|
|
 يوم الحارّة يوم الناس بيرجفو خوف... أحبّا المهدي شايلين سيف يجاهدو وما بعرفو الخوف
|
. . [qb]
أشوفك زهرة فى بستان أريجا يفوح و يملا الريف
أشوفك موجة بتصارع بقية الموج و تصل القيف
أشوفك شجرة وارفة و طارحة مادة غصونا واصلة الطيف
أشوفك فى عيون أولادك الفى سبيلك يشهرو سيف
أشوفك فى كرم و عطاء بغرّق ضيف
أحس بيك نسمة بترطّب ليالى الصيف
ليك أشواقنا تسبقنا و تعبّر كيف
وبيكا رؤوسنا مرفوعة وبيكا نقيف
***************************************
ويوم الحارّة يوم الناس بيرجفو خوف
احبّا المهدي شايلين سيف يجاهدو و ما بعرفو الخوف
رافعين راية منصورة و ترفرف بى نسايم أب روف
يكبّرو ليك
ويهتفو بيك
هتافاً من صميم الجوف
********************************************
ويوم الدنيا بتضلّم و تبقى ضلام
وناس شاكيين
وناس باكيين
وناس في خصام
وزول ما بهمّو غير قرشاً يزيدو حرام
يجيك أنصارى قايد قلبو للإسلام
حفيد مهدية ود أنصار شجاع ضرغام
عشان خاطرك و لي قضيتك تهون آلام
**********************************************
وراجعين ليك
وراجعين بيك
تجيبنا عليك
تضمّنا ليك
وبى أشواقنا مليانين
قدر ما نشوف بلاداً تانية غيرك ما بيملا العين
قدر ما نطوف نجوب الدنيا راجعين ليك يقودنا حنين
وندفن روحنا في ترابك و حرمانّا العصرنا سنين
نعوّضو بى عبير أرضك .. زلال مويتك من النيلين
******************************************
وراجعين ليك
وراجعين ليك سيوف النصر ناس آمين
ناس شايلين كتاب الله و بعزّو الدين
ناس بى شرعو محكومين
وناس في عزتك ساعيين
وناس من منهلك شاربين
ولو أرضك تكون عطشانة ... عطشانين
ولو أرضك تصير رويانة...رويانين
أهم ديلاكا أهل الصدق و الصادقين
*******************************************
وراجعين للبلاد الطيبة للسودان
بلاد ما بمسّها الشيطان
ديار المهدي سيد القبّة البتوهّج أم درمان
وراجعين لي حماك في كرري في شيكان
بلد بتترجم العزة و كيف بتكون كرامة انسان
نعمّر ليك و نزرع فيك نخليك فوق على البلدان
ونرفع يدّنا و ندعى و نقول يا ربّنا الرحمن
خلّى بلادنا دايماً رايدة دايماً أوّل الأوطان
ولو أفنينا كل أعمارنا دايرين نوفى ليك عرفان
ما بتكفّى ما بتقضّى لو زدناها بى أزمان
****************************************
[/qb]
|
|
 
|
|
|
|
|
| |
lana mahdi
Abdelrahman Elegeil
عمر ادريس محمد
نصار
فيس بوك
تويتر
انستقرام
يوتيوب
بنتيريست