|
|
 آخـــــــــر العلاج الحضـــــــن !!
|
آخر العلاج الحضن
آخر العلاج الحضن
وآخرة نزيف الصب صباح
وكتين تشقق كل شموس هادي العيون السمحي
تيراب المحنات والصبر والذكری وأبواب الكفاح
وكتين تعود كل القماري الهاجري عشها بالسنين
تلقاهو زي ما كان قبيل لا أنة لا خوف لا جراح
والدنيي تقلع طرقتا الملياني بي سكن الممات
وكل الشوارع باقي نور
والله كل الناس حضور
الشهدا والقابضين علی جمر الحياة
مافيهن الغاب بالغلب ما فيهن الاتغابی فات
وطعم الليالي صفاح صفاح
وكتين تفيق كل العصافير في الغصون
علی صوت هتاف مطر الغنا النازل حداك
بالرغم من غيم السكون
يملا الحنين كل البيوت
وكل الهجاير تنكسر ترحل تفوت
كل السنين واياما فوق كتف الشهور
تقراك حصاد غربة ووفراق
لمة وضبايح واشتياق
وكل السبايط شوقا يتفدع تمور
عتمور ورا عتمور تجيك
كل القلوب الواسعة
وابيات القصايد والمسايد تشتهيك
وحتی الطنابير شطفت غنواتا بيك
وتلقاك واقف منتصب علی حيل سماك
قالداك
تواريخ من زمان راقدة ومرضرضة في الكتب
قالداك سحب
قالداك خطا الشهدا المشت مليانة بي ريحة التراب والشوق
ودمها لسة في كل الحيط مكتوبو موال البلد
اخر العلاج الحضن ياهادي البنية الام
وياهادي الجسارات الولد
آخر العلاج جمّام عشق هادي الصدور
ينزل يسيل لا حِسبي لا كم لا عدد
آخر العلاج الحضن يتلافي المسافة البين
مساديرنا وغناك
بين المسافرين في درب شوفتك زمن
زادن نجيمتين في سماك
عقبان جراب صبرا ميقن بالرجوع
تمتم وصاياك بالدموع خوفة يقولولك نفد
آخر العلاج خيل الليالي تخب تجيك
شالخي الصباح من توب ضلامات اللحد
آخر العلاج الحضن وكتين الجميع
الفاتو والجايين وحقا ماب يضيع
والقمري فوق نخل الغناوي يوج غنا
ويقدر يعلم حنو للعش الرضيع
يتقلدو في دارة هواك
ويغنوا ليك ويشيل سماك
أحد أحد
أحد أحد
أحد أحد
|
|
 
|
|
|
|
|
|
|
|
Re: آخـــــــــر العلاج الحضـــــــن !! (Re: أسامة معاوية الطيب)
|
Quote: آخر العلاج جمّام عشق هادي الصدور
ينزل يسيل لا حِسبي لا كم لا عدد |
اخي اسامة تحياتي يا رجل ودائما ما تدهشني لوحاتك واعمالك الموسيقيةالتي تسطرها لنا بحروفك المدوزنة وخيالك الجامح الجميل المختزل لكل صورالحب و الجمال واصالة وحضارة ابن البلد وحنان الوطن والتراب...
لله درك يا رجل .... ما اجمله من حب
بس المفردة دي جديدة مافي زوول جابها غيرك انت عندكم ساقيه هناك ولا شنو؟
| |
|
|
|
|
|
|
|
|
|
Re: آخـــــــــر العلاج الحضـــــــن !! (Re: تولوس)
|
تولوس
افتقدك منذ زمن طويل
واحن جدا عبرك لكسلا
بي حنين مهلك جدا لمطاعمها الشهية وهدأة التاكا الرومانسي حد الانفلات
كن معي حتى ابل اشواقا هناك اصبحت كسعن قديم يحتاج لرشة ماء حتى يستعيد ذاكرة حفظه لها
شكرا جدا
| Quote: بس المفردة دي جديدة مافي زوول جابها غيرك انت عندكم ساقيه هناك ولا شنو؟ |
لا اعتقد اني اول ولا حتى الزول المية الاستعمل كلمة جمام دي ولكنها دخلت الشعر ( الشايقي ) منذ زمن طويل ولكني لا استحضر مثالا دقيقا
بس يمكن اتذكر ليك بيت من شاعرنا كمال حسن محمد
غناها الفنان معاوية المقل
حرام باقي العمر ودع نسيب البينا للاعوام
خصام يا حبيب حرام عيد الفطر ايام
يا ريت يمر واحد متذكر البيت تحديدا والابيات الاخرى الوارد فيها الجمام
تحياتي جدا وشكرا على وسيم الاشادة
| |
|
|
|
|
|
|
| |
أسامة معاوية الطيب
fadlabi
Ibrahim Algrefwi
الجندرية
تولوس
فيس بوك
تويتر
انستقرام
يوتيوب
بنتيريست