الحقيقة فن الأتوكيت واللباقة والإخراج صار يدرس في الجامعات وغدت له كليات خاصة.. لكن نحن في العالم العربي لسه بعيدين منو شديد.. بعيدين من أن نكون ناس عالميين.. ومهذبين في حركاتهم وسكناتهم.. حاجات كتيرة جداً.. حا نتناولها حبة حبة.. بتفرج كتير على القنوات الفضائية وخاصة السودانية.. قبل فترة في مؤتمر قمة.. والرؤساء قاعدين والوزراء.. ناس المؤتمر وزعوا أوراق أمام كل وفد.. ولاحظ المسألة على مستوى الرؤساء.. أكثر من رئيس طوالي ضرب يدو في خشمو وبلاها بي بزاغو.وبتركيز على الأصبعين السبابة والخنصر.زعشان يقلب بيها الورق الختوهو أمامو.. طيب يدك دي تاني ماحاتسلم بيها على الناس؟ اكيد حاتسلم.. ودائماً في مثل هذه الظروف قاعد تكون في عليبة صغيرة كدة فيها قطعة بلاستيك مبلولة برغوة كدة زي رغوة الصابون يستعملها الإنسان المتحضر بدل ما يضرب إيدو في خشمو يبلها بالبزاق.. أكثر من رئيس ووزير كرر الحركة دي.. ماعايز اجيب اسماء الرؤساء العملوها.. وبي قلبي قلتا العيب ماعلى الرؤساء العيب على الناس البي يجهزوا للمؤتمر. بس بعد شوية الكمرة لفت.. اشوف ليك قريب من كل رئيس في عليبة زي دي معمولة للمهمة إياها... ياخي خليك من دي.ز زمان بشوف في البنوك برضو في عليبة زي دي مختوتة على الكاونتر وامام الصرافين.. يدخل أصابعيو فيها بدل ما يضربا في خشمو.. ولمان المادة اللزجة تكمل شايف مرات يختوا فيها صابون.. بنك باركليز كان كل حاجاتو مستوردة من النوع دا.. هسه ماعارف بنوكنا في السودان بي تهتما بالحاجات دي زي العليبة دي والله لا.. ........ مجلس الوزراء السوداني.. نشوفو ليك في النشرة.. خاتين قدام كل واحد صحن فيه تمر قنديلة وفول مدمس.. الإجتماع شغال.. تلقا الناس شغالة في أكل التمر.. وواحد كان مشغول مشغولية شديدة والكمرة لافة مشغول بإخراج بواقي تمرة وفولاية من ضرسو أظنو مسوس.. وحاول وحاول ودخل أصبعو وبرضو ما طلعت.. وغيرو وغيرو.. إستنوا لسه عندي حاجات تانية..
06-29-2006, 03:06 PM
lana mahdi lana mahdi
تاريخ التسجيل: 05-07-2003
مجموع المشاركات: 16049
ها هاها. ........ إنت عارفة يا صحفيتنا القديرة لنا.. دائماً بي تجي مع علبة النظارة وريقة كدة طويلة الأمد لقش النظارة.. تتختا تحت بيت النظارة بعد تطبق النظارة.. بس يا لنا أنا لسه بشوف وبقرا وبكتب من غير نظارة... أها قلتا ليك السودانين طوالي الوريقة دي بي يشيلوها يرموها.. يقولوا ما بتنظف النظارة كويس.. ويبقى يقشوا بالشالات... وبرضو أول ما الواحد يشتري عربية أو سيارة في السودان.. طوالي يقلع مكيف السيارة يقول بيبوظ المكنة ..........
06-30-2006, 03:30 AM
منصوري منصوري
تاريخ التسجيل: 09-28-2003
مجموع المشاركات: 2504
ياسر عرفات الله يرحمو... كان مشهور بالحركة دي شديد.. اول ما يقسموا ليهم ورق المؤتمر..طوالي تلقاهو ضرب أصابعيهو في خشمو وشلاليفو ديك والعلبة الصغيرة على بعد سنتمترات منو المستخدمة لهذا الغرض... مع إنو هو خريج هندسة.. يفترض يكون خريج الهندسة دا زول دقيق .لأنو التعامل مع الماكينات والآليات بيعلم الزول الدقة.. بالمناسبة أنا إفتكر إنو الهندسة أخطر من الطب.. لأنو الطب إنت بتسأل مريض قدامك ويرد عليك يساعدك في تشخيص المرض.. لكن الهندسة إنت بتتعامل مع آليات صامتة. اي غلطة قاتلة..لكن المهندس المتمرس ممكن يعرف شكوى آلياته بأصواتها.. والأنظمة الحديثة الملحقة بالآليات التي تعطي إشارات معينة تنبه على شكوى العطل أو المرض... والمهندس بجميع تخصصاته ممكن يساعد في عدم انتشار الأمراض.. بتاع المجاري إذا خططها صاح.بتاع المعمارية إذا خطط مدينة صاح ورتب شوارعها وجعل فتحات للتهوية وشجرها وجعل أماكن لحرق الأوساخ والمخلفات.. وجعل شقق البناية سهلة التهوية..وضبط العددية التي تسكنها وتستغلها..وضبط جودة المياه فيها.. وقلل خطر الحرائق بالأنظمة الحديثة.. وغيرو وغيرو.. بهذا المستوى كان يمكن أن يكون ياسر عرفات رحمه الله دقيقاً لكنه لم يمارس الهندسة.. والعبرة بالممارسة.. عشان كدة شغلو كان هبتلي..شغال على كيفو في الأتوكيت.. ...... والله العظيم يا جماعة ورسوله الكريم.. أنا مالاقاني زول يجود فن الأتوكيت دا زي الأستاذ الأستاذ محمودمحمدطه.. في كل شي حتى وإن صغر.. في أكلو في شرابو في نومو في لبسو.. في معاملتو. في سلامو في حرارة إستقبالو للناس.. في جلستو على الكرسي.. في الحلاقة في غسيل الأيادي في المضمضة في المشي.. في فن مخاطبة الناس.. في محبتو للغبش..في الرضا بالله.. في الكتابة.. ودا الخلى كبار الأدباء والشعراء والفنانين يهيموا به.. ويكتبوا فيه الشعر والنثر.أمثال الدكتور عبدالله الطيب.. مفسر القرآن وعالم اللغة العربية الأوحد.وأمثال الشاعر الفحل محمد المهدي المجذوب.. والشاعر منير صالح عبد القادر..ويوسف بابكر التني... والأديب الأريب منصور خالد.. والقاص والراوي والكاتب الفذ الطيب صالح.. وصاحب التراث والموثق البديع الطيب محمد الطيب.. والعقلية السودانية الجبارة عبد الخالق محجوب.. والأديب والإمام العابد نصر الدين الهادي المهدي..والشاعر سليل الأنصار تلميذ الأستاذ محمود الشريف محمد أحمد البيتي..والسيد الإمام احمد عبدالرحمن المهدي الذي كان يحرص على شراء كتب الأستاذ أولاً بأول.. ولذلك الأتوكيت هبة إلهية تجري في دم الإنسان..
07-03-2006, 01:29 AM
منصوري منصوري
تاريخ التسجيل: 09-28-2003
مجموع المشاركات: 2504
في القناة الفضائية السودانية.. في نشرة الأخبار بتاعة الساعة حداشر..الإجتماع مدور بتاع مجلس الوزراء والسيد رئيس الجمهورية قاعد.. صحانة التمر القنديلة مختوتة فوق طاولة الإجتماع( نأكل ممانزرع) ومعاهو ( المررو) فول الحاجات.الفول السوداني.. واحد وزير مشغول بنفخ قشرالفول السوداني.. يعرك فيهو كدة وينفخ.. ليطير القشر ..زي ما بيعمل اي واحد مننا في شازع أمام ست الفول..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
منصوري
lana mahdi
فيس بوك
تويتر
انستقرام
يوتيوب
بنتيريست