|
|
 خبرات سودانية خارقة ..
|
لعل الكل انتظر حديثاً من مثل : تمكن المهندس السوداني فلان من التوصل لإكتشاف ...
أو طبيب سوداني يتمكن من اكتشاف دواء لـ.....
أتحدث هنا عن الخبرة الساكت دي .. زي شنو مثلاً .. زي خبرة حفر القبور !!
وبينما المعاول تتعالى وتتهاوى .. والوجوه يكسوها ذلك الجد المفتعل وربما الحقيقي .. تتعالى بعض أصوات الخبراء .. يا جماعة وسعوا بهنا .. أحفر شوية هنا .. كدي ناولني الأزمة دي ..
نكتسب في السودان خبراتنا بالتقادم .. يعني كلما مرت عليك سنة سودانية كاملة إزددت خبرة كدا ببلاش في أي شئ .. ومافي إمتحان ..
ويحق لك وأنت تعدل عمتك .. أن تهزأ بشباب الزمن دا .. وتترحم على الزمن داك .. وجزء منك يهزأ منك .. إذ تعي أكثر من غيرك ما كنته في الزمن داك ..
ويعجبك هذا الستر الجميل من السنين ومن الكثافة بينك وبين الزمن داك .. مافي زول عارفك .. والكل يحترمك .. لخبرتك المكتسبة من زمنك المتفلت منك ..
ويمعن البعض في بيان خبرته هازئاً .. يا بني نحن عمرك دا قضيناهو ... تحت الحيط . بالله دا كلام دا . يا لها من خبرة .
أعجب كذلك من خبرتنا في الاحتفال بنسبة الأشخاص والأشياء إلى سودانيتنا العجيبة .. السادات حبوبتو سودانية .. عبلة كامل .. عندها عرق في وين ما عارف ..
وأنا لمن كنت في كوالا لمبور ..
ووجدت في المنتديات من مكارم الأخلاق والصفات ما فاق حد التصور .. ياخ ما أكذبنا ..
إنتو البتتكلموا عنو دا ما السودان داك ذاتو ؟؟؟
في حاجة ما نعرف نعملا ؟؟ نقد الذات .. ما بنعرف نقول إننا ورا .. ورا شديد
بنستعجل الحاجات .. أي واحد مننا مستعجل .. هسع أنا مستعجل في الكي بورد دا لامن ما قادر أركز في الكلام البقولو دا ..
والواحد فينا يكورك في الحافلة وينهّر في السواق .. عشان يصل البيت يخش ليهو في عراقي ويطلع كرسي يقعد بيهو قدام الباب ..
دايرين الحاجات ساهلة وباردة .. في المغتربات يشيع البعض أن السودانيين من شدة ما كسلانين عندهم مدينة إسمها كسلا ..
وما أسرع أن ننتفش منكرين هذه التهمة بصفتي فرد من النوع السوداني - ميلاًبكل ما أوتينا من عصبية وتعصب ..
وأكتشفت لاحقاً في نفسي- للكسل والترطيب وأدركت أن السخاء البيئى الذي نولد فيه من أرض حدادي مدادي وموية هبطرش كل ذلك بتدي إحساس بأنو مافي مشكلة .. والأمور ماشية
وعلى ذكر ماشية ومشى ومشّي في صيغة الأمر .. ياخ الكلمة دي قاعدة تقتل في نهايات الأشياء السمحة .
نعجز في كثير من حالاتنا عن الصبر في خواتيم الأشياء ونكلفت الأشياء في نهاياتها .. استعجالاً للنتائج واستجابة لكثير من النصائح من شاكلة ياخي مشّي .. يا جماعة الحاجة دي كفاية .؟؟ والله ما كفاية لاكين بتمشي .. ونواصل
|
|
 
|
|
|
|
|
|
|
|
Re: خبرات سودانية خارقة .. (Re: hameem)
|
خلونا نشوف مواطن عرينا لنسترها ومواطن الضعف فينا لنقويها ..
شغلني لزمان الأثر الأنثوي في توجيه سلوكنا كذكور .. في الجامعة .. في الشغل .. في الشارع .. في المنتديات .. في الإنترنت ..
ووجدت أن الموضوع من الطرافة بحيث أنه يدعو إلى الضحك ..
شوفو معاي دي .. على أيام الصبا الباكر ..أحببت بنت الجيران وصنعت لنفسي ذلك الوجع اللذيذ ودخلت في الحالة تماماً ..
وملكت علي البنوتة - على عاديتها في مقاييس ما بعد - عالمي المحدود آنذاك ..وفي يوم طفولي صافي .. وبينما أنا في الشارع إذ أطلت المحبوبة من باب بيتهم ووقفت في خشم الباب ..
إرتفعت درجة حرارة الإنفعال لدي .. وبلهاث وأنفاس متسارعة قررت أن الموقف يتطلب إبداء بعض ما يلفت النظر .. فقلت لرفيق كان معي . بتعرف تعمل الحركة دي .. .
والقصد أن تري البنوتة العبد لله ومهاراته الحركية .. وهوب .. بب ..
شنو يعني .. بتضحكوا ليه .. آآآي .. دقيت الدلجة دقة العدو .. وطفقت أنفض عني غبار المحاولة ورفيقي .. أغمي عليه من الضحك .. وما بقول ليكم ما فعلت البنية ..
| |
|
|
|
|
|
|
|
|
|
Re: خبرات سودانية خارقة .. (Re: hameem)
|
أم نحكي عن الإنجازات السودانية في المسائل الكروية ..
دا وجع كبير .. وعجيب والأعجب منو .. أن لكل ذاك صحافة رياضية وصحفيون رياضيون .. وبرنامج الرياضة.. وعمم وجلاليب ..
غايتو زمان قبل الفضائيات التي أنارت حوالك هذا العالم .. كانت الأمور بتنطلي علينا.. كورتنا وفريقنا القومي ..
قوموا بلا قومي بلا قومهم . ياخ الرياضة دي ضروب وأنواع شوفوا لينا أي حاجة ثانية فبلا شك هنالك من الرياضات ما يناسب الزول السوداني ..
وإلى ذلك الحين . رجاء تحويل كل الميزانيات وكل المساحات المخصصة لكرة القدم .. إلى شئ أكثر نفعاً
تعالوا نشوف التمثيل :
ــــــــــ
والله باستثناء بعض الشباب من أصحاب المواهب الفردية هنا وهناك .. فالساحة تخلو أو تكاد من كل ما يمكن وصفه بالعمل الفني ..
وما بنخجل ياخ من المسلسلات فائقة البياخة والبوخ التي نبثها في الفضاء دي ؟؟ ومتى يدرك الهادي الصديق دا إنه لا حظ له البتة - بعد كل ها العمر الطويل في الهراء - في التمثيل ؟
وأحسن يشوف لو شغلانة ثانية .. لا نصوص لا تمثيل لا إخراج
والواحد تلقاهو عرقان ومكرفس وشو .. يعني الود داخل في الدور .. قوم بلا دور بلا دورين ..
ونواصل ..
| |
|
|
|
|
|
|
|
|
|
Re: خبرات سودانية خارقة .. (Re: hameem)
|
أخي hameem
فعلاً نحن قوم يقودنا حشاش بدقينتو إلا من رحم ربي وما أبرئ نفسي من الحش قاعداً أو منبطحاً حتى لو أتت جليت على دقني ، لكن وبحمد لله تغير الكثير من ذلك الخدر والكسل بفعل السفر والإغتراب والبهدلة وبخاصة في أوروبا. ولي عودة إن شاء الله
| |
|
|
|
|
|
|
| |
hameem
almulaomar
فيس بوك
تويتر
انستقرام
يوتيوب
بنتيريست