|
Re: ست الكسرة فى بنى مالك بجده - توجد فتريتة ، دكوة ، ويكة ، كركدى , زيت سمسم ...الخ (Re: قرشـــو)
|
صدقت والله
الحالة بقت صعيبة ، ولما تصغر طرقة الكسرة فهى إنذار حقيقى بالخطر
والخازوق يا قرشو لما تنعدم الكسرة كلو كلو ، ناكل دوم؟؟؟؟
مرة يا قرشو ماش أجيب كسرة من الرويس
لما وصلت ست الكسرة جات عربية الشرطة (الجيب) والنسوان قامن يجارن من الشرطة
العسكرى شال الطبق كلو وختاهو فى الجيب ، أنا جيت وقفت جمبو
قال لى عايز شنو يازول؟
قلت ليه ياخ نحن كان ما أكلنا الكسرة الإنت شايلها دى بنموت عديل كده
تصور العسكرى قعد يضحك وأدانى الطبق كلو وسألنى إنت بتعرف المرة دى؟؟؟
قلت ليه ، ما بعرفها لكن بشترى منها ، أدانى الطبق وقال لى كلمها تانى ما تبيع هنا
واضطريت أنتظر مع الطبق لحدى ما ستها رجعت ، واليوم داك أدتنى الكسرة (ملح) ساى
| |
|
|
|
|
|
|
Re: ست الكسرة فى بنى مالك بجده - توجد فتريتة ، دكوة ، ويكة ، كركدى , زيت سمسم ...الخ (Re: يازولyazoalيازول)
|
الأخ الفاضل / هشام ـ يازولyazoalيازول
تحياتي و تقديري و إحترامي
أشكرك شكراًجزيلاً على هذه اللفتة الإنسانية .. و على لمسة الوفاء الحانية .. و على تضامنك الإيجابي مع هؤلاء الحجات العفيفات .. هولاء هن خالاتي .. و صاحباتي .. منذ أن عرفت الطريق إلى بني مالك .. حيث الناس و اللمة و ريحة الأهل الوطن .. عرفت فيهن البساطة و النقاء . و لمست فيهن معاني التضحية و الإيثار .. فكن جزءاً من برنامجي اليومي في كثير من الأحايين .. و بيني و بينهن حميعاً.. ود موصول و مزاح برئ و برنامج شبه يومي .. و كثيراً ما يستشيروني في شئونهن .. اليوم قرأت البوست صباحاً .. و كنت في بني مالك ظهراً .. و كعادتي في المزاح معهن فأجأت الحاجة / مريم ـ الظاهرة في الصورة ـ و أنا على فكرة بلدياتها فهي من مدينتنا الحبيية الأبيض .. ـ و الله يا حجة بختك لقيتيها !! ** بختي في شنو إن شاء الله خير ؟؟ ـ كيف يا حاجة قاعدة مقنقنة في الأنترنت وتقولي لي بختي في شنو ؟؟ ** الأنتر ني ـ هكذا قالتها ـ !! _ أآي الأنتر ني يعني عاملة لي فيها ما عارفة ؟؟ ** و حات نظري كلامك دا ما عارفة فيهو شي .. ـ يسلم نظرك يا خالة بس في واحد ود ناس كدا كتب عنكم كلام كويس خلاص و جاب صورتكم كمان يعني عمل ليكم دعاية مجان .. ** في الجريدة ؟؟ ـ في الإنترنت .. يعني حاجة كدة زي الجريدة و زي التلفزيون .. بختك لقيتيها .. ** و الله بارك الله فيهو بس ما يكون دا الزول اليومداك جا قال لينا أنا حأبلغ السفارة تجي تكشكم و توديكم السودان .. ـ دا منو دا ؟؟ ** و الله واحدن مجينين كدا مقابلنا بلا سبب ؟؟ يا ولدي أنحنا السودان مابينو في زول بيابى أهله لكن هو عارف المقعدنا جنس القعدة دي شنو ؟؟ ـ و يوديكم السودان ليه ؟؟ ** قال إتن قاعدات هنا جايبات لينا الكلامات .. هسة دي يا ولدي في ذمتك دي أنحنا كان ما مجبورين في زول بابى الراحة لي نفسو ؟؟ ـ الله يعينكم يا خالة لكن الزول المجنون دا ما تشتغلي بيهو الشغلة إنتي البتعمل فيهو دا و الله رجال ما بسووه .. ** الله كريم يا ولدي .. هكذا تحدثت مع حجة مريومةو تداخلت معنا حجة تمرة التي تجلس إلى جانبها ـ حتى في الصورة ـ بينما غابت عنا حجة هدية التي تجلس أقصى يسار الصورة ـ التي أشتري منها منذ أكثر من عشرة سنوات ـ و علمت أنها تراجع المستشفى اليوم لمتابعة العلاج من الجلطة التي أصابتها في رجلها ـ شفاها الله شفاءاُ تاماً ـ بسبب قعاد الدوكة .. فقل لي يا زول .. هل أحدثك أكثر عن صديقاتي .. خالاتي .. ستات الكسرة .. عن علاقاتي المتينة بهن جميعاً .. .. أم عن ذلك المجينين الذي ما درى أنهن أشرف و أنفع من أمثاله ؟؟
| |
|
|
|
|
|
|
Re: ست الكسرة فى بنى مالك بجده - توجد فتريتة ، دكوة ، ويكة ، كركدى , زيت سمسم ...الخ (Re: يازولyazoalيازول)
|
هشومة
كيف الغالي
اصعب موقف لما تجي ماشي فوقن أقول في نفسي اشتري منهن كلهن انشاء الله طرقة طرقة
شان مافي واحدة تاخد في خاطرا مني
انت عارف يا هشام عندهن درجة تعاون واشتراكية عالية جدا جدا
يعني الفكة تجيك في دقايق ..كل واحدة تطلع الفكة العندها شان يمشو الزبون
الكسرة كان كملت عند واحدة تجر صينية الجنبها تديك منها
بس انت عارف يا هشام حقو انت بالذات كرجل حنفولي وعمدة كسرة قديم تتبنى فكرة عمل مظلة لامهاتنا واخواتنا ديل
ياخي ديل بيقعدن في نص متر ضل
| |
|
|
|
|
|
|
|