|
أعملوا حسابكم من بكرة الجماعة حا يبدو يكضبوا
|
طبعا بكره هو يوم واحد ابريل ، وطبعا نحن السودانيين عندنا شوية (فلهمة) و (قرضمة) و (فلقصة) و (عنطزه) و (جعصصه) وحاجات كده قاطعنها من راسنا ، شعب أثر فيه الاستعمار وقعاد (الانجليز) معانا و (الأقباط) و (اليهود) و (الأغريق) و (ولاد الريف) و أثر الكنيسة ما زال واضح وقوى خصوصا فى الجنوب ، ورغم (فقرنا) و (عراريقنا) و (حواشاتنا) و (بكاسينا) و (رقشاتنا) و (سفنجاتنا) و (توب زراقنا) و (ودعنا) و (سعفنا) و (أباريقنا) و (قطع جمارنا) و (غنمنا) و (سبيلنا) ، رغم ده كلو ، تلقى الجماعة يوم واحد أبريل يستعدوا أكتر من أولاد جون زاتهم ، ويطلعوا ليك كضبات كده ، ما أنزل الله بها من سلطان ، ولما تلقى الواحد (ينخلع) من (الكضبة) ، تلقى الجماعة يقعدوا يضحكوا ، ويقولو ليك (يا داقس) الليلة واحد أبريل ، ما سمعتا بى (April Fool)
الله يفلفل راسكم
الناس فى شنو؟؟؟؟ والحسانية فى شنو؟؟؟؟
أذكر فى السنوات الماضية ، كمية من الكضبات كده ، على مستوى الجرايد ، وبعضها به من (البياخه) و (الأذيه) ما لم ينزل به الله سلطانا ، ويكون ليها آثار مدمرة ، عشان ناسنا جايطين الحكاية ساكت ، كعادتهم فى كل أمر ، لغاية ما يخرجوا عن طور (الفكاهة) أو (الطرفة) الخفيفة الغير مؤذيه ، فهل تفضلتم بأن تحكوا لنا بعض هذه (القنابل) البايخه التى حصلت سابقا ، أو التى حاتحصل بكره؟؟؟؟
|
|
|
|
|
|