|
|
|
 Re: من كان يعشق مصطفي.. فان مصطفي قد مات.. ومن كان يعشق فن مصطفي .. ففن مصطفي حي لم يمت.. (Re: rani)
|
وهذه سلامات أزهرى محمد على
فتح الجسد باب الخروج للروح
ولج من سم الخياط للطين
بنت قندول شتتناهو في البلدات
ولمناهو في زمن الجفاف محصول
كأنو الأرض مافصّد وشيها لحد
ولا بدت الخليقه الموت
ولا انشق الأديم لي زول
مرق فد زول
أمناهو سر القول وسمناهو
ود سيد أحمد المقبول
وقدمناهو لي قدام
براهو كان الولي صاحي
وكان في الحضرة كم درويش
بلد في حافة الهدام
ونحن نيام
علي حد الفجيعة نيام
كل ما نعبي الخاطر بالاحلام
نرجع منكسرين ومحتشدين للآخر بالالم
وانت كأنك ما صدقت تباعا نسقط
أو نتراجع عام ورى عام
ولا صدقت نسيبك وحدك
واقف أعزل وراهن امرك للايام
وانت بتطلع من احزانك ورده وقنديل
طاوي النيل في عبك وطالع … طالع للمملكوت
كنت تدندن آخر نص لحنته تشرح سر الغنى للموت
خصمناك بي حق السقيا وانت الضارب عرقك عرق المويه بلا حدوت
توضيت بالنيل وقفت في ذات اللحظة وقف محمود
وصلى معاك يناير حاضر
ادركناك في آخر ركعه…في آخر كلمة حق انقالت
وانت بتعدل عوج الدنيا المالت
أملناك ياصاحب عين الشمس
ورضيناك في المطرة الشالت .. شالت وختت
وكل ما شالت شالت شدره روحك بالنوار واتحتت
ولما الشمل وراك اتشتت طارت زي عصفورة وركت
فرحانه تردد غنواتك نزلت تقط في صورتك
شربت من نقاع الزير ورجعّت بترف في الصورة
هشيته ابت ما تطير خليتها أظنها من طيرك
بس يا صاحب كتر خيرك متصالح حتى مع الطير
لاهّد قوافيك الخوف لا الموت غير خط سيرك
وأهو لسه أنحن بنتونس
والشاي في النار مستعجل ليه
والونسه بتمسخ من غيرك .. خليك معاي الموت
ملحوق والشاي في النار ..أقعد بي جاي الشاي… الشاي
يا زول الشاي…
لمتين متيمم شطر النيل
متوقي اليابسه ووارد
متوكي الغنيه عصا موسى
بتهش في غيم الالفه الشارد
مهدود القدره وفترانه
حردان الضل البارد
بتوجل لي يوسف في البير
يطلع من بطن البير المارد !
* * *
فات الكان بدينا احساس بالالفه
وكان رواينا
فات الباكي جرحنا وناسي جرحو
ولافي ورانا مدينه.. مدينه
فات الصاحي ونحن نغط
في النومه السابعه
طالق حسو ولا حسينا
حتحت فينا غناه الطاعم
وفات قنعان من خيرا فينا
سلامات يازول يا رائع
سلامات عوافي
سلامات يا خلاصة الخير الفي الناس
وترياق الزمن المتعافي
سلامات يا زول يارائع
سلامات عوافي
محاصر فيك
بسأل عن سكه تطلع منك
او سكه تودي عليك
بسأل عن مخرج منك وليك
زي نهر بينبع
وما لاقي مصب
بتمدد عشقك من اقصى ضواحي الروح
لي اقصى نواحي القلب
يتكثف بسعة اطلاق الرب
وانا كنت بتفلي القلب بسيرتك
سميتك حلاب الغيم
من ضرع الجدب
وظنيتك مارست الفعل السري
وحفظت فحولة النيل
أيام الخصب
ولمحتك وانت بتمشي
وترقص في حمامك
علي حمة ايقاع الحرب
وتكتل جلد الكلمه الحافه
لحبيبه بتفتح مجرى الغنا في الدم
وتفلس بيبان القلب
فيا بنوت الشارع الطاعم
قومن كب!
قومن للما قصر
في غناكن ضمه
ولا لإتلوم بواركن تب!
ولو تبقى السكه الماشه طشاش
ما تبقى السكه الجايه ضهب
وسلامات يا زول يارائع
البارح عصفورتك
ركت في البال
رقصت
وادت عصفور الريد شبال
وطارت من قولة كر
ما الزول النهر العصفورة
بحرض في كلاب الحر
لابسني وداخل في اللحم الحي
راصد كل البسأل عن حالي
حرش ضلي علي
ونتف زغب الخاطره التخطر علي بالي
ومنع العصفوره تحوم
استجوب كل الناس البجو في النوم
ما تقوم!
يا زول يا رائع ومهموم
يامضيع ضي عيني وراك
واقف
حاحاي للنوم
يا مستف رئة الدنيا شهيق
ومشحتف روح الخرطوم
كيف حال يا بوي
كيف حال يا خال
وتعال
***
اتفضل علي باحة بيتنا الطيب!
ماعون الاطفال
ضمد جراحاتك تعال!
من ضلاماتك تعال!
من حافة البرزخ تعال!
من شرفة الملكوت – تعال
ادينا هينين من صبر
السكه ابعد من مشيك
والجرح اعمق من حدود الاحتمال
السابله والاطفال هناك
قدامك المشوار طويل
والريح وراك
كل البيوت
اتشرفت لي طلعتك
والونسه ما كملت معاك
القرقراب والقهقه
مين سمى ترحالك غياب ؟!
والغيبه بتزيدك بها
لو يرتق الحزن المصاب
كان بعدك الموت انتهى
يا اقصى حالات الحضور المشتهى
يا منتهى
تعال قرحنا بي دهشة غناك الحي
وحي من جرحك الدامي
وفتر حيلك
وحي من ضلك الرامي
وحمل شيلك
تموت متل الشدر واقف
تموت واقف علي حيلك
فيا حليلك
ياحليلك .. بنستناك
علي صهوة جياد الرياح
بنستناك
في الزمن اللديح القيح
علي باب الحلم في غناك
بنستناك
رحيلك شهلت الدنيا
ورتب العالم البهناك
بستناك
وانا تاني وراك شن لاحق
دهستني في بعدك
حدو الخوف
الداخله علي بالساحق
اديني القدره التمنحني
بحجمك سعة الشوف
لو اقدر اطل من شاهق
لو اقدر الوح لعيونك
تلمحني
وانا ضعفي امامك فاضحني
سامحني
ما قدرت اطولك
سامحني
شفتك من وجع طالع
علي برزخ ملتقي النيلين
كنت هناك وحيدك
وكل الناس اتنين .. اتنين
براك واقف
في حد السيف
براك الما وقف بين .. بين
تغازل حلمك الفارع
فتح بابين علي الملكوت
تسلم خواتم عمرك اليانع
تسلم علي حضرة جلال الموت
وتفتح في الارض نفاج
اذا امتلأ الفراغ بالصوت
فيا باطن الديم افتح
براحات الحنين مشرع
وانده لي مدن شاخت
انده لاطلال القرى الراحت
بيوت في بيوت
تمرق من شبر مسرح
مدن فاضله
وعالم باتساع الحلم
بقامة يشتهي التابوت
فما لفظ البحر يونس
ولا انسدت
شهية الحوت .. ويا زول يا رائع تمشي
بالحسره وتموت؟
وسلامات يازول يارائع
| |
 
|
|
|
|
|
|
|
 Re: من كان يعشق مصطفي.. فان مصطفي قد مات.. ومن كان يعشق فن مصطفي .. ففن مصطفي حي لم يمت.. (Re: rani)
|
الاخ الرائع رانى
لك التحية والشكر وانت تاتينا فى كل مرة بأحدى روائع لهذا الانسان الوطن
وكانت روعة هذه المرة هو الرجل الشفيف والانسان الاستاذ ازهرى محمد على
لقد كنت سعيد الحظ بحضورى لهذا اليوم الذى اقامه منتدى شموس الثقافى السودانى
فى القاهرة فى 2003 . كما اسعدنى الحظ ايضا فى ان اكون من ضمن اول المستمعين للجزءالاول
لاروع ماكتب صديقنا واستاذنا ازهرى محمد على ( سلامات يازول يارائع ) وكان ذلك فى الحصاحيصا
وذلك قبل وفات الاستاذ مصطفى سيد احمد .
فالتحية لك رانى
والتحية الى صديقى واستاذى ازهرى محمدعلى
والتحية ايضا الى روح صديق الانسانية استاذنا مصطفى سيد احمد
فات الكان بدينا احساس بالالفه
وكان رواينا
فات الباكي جرحنا وناسي جرحو
ولافي ورانا مدينه.. مدينه
فات الصاحي ونحن نغط
في النومه السابعه
طالق حسو ولا حسينا
حتحت فينا غناه الطاعم
وفات قنعان من خيرا فينا
سلامات يازول يا رائع
سلامات عوافي
سلامات يا خلاصة الخير الفي الناس
وترياق الزمن المتعافي
سلامات يا زول يارائع
سلامات عوافي
| |
|
|
|
|
|
|
| |
rani
Kostawi
mahdy alamin
Elmosley
الواثق تاج السر عبدالله
راشد يحى مدلل
حسن النور محمد
فيس بوك
تويتر
انستقرام
يوتيوب
بنتيريست