اعلن تجمع المعارضة السودانية انه يعتزم ترشيح زعيميه محمد عثمان الميرغني وجون قرنق لرئاسة الجمهورية والنزول في قائمة موحدة ضد مرشحي الحكومة في الانتخابات المقبلة، فيما كشف التجمع انه سيلجأ الى الشارع لخوض معركة دستورية ضد الرئيس عمر البشير من خلال تظاهرات شعبية كبيرة في كل مدن السودان. الكلام دا يا جماعة قالو حبيبنا وولدنا حاتم السر الناطق باسم التجمع .. دا شنو يعنى .. ما قالو نيفاشا دى قالت الرئيس مننا والنائب قرنق يعنى الميرغنى حينزل وين (جناح ) .. اها .. ايوا الكلام بعد الفترة الانتقالية لمن الشغلة تكون (open ) وبالجد انا ما عاوز اطمم بطنكم بكلام ساس يسوس دى لكن مرات كدا الناس بتجيب اخبار وتطلق تصريحات تخلى الزول يخش ويجى صادى تانى ... يعنى هسة بالله حاتم دا عاوز يقنع الناس انو تانى فى زول عشان الحكومة ولا المعارضة بيمرق الشارع و(بالدم بالروح نفيدك يا علان ) وين يا عالم الناس دى ساكنة ...الشعب السودانى بيقى مكجن كل الاحزاب وكل التنظيمات ياخ حتى فى الجامعات محل الاستقطاب والتجنيد والحراك والنشاط الطاغ اتخن تخين من قائمة اى حزب ما تجيب اكتر من (500 ) صوت وكانت بالغت كدا تجى (1000 ) زيادة يعنى بصين وحافلتين وتلاتة امجاد وديل اقل من الناس البيحضرو تمرين ما فيهو تقسيمة لفريق من فرق الدورى الممتاز فى الاقاليم ... طيب ... انسو دا كلو ... نمشى فى الخبر زاتو ونقرا : وشدد السر على "ضرورة تمثيل القوى السياسية في لجنة اعداد الدستور الانتقالي"، معتبراً ان محاولات الحكومة "ربط اعداد الدستور الانتقالي بنصوص اتفاق السلام المبرم بينها وبين "الحركة الشعبية" غير صحيح". وقال: "اذا قررت الحكومة التمادي في سياسة تهميش الآخر واذا لم يتحقق التمثيل المتوازن للقوى السياسية في لجنة اعداد الدستور فإننا لا نضمن رد فعل الشارع السياسي السوداني". ولوح "باللجوء الى الشارع ودعوة الشعب الى خوض معركة دستورية في مواجهة الحكومة عبر تنظيم التظاهرات وتسيير المواكب واستخدام سلاح الاضراب العام والعصيان المدني". وكشف "ان التجمع بدأ الاعداد لشن حملة واسعة بالتعاون مع كل القوى السياسية السودانية المعارضة (لحكومة) الانقاذ تنطلق من العاصمة الخرطوم وتعم بقية الاقاليم". بالله حاتم بى صحو .. ما مية مره الناس والعالمين قالت وقبال ما تجى اللجنة دى انو الحركة طرف فيها يعنى تلاقائيا التجمع الحاتمى دا مشارك ولو فرضنا انو ما مشارك دى تبقى مشكلة الحركة الشعبية ... لانها المفروض تدخل حليفها وتحرص على كدا لكن وكت قرنق باع التجمع و(ملحو ) الحكومة ذنبها شنو يشاركو ولا ما يشاركو ... وعليه من (المفروض ) انو حاتم السر يقول كلامو دا للحركة الشعبية وصحى جون قرنق كابى الزوغة من ناس التجمع وبيجى اجتماعاتهم (يلا يلا ) وبعد ما يعمل ليهو كم حركة كدا من شاكلة (يا ايدى شيلنى وختينى ) ودا كلو صحى لكن بالتاكيد حاتم السر ممكن يلقى اى زول من ناس (خط مية غرب ) التحضر الاجتماعات بتاعة التجمع ويقول ليهو الكلام دا بدل ما يشبكنا طلق وحرم وحنمرق البلد فى انتفاضة ونقلب البحر طحينة . ولا شنو يا جماعة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة