|
|
 مبروك يا مناصير الإتـفاق
|
شايقي شايقي منصوري منصوري... اصلو مافي فرق.. والقاعدين يفرقوا بيناتنا شرذمة.. رهط..قليليين للمصلحة الشخصية قبل العامة..بعض الطمع بعض الجشع..بعض الهلع..خلوا المصلحة العامة فوق كل شئ..
.............
يعني قعدنا قبلنا.. يا كريمة أبشري. قمحنا بيجيك وشمارنا بيجيك.. وخرفانا بتجيك.وتمرنا بيجيك ويمشي عطبرة والخرطوم.. رطب في القفاف.. وناشف و( معوبس) في الشوالات... والبص من نوري قايم قايم.. والبوكسي من كريمة قايم قايم.. واللواري المسافرة وشاختة في الرملة قايمة قايمة وحس الطنبور فيها ومسوين ليها كوز.كوز دي حاجة بيعرفوها ناس اللواري..
........
يعني عادت مزعة اللحم الي أصلها في موطنها في طينها وفي بواديها البي تعرفا حجر حجر.درب درب.. عقبة الجابرية.. وكربكان.. وعقبة حوة.. والشكك قاعدات ممدات راجيات مناصير يمشو بي فوقن وهن يحمدن ويشكرن لى سيدن الخالقن..وادي اب سباع والعرفة وساني.ودي أم عون.. العيتنوب
........
يا قشيش هبج العيتنوب
فوق دريبن سافي الجنوب
ياكتل يا جيتا مرقوب
.........
يا قشيش رداح أم سني
فوقو تعل العيني قال دى
ناس فريقك يضحكوا بي
التقول ماجربوا الغى
............
يا قشيش هبج الكربكان
عوج ألبل وفقع الضان
داير اشوف قشو اللازمان
..........
يعني قاعدين قاعدين نعمر ونبني
..........
بس ما تقولوا لينا على مسؤوليتكم.. وتقعدوا تتفرجوا علينا من بعيد وتشمتوا فينا.. وتنتظرونا نفشل.. عشان ترجعوا تجوا تقولوا لينا..قبيييل ما قلنا ليكم لا.. الشمتان والشماتة ذنب.. والشمتان متقاعس.. والشمتان ناقص.. عشان مصلحة الوطن الكبرى..مدوا إيدكم معانا ساعدونا.. أدونا..تمونا.. الناس القدموا النصيحة ما يتخلوا عننا.. يواصلوا معانا في كل العقبات الجاية عشان النصيحة تكتمل لأنها يا دابها مولود جديد.يحتاج ينمو في نفس الإطار...لأنو هو طفل لحمو لين لسه ممكن يتأكل لأي حيوان مفترس متربص.قاعد منتظر..
..........
ما تقولوا لينا فصلوكم من إدارة السد.. البكر بي ميزانيتا..البكر بالمعونات المتدفقة..صاحبة اليد المسهبة في المصاريف والتصاريف..
فصلوكم منها وخلوكم لى ناس ولاية نهر النيل.. العجوز.صاحبة الميزانية الشتات الراجيها كل فرد من الدامر لغاية حدود الولاية.. لا ساعدونا من الشئ دا المتدفق الجاي للخزان.ما برضو نحنا ضحينا وأراضي السلوكة راحت مننا..
........
القرى النوذجية عايزنها أسوة بأخواننا البنيتو ليهم بيوت سمحة وبيضاء.. عشان ما يبقى بعدين ناس كدة وناس كدة..
.......
طريق الظلط الوصل الخزان مدوهو شوية علينا بي تحت موش بي فوق.عشان يعم حلال وقرىالمناصير.. عايزين نضوق الظلط في آخر عمرنا..
........
الكهرباء المجان شوية سنوات كدة لى قدام عايزنها..عشان ضحينا
.......
جامعة المناصير عايزنها
......
مجالات في التعدين والثروة السمكية ومشتقاتها
.....
ومستشفى زي الإتعمل جنب الخزان دا عايزنوا.. ياما ماتن بناتنا في الوضوع وهن ماشات على مستشفى مروي ومستشفى كريمة..العملية دي فيها أجر كبير خلاص..الفي إيدو القلم يحصل الأجر دا.. عمل جاري صدقة جارية دي.. الفي إيدوا القلم يحصل ويكتب ويلقى الأجر المسهب دا.. قبل ما ترفع الأقلام وتجف الصحف..
.........
وحاجيات تاني صغيرة صغيرة كدة تمدوا لينا إيدكم فيها عشان ننهض ونتب ونقوم..ونقوم كلنا مع بعض.. ونتساعد..
الرب قاعد وحاضر في كل لحظة وكل برهة.. عليه التكلان وهو صاحب الأمر والشان.. ولا فاعل لصغير الأشياء ولا كبيرها إلا الله...
|
|
 
|
|
|
|
منصوري
يحى الشريف
فيس بوك
تويتر
انستقرام
يوتيوب
بنتيريست