مرثية وعزاء في وفاة المغفور له الحاج بشير النفيدي رحمه الله
والد الملوك الكُـمَّلْ الْ للعـشير ماهمَّلْ حليلو فارقنا ما قـدِرنا نـِتحَـمَّل لـكن بـِنِـتـْجَـمـَّل حليلو --------------- نزلن دموع العين سارفات علي الخدين سمح الطباع الزين كم حلَّ ناس من دين حليلو ---------------- ال للأهــل نفـَّاع ال للضُعَـاف رَفـَّاع فارقنا غير وداع خـلَّ الدَّمـِع نـبـَّاع حليلو ----------------- باكيات قلوب الناس لـ طيب الأحساس ال للمكارِم ساس ود حمزة والعباس حليلو ---------------- نبكي النهار والليل والعين مِجَدِولَة سيْل تِلْبي اللَّزُوم للشيل ال بيـه عـِدْلْ الميـل حليلو --------------- ببكي القلب مجروح ياحليل صديق الروح الناس حزينة تنـوح من ال بقـت (يانـوح) حليلو --------------- الصايـم الصَّـلاى ال للضُّعَـاف رتـَّايْ الأبـلَـجْ العـطَّـاْي الْ للعروض غطـَّاي حليلو -------------- نبكي ودموعنا تسيِل للبـسنـد ال بتمِيِل أستاذ عموم الجِيل ال كـفو بحَرْ النِّيلْ حليلو -------------- نبكيك حُزُنـَّا شديد ؤ جروحنا دون تعديد الصافي طاهر الأيد في القاسية رايو سديد حليلو -------------- يا ال للرجال بتقود الراي عليك معقود سلطان ملوك الجود ال للوطن مفـقود حليلو ---------------
يوم السفــر فـُتـُّو وَالومِي ما عُدتـُو لا جِيِتُو ودَّعْـتُو لاشوفِي مَتـَّعتـُو حليلو ------------- نبكيك بكي الحَزْنَانْ ياال حَاشَا مَاكْ مَنـَّان قلبك مليتو حنان لـ كافة الإنسان حليلو --------------- ببكيك بكا المضيوم يا ال عابد القيوم قلبي الحزين مهموم والعين مجافية النوم حليلو -------------- رحل النفيدي الحر صاحبي البـِزيل الضُّر فارس الخيول الغُر لا بْكِـل ولا بـِفْتــُر حليلو ----------------- اسد الكجاجة المُر ال في العرين بنـتـُر وكتين جبينو يصُر منو الرجال بتر حليلو ----------------- للأقربين والغير ياحليل بشير الخير صاحبي ال بزيل الضير لـ ربو جد السير حليلو ---------------- كم صام ؤكم صلي وكم أدي ما خل ما اتفوجج اتعلي فاكـِّيـها لـ اللَّه حليلو ---------------- يا معمر السودان يا طاهر الأبدان الكل عليك نكدان في البادية والأمدان حليلو ---------------- بـ كفك الميمون كل النجاح مضمون بترولناعم الكون والخير نبع لون لون حليلو ---------------- بـ كفك السواي واللإجتهاد والراي بترولنا خبرو معاي عم البلد جاي جاي حليلو ----------------
بنـَّيتْ مساجد كمْ ؤكـفـلت كم يـُتـَّم بـ جودك الحتـَّم كل النـَّقـَص بنتم حليلو
يا الخضَّتَ كل مجال ؤحسمت كل سجال متـسـطـرة الآجـال تبكيك رجال ؤرجال حليلو ---------------- أسد الخلا الكفات لاجية لا شوفات وآ لومي يومو الفات بي بـِعدَن الخطوات حليلو ------------------ أسد الخلا ابو زنود فوقو الحمل مسنود فارس الكرم والجود ال للقبيلة بقود حليلو --------------- ياصاحبي طبع الموت ما منو شفعة وفوت منذ الأزل مثبوت شمل الجميع مشتوت حليلو ----------------- يا صاحبي وينك لي تنظر تشوف البي قلبي الحزين قال لي الموت مصير الحي حليلو ---------------- يا ال ماك يخيل،حاشاك درب الكرم ممشاك توب القبول يغشاك من ربك الأنشاك حليلو -------------- يا ال للأهل واصال عطاي ؤماك فاصال بالمدة كفك صال خربانة يا ابو وصال حليلو -------------- نسأل اله الكون ال فضلو ما ملكون الرحمة وين ماتكون ليك تبقي دار ؤسكون حليلو ---------------- رب العـبـاد يوم راد واتحـدد المـيـعاد كان العمر بنزاد تـفـديـك بـلاد ؤبلاد حليلو
احمد عبد اله البنا( الفرجوني) اريزونا مدينة فينكس في6 مايو 2005
فقد السودان بوفاة رجل البر والاحسان المغفور له بأذن الله الحاج بشير النفيدي رجل ذو هامة عالية وايادي كثيرة وبحر من العطاء انار الله قبره وجعله روضة من رياض الجنة فالرجل لا يذكر والا تذكر بجانبه المفاضل والمكارم .... فاغمد عينك هنيئا قرير العين فانت عملت لمثل هذا اليوم وتغمدك الله برحمته الواسعة والعزاء موصول لاسرتك الكريمة هنا وهناك . فقد كتب الشاعر احمد عبدالله البنا ( الفرجوني ) هذه المرثية معبرا عن هذا الفقد الجلل وقد اوفى ما اوفى .... ونعدكم ان نقدم لكم هذه المرثية بصوت الفنان الفرجوني في القريب العاجل ..... فله مني الشكر والتقدير والتجلة .
05-15-2005, 02:53 PM
ود محجوب
ود محجوب
تاريخ التسجيل: 04-22-2003
مجموع المشاركات: 7643
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة