|
|
 الطريفى زول النصيحة .. الانقسامى !
|
طيب ... مساء الخير يا حبايبنا ... كيف الحال تمام .. شنو شايف لى كميات بيانات وبيانات مضادة تتعلق بحركة تحرير السودان مالهم انشاء الله ما عندهم عوجة ... سحروهم ولا شنو .. فجاة كدا ضربتهم انفولنزا الانقسامات وكومى وكومك وفرعى وفرعك صحيح من شابه اباه فما ظلم ، مش بيقولو كدا ... هسه الناس الزينا شغلتهم الاخبار ديل نعمل شنو كان شلنا ناس القيادة الميدانية ناس جمعه محمد حقار الطلع بيان هنا دا وقال انو الاستاذ عبد الواحد محمد نور (شلعوه ) وودوه الصالح النضالى العام كان اخدنا برواية ناس (حقار ) ديل تبقى مشكلة ويقولو لينا بكره دا زول (مشوطن ) وما عندو علاقة بالحركة ، خلاص نقول خير ونشيل البيان التانى القال انو البيان دا كلو (وهمة وقلبة فى شكل وردة ) من جهات مفتحه وعاوزة تخلق فتنه فى الحركة ... نكون برضو نحن معشر ناقلى الاخبار فى ورطة لانو الحدث يمكن يكون حقيقى ويكون فاتك الحضور والمواكبة ... غايتو مشكلة ... لكن فى ظنى المبسط كدا وبدون (فلفسة ) القصة بتاعة جيوش التحرير دا محيرة خصوصا فى دارفور كل يوم قيادات كدا كمية واى زول منهم ناطق ومتحدث رسمى وقاعد فى الاراضى المحررة ودى مساحتها كم ما معروف لكن كترة الناس البتقول انهم قاعدين وبيطلعوا بياناتهم من الاراضى المحررة دى معناها انو الحكومة دى قاعدة فى دارفور على السلك ود ابرق بس ...
وحيث اننا ناس بتاعين حيكومة وما (ناقشين ) ابو النوم فى حكاية الثوار والثورة (الحديقة ) دى ممكن يا اخوانا زول كدا (ثورى ) يفهمنا الحكاية شنى عشان نعرف راسنا من كرعينا ونحدد نشيل التصريح من منو ونعرف الخبر الاكيد و(قالو البطانه اترشت ) كان بطانة رفاعة ولا المناطق المحررة ..
وبالجد القصة محيرة لكن زى ما قلنا فى البداية يعنى ناس جيش التحرير ديل الناشطين فى دارفور والنت وعندهم سيولة فى البيانات دى ما زيهم زى كل الاحزاب والتنظيمات السودانية المسلحة والمملحة والمكسحة كلها جنها انقسامات بس الحزب من ديل يقول يا رحمن يا رحيم تووووووووووف يشوت ليك ربطة قيادات بره الميدان ما الشيوعيين مثلا بنقسموا لغاية هسه والاسلاميين انقسموا وحزب الامة برضو انقسم وكلهم العميان شايل المكسح منقسمين فليه ما تنقسم حركة تحرير السودان فى دارفور ... ما عادى وامر طبيعى وما غريب غريب الشيطان يا بابا .. يعنى هسة عندكم الاتحاديين ديل انقسموا لمن الحزب زاتو بقى عاوز ليهو مفتاح خريطة عشان تعرف مثلا مضوى ولا على السيد ولا الازهرى الصغير من ياتو جناح وليبرو وفردة باك .
وكدى النشوف اخرتا زى ما بيقول الاستاذ سعد الدين ابراهيم ، هو البلد والناس الفى بلد بقى وراها حاجة غير حركات العدل والتحرير دى ما السودان دا من يومو فقر والظلم بتاع ناس الخرطوم غطى الجبال والمساكين عشان كدا الاقدار حنت علينا ورسلت لينا ناس المناطق المحرره ديل عشان نروق المنقه ونعيش فى سبات ونبات ونخلف صبيان وبنات وهم عشان الغايات دى بيختوه قرض واى زول يفهق اخوهو ... واى زول بيقول انهم مش تمام دا زول حاقد وحسود وجنجويد وماجور و(راكب فيل ) زاتو واى خبر يتعلق بالجماعات ديل خبر مفبرك ومدسوس ... اى دينى وايمانى مدسوس ... اى ما الثورة متماسكة وهسه ادبياتها كلنا بنشوفها وبنقراها ... روعه فيها ادب لوركا ومنضالات واشتراكية جيفارا الحمراء وفيها شهامة الهمباتة والزقنديه ... اى انتو معمشين ما شايفين ادب الثورة جميل ومنطقى كيف ؟ عشان كدا اى خبر بتاع انقسام ما تصدقوه يكون (منجور ) فى الــSMC الله لا كسبها بس قاعدة مصاقرة الشمارات وزراعتها .
معليش زهجتو ... لكن يا جماعه انتو رايكم شنو ... بالجد كدا فى المسالة وانا (الطريفى زول النصيحة ) دا خلونى انتو رايكم شنو زى ما بتقول عفاف حسن امين .. اها رايكم شنو .
|
|
 
|
|
|
|
|
|
|
 Re: الطريفى زول النصيحة .. الانقسامى ! (Re: محمد حامد جمعه)
|
| Quote: تور فحل الجواميس الرقادن لخ |
تور "بـَـقَـــر" الجواميس الرقادن لخ.
غير دي والله ما قريت حرف في موضوعك ده .. لكن حاقراه يا استاذ.
بس حرقتني دي أكتر من اي شيء تاني. عليك الله أنا مش فارغ وفاكي الدرب ..
أو فاكي البيرق ذاتو؟.
| |
|
|
|
|
|
|
|
|
|
Re: الطريفى زول النصيحة .. الانقسامى ! (Re: Shinteer)
|
الأخ محمـد،
الحكايـة وما فيهـا عمل رجال ضــد حكومـة الحركـة الإسـلاميـة الفاسقــة، الليلـة يختلفـوا بكـرة يتفقـوا، ناس حاقدين ينشــروا عنهـم الأكاذيب.. دا كلو فى ظروفهـم دى عادى، فما توجـع راسـك بيـه.. المهـم بكرة حيجـروا حكومتك من راسهـا وكرعينـا لى نيفـاشـا ويمسكـوا أبهام على عثمـان ويغطسـوه فى المحبـرة وبعـد داك يضغطـوه فوق وثيقـة الإستسـلام، ويقولوا ليـه لو شفت الكمـرة أبتســم وأرفـع يدك فوق بالوثيقـة!! ولو مشيت أودتك فى الهوتيل بعـد أبكى على كيفك.
بعـدين راى ليك.. أنت صحفى يا أخى.. ليـه ما تمشى للناس ديل تأخـذ الخبـر منهـم مباشــرة.. موش الســودان دا أمن , و الحكومــة ما قاعـدة فوق سـلك ود أبرق، وإنما فى سهــلـة بطول وعرض الســودان؟!!
| |
|
|
|
|
|
|
|
|
|
Re: الطريفى زول النصيحة .. الانقسامى ! (Re: أبوالريش)
|
ابو الريش شنو يا مان شايفك (ملصت البدل والقمصان ) ... عاوز تترس بحر النضال خرصان ولا شنو ..
اسمع نحن بصمنا قدام الكاميرات ولا وراها خليهو ابقى فى ناسك البيجو يبصمو لينا ونحن زى ما بتقولو معولقين وحالنا بالبلا
| |
|
|
|
|
|
|
|
|
|
Re: الطريفى زول النصيحة .. الانقسامى ! (Re: Shinteer)
|
قرأت الموضوع ووجدته عن حركة تحرير السودان التي لا أعرف ماهيتها. إن كان هنالك انقسام داخل هذه الحركة فاتمنى لها المزيد من الانقسامات والبلاوي المنيلة .. وإن لم يكن بها انقسامات .. فأتمنى لها انقسامات. تحرير السودان قال. والله كلام. يا ربي السودان ده لسع مستعمرة بريطانية؟.
| |
|
|
|
|
|
|
|
|
|
Re: الطريفى زول النصيحة .. الانقسامى ! (Re: عمر الفاروق شيخ الدين)
|
السيـد محمــد حـامـد جمعــة،
نعـم وضعت صــورة الشهيــد محمــد عثمـان حامـد كـرار.. أشــرف من كل الإســلاميين، فرادى وجماعـات.. وهى بدلـة عسكــريـة.. ولكن دعنى أقول لك، أننا سـوف لن نقاتل الشــرفـاء من الجيش الســودانى الباســل، ولكن ســوف نلقطكــم منهــم كما كنت تلقـط الحصحـاص من البليلــة
| |
|
|
|
|
|
|
| |
محمد حامد جمعه
Shinteer
فيس بوك
تويتر
انستقرام
يوتيوب
بنتيريست