أخخخخخخخخخخخخخ شخخخخخخخخخخخخخخخخخخخخخخخخخخ أخ أخ أخ !!!!!!! بعد يوم مضني وتعب وجري ورا المعايش والرزق تفتح باب البيت وأول كلمة تقولا : " يا سلاااااااااام ياخ البيت ده إختراع جميل خلاص بالله الفكر فيهو منو ؟؟".. ويا السرير جاك بلا ..
سودانيز أون لاين بقت مرضة عدييييييييييل كده والله والواحد مننا بقا بيشيلا معاهو البيت زيها زي بطيخة لنا مهدي .. بقت هم من هموم البيت يعني مثلاً أول ما تخش البيت الأهل يسألوك : أها الليلة ياسر الشريف كتب شنو ؟؟؟(لاحظ يقولوا ليك ياسر زي التقول بيعرفوهوا).. أو يلاقيك صحبك في الحلة ويقول ليك (إنت أساسي ده مالو مع بشاشا الليلة ؟؟؟)
الكلام ده كلو مدخل لي الموضوع الأساسي وهو الحالة الصعبة الوصلوا ليها بعض البورداب من هووس بوردي والواحد بقا البورد ومشاكلو تطاردو في أحلامو .. الواحد بقا يتخيل وشوش الناس عاملة كيف وصوتهم عامل كيف وياربي ده أسة بيكون لابس شنو وياربي فلان داك شغال من جهازو الفي المكتب ولا الفي البيت ووووو.. ويتطور التفكير ويقوم يتحوول لي تخيلات وأفكار تطرأ فجأة لكتابة موضوع أو الرد علي مداخلة .. أخر الصيحات هي الأحلام بي مواضيع البورد بعد ما كان الواحد كل أحلامو يكون سايق عربية أو سكن ليهو في عمارة كبيرة أو أو أو .. قررت فتح شركة تقوم بتفسير الأحلام البوردية وأي زول عندو حلم أو كابوس بيجيهو طوالي لازم يجي يحكيهو لي وانا إنشاء الله بوريهو هل ده فأل خير ولا حلم مزعج !!!
مثال بسيط : قابلت اليوم وبالصدفة عبد الرازق الطالب وبالرغم من إنو انا طوولت منو شدييد ما قابلتوا الراجل قبل ما يسلم علي قال لي بالله شفت تراجي كاتبة شنو ؟؟؟؟ أها بعد ما قلت ليهو كدي قول بسم الله يا أبورزقة وسلم علينا سلم علي وقال لي : تعرف انا أمبارح حلمان ليك بي بشاشا وياسر الشريف ديل في شكل كورة وانا لابس لي هدوم كورة وأشيل وأضقل بيهم في ميدان كبيييييييييييييييير وفيهو كشافات والجمهور يشيل ويصفق لي قال لي بضقل بيهم أظن ساعتين وفي النهاية توووووووووووووف شتهم في الشبكة ..
اها يا جماعة النفسر ليكم حلم الراجل ده ( دعاية لي شركتنا): أول حاجة ظهور كشافات في الحلم ده معناها عبد الرازق في طريقو للإستنارة وترك أفكارو الضلامية .. ظهور ياسر الشريف في الحلم ده معناهو إنو عبد الرازق ده زماااااااااااااان كان عامل ليهو عملة كبييييييرة وداسيها من الناس (كان كاتل ليهو زول ما بعرف !!!)وحاسي إنو الإنتربول بيراقب فيهو .. ظهور ياسر الشريف في أحلامك يدل علي أنك في خطر كبير يقودك إلي غوانتنامو .. أما ظهور بشاشا فصراحة دي غلبتني عدييييييييييييل كده لكن والله أعلم ده فأل حسن في الحلم إنو يجيك بشاشا !!!!!!!!!!!!!!!!!!!!!!
أها يا ناس أحلامي كتييييييييييرة والله وبجيكم بيها والعندو حلم يجي يقولوا..
تخريمة : أرشح الأخوان حسين ملاسي وصديق الموج للمشاركة في تفسير الأحلام ..
05-11-2005, 10:02 AM
almulaomar almulaomar
تاريخ التسجيل: 07-08-2002
مجموع المشاركات: 6485
الأخ عمر الفاروق شيخ الدين أنا كنت داقس وأفتكرت الحكاية خارج البود وخارج حدود المنتدى وتخيلت الأحلام جد عشان كده ورغم خروجي عن النص أسمح لي بذلك وحاول فسرلي حلمي ده وليك البشارة. كذب المنجمون ولو صدقوا رأيت في ما يري النائم أن هناك شجرة كبيرة أغصانها جميلة ناضرة تسر الناظرين يتحلق حولها نفر يحملون عصياً وفؤوساً - وعكاكيز – وهم في هرج ومرج وزحيح ووحيح فسألت أحد جمهور النظارة ما بالكم كأنكم حمر مستنفره ساكيها أسد فقال لي وإنت مالك الحشرك شنو ،فقلت له إن الحب ، فقال لي تحبك مقره فسألته من هي مقرة هذه أهي بكر أم ثيب أم عوان بين ذلك فقال لي ا أخي إنت جايننا من وين ، فقلت ليهو طيب إنت مستعجل ليه لازم تفهم سؤالي أنا لمن قلت ليك إنه الحب قاصد ليك حب الشمارات تقوم تجيب لي مقره وباربرا وناستاسيا وبالمناسبة مقرة د مثلت بطولة ياتو فيلم وكان معاها منو ؟ فقام صاحبي من الغيظ بكي وقال لي شكيتك على الله إنت بصرحة فايق وغياظ ومسيخ يعني أحسن منك هيد أند شولدر لأنه على الأقل إثنين في واحد وإنت تلاته في واحد كرهتني يا أخ عليك الله شتت. فشتت ما في جيبي من فول حاجات وتسالي فسأستل محدثي سكينا من ذراعة وبقر بها بطنه فأنتحر ، فنظرت خلفي علي أجد بنبر أو كرسياً و كنبة فلم جد غير لستك مدفون في الأرض إلى النصف في زاوية أو كورنر حتى يستطلع الجالس الغادي والرايح وسيد الرايحه زاتو ،فجلست في اللستك فإذا بشخص ينتهرني نهرة أشد من نهرة الدلال عندما يكون السوق حامياً، فقلت له ناهرني ليه ينهرك النيل الأزرق إن شاء الله وكلمه منو وكلمه مني تدخل البعض من الغوغاء وملأ أحدهم يديه رماداً وبسطها بيني وبين خصمي مردداً المديدة الحارة فقلت له دعها تبرد يا أخي ما تعمل لينا قلق.في أثناء ذلك سمعت طرقاً شديداً على باب الطوارئ في منزلنا وهو باب زنكي لا لون له ولا طعم يستخدم عادة من قبلنا أيام السينمات والحفلات والعوة المتأخرة في ساعات الفجر الأولى أو الأربعة أخماس الأخيرة من الليل وهو الباب البجيب الريح لذلك لم يكتفي والدنا أن يسده وحسب بل ذهب أبعد من ذلك بأن رتجه بعتله وبعض الكرور وشئ من حديد خرده ، وكان أقرب أن ينهار الجدار بإعتباره حيطه على أن ينفتح الباب ، أها في هذه الأثناء قومي يا الكهرباء ولعي أتاريها كانت قاطعة ونيست أطفئ النور قبل النوم ولأنني بايت القوى وجعان جوع شديد ولأن البيت أخوي من فؤاد أم موسي وفؤاد المهندس النوم جافاني ، أها قعدت في نص العنقريب وكابست لي كيس الصعوت ذات اليمين وذات البتاع ما لقيو أتاريهو جات هبو بالليل وخمت ليك كيس الصعوت والسفنجات والجريدة وعلى البلاعه عديل تووش الصعوت راح في موية البلاعه والكيس إتعطن والقوز جبالو إتناطن والبندر فوانيسو البيوقدن ماتن والسفنجات طفحن وأخبار الجريدة إتماصت. أها ده يكون من شنو بعدين لو فشرت لي الحلمه دي تفشير كويش من يوم الليله بسميك عمر الفشار وبجيب ليك كل أحلام الغبش في شوالات وكراتين بس الأولو شرط آخرو نور يعني توقع معاي عقد إحتراف لمدة عام قابلة للتجديد في تفشير وتفسير وتكسير وتطوير الأحلام الزلوطية منها والوردية على أن لايتعدي الحلم حدود المكان وجغرافية السودان وزمن الخريف.
نأم نأم نأم (نعم) إنت يا ولد هوووووووووووووووووووووووي أول هاجة تنومي كويس وتتغطي كويس .. حيييييييييييييييييييييييييييييييييييي!!! بسم الله بسم الله بسم الله .. تف تف تف تف تف أها نبدا يا ولدي : أولاً بالتبادي :
Quote: رأيت في ما يري النائم أن هناك شجرة كبيرة أغصانها جميلة ناضرة تسر الناظرين يتحلق حولها نفر يحملون عصياً وفؤوساً - وعكاكيز – وهم في هرج ومرج وزحيح ووحيح
مفسرون الأحلام العاديون كانوا حا يقولوا ليك طواااالي الشجرة دي معناها بورد سودانيز أون لاين وأغصانه الناضرة دي المواضيع قبل حرب دارفور أما النفر الكانوا شايلين العكاكيز ديل الجمهوريون وناس الغرب والشيوعية وحفنة من الكيزان وعدد لا بأس به من الأنصار يحملون الفؤوس !!! لكن نحن يا الملا نظرتنا للتفسير بعييييييييييييدة .. أول حاجة ظهور الشجرة الكبيرة في حلمك يدل علي أنك من الناس الكانوا لمن تجي الساعة 12 ظهر بتشيل كرسيك وتختو تح شجرة النيمة في إنتظار بنات الثانوي العالي إما ممسكاً بي مقص تحلق أو سيجارة بتبخبخ فيها .. ما تشتغل بي ناس الهرج والمرج ديل لأنهم شينين والجكس بيحتقرهم وكل الجكس كان بيركز عليك إنت ..
ودليل تفسيري هو الزول الجاك في الحلم وقال ليك :
Quote: فقال لي تحبك مقره
طبعاً انا قريتا مقرة بت عم علوة و ونسيبة سوبا رغما عن إختلاف الأحرف ..
Quote: فشتت ما في جيبي من فول حاجات وتسالي
تشتيتك للتسالي دلالة علي إنو الخرطوم نجحت كعاصمة للثقافة العربية وإصحاح البيئة وصارت عاصمة حضارية بعيدة عن الباعة المتجوليين وحاجات الفول .. المشكلة المحيراني إنو هل تشتيت الفول والتسالي كان بعد ما دخلت يدينك وطلعتهم ولا الفول والتسالي إتشتتوا بي تحت البنطلون لأنو في الحالة دي معناها جيب البنطلون مقدود وبالتالي ده كناية علي الفلس !!!!!!
Quote: فنظرت خلفي علي أجد بنبر أو كرسياً و كنبة فلم جد غير لستك مدفون في الأرض إلى النصف في زاوية أو كورنر حتى يستطلع الجالس الغادي والرايح وسيد الرايحه زاتو
لالالالا ما تخاف يا الملا عمر ميدان أبو جنزير ما بتجيهو عوجة والحكومة ما حا تنزعوا والليق باقي باقي والدافوري شغاااااااااااااااال ..
Quote: فإذا بشخص ينتهرني نهرة أشد من نهرة الدلال عندما يكون السوق حامياً،
طبعاً الزول النهرك ده انا شايفو في الحلم رهاب رهاب مرة مرة يجيني عبد الرحيم محمد حسين وبيقول ليك قووووووووووم يا الملا هووووووووووي انا عايز الحتة دي أبني فيها مبني لي وزارة الداخلية ومرة مرة يجيني المتعافي والي الخرطوم يقول ليك زح اللستك ده عايزين نستثمر فيهو ومراااااااااات يتقلب لي عوض الجاز عشان اللستك التحتك ده فيهو بترول ..
Quote: أها في هذه الأثناء قومي يا الكهرباء ولعي أتاريها كانت قاطعة
الكهرباء في الحلم فأل حسن يا الملا عمر سواء قاطعة أو شغالة لكن المشكلة هي هل الكهرباء بي كروت الجمرة الخبيثة ولا عداد عااادي ؟؟؟؟؟؟؟؟
Quote: أها قعدت في نص العنقريب وكابست لي كيس الصعوت ذات اليمين وذات البتاع ما لقيو أتاريهو جات هبو بالليل وخمت ليك كيس الصعوت
الصعوت في الأحلام هو إنشغالك هذه الأيام بالحرب الدائرة في دارفور ويبد أنك وطني غيور يا الملا عمر أما تفتيشك ليهو ذات اليمين وذات الشمال خطأ كبير لأنك ما فتشت ذات الشجون !! والصعوت دايماً بيكون هناك ..
Quote: أها ده يكون من شنو
ولا شي يا الملا عمر ما تخاف جاياك قروش كتيييييييييرة وبنطلون جينز وطاقية حمرا ومعجون سيجنال 2 وهبهان من مغترب صديقك وبيحبك .. نوم كويس وتاني أمشي بي الباب العدييييييييييييييل ...
05-11-2005, 10:40 AM
luai luai
تاريخ التسجيل: 02-27-2002
مجموع المشاركات: 2251
عمر الفاروق تحياتي ،،، اولا بركة الشفناك ( الصورة )- واؤكد لك اتابع معظم تعليقاتك اللطيفة احيانا وفي التنك في كل الاحوال اضحك (الدنيا فيها شنو ياسيدي)
اما حلمي الذي بحاجة للتفسير فقد رأيت فيما يرى النائم انني اسير وسط بحر عميق مظلم ولجي ... وفي هذا البحر عدد من السفن سفينة عليها علم اسود ( وهذه ترفع شعار تعنصر تعنصر تعنصر(اي كن عنصريا حتى الثمالة) ولديها رسم فيه(وجه عليه عظمين) وسفينة ثانية عليها علم احمر ( وهذه عليهاكتابات قديمة ممحوة بالجانب الايمن الاشتراكية - القطاع العام - ماركس - الدين افيون الشعوب - ولكن بالجانب الاخر شعارات جديدة - الديمقراطية - حقوق الانسان - العدالة - محكمة الجنايات الدولية وسفن اخرى صغيرة صغيرة تدور وتترنح يا عمر الفاروق ...تتخبط مع الامواج تعلو وتترنح سفينة ترفع الرقم 1593 وسفينة ترفع بندقية كلاشينكوف وسفينةترفع علم صغير مكتوب عليه كلمة استطعت تمييزها (علمانية) ...وسفينة مكتوب عليها (الاحلام) وسفينة مكتوب عليها (كنس الاسلام السياسي ) المهم يا عمرالفاروق يا عزيزي ... صحوت من نومي مذعورا على صوت نغمة رسالة على هاتفي وكانت تقول الرسالة : (انا في طريقي لملوط ..ساخبرك لاحقا بما رأيته وسمعته هناك) (يقصد حقل ملوط النفطي الذي سيدخل الخدمة في اغسطس من هذا العام )
فما تفسيرك لرؤانا ...اعزك الله
05-12-2005, 00:56 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي عمر ألم أقل لك كذب المنجمون ولو صدقوا ،أها آخر أصدقائي المغتربين المحترمين عند حضوره في إجازته التي تشبه تصفيات كأس العالم مرة كل أربعة سنوات قداني قد عديل كده الراجل يا أخي متسلف مني لغاية ما سافر مبلغ وقدره ناهيك عن المشاوير والواسطات والتحانيس والتعهدات لغاية ما إنقلع وشتت فشلت نفس عميق لمن قربت أبقي زي تجربة الجالون وأتطفق وألحق الصح ، ده كلو في مقابل فتيل ريحه مضروبه وقميص من تلك القمصان رخيصة الثمن وجزمه ون وي بو ماشيبيها مشوار بتاع واحد كيلومتر سيراً على الأقدام لازام تشيل معاك إسبير ، وشوية دروس في الفلسفه منها ، يا أخي الهدية مش بقيمتها المادية الهدية بقيمتها المعنوية ثم أردف قائلاً بصوت رخيم وإلقاء شعري جيد ولغة واثقة متمكنة : جَاءَتْ سُلَيْمَانَ يَوْمَ الْعَرْضِ هُدْهُدَةٌ أَهْدَتْ لَهُ مِنْ جَرَادٍ كَانَ فِي فِيها وَأَنْشَدَتْ بِلِسَانِ الْحَالِ قَائِلَةً إنَّ الْهَدَايَا عَلَى مِقْدَارِ هَادِيهَا لَوْ كَانَ يُهْدَى إلَى الْإِنْسَانِ قِيمَتُهُ لَكَانَ يُهْدَى لَك الدُّنْيَا وَمَا فِيهَا فأكلتها في حناني ورددت في سري داك سليمان نبي من أنبياء الله لا حكمتو الإنقاذ لا محتاج لي جاز لا بقيف في صف الغاز ووجمت ثم أجبته: طيب المغترب ليها شنو ما تجي تقعد معانا في البلد دي وأهديك جراده بس أو نمله أو ود أبرق وكمان بالمرة تدينا دروس عصر.
05-12-2005, 01:09 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
إذا كانت الأحلام بالكهرباء فأل حسن فإن أهلي قريتي أجمعين لم يحلموا أبعد من ضوء شعلة قبورة وهي تلك الدلقانه المعطونه في جاز ، على وزن عجوه معطونه في عسل ، وأكيد هناك فرق رغم إنو كلو عطن في عطن. أها ناس قريتنا ديل يكون حلمهم دا كابوس ولا شنو خاصة إذا كانت الرياح شمالية شرقية مصحوبة بجبهة هوائية باردة وإرتفاع الموج ولا دي ما داخله معانا.
05-12-2005, 08:03 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
..
almulaomar
luai
ALGARADABI
ناذر محمد الخليفة
فيس بوك
تويتر
انستقرام
يوتيوب
بنتيريست