|
|
 الشهيد ..أرملتة ..وخليفتة في أهله..حاج ود الممكون..أم المريود..والأجور المضاعفة!!
|
الشهيد ..أرملة الشهيد..خليفة الشهيد في أهله..حاج ود الممكون..أم المريود..والأجور المضاعفة!!
مسرحية من فصل واحد ومنظر واحد
حاج العجب: إنت آ حاج تمساح..الحاصل بينك وبين حاج ود الممكون شنو؟؟؟ما كنتوا زمان زي الأخوان.
حاج تمساح: والله حاج ود الممكون دا راجل قفا إيد وجاحد..أصلو الخير ما بنفع فيهو.
الكلام دا كيفنو يا حاج تمساح؟؟..ود الممكون دا الحله كلها بتشهدلو راجل طيب وضميرو أبيض..زول الله ساااكت.
حاج تمساح: الراجل خدمناهو خدمه ما كان يحلم بيها..بس طلع راجل خسيس وإيمانو مزعزع..حايم في الحله يدعي علينا ليل ونهار..وعلى الحرام أنا كان ما بعاين لي حق الجيره كنت غتست حجرو.
حاج العجب: خدمتوهو كيف يا حاج؟؟؟ وبدعي عليكم ليه؟؟
حاج تمساح: خدمناهو في ولدو..الشهيد مريود..مش نحنا الرشحناهو للجهاد؟؟؟؟
حاج العجب: لاكين آ حاج تمساح..الراجل ما كان عندو غيرو..ياهو وليدو الويحيد وضراعو..وهو الله يرحمة الكان شايل حاج ود الممكون وأم المريود..ما إنت عارف ود الممكون راجلا كبير وما عندو قدره على الشغل.
حاج تمساح: ياحاج العجب ما تبقي جاهل إنت كمان..إنت داير تبدل كوم التراب دا بالآخره؟؟ هسع بالله شوف حاج ود الممكون دا كان صابر صبر أيوب..وعلي شنو؟؟ المريود كان شقيان يومو وليلو وكان يا داااب جايبلهم حق الكسره والملاح..والمريود ذاتو والله هو ومرتو كانوا مرات بيتمو عشاهم بالنوم.
حاج العجب: والله آ حاج تمساح كلامك دا ما فهمتو بالحيل.
حاج تمساح: أسمع ياحاج العجب..أخير الصبر الآخرتو كسره وملاح وللا الصبر الآخرتو الجنه؟؟
حاج العجب: ودي دايرالا كلام ؟؟ أخير الصبر الآخرتو الجنه ..بس هسع الدخل الكسره والملاح في الجنه شنو؟؟؟
حاج تمساح : يا حاج العجب ماتبقي فهمك تقيل..حاج ود الممكون وأم المريود كان صبروا واحتسبو ياها الجنه عديييييل..ربنا عز وجل قال في كتابو العزيز ( وبشر الصابرين الذين إذا أصابتهم مصيبة قالوا إنا لله وإنا إليه راجعون).
حاج العجب : ونعم بالله يا حاج تمساح..بس يا حاج تمساح الوليد الراح كان في عز شبابه.
حاج تمساح: يا راجل ما تبقي جاهل..القال ليك راح منو؟؟ الولد شهيد..الولد ربنا عوضو دارا أخير من دارو وأهلا أخير من أهلو..ومرتن أخير من مرتو..كسبان أجر الشهادة وسبعين من بنات الحور.. وأمه وأبوه زياده على أجرهم العظيم على الصبر..برضو تاااااني كسبانين أجر شفاعتو ليهم يوم القيامه...أجور مضاعفه ياحاج العجب..أجور مضاعفه..وبرضو لا كتر خيرنا ولا بارك الله فينا...دنيا...ناس ما بنفع فيها المعروف.
حاج العجب : بس والله البنيه مسكينة إترملت وهي لسع سغيره.
حاج تمساح : والله يا حاج العجب أمرك يحير..يا خوي ماك شايف البنيه تحمد ربها مبسوطه وعايشه عيشه ما كانت عايشاها قبل؟؟؟ حرم المهر الدفعتوا ليها كان باعوك إنت وحمارتك والمبروكه ما تجيبو ربعو..والله عزها هسع مافي زيو..أرملة شهيد..وزوجة غازي.
حاج العجب: غازي؟؟ غازي الدخلو شنو؟؟دحين دا ما ياهو الكان وزير؟؟؟؟
حاج تمساح: وزير شنو يا جاهل....غازي دا أنا
حاج العجب: إنت آ حاج تمساح غيرك جبتك وكمان إسمك وللا شنو؟؟؟؟
حاج تمساح : إنت يا سجمان ماسمعت الحديث الشريف من جهز غاز فقد غزا
حاج العجب : والله آ حاج تمساح كلامك دا زي الغلوتيه
حاج تمساح : غلوتية شنو يا جاهل؟؟إنت شن عرفك بالدين؟؟خلوا العلم لى أهلو..غازى يعني البيمشي الغزو..البيمشي الجهاد..يعني البجهز والبيخلف المجاهد في أهلو برضو غازي..يعني مجاهد..فهمت وللا أفهمك تاااااني؟؟؟
حاج العجب(في براءة): إنت آ حاج تمساح..مادام الحكايه فيها الأجر دا والجنه وبنات الحور..إنت والجماعه مالكم ما مشيتوا؟؟؟
حاج تمساح: يا راجل ياجاهل..إنت قايل نحن القاعدين نسويهو هين؟؟؟ نحن كان مشينا البخلف الشهداء في أهلهم منو؟؟؟؟
حاج العجب (في براءة): أفو يا حاج..ونحن الكبار ديل مشينا وين؟؟؟ والله اهلم ووليدلتهم وحريمهم ما بنفرط فيهم تب..ووالله كان ما أكلناهم قبلنا ما ناكل.. أفو يا حاج والله ما ظنيت فينا خير..كيفن ما بنخلفهم في اهلهم وهم ياهم أخوانا ووليداتنا.
حاج تمساح : تخلف شنو ياراجل يا مكركب...والله إنت فوق حماره ما تقدر تخلف ( الخلف فوق الحماره هو وضع الرجل اليسري مكان اليمني والعكس أثناء الركوب) إنت كلامي دا كللللو ما دخل راسك..والله صح الجهل مصيبه.
حاج العجب (في براءة): خلاص آ حاج تمساح ما دام الحكاية فيها الأجر دا كله..رشحني عليك الله..بمشي متوكل ومطمن وعارفك ما بتدي المبروكه عوجه كان أنا ما جيت حي.
حاج تمساح(في غضب) : يا راجل أمش...أمش ولم شكلوتك عليك..إنت قايل الجهاد لعب؟؟؟؟؟؟
ستـــــــــــار
|
|
 
|
|
|
|
|
|
|
 Re: الشهيد ..أرملتة ..وخليفتة في أهله..حاج ود الممكون..أم المريود..والأجور المضاعفة!! (Re: Raja)
|
الأخت الغالية والصديقة الصدوق رجاء
لك كل الود والتقدير والتحايا العطرة
إعجابك بهذه الفضفضة شهادة أعتز بها..ويا ما في الجراب ياحاوي..بس بلاش تشجيع ..أخوك صاحب عيال..يصدق ويسوق فيها ويروح في شربة ميه.
لكن لو كنت من أول ما سجلت إكتفيت باللقب نايل ون..كنت شفتي العجب..بس طلعت درويش ودخلت بارم شنباتي..عالم جبانه...مش كدا؟؟؟؟بس يتهيأ لي أني ما جبان لكن تقدري تقولي خواف وطبعا المسافة بين الخوف والجبن بعيده..ياهو التفسير كدا..وللا أكون فسرت الماء بعد الجهد بالووتر؟؟...وخلاص كفايه ما تودوناش في داهيه
| |
|
|
|
|
|
|
| |
nile1
Raja
فيس بوك
تويتر
انستقرام
يوتيوب
بنتيريست