ده مرات الدكتور الكوباني قاعد يخرمج زيو ..يكتب ليهو خمسة اغنيات تقوم تلقا إتنين منهم زي مغرمة معجبة دي !!!!!!!!!!!
Quote: حتى أغنية كلك حلو بتاعة فرفور هي في الأصل أغنية لبنانية لا أدري هل اقتبسها كوباني أم توارد خواطر
يا ريت هنا توضح لينا اكتر يا دكتور أو تورينا إسم الأغنية والفنان لأنو اول مرة نسمع بي معلومة زي دي..
Quote: وتحيات واصلة لحبيبنا الرائع عمر محمود خالد
ولكوباني الجميل
ومعاك تحي الدكتور عمر خالد والدكتور كوباني ويا ريت الكوباني ينتهج نهج الدكتور عمر خالد الذي يغيب عن الساحة الغنائية فترة ثم يأتي بالروائع ..
05-28-2006, 09:17 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
وجدت نفسى يا عمر متسمرا أمام بوستك هذا طويلا بعد أن أكملت آخر مداخلة فيه. فمن تتحدث عنه هو إبن دفعتى على كوبانى.
على حقيقة من الذين يمكن أن تطلق عليهم فنان وشاعر حتى وإن لم يكتب الشعر. هذا إن كان الشعر إحساس ومشاعر رقيقة دفاقة تنساب الى من حولك كما ينساب العطر الجميل من زهرة يانعة.
على كوبانى( قبل أن تضاف له الألف واللام) كان يحب الفن ويعزف العود لدرجة لاأتخيل على وإلا فى يده العود.
أعرف أنه يحب الشعر ويكاد يحفظ معظم شعر نزار قبانى.
مسألة أنه لم يكن يكتب الشعر فى الكلية لا أحد يجزم بها ولكن يمكن أن نقول بأنه لم يكن معروفا كشاعر للعامة فى الجامعة.
وهذه النقطة لاتعنى بأنه لايكتب الشعر لأن الشاعر محمد بادى لم يشتهر كشاعر إلا فى السنة الرابعة طب فى الفترة التى كان فيها صديقا للشاعر نزار غانم وكانت لكليهما علاقة قوية بسفير السعودية ودالقرشى والمرحوم إسماعيل حسن. بل إنتاجه قل بعد مرثيته لاسماعيل حسن وبعض الناس ربطوا بين شاعريته بل حتى إلقاءه للشعر والشاعر إسماعيل حسن. وهذا نفسه فى تقديرى لايقلل من شاعرية ودبادى.
حتى الأبنودى بجلالة قدره قد سمعت شاعرنا الكبير محى الدين فارس يقرر أنه ليس بشاعر ولكنه يجمع شعر الفلاحين وينشره بإسمه.
وفى سهرة كان فيها ترباس مع كوبانى قال ترباس فى شكل دعابة : (كوبانى بلاقى القصايد فى جيوب الموتى) طبعا باعتباره أخصائى طب شرعى.
القصد أن أقول أن مولد شاعرية الشاعر لاتحدد بعمر معين هذا مع إثبات أن من يقرض الشعر يافعا يكون مجودا أكثر من من يقرضه بعد الثلاثينات.
أتفق معك فى أن الإكثار فى أى شئ يقلل الجودة وكوبانى فعلا يحتاج أن يقلل من العدد ليزيد من الجودة فى الشعر. أما شعر الغناء اليوم أصبح مجاراة للذوق العام وكيف تستطيع أن تحرك أرجل الشباب قبل أن تحرك مشاعرهم وهذا حقيقة لايحتاج لكبير عناء. ولكن أتمنى لصديقنا كوبانى أن يخرج لنا بأشعار تعيدنا الى عهد الأغنية الذهبى .
أما علاقة الأطباء بالشعر فهى ممتدة بامتداد الناطقين باللغة العربية. فهل تدرى ياعمر أن القدال كان أحد طلاب الطب حتى السنة الثالثة؟
ومن شعر الأطباء صدحت أم كلثوم بالأطلال للدكتور إبراهيم ناجى.
الحقيقة على زماننا كنت أعتقد أن أغلبية من فى الطب ضلوا طريقهم وكان أولى بهم كلية الآداب ولكن رغبة الأهل غلابة فى كثير من الأحيان.
05-28-2006, 08:10 PM
Dr. Moiz Bakhiet
Dr. Moiz Bakhiet
تاريخ التسجيل: 05-20-2004
مجموع المشاركات: 9044
الدكتور بلة موسى : تحياتي وشكراً على إثراء النقاش .. لكن كدي خلينا نكون واضحين شوية في نقطة محددة ومعليش إذا حا تلف البوست حبتين ولكن في النهاية حا ترجعنا ليهو .. صراحة يا دكتور بلة حسيت بيك وجعتك شوية مداخلة الدكتور معز لمن كتب :
Quote: كوباني لم يكتب الشعر ونحن طلاب لكنني أحد الذين تفاجأوا بأغنياته الجميلة
فزي حسيت بيك خليت الموضوع الاساسي وجيت عشان توضح النقطة دي وإن لم يكن حديثك مباشر للدكتور معز .. وانا هنا صراحة حا اكون في صف الدكتور معز لأنو قال هو ما قرا ليهو او سمع بيهو بيكتب الشعر خلال فترة الدراسة وعشان نكون واضحين يا دكتور لو الكوباني كان من النوع الذي لا يحب ان يخرج شعره للعامة لما رأيناه الان يبهل لنا هذه الكمية المهولة من الشعر الغنائي .. ما حا اكذب عليك يا دكتور وحا اقول ليك لي كل زول محاولات شعرية منها الخجولة ومنها الجميلة ومننا الزول البيكون عندو دفترو الخاص لكن صدقني طالما انك ما بتكون عايز زول يعرفو فطيلة حياتك ما بتخلي زول يعرفو لكن مش فجأة كده تطلع وتنقلب 180 درجة .. اتفقنا يا دكتور إنو الكوباني (اضافة الالف واللام هي الشائعة للعامة ) اصبح يكثر من الاشعار ودي هي نقطة خلافي مع الدكتور لأنو الكوباني بقا يكتب كتير دون الجودة لكن ده ما بيمنع إنو في خضم الشعر الغنائي الكتير ده بيكون عندو الشي الجميل ويكفي إنو من اجمل ما سمعت له هو بساط الريح على ما اظن وهي اغنية جميلة جدا كلمات ولحن ..
Quote: أتفق معك فى أن الإكثار فى أى شئ يقلل الجودة وكوبانى فعلا يحتاج أن يقلل من العدد ليزيد من الجودة فى الشعر.
تعرف يا دكتور دي اهم نقطة في الموضوع ودي الكنت عايز الناس تصل ليها او على الاقل تتناقش فيها وتذكر المحاسن والمساوئ من هكذا ظاهرة ..
Quote: الحقيقة على زماننا كنت أعتقد أن أغلبية من فى الطب ضلوا طريقهم وكان أولى بهم كلية الآداب ولكن رغبة الأهل غلابة فى كثير من الأحيان.
والخوف يكون العكس كمان حاصل ونلقا ناس الاداب كلهم مفروض يكونوا اطباء ضلوا طريقهم للاداب
05-29-2006, 03:02 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: قلت لى اى شخص يمكن ان يجارى الكوبانى ويكتب مثله ؟!!
اى شخص .. اى شخص ؟!!
ايوة اي شخص اي شخص.. انقري لي قلت ليك كده ؟
لأنو انا مثلاً اي شخص وزول ساااااااااااااي معاك كويس؟ يلا وما طالباني حليفة انا اسة حا انجر ليك قصيدة غنائية اسسسسسسسسسسسة دي بي نفس اسلوب الكوباني
حبيب الناس عني ما تسأل .. وتحرمني الشوفة يوم تزعل.. تعال وريني قول لي كيف الحل ..
**** غيابك طال فات كتير حدو .. عشان عينيك صبرنا بنمدو .. ونجم الليل بقينا بنعدو .. وما هاميك علينا تدلل .. وريني قول لي كيف الحل ..
**** يوم تشرفنا الدنيا تضحك لي.. وتتمسح احزان والدمعة في عيني .. ولو تعرف الحال لو تعرف البي .. حال ظاهر ليك لو بتتأمل .. وريني قول لي كيف الحل ..
**** ليه بتتعمد ديمة تنسانا .. ديمة طارنك مرة اطرانا .. قلبك المرتاح وقلوبنا تعبانة .. يا جميل ما تحن ليك بنتوسل.. وريني قول لي كيف الحل..
**** كل يوم بيمر ريدتي ليك بتزيد.. خالي قلبك ليه وحبي ليك شديد.. يا حبيب ارجوك تعال نتم الريد .. او تخليني في المحبة شهيد .. موتي في حبك يا جميل اجمل .. وريني قول لي كيف الحل..
تخريمة : هوووووي يا شباب ما تجوا تضحكوا فيني والله الكلام ده انا ناجرو اسسسسسسسة دي في كتابتي للمداخلة دي يعني ما تجوا تحللوهو لي وتقولوا لي عامل فيها شاعر و و و و .. وكمان لو فيكم زول بيلحن انا ما عندي مشكلة الأغنية دي تدوها لي محمد الامين أو وردي وبي المييت كده عثمان حسين
Quote: حبيب الناس عني ما تسأل .. وتحرمني الشوفة يوم تزعل.. تعال وريني قول لي كيف الحل ..
**** غيابك طال فات كتير حدو .. عشان عينيك صبرنا بنمدو .. ونجم الليل بقينا بنعدو .. وما هاميك علينا تدلل .. وريني قول لي كيف الحل ..
**** يوم تشرفنا الدنيا تضحك لي.. وتتمسح احزان والدمعة في عيني .. ولو تعرف الحال لو تعرف البي .. حال ظاهر ليك لو بتتأمل .. وريني قول لي كيف الحل ..
**** ليه بتتعمد ديمة تنسانا .. ديمة طارنك مرة اطرانا .. قلبك المرتاح وقلوبنا تعبانة .. يا جميل ما تحن ليك بنتوسل.. وريني قول لي كيف الحل..
**** كل يوم بيمر ريدتي ليك بتزيد.. خالي قلبك ليه وحبي ليك شديد.. يا حبيب ارجوك تعال نتم الريد .. او تخليني في المحبة شهيد .. موتي في حبك يا جميل اجمل .. وريني قول لي كيف الحل..
وحاة الرسول كلام زى العجب وسممممممممممممممممح !!
وتقول لى انك زول ساى ياوهم ؟!!
ياخ انت لو فكرت تبقى شاعر بتضايقنا فى اكل عيشنا خليك ناقد بس سمح ؟!!
أنا جبتا تلاتة أمثلة ومن ضمنهن كلام الشاعر الكبير محى الدين فارس.
وبعدين معز كشاعر كلامو بكون خطير فى كوبانى وكذلك الأستاذ محى الدين فارس فى الأبنودى.
ومعز مرة ذكر أن كوبانى سألو عن كيف يكتب الشعر ولمح له ضمنا بمحاولته كتابةالشعر.
بعدين ياابوعمير شوف كلامك دا:
Quote: فزي حسيت بيك خليت الموضوع الاساسي وجيت عشان توضح النقطة دي وإن لم يكن حديثك مباشر للدكتور معز .. وانا هنا صراحة حا اكون في صف الدكتور معز لأنو قال هو ما قرا ليهو او سمع بيهو بيكتب الشعر خلال فترة الدراسة.
وشوف كلام معز هنا:
Quote: كوباني لم يكتب الشعر ونحن طلاب لكنني أحد الذين تفاجأوا بأغنياته الجميلة
ماصحيح لأنو أنا وضحت سبب مداخلتى هو زمالتى بكوبانى والتى لاتخلو من المناكفات الجميلة لمدة ستة سنوات يعنى بعد تخرج دكتور معز وقلت أنه فنان وشاعر وإن لم يكتب الشعر.
القصد من مداخلتى ياعمر هو: إن كان بوستك القصد منه نقد تجربة كوبانى فيمكن طرح إنتاجه وتشريحه حتة حتة لتبين مواضع الجمال ومواضع الإخفاق وبهذا نبتعد عن كون كوبانى شاعر أم لا ولكن من عرض أشعاره سيقرر كل قارئ -حسب فهمه لنقدك وحسب قوتك فى تبيان مواضع القوة والضعف- إذا كان كوبانى شاعر أم لا.
أما مثالك الذى طرحته للأخت نادية فأعتقد سيجعلك كذلك شاعر غنائى لو لقيت ليك دريب للإذاعة والتلفزيون .
إضافة خارج النص أما عن الشاعر والمشاعر فالطيب سيخة شاعر ممتاز ولكن لايمتلك مشاعر تجعله يحس بعذاب إنسان فى دارفور أو أنة مسجون فى بيوت الأشباح. بل مشاعره لم تمنعه من صفع أساتذته فى الكلية لأنه أصبح فى السلطة وهم فى المعارضة. أضف للحساب محمد محمد خير الصحفى الذى يكتب أجمل الأشعار وعند الطلب.
05-30-2006, 12:38 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
دكتور بلة : شكراً للتوضيح والقصة والله ما غتاتا ولا يحزنون هو مجرد إحساس فبس توووشك قمت جيت كتبتو ليك .. ومعاك الحق في حكاية الورشة دي بس الكلام ده كبييير وكتييييير .. من الصعوبة دراسة الكوباني (الف ولام ) كظاهرة شعرية سواء كانت غنائية او للشعر وذلك ان الكوباني ليس كل ما يكتبه جميل كما ان ليس ما يكتبه قبيح .. كوباني يحاول ان يكتب الأغاني الخفيفة في العادة في حين ان القصيدة الغنائية ليست بالضرورة خفيفة !!! زاد الشجون قصيدة غنائية ..المرسال قصيدة غنائية .. بخاف قصيدة غنائية ..مع السلامة قصيدة غنائية .. المصير قصيدة غنائية .. ليه كل العذاب قصيدة غنائية ..والامثلة كثيرة . لكن الكوباني حتى القصائد التي يكتبها يكتبها بأسلوب واحد وربما يضاري الكوباني بعض القصائد باللحن فيخفي الكلمات بها .. عوض جبريل عليه الرحمة كان شاعراً غنائياً لكنه كتب اشعار يمكن ان يتم إلقائها في محافل ثقافية فهل نستطيع ان نلقي كلمات الكوباني في الإحتفائيات في صورة قصيدة ؟؟ كوباني ربما الطب غفر له كثيراً إضافة لمكانته الإجتماعية وعلاقاته الواسعة والتي حصنته من النقد اللازع أو الشديد اللهجة فنفس إستايل الكوباني ونفس مدرسته يقوم بها شاب يدعى هيثم عباس يكتب بنفس إستايل الكوباني ويلحن ولكن هجوم عنيف شنته وسائل الاعلام على هيثم عباس على انه واحد من الذين يدهرون الفن السوداني لأنه يكتب بكثرة دون الاهتمام بالجودة وفعلاً كان هيثم هذا من الاسباب الرئيسية في تدهور الفنان محمود عبد العزيز .. فلماذا يواجه هذا الهيثم ولا يتم مواجهة الكوباني بنفس هذه الشراسة .؟؟
05-30-2006, 01:39 PM
Balla Musa
Balla Musa
تاريخ التسجيل: 12-30-2004
مجموع المشاركات: 15238
وأتمنى أن ينضم للمتداخلين موصلى وتماضر وبدرالدين شنا وكل الفنانيين والشعراء بالمنبر.
طيب خلينى أكون صريح معاك. فمداخلاتى هنا غير محايدة فى حديثى عن على كوبانى. وطبعا دا شئ طبيعى لى كإنسان جاء من مجتمع قبلى فتجدنى أمجد كل الشعراء من قبيلة الأطباء. فاحمد فرح شادول وعمر محمود خالد ومعز وودبادى ونزار غانم وغيرهم وغيرهن موضع فخرى وتقديرى.
وأتذكر عندما كان معز يقدم برنامج فى التلفزيون إسمه أولاد دفعة على ما أظن كانت حلقة الأطباء أجمل حلقة لما كان فيها من أدباء وشعراء وفنانين من هذه القبيلة.
دعنا ياعمر نعود لبطل البوست كوبانى وأحاول الحيادية فستجدنى لاأتمنى لعلى كوبانى أن يتابع خطوات الأغنية العربية التى تابعت الذوق العام فى تدنيه ونزلت إليه حتى هبطت.
فليت كوبانى طور الأغنية كلمة ولحنا وأداءا بصورة ترقى بذوق المتلقى ولاتنزل له لاسيما وأغلب الشعب السودانى لازال يطرب للحقيبة وهى تشكل (الأصانصير) الذى يصعد به كل مبتدئ. ولكن هذا المبتدئ فور تغنيه بمايسمى بالجديد تجد حبال أصانصيره تقطعت وهوى فى بئر السلم.
ياعمر لو عايز تصل فى السودان صادق أهل الإعلام المقروء والمسموع والمرئى وكتر من الإبتسامات والهدايا (للنقاد) وستجد قصيدتك أعلاه إشتهرت وقعدت مع عتيق فى سرج واحد وبعدها أنفخ ولو حملك ريش . تحياتى
05-31-2006, 01:37 AM
banadieha
banadieha
تاريخ التسجيل: 02-04-2002
مجموع المشاركات: 2235
وياعمر الفاروق عشان ما بقدر أحانكك في رأيك في الشاعر على كوباني قلت أخوفك منه ولكن الظاهر أنا لخبطت في حق علي كوباني كمان ولذلك أعتذر عما ورد في مداخلاتي الإثنتين واللوم على وجع الحلق الإتعافيت منه أخيراً..والإعتذار للأخ المحترم الذي لفت نظري لذلك وللدكتور على كوباني وزملائه ومعجبيه ومواقفه المشهودة.
05-31-2006, 03:44 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: واللوم على وجع الحلق الإتعافيت منه أخيراً..
سحروووووووك وللللللللللللا ادوووووووووك عين ... وييييييييين .. يااااااااا ..سمير .. ورورووووووووووووووك حمد لله على السلامة يا زوج يا جميل .. وعليك بي زيت عافية فهو للصحة والعافية
10-03-2006, 10:47 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الأخ عمر الفاروق أحمل لك رسالة من الأخ الصديق عتى الكوبانى ( وما على الرسول الا البلاغ) قال ليك انو عرف بأمر البوست و دخل عشان يرد عليهو عن طريق أحد الأعضاء لأنو يرحب يالنقد الهادف و لكن وجد البوست لايستحق الرد علبه بكل أسف ( وبكل أسف دي من عندى) تعرف ليه؟؟؟؟؟؟؟؟؟؟؟؟؟؟؟ لأنو وجد انو 2 من ال 3 أغنيات التي استشهدت بها ليست من كلماته تتخيل؟؟؟؟ بالتحديد بساط الريح و عى كيفك ليس له علاقه بهما الا السماع و يرجو منك تحري الدقة حين تتصدى للنقد حتى يكون النقد موضوعى,,,,
والايام دى داخل لى دورة موسيقى عشان اقدر الحن كمان مالو الابداع دا حكر على زول بالمناسبة ياعمر امثلتك لنادية عثمان فيها جرس وموسيقى وقافتهها جميلة واحساسك فيها يخرج القرف من النفوس الهابطة وبروى الظمئان قبل الغيبة
يروى الظمئان قبل الغيبة وعشان روحى تلقى حبيبة اكتب وسطر انا بقرا ليك اكتب ولحن انا بسمك ليك لان حروفك تسعدنى بعد الفطرة ياحبيبى تانى بلقاك فى السهلة خلاص سوف اصير لك ملحن رايك شنو...بس شوف وليد طه دا زمان كان صوتو كويس او نا>ر الخليفة كان له دندنة جميلة ولقدام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة