|
|
 على الطلاق
|
على الطلاق
يا ولد ... جيب معاك الابريق بتاع الموية دا واغسل لخوالك ديل ...
اسمك منو يا جنا ؟ ... اسمى عبده ... بتقرأ سنة كم ؟ .. بقرأ سنة خامسة ... ما شاء الله .. اديك الصابونة يا حاج؟ لا ما محتاج لصابونة نحن كنا بنغسل ايدينا بالتراب ساااكت يا ولدى ... الا الفلهمة خلتنا نجرى ورا العطرون .. وزيت السمك الناشف ... اها يا ولدى قلت لى اسمك منو ؟ ... يا حاج ما قلت ليك عبده ... اهاااا اعذرنى يا ولدى اصلو خالك بقى نساى خلاص ... يوم داك مشينا مع خالتك لمحل الدهب انت عارف يا ولدى خليتا ليك جوة المحل ورجعت البيت ... دة كلو من الكُبر ... اها يا ولدى عندك اخوات ؟ ... ايوة .. متزوجات ؟ ... لشنو داير تتزوج واحدة ؟ .. لا ما كدى لكن بسأل ساى .. اصلاً ما فيش حيل للعرس تانى .. الجيب فاضى وبنات الزمن دة دايرات العديل والزين ... قلت لى بتقرأ سنة كم ؟ ... يا حاج غسلت ايدك خلاص ؟ ... مالك يا ولدى اتضايقت من كلامى دة ولا شنو ؟ .. اصلو عمك خرّف ... اها قلت لى امك اسمها منو ؟ .. شوف يا حاج انت مالك ومال امى ؟ .. داير تعرسا برضو .... امسك الابريق دة اغسل جضومك دى ... ولحدى هنا كفاية ... يا ولد ما تكون اتضايقت من كلام عمك الخرفان دة انا بس بدور اونسك ... ولا تونسنى ولا حاجة انا ما فاضى ليك ...
والله يا حاج فلان طولنا خلاص من الونسة السمحة دى ... الله يديك العافية ... لكن ما قلت لى ما عندك لى بت سمحة كدى لى ولدى دة ؟ ... افو يا حاج احمد دة كلام ؟ ... كمّا ناسبتك اناسب منو تانى ...لكن اول حاجة اعرض الامر على ولدك يمكن ما داير يناسبنى ولا يكون عنده زولة تانية رامى عينو عليها ... افو انا ولدى يرمى عينو على واحدة غير ما يشاورنى ؟ ! ... يرميهو فوق سايفون ود الحسين .. لا يا حاج الكلام دة كان زمان يعنى الاولاد اليومين ديل شوية كدى ما زى زمنا داك ومفروض نحن نقرأ افكارهم كويس عشان الحياة بقت صعبة وما نتخذ اى اجراء تعسفى يكون على حياتنا كلنا بالويل ... شوف يا حاج انا بنادى الولد دة وبشوفو ليك وما اظنيتو يخالف امراً لى ... اها يا ولد رائك شنو فى بت عمك دى ؟ .. والله يا حاج انا داير اقرأ وبعد التخرج بفكر فى طريقة تكوين نفسى حتى الزواج دة اخر حاجة ... يا ولد انت قليل ادب ... انا ربيتك كدة ؟ .. وعلى الطلاق تتزوج البت دى ورا عين ابو اهلك ... وما فى رجعة من كلامى دة ...
عليك الله شوف ابوى دة !! ... البت شينة وعيونا دقااااق زى عرق الجلابية ... ومنفخة زى شوال العيش ... وفوق دة كلو بتشبه لى بنات نسيبة فى الدفاع الشعبى ... دايرنى اعرسا !! .. اريتا ما عرست كلو كلو .. زى الكديسة ... مالك يا ولدى شايفاك مهموم كدة ؟؟ ..
اقول ليك شنو يمة ... ابوى دة اذا قال داير يعرس لى بت شينة انتى بترضى ؟ ... لا ما برضى فوقك خالص .. خلاص هسع هو جبرنى اعرس وانا ابيت ... ما تعرس كلو كلو واليحصل يحصل ... لكن يمة بس .. بس شنو يا ولدى ؟ ... بس هو قال انتى طلقانا اذا انا رفضت .. وحلف بالطلاق اعرس البت دى ....
ووب علّى الليلة ... الليلة ما اترمدتى واسجمتى يا ام الطفش قبال عرسو ... وانت سويت شنو هسع ؟ ..
انا ابيت البت ... وبالمناسبة انتى طلقاااانة يمة ...
عليك الله يا ولدى عرسا عشان امك ما تطلق ... والله لا بعرسا ولا شئ ... اطلّقى طوالى ... هو القال ليهو يحلف بالطلاق منو ... خلاص رجع لى لبنى يا شقى ... لبنك دة اصلو حليب كانى 
|
|
 
|
|
|
|
alfatih
فيس بوك
تويتر
انستقرام
يوتيوب
بنتيريست