|
|
 كنا فى حفلة ليلة .........تآآآآآآآآآآآآآآآآآآآآآآآآآآنى
|
كنا في حفلة ليلة البوست دا (مكيفنى ) لأنو كان على المكشوف وبالبلدي والعامي البسيط لا غلطنا فيه على مان ولا (مانه ) ولا دقشنا لينا حزب ولا جماعة ولا جمهورية وبس سردنا فيهو تفاصيل مشاهد أبطالها شباب الحلة (تجه وشركاءه ) والحق ان (كنا فى حفلة ) رأيت أن أعيده لعده اعتبارات موضوعية أول تبادي لأنو الدنيا قبايل عيد وفرح وكدا وتانى حاجه الدنيا سلام وراس سنة – فات منها مش كمطاشر يوم كدا – ووعشان كدا يا جماعة الخير والايمان قررت ان نعيد ليكم البوست دا وطبعا فى طبعه منقحة وجديدة مناسبتها الاساسية ايضا انو (وليد تعريفه ) حيدخل القفص الذهبى والنصيحة الزول لمو فيه جمهرة من عتاة (العزابة ) زى عبد المنعم تيمور وحسن سلك وديل دفعتهم هسه ماسكة هيئة اركان الجيش ديل شبكو المسكين (عاك عاك ) وانسى وامرق روحك و(ابعد عن الشر وغنيلو ) ومالك ومال القراية ام دق وقعدو يعددو ليهو فى محاسن العزوبية (تجى على كيفك ) وتمرق لا تخشى سوى الله وبوائق سائقى (الاتوس ) والامجاد وكفاوى الركشات ، وما بتكون ملزم بنسيتك الماتت ولا اخت مرتك الفى المستشفى ولا خال عم ابو مرتك الاتوفى فى (جاربوك ) الشمال ام صفقا وطرقا عراض ! وعاوزين النصيحة (تعريفة ) قرب يمشى لناس بيتهم ويقول ليهم فى موضوع العرس دا (باص ) وانو حيرجع (بلد الغربة ) والله كريم بعدين والخلى صاحبنا يقرب ينط انو فى زولا من شلتنا كان زمان مثال الاناقة والحضور و(الوجاهة ) ، الله يديهو العافية وكانت عربيتو كريسيدا لمن كان للكريسيدا شنة ورنة قبال ما تجى افواج السيارات التترية والكورية وتبقى ماسكة الفرملة لانها ما مرغوبة فى السوق وسوقها (جارى هواء ) ولو اشتريت واحدة وركبتها وجيت تفكها فى دلالة بانت الجنب بيت الضو حجوج ولا دلالة الصحافة او (المريديان ) بتكون ركبت (الفيل ) لا مؤاخذة والله معاك وبتجيب ليك بس (حق رقشة ) خالية ترخيص وعاوزة جوكى بتاع مجازفات وبالمناسبة شفتو البلد ناسها بقت مفلهمة كيفن المريديان بكل جلالة قدروا بقى (قراش ) دلالة ضاجة بالحركة وسوقها مدور طوالى رغم انو المريدان زمان محل راحات للناس المروقة ومرطبة لكن هسة (وين ) المسالة بقت عادى حتى انا المعولق دا مرات بيكون جيبى دافى بخش من (الكافيه نت ) بتاع فندق المرديان برمى لى بوستين تلاتة وبمشى ! اها كنا بنقول شنو ... ايوا زولنا الكان قيافة وفايت الناس لطافة (ابو كرسيسدا ) دا يا جماعة قام عرس ... نصيح والله بس براهو كدا خشت راسو وقام عرس ... ياخ من استلم (مرتو ) تانى بقينا نشوفو من الجمعه للجمعه ولو لاقيناه فى الشارع يا ماشى شايل (جك ) عاوز يجيب فوووووووووووول يا شايل الشافع موديهو التطعيم يا بسخن فى العربية ماشيين بكا يا لقريبتهم فى المستشفى ، ياخ الزول حتى (فردنا) فى مدرج دار الرياضة بامدرمان فقدو وكنا بنقعد جنب ناس (نمل فى نمل ) وعمك افرو واستاذ سنوسى وواحد من ناس امبده جنو يشتم فريق (ابوعنجه ) الناس ديل كلهم فقدو صاحبنا العريس ... يا جماعة وين صاحبكم الوجيه داك البيشبه متوكل كمال كان هذا السؤال يثير غيظى وحنقى لكننى كنت الوذ بان اضعه فى خانة حسن النوايا قلنا ليهم يا اخوانا الزول عرس وهسة فى شهر العسل ...... ايوووووووووووى الزغاريد قجت والمدرج دا فجاة لقينا فيهو فنان وزول بتاع بنقز والحلاوة – مرقت من وين ما عارف – ومبروك مبروك ......... ناس دار الرياضة حكاية دسمة ومطولة من الامتاع وعندهم بوست خصوصى منى خطييييييييييييييييييييييييييييييير ... عجيب مره واحده وبنزل قريب .
اها دا طبعا كلو احتفالا بصاحبنا العرس وبالمناسبة الزول هادى وحليون بس لمن يخش دار الرياضة من قولة تيت بفقد المنطق وببدا بانو يدردم سفه غريبه خالص ووراها طوالى ثانية ثم ثالثة يستبدلها مع اية هجمة ضائعة او كوره مرقت اوت من فريقو المفضل (الاحرار ) والغريبة انو ما بيسف الا فى دار الرياضة ويوم كوره الاحرار !
اها مسعولين من العافية والخير اخدنا ليك كم شهر كدا صاحبنا الكان يجيك العطر ضارب قدامو خمسة ستة امتار والقشره رهيبة بقينا نلقاهو ليك زى ما قلنا بس يا طالع يا نازل وفقد كتير من بريقو الزمان وشوية شوية مسالتو باظت ووضح لينا انو العرس ما نفع معاهو وبقى كل ما نلقاه ونحن اصحابو يا زول مالك بس يقول (الحمد الله ) طبعا صاحبنا كتوم لكن حسينا بيهو والظاهر وقع فى مرا من (العوين ) البيسلو الروح وبيجبو للزول غضروف نفسي ديك ... الله يسامحها غايتو عزلت أطيب واحد فينا ، اها شلة العزابة ( تيمور وسلك ) لمو الزول دا مع وليد تعريفه عشان قال شنو يطممو بطن التانى من العرس ويطيروها ليهو فى راسو لكن تصدقو وليد جا مارق مقتنع ... قال عريسنا وصاحبنا داك قال ليهو عرس .... واتمرغ فى العرس ولو لقيت فى ليلة واحدة ادقشهن اربعة (صم لم ) والله يهنيك ويسعدك ... انا هسه مبسوط خالص ومرتاح لكن بس اصحابك ديل يا تجى معاهم فى الكوشتينة والكورة والفوارغ يا انت دقست والمره مسكتك !!!! امش عرس عرسك ...
اها بعد ما خلاص زالت حواجز والغام صاحبنا وليد ورجع العزابه العواجيز بغيظهم لم ينالوا شيئا جا دورنا نحن عشان شنو طبعا نوضب ترتيبات الحفلة اها قعدنا برانا قلنا نشوف حنعمل شنو وطبعا تجه الشليق ربط خشمو ودق صدروا قدام جمهرة من الناس قال (الفنان علينا ) وانا طبعا متخيل الفنانيين الجد جد بياخدوا قروش كدا يعنى (خمسمائه الف جنيه ) ننط نبالغ شوية (قول مليون ) لكن ما كنت داقس و(فاره ) تصدقو مشينا لخمسة فنانيين محترمين واساتذه كبار ... لقيناهم ليك سته مليون وسبعه والرقم والعداد رامى خايف اكتبو هنا البوره فى البنات تذيد لانو رقم يكتل ويخلى اى زول عاوز يعرس يشتت ويجرى بعيد اها راسنا ضرب قلنا نشوف ناس وفنايين اقل مشينا لواحد كدا انا اصلا مكجنو وما بطيقو لوجه الله كدا فتحتو لخشمو قال الحفلة وين وفى تصوير ولا مافى وما عاوز زول يسجل وما عاوز يبشر اى زول فوقى بعكاز ! اتحمقت قلت ليهو يا اخوى ما تمشى تغنى فى القسم بتاع (العاشره )... شنو مافى زول يبشر بعكاز انت فنان ولا حكايتك شنو ياخينا !
برجع ...باذن الله واواصل ........
|
|
 
|
|
|
|
محمد حامد جمعه
وليد محمد المبارك
saif massad ali
فيس بوك
تويتر
انستقرام
يوتيوب
بنتيريست